1.á athdhearbhú nár cheart go gcúiteofaí dolúbthacht bhuiséadach leis an mbeartas comhtháthaithe ná go mbainfí ciorruithe de mar gheall ar ghéarchéimeanna, agus gur cheart dó, mar straitéis infheistíochta fadtéarmaí, réigiúin a chumasú chun aghaidh a thabhairt ar an aistriú tionsclaíoch, ar an aistriú teicneolaíoch, ar an aistriú éiceolaíoch, ar an aistriú fuinnimh, ar an aistriú digiteach, ar an aistriú sóisialta agus ar an aistriú déimeagrafach, agus iad a chomhchruthú; á chur i bhfios go láidir nach féidir leis an mbeartas comhtháthaithe na cúraimí sin go léir a chomhlíonadh ach amháin má tá sé leabaithe i gclár láidir cistiúcháin, agus á áitiú, dá bhrí sin, gur cheart beartas láidir comhtháthaithe le cistiú méadaithe a áirithiú i CAI iar-2027;

2.á mheabhrú go bhfuil dúshláin shonracha roimh na réigiúin is forimeallaí san aistriú i dtreo Aontas atá níos glaise, níos digitithe agus níos neamhspleáiche ar iompar a chumhachtaítear le hinnill dócháin, mar gheall ar a iargúltacht ón ngréasán ilchríochach;

3.á aithint go bhfuil dúshláin shuntasacha ag baint leis an aistriú glas agus leis an aistriú digiteach maidir le cuspóir an chomhtháthaithe eacnamaíoch, shóisialta agus chríochaigh, atá cumhdaithe sna Conarthaí; á chur in iúl gurb eol di an baol a bhaineann le méadú na n-éagothromaíochtaí réigiúnacha, doimhniú na n-éagsúlachtaí sóisialta agus le ‘leagan amach tíreolaíoch na míshástachta’ atá ag méadú, ós rud é go bhfuil éagsúlacht mhór idir réigiún Eorpach amháin go réigiún eile a mhéid a bhaineann leis na coigeartuithe riachtanacha is gá agus na tairbhí a d’fhéadfadh a bheith ag baint leis an dá aistriú, rud a chuirfidh leis na héagothromaíochtaí réigiúnacha sna blianta amach romhainn; á mheas nach mór don bheartas comhtháthaithe na fórsaí eacnamaíocha atá fabhrach do cheirtleán méadaitheach na ngníomhaíochtaí eacnamaíocha ardluacha in ionaid uirbeacha agus thionsclaíocha a shárú más mian leis an Aontas a sprioc maidir le comhtháthú eacnamaíoch, sóisialta agus críochach a choinneáil mar a chumhdaítear sna Conarthaí;

4.á chur i bhfios go láidir go mbeidh tionchar suntasach ar chomhtháthú eacnamaíoch, sóisialta agus críochach an Aontais ag na pleananna chun astaíochtaí GCT a laghdú 55 % ar a laghad faoi 2030 agus neodracht aeráide iomlán a bhaint amach faoi 2050;

5.á chur i bhfios go láidir a thábhachtaí atá sé aird bhreise a thabhairt ar na críocha a bhfuil sainiúlachtaí geografacha acu, amhail réigiúin thuaithe, oileáin, na réigiúin is forimeallaí, réigiúin shléibhtiúla agus réigiúin nach bhfuil an daonra chomh dlúth sin iontu, go háirithe iad siúd atá iargúlta agus ag brath go mór ar bhreoslaí iontaise nó deireadh a chur ar thionscail shonracha de réir a chéile;

6.á mholadh go láidir go n-áireofaí cuspóir sonrach beartais maidir leis an aistriú tionsclaíoch laistigh de bheartas comhtháthaithe AE tar éis 2027; á chur i bhfáth gur cheart don chuspóir sin neamhspleáchas straitéiseach na hEorpa a chur chun cinn agus aghaidh a thabhairt ar fho-iarmhairtí dúshlánacha na n-aistrithe glasa agus digiteacha agus gur cheart é sin a bhaint amach ar luas níos airde fós i ndlúthchomhar leis na húdaráis áitiúla agus réigiúnacha d’fhonn borradh a chur faoin bhfostaíocht le poist ardcháilíochta, athsciliú agus uas-sciliú oibrithe a chur chun cinn, go háirithe oibrithe atá faoi mhíbhuntáiste sóisialta agus oibrithe atá dífhostaithe go fadtéarmach, agus na hiarmhairtí diúltacha ar fhostaíocht agus ar fholláine shóisialta a mhaolú, trí thacaíocht a thabhairt do gheilleagair áitiúla, réigiúnacha agus náisiúnta agus iad a éagsúlú;

7.á mheas gur cheart do bheartas comhtháthaithe AE tar éis 2027 cur chuige níos difreálaithe agus níos spriocdhírithe a leanúint, ag comhlánú le húsáid critéar a bhaineann le hioncam chun leibhéal na tacaíochta a chinneadh chuig chritéir bhreise lena gcuirtear san áireamh freisin saintréithe réigiún agus na dúshláin shonracha lena dtugtar aghaidh orthu a bhaineann le hacmhainneacht fáis réigiún amach anseo, amhail an ráta dífhostaíochta i measc na hóige, an ráta dífhostaíochta fadtéarmaí, leibhéil na bochtaineachta, spleáchas ar phoist in earnálacha aistrithe agus infheistíocht sa taighde agus san fhorbairt, chomh maith leis an dídhaonrú, aosú an daonra, imirce daoine oilte agus an bhearna scileanna atá ann cheana;

8.á iarraidh go gcuirfí síneadh leis an gCiste um Aistriú Cóir (CUAC) sa chlárthréimhse tar éis 2027, ar cheart acmhainní airgeadais breise a thabhairt dó chun tacú le réigiúin atá ag brath go mór ar earnálacha a bhfuil claochlú domhain á dhéanamh orthu, amhail earnáil mótarfheithiclí, i bhfianaise an ghlanchaillteanais fostaíochta a mheastar a bheidh ann mar thoradh ar an aistriú mótarfheithiclí; á chur in iúl go bhfuil sí den tuairim gur cheart an síneadh sin ar CUAC a dhíriú ar leibhéal ainmníocht iomchuí na n-aonad críochach ar mhaithe le staidreamh (NUTS), go gcuirfí san áireamh sainiúlachtaí réigiúnacha, go bhfuil raon feidhme níos leithne acu ná CUAC atá ann faoi láthair, gur cheart é a cheapadh sa chaoi go bhféadfar freagairtí prasa a thabhairt ar dhúshláin a thiocfaidh chun cinn as an nua ar fud earnálacha agus tionscal éagsúil agus go ndéanfar é a chomhtháthú go hiomlán i Rialachán na bhForálacha Coiteanna bunaithe ar phrionsabail na comhpháirtíochta, an rialachais il-leibhéil agus an chur chuige áitbhunaithe; á iarraidh, thairis sin, ar Eurostat meastachán a dhéanamh ar an nglanchaillteanas fostaíochta in earnáil mótarfheithiclí a bheidh mar thoradh ar an aistriú glas agus digiteach;

9.á chur in iúl go dtuigeann sí gur cheart na táscairí seo a leanas a chur san áireamh chun go gcinnteofar ar cheart a mheas go bhfuil réigiún ag brath go mór ar an tionscal gluaisteán: rannchuidiú thionscal na ngluaisteán le OTI réigiúnach; sciar na dtáirgí gluaisteán in onnmhairí réigiúnacha; rannchuidiú thionscal na ngluaisteán le fostaíocht réigiúnach; agus rannchuidiú thionscal na ngluaisteán le hinfheistíocht iomlán T&F réigiúnach;

10.á iarraidh ar an gCoimisiún cleachtaí tuairiscithe a shimpliú, mar shampla tríd an gcur chuige ‘maoiniú nach bhfuil nasctha le costais’ a leathnú, i gcás inarb iomchuí, agus trí chothromaíocht a aimsiú idir an fócas ar thorthaí agus ar thionchair agus an fócas ar chaiteachas chun cur chun feidhme níos éifeachtúla a bhaint amach agus faireachán láidir a choinneáil ar úsáid na gcistí ag an am céanna; á mheas gur beart an-dearfach é ‘rogha costas simplithe’ agus á iarraidh ar an gCoimisiún agus ar na húdaráis bhainistíochta a chur i bhfeidhm a leathnú chuig tionscadail thionsclaíocha, ghlasa agus dhigiteacha;

11.á chur i bhfáth gur gá a áirithiú go gcaithfear go cothrom le micreaghnóthais agus gnóthais bheaga agus mheánmhéide (MFBManna) agus cuideachtaí meánchaipitlithe beaga i ndáileadh CSIE trí shimpliú a dhéanamh ar na céimeanna riaracháin is gá chun rochtain a fháil ar na cistí sin agus trí dhul chun cinn a dhéanamh i dtreo ‘prionsabal na haonuaire’ a chur chun feidhme go hiomlán, rud a chiallaíonn nach gceanglaítear ar shaoránaigh ná ar ghnólachtaí ach faisnéis chaighdeánach áirithe a sholáthar do na húdaráis aon uair amháin; ina theannta sin, aithníonn sí an ról bunúsach atá ag MFBManna san aistriú tionsclaíoch agus á chur i bhfáth a thábhachtaí atá sé a áirithiú go mbeidh siad rannpháirteach go gníomhach i dtionscadail, agus a ráthú go ndaingneoidh siad maoiniú leormhaith trí shásraí amhail cuibhreannais nó ionstraimí malartacha;

12.á aithint, in ainneoin go mbaineann tairbhí eacnamaíocha do na réigiúin uile leis an digitiú faoi láthair, go bhfuil deacrachtaí tromchúiseacha á gcruthú ag an aistriú digiteach do réigiúin bheagfhorbartha; ag cur béim ar a thábhachtaí atá sé infheistíocht a dhéanamh sa bhonneagar digiteach agus scileanna digiteacha a thógáil i measc an phobail i gcoitinne agus an lucht saothair, chun aistriú ó theicneolaíochtaí diansaothair go teicneolaíochtaí atá dian ar chaipiteal agus feiniméan a bhaineann le himirce daoine oilte a sheachaint; ag cur béim, ina leith sin, ar an ról lárnach atá ag institiúidí áitiúla, réigiúnacha, náisiúnta oideachais agus taighde maidir le moil nuálaíochta digití a threorú, agus aird á tabhairt ar chur amú an tsaineolais a eascraíonn as beartais réigiúnacha neamh-chomhordaithe;

13.á chur i bhfáth go bhfuil gá le tacaíocht shuntasach chun cabhrú le réigiúin agus iad ag dul i dtreo na digiteála agus chun spriocanna digiteacha a leagtar amach i gclár beartais 2030 dar teideal ‘Clár Beartais 2030 don Deacáid Dhigiteach’ a bhaint amach; á mheas, sa chomhthéacs sin, gur bealach amháin iad comhpháirtíochtaí poiblí-príobháideacha chun tacú le forbairt scileanna criticiúla agus feabhsuithe ar dheiseanna fostaíochta agus ar inoiriúnaitheacht na margaí saothair, chomh maith lena bhfeidhmíocht ó thaobh táirgiúlachta agus éifeachtúlachta de, rud a fhágann go bhfuil siad ina bpríomhthosca d’aistriú digiteach rathúil; á chreidiúint nár cheart dearmad a dhéanamh ar aon duine, gan beann ar a earnáil oibre, ar a chineál conartha, inscne, aoise nó suímh gheografaigh ar an mbealach chuig aistriú glas agus digiteach AE;

14.ag tabhairt dá haire go bhféadfadh dúshláin a bheith roimh earnálacha monaraíochta atá neamhchosanta ar iomaíocht dhomhanda, agus roimh na réigiúin atá speisialaithe ann, le linn an aistrithe ghlais, go háirithe má bhaineann iomaitheoirí idirnáisiúnta tairbhe as praghsanna fuinnimh níos ísle agus má úsáideann siad níos lú fuinnimh in-athnuaite; á chur i bhfáth go mbeidh ról suntasach ag costais an fhuinnimh inathnuaite sna dinimicí sin freisin;

15.á mheabhrú gur dócha go mbeidh tionchar díréireach ag réigiúin bheagfhorbartha le linn an aistrithe ghlais, go háirithe maidir le haistriú na hearnála iompair chuig réitigh dhícharbónaithe; á chreidiúint gur gá ionstraimí sonracha a bhunú chun tacú leis an slabhra luacha i gcomhthéacs an aistrithe éiceolaíoch d’fheithiclí agus, go sonrach, na hearnálacha leathsheoltóirí, ceallraí agus comhpháirteanna atá riachtanach do mhótair leictreacha, don tiomáint uathrialaitheach, don digitiú agus don nascacht;

16.á chreidiúint nach mór do dhícharbónú an iompair de bhóthar, lena n-éilítear claochlú shlabhra luacha iomlán thionscal na ngluaisteán agus deireadh a chur de réir a chéile leis an inneall dócháin faoi 2035, straitéis dea-phleanáilte maidir le ‘haistriú soghluaisteachta’ a leanúint agus ní mór don straitéis sin na hathruithe is gá a chur chun feidhme ar fud an tslabhra luacha ina iomláine, lena n-áirítear i bpróisis táirgthe, chun nach n-athlonnófar an táirgeadh lasmuigh de AE; á chur i bhfios go láidir, thairis sin, leis an straitéis sin, ba cheart go n-áiritheofar aistriú rianúil agus inghlactha go sóisialta do na hoibrithe agus do na cuideachtaí atá buailte, go háirithe iad siúd i réigiúin bheagfhorbartha agus réigiúin a bhfuil dúshláin dhéimeagrafacha nó chríochacha rompu; á chur in iúl go bhfuil sí den tuairim go mbeidh ról ag iompar dícharbónaithe d’iarnróid agus de bhus in iompar glan-nialasach amach anseo, agus gur cheart tacú leis trí phleanáil phoiblí fhadtéarmach trí bhonneagar iarnróid agus iompair phoiblí a leathnú;

17.á mheas gur cheart go n-áireofaí sa straitéis aistrithe soghluaisteachta sin plean mionsonraithe chun oibrithe a athsciliú agus a uas-sciliú, nó, i gcás inar gá, roghanna malartacha fostaíochta a chur ar fáil do dhaoine atá fostaithe faoi láthair in earnáil mótarfheithiclí; á chreidiúint gur cheart go mbeadh bearta sa phlean sin freisin chun láithreacht na mban san earnáil sin ina bhfuil ceannas ag fir a neartú agus chun lánpháirtiú daoine faoi mhíchumas san ionad oibre a chur chun cinn; á chur in iúl go bhfuil sí den tuairim, thairis sin, gur cheart go gcuirfí dreasachtaí agus tacaíocht ar fáil leis an bplean sin chun a áirithiú go bhfanfaidh gléasraí tionsclaíocha nua a eascraíonn as an aistriú laistigh de na réigiúin lena mbaineann, lena ráthófar a dtairbhí táirgiúla agus ar an gcaoi sin go gcoinneofar na héifeachtaí iarmharta sna réimsí sin; á mholadh go mbunófaí tionscadail thionsclaíocha inbhuanaithe lena dtabharfar chun críche na slabhraí soláthair ina n-iomláine sna críocha sin;

18.á iarraidh ar an gCoimisiún an togra is gá a chur ar aghaidh chun leanúnachas an tSásra um Aistriú Cóir a áirithiú agus go dtabharfar cistí leordhóthanacha agus breise dó chun tacaíocht a chur san áireamh do réigiúin atá ag brath go díreach nó go hindíreach ar an earnáil mótarfheithiclí agus ar na tionscail agus seirbhísí a bhaineann le páirteanna a sholáthar, go háirithe sa Chiste ábhartha um Aistriú Cóir atá príomhshruthaithe laistigh den bheartas comhtháthaithe, ionas gur féidir sineirgí agus éifeachtaí iarmharta a chur chun cinn le cistí agus cláir éagsúla Eorpacha chun aghaidh a thabhairt ar phróiseas an chlaochlaithe réigiúnaigh;

19.á mheabhrú gur minic gurb iad na húdaráis áitiúla agus réigiúnacha is mó a bhíonn freagrach as beartais a bhaineann le hoiliúint a chur chun feidhme, agus dá bhrí sin go bhfuil gné chríochach na mbeartas sin ríthábhachtach. á mheabhrú, chun na críche sin, a thábhachtaí atá acmhainneacht riaracháin chomhionann agus rochtain ar chistiú agus ar fhaisnéis i réigiúin uile an Aontais;

20.á mheas gur cheart go leanfadh na pleananna um aistriú cóir do réigiúin atá spleách ar an tionscal gluaisteán go comhsheasmhach cur chuige áitbhunaithe agus gur cheart do na húdaráis inniúla iad a bhainistiú ar bhonn phrionsabail na comhpháirtíochta agus an rialachais il-leibhéil;, agus comhar idir-réigiúnach agus trasteorann a dhreasú i measc na réigiún i mbun aistrithe; ag cur béim ar an bhfíoras, thairis sin, gur gá tús áite a thabhairt d’infheistíochtaí i gclaochlú éigeantach na hearnála, rud a chuirfidh ar a cumas oiriúnú do na caighdeáin feidhmíochta nua d'astaíochtaí, agus i gcláir athscilithe agus i straitéisí inbhuanaithe éagsúlaithe eacnamaíocha ar fud an tslabhra luacha ar fad chun aistriú rianúil agus cuimsitheach a áirithiú d’oibrithe agus do gheilleagair áitiúla agus réigiunacha;

21.á mheabhrú, maidir le haon chinntí straitéiseacha a dhéanfaidh monaróirí buntrealaimh chun aistriú i dtreo na soghluaisteachta leictrí, nó forbairtí teicniúla eile amhail tiomáint uathrialaitheach, digitiú agus feidhmeanna breise sábháilteachta i gcarranna, ós rud é gur cinnte go mbeidh éifeacht an tsíolaithe acu agus go mbeidh tionchar níos mó acu ar an slabhra luacha áitiúil agus réigiúnach;

22.á mholadh go ndéanfaí breithniú ar an rogha na pleananna aistrithe a chur chun feidhme trí chur chuige torthaí-bhunaithe a úsáid, lena gcuimsítear grúpa tionscadal a bheidh le déanamh ag tairbhí chun rannchuidiú le cuspóirí na bpleananna; á mheas, chun an treoshuíomh atá bunaithe ar thorthaí a shimpliú agus a threisiú, go bhféadfaí an bhainistíocht a bhunú go heisiach ar gharspriocanna, aschuir agus torthaí a comhaontaíodh roimhe seo idir an Coimisiún agus na húdaráis bhainistíochta; á chur in iúl go bhfuil sí den tuairim gur cheart go mbeadh rialú agus iniúchóireacht plean aistrithe teoranta i dtaobh cé acu an mbaineann sé nó nach mbaineann sé amach a gharspriocanna agus a spriocanna;

23.aithníonn sí a thábhachtaí atá sé tacaíocht a chur ar fáil do gach cuideachta sna hearnálacha atá ag dul i mbun aistrithe, agus béim ar leith á leagan ar MFBManna agus cuideachtaí meánchaipitlithe beaga, a bhféadfadh acmhainní teoranta a bheith acu chun an t-athrú is gá a bhaint amach; á chur i bhfáth a thábhachtaí atá cúnamh spriocdhírithe chun cabhrú le MFBManna agus cuideachtaí meánchaipitlithe beaga sócmhainní fisiceacha agus bonneagar fisiciúil a fháil, a uasghrádú agus a chothabháil, agus infheistíocht a dhéanamh i dtaighde agus i bhforbairt; ag cur béim ar an bhfíoras go bhfuil gá le cláir chistiúcháin thiomnaithe, tionscnaimh fothaithe acmhainneachta, malartú eolais agus dea-chleachtais agus cúnamh teicniúil atá saincheaptha go sonrach do riachtanais MFBManna agus cuideachtaí meánchaipitlithe beaga chun a áirithiú go ndéanfar iad a chomhtháthú go rathúil agus rannpháirtíocht i dtimpeallacht shíorathraitheach na hearnála;

24.á chur i bhfáth gur gá an bhearna infheistíochta i réimse T&F san Aontas a dhúnadh agus an sprioc 3 % de OTI an Aontais a infheistiú i T&D a bhaint amach;

25.á iarraidh ar na Ballstáit éiceachóras leormhaith agus cothrom a bhunú chun soghluaisteacht leictreach a rolladh amach i gcomhréir leis an rialachán maidir le bonneagar breoslaí malartacha a úsáid; á mheabhrú nach bhfuil coincheapa áirithe a oibríonn do limistéir uirbeacha indéanta ná leordhóthanach do limistéir thuaithe agus, á chur i bhfáth a thabháchtaí atá sé bonneagar breoslaí malartacha poiblí a sholáthar i réigiúin thuaithe, i réigiúin oileánacha agus iargúlta agus i réigiúin ina bhfuil dlús íseal daonra nach bhfuil cumhdaithe go leormhaith ag soláthraithe príobháideacha chun freastal ar riachtanais an daonra cónaithe agus na gcuairteoirí; á mheas, ina leith sin, gur cheart go mbeadh praghas na seirbhíse sin arna soláthar go poiblí iomaíoch le meánphraghas na seirbhíse a thairgeann soláthraithe príobháideacha; á mheas, chun na críche sin, gur gá creat beartais agus rialála don tsoghluaisteacht leictreach a fhorbairt bunaithe ar anailís dhomhain ar an staid atá dírithe ar phríomhdhúshláin an bheartais sin agus na deiseanna a shainaithint chun go n-éireoidh leis;

26.á iarraidh ar an gCoimisiún na cláir exchangeEU agus TARGET (cúnamh teicniúil le haghaidh aistriú chuig fuinneamh glas) a mhéadú chuig na réigiúin mótarfheithiclí atá i mbun aistrithe, chun malartú taithí agus torthaí a chur chun cinn idir réigiúin ina bhfuil meath ag teacht ar earnálacha eacnamaíocha, amhail gual nó móin, agus réigiúin ina bhfuil earnálacha claochlaithe amhail tógálaithe agus soláthróirí mótarfheithiclí; á chur in iúl go bhfuil sí suite de go bhféadfadh an chomhroinnt taithí sin, mar aon le cur chun feidhme na bpleananna aistrithe a fhaigheann tacaíocht ó chistiú CSIE, cabhrú le réigiúin mótarfheithiclí agus soláthraithe aistriú rianúil i dtreo gníomhaíocht atá neodrach ó thaobh na haeráide de a bhaint amach;

27.á threorú dá hUachtarán an rún seo a chur ar aghaidh chuig an gComhairle, chuig an gCoimisiún agus chuig parlaimintí náisiúnta agus réigiúnacha na mBallstát.