1.Jafferma mill-ġdid li l-politika ta’ koeżjoni la għandha tikkumpensa għall-inflessibbiltà baġitarja u lanqas ma għandha ssofri tnaqqis minħabba kriżijiet, u li, bħala strateġija ta’ investiment fit-tul, għandha tgħammar lir-reġjuni biex jindirizzaw it-tranżizzjonijiet industrijali, teknoloġiċi, ekoloġiċi, diġitali, soċjali u demografiċi u jsawruhom b’mod konġunt; jissottolinja li l-politika ta’ koeżjoni tista’ tissodisfa dawn il-kompiti kollha biss jekk tkun inkorporata fi programm ta’ finanzjament robust u għalhekk, isostni li għandha tiġi żgurata politika ta’ koeżjoni b’saħħitha b’aktar finanzjament fil-QFP ta’ wara l-2027;

2.Ifakkar li r-reġjuni ultraperiferiċi jiffaċċjaw sfidi speċifiċi fit-tranżizzjoni lejn Unjoni aktar ekoloġika, aktar diġitalizzata u anqas dipendenti fuq it-trasport bil-magna tal-kombustjoni, minħabba d-distanza tagħhom min-network kontinentali;

3.Jirrikonoxxi li t-tranżizzjonijiet ekoloġiċi u diġitali jippreżentaw sfidi sinifikanti għall-objettiv tal-koeżjoni ekonomika, soċjali u territorjali, li huwa minqux fit-Trattati; huwa konxju mir-riskju li jikbru d-disparitajiet reġjonali, li jiżdiedu l-inugwaljanzi soċjali u li tissaħħaħ il-“ġeografija tal-iskuntentizza”, peress li l-aġġustamenti meħtieġa mit-tranżizzjoni doppja u l-benefiċċji potenzjali tagħha jvarjaw ħafna minn reġjun Ewropew għal ieħor u se jżidu d-disparitajiet reġjonali fis-snin li ġejjin; iqis li l-politika ta’ koeżjoni jeħtiġilha tegħleb il-forzi ekonomiċi li jiffavorixxu agglomerazzjoni dejjem tikber ta’ attivitajiet ekonomiċi ta’ valur għoli fiċ-ċentri urbani u industrijali jekk l-Unjoni trid iżżomm l-għan tagħha ta’ koeżjoni ekonomika, soċjali u territorjali kif minqux fit-Trattati;

4.Jissottolinja li l-pjanijiet biex jitnaqqsu l-emissjonijiet ta’ gassijiet serra b’mill-inqas 55 % sal-2030 u l-kisba ta’ newtralità klimatika sħiħa sal-2050 se jkollhom impatti kunsiderevoli fuq il-koeżjoni ekonomika, soċjali u territorjali tal-UE;

5.Jissottolinja l-importanza li tingħata attenzjoni addizzjonali lit-territorji bi speċifiċitajiet ġeografiċi, bħar-reġjuni rurali, il-gżejjer, ir-reġjuni ultraperiferiċi, ir-reġjuni muntanjużi u r-reġjuni b’popolazzjoni anqas densa, speċjalment dawk li huma iżolati u dipendenti ħafna fuq il-fjuwils fossili jew industriji speċifiċi li qed jiġu eliminati gradwalment;

6.Jirrakkomanda bil-qawwa l-inklużjoni ta’ objettiv ta’ politika speċifika dwar it-tranżizzjoni industrijali fi ħdan il-politika ta’ koeżjoni tal-UE lil hinn mill-2027; jenfasizza li dan l-objettiv għandu jippromovi l-awtonomija strateġika Ewropea u jindirizza l-effetti sekondarji diffiċli tat-tranżizzjonijiet ekoloġiċi u diġitali u li dan għandu jinkiseb b’veloċità saħansitra ogħla f’kooperazzjoni mill-qrib mal-awtoritajiet lokali u reġjonali bl-għan li tingħata spinta għal impjiegi ta’ kwalità, jiġu promossi t-taħriġ mill-ġdid u t-titjib tal-ħiliet tal-ħaddiema, speċjalment ta’ ħaddiema soċjalment żvantaġġati u qiegħda fit-tul, u jittaffew ir-riperkussjonijiet negattivi fuq l-impjiegi u l-benessri soċjali, permezz tal-appoġġ għall-ekonomiji lokali, reġjonali u nazzjonali u d-diversifikazzjoni tagħhom;

7.Iqis li l-politika ta’ koeżjoni tal-UE lil hinn mill-2027 għandha ssegwi approċċ aktar differenzjat u mmirat, li tikkomplementa l-użu ta’ kriterji relatati mal-introjtu biex jiġi ddeterminat il-livell ta’ appoġġ għal kriterji addizzjonali li jqisu wkoll il-karatteristiċi tar-reġjuni, l-isfidi speċifiċi li jiffaċċjaw dwar il-potenzjal ta’ tkabbir futur, bħar-rata tal-qgħad fost iż-żgħażagħ, ir-rata tal-qgħad fit-tul, il-livelli tal-faqar, id-dipendenza fuq l-impjiegi fuq setturi ta’ tranżizzjoni u l-investiment fir-riċerka u l-iżvilupp, kif ukoll id-depopolazzjoni, it-tixjiħ tal-popolazzjoni, l-eżodu tal-imħuħ u d-distakk eżistenti fil-ħiliet;

8.Jitlob l-estensjoni tal-Fond għal Tranżizzjoni Ġusta (JTF) fil-perjodu ta’ programmazzjoni ta’ wara l-2027, li għandu jingħata mezzi finanzjarji addizzjonali sabiex jiġu appoġġjati r-reġjuni li huma dipendenti ħafna fuq setturi li għaddejjin minn trasformazzjoni profonda, bħas-settur awtomobilistiku, meta jitqies it-telf nett stmat ta’ impjiegi li huma mistennija minħabba t-tranżizzjoni awtomobilistika; huwa tal-fehma li din l-estensjoni tal-JTF għandha tkun iffukata fuq il-livell xieraq tan-nomenklatura tal-unitajiet territorjali tal-istatistika (NUTS), tqis l-ispeċifiċitajiet reġjonali, ikollha kamp ta’ applikazzjoni usa’ mill-JTF attwali, titfassal b’tali mod li tippermetti reazzjonijiet fil-pront għal sfidi ġodda li jirriżultaw f’diversi setturi u industriji u tkun integrata bis-sħiħ fir-Regolament dwar Dispożizzjonijiet Komuni abbażi tal-prinċipji tas-sħubija, il-governanza f’diversi livelli u l-approċċ ibbażat fuq il-post; jistieden, barra minn hekk, lill-Eurostat jistma t-telf nett ta’ impjiegi fis-settur awtomobilistiku li jirriżulta mit-tranżizzjonijiet ekoloġiċi u diġitali;

9.Jifhem li sabiex jiġi ddeterminat jekk reġjun għandux jitqies bħala dipendenti ħafna fuq l-industrija awtomobilistika, għandhom jitqiesu l-indikaturi li ġejjin; il-kontribut tal-industrija awtomobilistika għall-PDG reġjonali; is-sehem tal-prodotti awtomobilistiċi fl-esportazzjonijiet reġjonali; il-kontribut tal-industrija awtomobilistika għall-impjiegi reġjonali; u l-kontribut tal-industrija awtomobilistika għall-investiment totali reġjonali fir-R&Ż;

10.Jistieden lill-Kummissjoni tissimplifika l-eżerċizzji ta’ rappurtar, pereżempju billi tespandi l-approċċ ta’ “finanzjament mhux marbut mal-ispejjeż”, fejn xieraq, u billi ssib bilanċ bejn l-enfasi fuq l-eżiti u l-impatti u l-enfasi fuq in-nefqa sabiex tinkiseb implimentazzjoni aktar effiċjenti filwaqt li jinżamm monitoraġġ robust tal-użu tal-fondi; Iqis li l-“għażla tal-kostijiet issimplifikati” wriet li hija miżura pożittiva ħafna u jistieden lill-Kummissjoni u lill-awtoritajiet ta’ ġestjoni jespandu l-applikazzjoni tagħha għall-proġetti industrijali, ekoloġiċi u diġitali;

11.Jisħaq fuq il-ħtieġa li jiġi żgurat it-trattament ġust tal-intrapriżi mikro, żgħar u medji (MSMEs) u l-kumpaniji żgħar b’kapitalizzazzjoni medja fid-distribuzzjoni tal-FSIE billi jiġu ssimplifikati l-passi amministrattivi meħtieġa għall-aċċess ta’ dawn il-fondi u billi jsir progress lejn l-implimentazzjoni sħiħa tal-“prinċipju ta’ darba biss”, li jfisser li ċ-ċittadini u n-negozji huma meħtieġa biss li jipprovdu ċerta informazzjoni standard lill-awtoritajiet darba; barra minn hekk, jirrikonoxxi r-rwol fundamentali tal-MSMEs fit-tranżizzjoni industrijali u jisħaq fuq l-importanza li tiġi żgurata l-parteċipazzjoni attiva tagħhom fil-proġetti, u li jiġi ggarantit li jkollhom finanzjament adegwat permezz ta’ mekkaniżmi bħal konsorzji jew strumenti alternattivi;

12.Jirrikonoxxi li, minkejja l-fatt li d-diġitalizzazzjoni bħalissa għadha ġġib benefiċċji ekonomiċi għar-reġjuni kollha, it-tranżizzjoni diġitali qed toħloq diffikultajiet serji għar-reġjuni inqas żviluppati; jenfasizza l-importanza tal-investiment fl-infrastruttura diġitali u l-bini tal-ħiliet diġitali fost il-popolazzjoni ġenerali u l-forza tax-xogħol, sabiex issir bidla minn teknoloġiji li jirrikjedu ħafna ħaddiema għal teknoloġiji intensivi fil-kapital u jiġi evitat il-fenomenu tal-eżodu tal-imħuħ; jisħaq, f’dan ir-rigward, fuq ir-rwol ewlieni li għandhom l-istituzzjonijiet edukattivi u tar-riċerka lokali, reġjonali u nazzjonali fit-tmexxija taċ-ċentri tal-innovazzjoni diġitali, filwaqt li jinnota l-ħela ta’ għarfien espert li jseħħ minħabba politiki reġjonali mhux ikkoordinati;

13.Jenfasizza li huwa meħtieġ appoġġ sinifikanti sabiex ir-reġjuni jiġu assistiti fi triqthom lejn id-diġitalizzazzjoni u l-ilħuq tal-miri diġitali stabbiliti fil-programm ta’ politika tal-2030 intitolat “Perkors għad-Deċennju Diġitali”; iqis, f’dan il-kuntest, li s-sħubijiet pubbliċi-privati huma mod wieħed possibbli biex jiġi appoġġjat l-iżvilupp ta’ ħiliet kritiċi u biex jittejbu l-prospetti tal-impjiegi u l-adattabilità tas-swieq tax-xogħol kif ukoll il-prestazzjoni tagħhom f’termini tal-produttività u l-effiċjenza u li dan jagħmilhom fatturi ewlenin biex tirnexxi kwalunkwe tranżizzjoni diġitali; jemmen li ħadd, irrispettivament mis-settur tax-xogħol, it-tip ta’ kuntratt, il-ġeneru, l-età jew il-pożizzjoni ġeografika ma għandu jintesa fit-triq lejn it-tranżizzjoni ekoloġika u diġitali tal-UE;

14.Jinnota li s-setturi tal-manifattura esposti għall-kompetizzjoni globali, u r-reġjuni speċjalizzati fiha, jistgħu jiffaċċjaw sfidi matul it-tranżizzjoni ekoloġika, b’mod partikolari jekk il-kompetituri internazzjonali jibbenefikaw minn prezzijiet tal-enerġija aktar baxxi u jużaw inqas sorsi ta’ enerġija rinnovabbli; jenfasizza li l-kostijiet tal-enerġija rinnovabbli se jkollhom ukoll rwol sinifikanti f’dawn id-dinamiki;

15.Ifakkar li r-reġjuni inqas żviluppati x’aktarx li jiffaċċjaw impatt sproporzjonat matul it-tranżizzjoni ekoloġika, speċjalment fir-rigward tal-qalba tas-settur tat-trasport lejn soluzzjonijiet dekarbonizzati; jemmen li jeħtieġ li jiġu stabbiliti strumenti speċifiċi biex jappoġġjaw il-katina tal-valur fil-kuntest tat-tranżizzjoni ekoloġika għall-vetturi u, b’mod aktar speċifiku, is-setturi tas-semikondutturi, il-batteriji u l-komponenti li huma meħtieġa għall-muturi elettriċi, is-sewqan awtonomu, id-diġitalizzazzjoni u l-konnettività;

16.Jemmen li d-dekarbonizzazzjoni tat-trasport bit-triq, li tirrikjedi t-trasformazzjoni tal-katina tal-valur kollha tal-industrija awtomobilistika bl-eliminazzjoni gradwali tal-magni tal-kombustjoni sal-2035, trid issegwi strateġija ppjanata sew ta’ “tranżizzjoni tal-mobbiltà” u din l-istrateġija trid timplimenta l-bidliet neċessarju fil-katina tal-valur sħiħa, inkluż fil-proċessi tal-produzzjoni, sabiex tevita li l-produzzjoni tiġi rilokata lil hinn mill-UE; jissottolinja, barra minn hekk, li din l-istrateġija għandha tiżgura tranżizzjoni bla xkiel u soċjalment aċċettabbli għall-ħaddiema u l-kumpaniji affettwati, speċjalment dawk f’reġjuni inqas żviluppati u reġjuni li qed jiffaċċjaw sfidi demografiċi jew territorjali; huwa tal-fehma li t-trasport dekarbonizzat bil-ferrovija u bil-karozzi tal-linja se jkollu rwol fit-trasport b’emissjonijiet żero netti fil-futur, u għandu jiġi appoġġjat minn ippjanar pubbliku fit-tul permezz tal-espansjoni tal-infrastruttura tat-trasport ferrovjarju u pubbliku;

17.Iqis li din l-istrateġija għat-tranżizzjoni tal-mobbiltà għandha tinkludi wkoll pjan dettaljat għat-taħriġ mill-ġdid u t-titjib tal-ħiliet tal-ħaddiema, jew, fejn ikun meħtieġ, tipprovdi għażliet alternattivi ta’ impjieg għall-persuni li bħalissa huma impjegati fis-settur awtomobilistiku; jemmen li dan il-pjan għandu jkollu wkoll miżuri biex tiżdied il-preżenza tan-nisa f’settur maskulinizzat ħafna u li tiġi promossa l-integrazzjoni tal-persuni b’diżabbiltà fuq il-post tax-xogħol; huwa tal-fehma, barra minn hekk, li dan il-pjan għandu jipprovdi inċentivi u appoġġ biex jiġi żgurat li impjanti industrijali ġodda li jirriżultaw mit-tranżizzjoni jibqgħu fir-reġjuni kkonċernati, sabiex jiġu ggarantiti l-benefiċċji produttivi tagħhom, u b’hekk l-effetti konsegwenzjali jinżammu f’dawk iż-żoni; jirrakkomanda l-istabbiliment ta’ proġetti industrijali sostenibbli li jikkompletaw il-ktajjen tal-provvista kollha f’dawk it-territorji;

18.Jistieden lill-Kummissjoni biex tressaq il-proposta meħtieġa biex tiġi żgurata l-kontinwità tal-Mekkaniżmu għal Tranżizzjoni Ġusta u li jingħata fondi suffiċjenti u addizzjonali biex jinkludi appoġġ għal reġjuni li huma direttament jew indirettament dipendenti fuq l-industriji u s-servizzi awtomobilistiċi u tal-provvista tal-partijiet, b’mod partikolari fil-Fond għal Tranżizzjoni Ġusta rilevanti integrat fil-politika ta’ koeżjoni, sabiex is-sinerġiji u l-effetti konsegwenzjali jkunu jistgħu jiġu promossi b’diversi fondi u programmi Ewropej biex jiġi indirizzat il-proċess ta’ trasformazzjoni reġjonali;

19.Ifakkar li l-awtoritajiet lokali u reġjonali ħafna drabi huma responsabbli għall-implimentazzjoni tal-politiki relatati mat-taħriġ u li d-dimensjoni territorjali ta’ dawn il-politiki hija għalhekk ta’ importanza vitali; ifakkar, għal dan l-għan, fl-importanza tal-kapaċità amministrattiva ugwali u tal-aċċess għall-finanzjament u għall-informazzjoni fir-reġjuni kollha tal-UE;

20.Iqis li l-pjanijiet ta’ tranżizzjoni ġusta għar-reġjuni dipendenti mill-industrija awtomobilistika għandhom konsistentement isegwu approċċ ibbażat fuq il-post u għandhom jiġu ġestiti mill-awtoritajiet kompetenti abbażi tal-prinċipji ta’ sħubija u governanza f’diversi livelli, u jinċentivaw il-kooperazzjoni interreġjonali u transfruntiera fost ir-reġjuni li jkunu għaddejjin minn tranżizzjoni; jenfasizza, barra minn hekk, il-ħtieġa li jiġu prijoritizzati l-investimenti fit-trasformazzjoni meħtieġa tas-settur li jippermettulu jadatta għall-istandards il-ġodda tal-prestazzjoni tal-emissjonijiet tas-CO2, għall-programmi ta’ taħriġ, ta’ taħriġ mill-ġdid u ta’ titjib tal-ħiliet u fl-istrateġiji ta’ diversifikazzjoni ekonomika sostenibbli tul il-katina tal-valur kollha biex tiġi żgurata tranżizzjoni bla xkiel u inklużiva għall-ħaddiema u għall-ekonomiji lokali u reġjonali;

21.Ifakkar li kwalunkwe deċiżjonijiet strateġiċi meħuda mill-fabbrikanti tat-tagħmir oriġinali (OEMs) biex jaqilbu lejn il-mobbiltà elettrika, jew żviluppi tekniċi oħra bħas-sewqan awtonomu, id-diġitalizzazzjoni u funzjonijiet addizzjonali ta’ sikurezza fil-karozzi, inevitabbilment se jkollha effett kaskata u impatt fuq il-livelli aktar baxxi fil-katina tal-valur lokali u reġjonali;

22.Jissuġġerixxi li tiġi kkunsidrata l-għażla li jiġu implimentati l-pjanijiet ta’ tranżizzjoni bl-użu ta’ approċċ ibbażat fuq ir-riżultati, li jinkludi grupp ta’ proġetti li għandhom jitwettqu minn benefiċjarju biex jikkontribwixxi għall-objettivi tal-pjanijiet; iqis li sabiex tiġi ssimplifikata u msaħħa l-orjentazzjoni bbażata fuq ir-riżultati, il-ġestjoni tista’ tkun ibbażata esklużivament fuq stadji importanti, outputs u riżultati maqbula minn qabel bejn il-Kummissjoni u l-awtoritajiet maniġerjali; huwa tal-fehma li l-kontroll u l-awditjar ta’ pjan ta’ tranżizzjoni għandhom ikunu limitati wkoll għal jekk dan jilħaqx l-istadji importanti u l-miri tiegħu;

23.Jirrikonoxxi s-sinifikat li jiġi pprovdut appoġġ lill-kumpaniji kollha fis-setturi li għaddejjin mit-tranżizzjoni, b’enfasi speċjali fuq l-MSMEs u l-kumpaniji żgħar b’kapitalizzazzjoni medja, li jista’ jkollhom riżorsi limitati biex jiksbu t-trasformazzjoni meħtieġa; jisħaq fuq l-importanza ta’ assistenza mmirata biex l-MSMEs u l-kumpaniji żgħar b’kapitalizzazzjoni medja jiġu megħjuna jiksbu, jaġġornaw u jżommu l-assi fiżiċi u l-infrastruttura, u jinvestu fir-riċerka u l-iżvilupp; jenfasizza l-ħtieġa ta’ programmi ta’ finanzjament dedikati, inizjattivi ta’ bini tal-kapaċità, skambju tal-għarfien u tal-aħjar prattiki u assistenza teknika mfassla speċifikament għall-ħtiġijiet tal-MSMEs u l-kumpaniji żgħar b’kapitalizzazzjoni medja sabiex jiġu żgurati li l-integrazzjoni u l-parteċipazzjoni tagħhom fix-xenarju li qed jevolvi tas-settur, tirnexxi;

24.Jisħaq fuq il-ħtieġa li jingħalaq id-distakk fl-investiment fir-R&Ż fl-UE u li tintlaħaq il-mira li jiġu investiti 3 % tal-PDG tal-UE fir-R&Ż;

25.Jistieden lill-Istati Membri jistabbilixxu ekosistema adegwata u ekwa għall-implimentazzjoni tal-mobbiltà elettrika f’konformità mar-Regolament dwar il-varar ta’ infrastruttura ta’ fjuwils alternattivi; ifakkar li ċerti kunċetti li jirnexxu fiż-żoni urbani aktarx huma inqas fattibbli jew mhumiex biżżejjed għaż-żoni rurali u jisħaq fuq l-importanza li tiġi pprovduta infrastruttura pubblika ta’ fjuwils alternattivi fir-reġjuni rurali, fil-gżejjer u fir-reġjuni remoti u fir-reġjuni b’densità baxxa ta’ popolazzjoni li mhumiex koperti b’mod adegwat minn fornituri privati sabiex jiġu ssodisfati l-ħtiġijiet tal-popolazzjoni residenti u l-viżitaturi; iqis, f’dan ir-rigward, li l-prezz ta’ dan is-servizz ipprovdut pubblikament għandu jkun kompetittiv mal-prezz medju tas-servizz offrut minn fornituri privati; iqis, għal dan l-għan, li jeħtieġ li jiġi żviluppat qafas ta’ politika u regolatorju għall-mobbiltà elettrika bbażat fuq analiżi fil-fond tas-sitwazzjoni sabiex jiġu identifikati l-isfidi ewlenin għal din il-politika u l-opportunitajiet biex tirnexxi;

26.Jitlob lill-Kummissjoni Ewropea testendi l-programmi “exchangeEU” u “TARGET” (assistenza teknika għat-tranżizzjoni lejn enerġija ekoloġika) għar-reġjuni awtomobilistiċi fi tranżizzjoni, sabiex jiġi promoss l-iskambju tal-esperjenzi u tar-riżultati bejn ir-reġjuni b’setturi ekonomiċi li sejrin lura, bħas-setturi tal-faħam jew tal-pit, u r-reġjuni b’setturi li qed jittrasformaw ruħhom bħall-kostrutturi awtomobilistiċi u l-fornituri; jinsab konvint li l-kondiviżjoni tal-esperjenza, flimkien mal-implimentazzjoni tal-pjanijiet ta’ tranżizzjoni appoġġjati mill-finanzjament tal-FSIE, tista’ tgħin lir-reġjuni awtomobilistiċi u lill-fornituri jiksbu tranżizzjoni bla xkiel lejn attività newtrali għall-klima;

27.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni kif ukoll lill-parlamenti nazzjonali u reġjonali tal-Istati Membri.