1.á chreidiúint go láidir go rannchuidíonn an clár um Shaoránaigh, Comhionannas, Cearta agus Luachanna (CERV) ar bhealach ar leith le rannpháirteachas agus rannpháirtíocht shibhialta a fheabhsú ó thaobh ghné na gceart bunúsach de trí luachanna, idirphlé sibhialta agus saoránacht a chomhcheangal go héifeachtach, agus ag cur chun cinn ag an am céanna an chomhionannais shóisialta agus inscne, na héagsúlachta tríd an gcúnamh do chaomhnú na hoidhreachta réigiúnaí, na comhfhiosachta stairiúla agus an chomhraic i gcoinne an idirdhealaithe agus an fhoréigin; á chur in iúl gurb é a tuairim gur uirlis bhunriachtanach é clár CERV do thodhchaí an Aontais agus chun aghaidh a thabhairt ar dhúshláin shochpholaitiúla, amhail an bhearna eolais, an tEoraisceipteachas, laghdú ar an spás sibhialta, agus creimeadh an smachta reachta agus na dúshláin atá roimh an smacht reachta ar fud na hEorpa; ag spreagadh an chláir chun tacú le gníomhaíochtaí atá dírithe ar athléimneacht eagraíochtaí na sochaí sibhialta a fhorbairt, lena n-áirítear iad siúd atá dírithe ar an smacht reachta agus ar luachanna an Aontais;

2.á mheabhrú go bhfuil cur chun feidhme chlár CERV fós sna luathchéimeanna, ós rud é nár glacadh an rialachán lena mbunaítear an clár go dtí 2021; á thabhairt le fios, ar an gcúis sin, nach bhfuil ach líon beag tionscadal faoi Shraith 3 curtha i gcrích agus nach bhfuil mórán faisnéise ar fáil ó thairbhithe chun gur féidir torthaí a mheas go cruinn;

3.á iarraidh ar an gCoimisiún tosaíocht a thabhairt do bhailiú sonraí maidir le clár CERV, go háirithe maidir le grúpaí faoi mhíbhuntáiste, lena n-áirítear pobail imeallaithe, mionlaigh, agus pobail leochaileacha chun aghaidh a thabhairt ar na dúshláin uathúla atá rompu agus chun taighde ar a dtaithí a chur chun cinn; á áitiú gur gá sásraí láidre faireacháin agus meastóireachta a bhunú; á chur i bhfios go láidir go mbeidh an cur chuige sin úsáideach chun bonn eolais a chur faoi fhorbairt beartais, chun rannpháirtíocht fhóinteach na ngrúpaí faoi mhíbhuntáiste i dtionscnaimh rannpháirteachais shibhialta a áirithiú agus chun a nguth a ardú, agus chun clár níos ionchuimsithí agus níos cothroime a chruthú agus meastóireachtaí níos fearr amach anseo á n-áirithiú ag an am céanna i gcoitinne;

4.á chur i dtreis go raibh roinnt dúshlán roimh an gclár lenar cuireadh bac ar chéimeanna tosaigh a chur chun feidhme, ar thosca seachtracha iad a lán acu, amhail paindéim COVID-19 agus cogadh foghach na Rúise in aghaidh na hÚcráine, agus gur chuir siad sin isteach go mór ar chearta na saoránach agus ar rannpháirtíocht na saoránach sa daonlathas; ag tabhairt dá haire, áfach, tar éis tús mall gur cuireadh dlús lena chur chun feidhme, agus go bhfuil an clár ag feidhmiú go maith anois; á thabhairt chun suntais, thairis sin, nach mór feachtais feasachta a eagrú chun dul i gcion ar phobal níos leithne, ó cheantair thuaithe go háirithe;

5.á chur in iúl gur cúis imní di gur cosúil go bhfuil úsáid agus tabhairt isteach uirlisí digiteacha nua chun cistí an Aontais a chur chun feidhme (e.g. uirlis eGrants) ina príomh-shaincheist do thairbhithe ó thaobh fhorbairt an chláir de; á chur in iúl gur oth léi go raibh de thoradh ar nósanna imeachta casta gur cuireadh bac freisin ar rannpháirtíocht eagraíochtaí níos lú nach bhfuil an t-am agus na hacmhainní is gá acu chun dul tríd an bpróiseas iarratais laistigh de na tráthchláir shocraithe; á mheas go bhfuil de thoradh ar dhearadh na n-uirlisí sin go gcuirtear teorainn le cumas an chláir dul in oiriúint d’fhorbairtí nua agus do riachtanais athraitheacha; á iarraidh go gcuirfí deireadh leis na hualaí riaracháin agus go simpleofaí na próisis maidir le cur i bhfeidhm, conraitheoireacht agus tuairisciú; á chur i bhfios go láidir go n-áirítear freisin le simpliú na gceanglas riaracháin próiseas iarratais níos éifeachtúla agus níos solúbtha d’eagraíochtaí a bhfuil comhaontuithe comhpháirtíochta creata ilbhliantúla sínithe acu, agus freisin chun coinne a bheith acu le forbairtí beartais; á chur i bhfáth, thairis sin, gur gá an tairseach iarratais a dhéanamh níos soláimhsithe, d’eagraíochtaí ar mhionscála go háirithe, agus a áirithiú go ndéantar na doiciméid uile a bhaineann leis an nós imeachta a aistriú go teangacha uile an Aontais chun rannpháirtíocht ó na Ballstáit uile a leathnú agus chun éagsúlacht chultúrtha a áirithiú;

6.á chur in iúl gur saoth léi nach bhfuil sé d’oibleagáid ar na Ballstáit pointe teagmhála náisiúnta (PTN) do chlár CERV a chur ar bun lena dtairgtear comhairle neamhchlaonta, faisnéis chabhrach agus tacaíocht d’iarratasóirí, do pháirtithe leasmhara agus do thairbhithe, lena n-áirítear cúnamh leis an bpróiseas iarratais, agus faisnéis shothuigthe i dtaobh thorthaí an chláir á comhroinnt ag an am céanna; ag tabhairt dá haire gur oth léi nach raibh PTNanna ach ag 20 Ballstát faoi mhí an Mheithimh 2023;

7.á chur in iúl gur cúis mhór bhuartha di go bhfuil tionchar ag rátaí boilscithe reatha ar na costais reatha atá le seasamh ag tairbhithe CERV; á chur in iúl gur oth léi go bhfuil dúshláin roimh thairbhithe maidir lena ngníomhaíochtaí pleanáilte a chur chun feidhme, go háirithe maidir leis na costais aonaid do liúntais taistil, chóiríochta agus lae, agus go bhféadfadh sé go mbeadh orthu cuid de na gníomhaíochtaí a bhí beartaithe acu ar dtús a ghearradh siar chun fanacht laistigh den bhuiséad;

8.á iarraidh ar an gCoimisiún an Grúpa Idirphlé Sibhialta a bhunú chun idirphlé rialta, oscailte agus trédhearcach a áirithiú chun an t-idirphlé sibhialta a neartú sa chlár trí chéile ar bhealach a thacóidh le próiseas dhá threo idir institiúidí ar gach leibhéal agus na geallsealbhóirí ábhartha uile, go háirithe ESSanna, agus mar chuid de chur chun feidhme Airteagal 11 de Rialachán (AE) 2021/692, chomh maith le hidirphlé sibhialta a úsáid mar uirlis rialachais agus tosaíochtaí a chinneadh don chlár oibre dhá bhliain agus gné chomhchoiteann an rannpháirteachais shibhialta mar ghné chriticiúil den daonlathas agus den smacht reachta a chur chun cinn tuilleadh; á mheabhrú, i ndáil leis sin, gur cheart gníomhaíochtaí nuálacha a chur chun cinn chun tacú le hidirphlé leis an tsochaí shibhialta, lena n-áirítear d’fhonn cultúr comhpháirtíochta le deontaithe a chothú atá bunaithe ar mhuinín; á iarraidh, go háirithe, go ndéanfar gníomhaíochtaí forbartha acmhainní chun tacú le rannpháirtíocht leathan na sochaí sibhialta, go háirithe trí naisc le scéimeanna cistiúcháin eile a chuirtear ar fáil trí bhainistíocht chomhroinnte, amhail an ionstraim um thacaíocht theicniúil;

9.á mheabhrú gur gá rannpháirtíocht ghníomhach na saoránach a spreagadh trí ghné Eorpach an oideachais saoránachta a threisiú, i ngníomhaíochtaí curaclaim agus seach-churaclaim araon; á thabhairt chun suntais gur féidir le hoideachas saoránachta fíor-Eorpach na saoránaigh a chur ar an eolas agus saoránaigh a mhúnlú de réir mheon an rannpháirteachais shibhialta agus na rannpháirtíochta sibhialta agus gur féidir le treoirlínte iomchuí ón Aontas a bheith ina n-uirlis úsáideach i ndáil leis sin; ag cur béim ar a thábhachtaí atá sé daoine nach saoránaigh de chuid an Aontais iad agus a bhfuil cónaí orthu san Aontas, agus a n-eagraíochtaí féinrialaithe, a áireamh i spriocghrúpa chlár CERV, agus go mbeidh de thoradh air sin go gcothófar an rialachas daonlathach, an smacht reachta agus an t-ionchuimsiú sóisialta;

10.á iarraidh ar na Ballstáit nach bhfuil PTNanna ainmnithe acu fós é sin a dhéanamh a luaithe is féidir agus á iarraidh ar an gCoimisiún leanúint de bheith ag obair leis an líonra PTNanna trí chruinnithe, trí bhearta oiliúna agus trí mhalartuithe tiomnaithe, ós rud é go raibh an-rath orthu sin nuair a eagraíodh iad go dtí seo; sa chomhthéacs sin, ag moladh don Choimisiún, do na Ballstáit agus do NCPanna líonra Eorpach de NCPanna a bhunú chun comhroinnt dea-chleachtas agus malartú eolais a éascú; ina theannta sin, ag moladh don Choimisiún líonra de thairbhithe CERV a bhunú chun taithí agus dea-chleachtais a mhalartú chun tuiscint níos doimhne a fháil ar na réaltachtaí áitiúla agus náisiúnta ar fud an Aontais agus níos faide i gcéin;

11.ag tabhairt dá haire gur ann do na torthaí a bhaineann le cineálacha éagsúla sásraí athdheonúcháin a thabhairt isteach faoi chlár CERV, atá an-spreagúil go dtí seo; á iarraidh go ndéanfar anailís cháilíochtúil agus chainníochtúil ar na glaonna éagsúla athdheonúcháin d’fhonn a n-úsáid a leathnú, b’fhéidir, chuig na sraitheanna eile de chlár CERV, i gcás inarb ábhartha, agus go háirithe chuig Sraith 3, chun a áirithiú go sroichfidh maoiniú an Aontais eagraíochtaí sochaí sibhialta ar leibhéal an phobail a bhfuil cuntais teiste fhada agus taithí shuntasach acu; ag tathant ar an gCoimisiún na nósanna imeachta agus na ceanglais riaracháin maidir le hathdheonú a shimpliú tuilleadh chun breis solúbthachta a thabhairt d’eagraíochtaí a dhéanann iarratas ar athdheonú vis-à-vis fo-dheonaithe, ag áirithiú go bhfuil caighdeáin iomchuí ann i ndáil le cúrsaí oibre, cúram sláinte agus cosaint shóisialta; á chreidiúint go bhféadfaí na ceanglais chómhaoiniúcháin a athbhreithniú d’fhonn na rialacha a oiriúnú do staid an tairbhí chun tacú le réimse níos ilghnéithí tairbhithe, lena n-áirítear daoine aonair agus micreastruchtúir, agus réimsí téamacha; á áitiú a thábhachtaí atá sé úsáid an chláir a chur chun cinn san earnáil oideachais i gcoitinne, lena n-áirítear mic léinn, múinteoirí, baill foirne oideachais agus oibrithe don óige; á chur i dtreis gur cheart go gcumhdófaí céatadán níos mó de na méideanna deontais leis an gcistiú a chuirtear ar fáil ó chlár CERV i réimse na gceart, an chomhionannais, na luachanna agus an rannpháirteachais shibhialta, a bhfuil foinsí eile cistiúcháin an-ghann nó in easnamh ina leith; ag tathant ar an gCoimisiún a áirithiú gur chuig struchtúir lena n-urramaítear Cairt um Chearta Bunúsacha an Aontais Eorpaigh a chuirtear an maoiniú, mar shampla trí shásraí rialúcháin a chur ar bun chun caighdeáin iomchuí oibre, cúraim sláinte agus cosanta sóisialta a ráthú; á iarraidh go ndéanfaí measúnú ar na sásraí athdheonúcháin chun meastóireacht a dhéanamh ar a n-éifeachtacht agus ar a solúbthacht ó thaobh grúpaí pobail a shroicheadh agus ó thaobh tacú le heagraíochtaí i dtíortha ina bhfuil laghdú ag teacht ar an spás sibhialta;

12.á iarraidh go ndéanfaí buiséad an chláir a mhéadú go EUR 2.6 billiún sa chéad chreat airgeadais ilbhliantúil (CAI) eile chun freastal ar an éileamh méadaitheach ar thionscnaimh rannpháirteachais shibhialta agus rannpháirtíochta daonlathaí, agus chun sásra ad hoc a bhunú chun cosantóirí chearta an duine a chosaint, cosúil le sásraí atá i bhfeidhm do chosantóirí chearta an duine lasmuigh den Aontas nó chun iriseoirí a chosaint, agus, go ginearálta, chun aghaidh a thabhairt ar thionchar an bhoilscithe ar chostais an chláir, agus aird á tabhairt freisin ar Chonclúidí na Comhdhála ar Thodhchaí na hEorpa maidir le saoránacht agus oideachas Eorpach, mar aon le tábhacht straitéiseach chlár CERV ó thaobh tosaíochtaí an Aontais a chur chun feidhme;

13.ag cur béim ar an bhfíoras go bhfuil gníomhaíochtaí éifeachtacha cumarsáide agus múscailte feasachta ríthábhachtach chun go n-éireoidh leis an gclár agus gur gá, dá bhrí sin, tosaíocht a thabhairt dóibh chun go mbeidh tairbhithe féideartha rannpháirteach, go háirithe ar an leibhéal áitiúil;

14.ag admháil go bhfuil malartuithe agus rannpháirtíocht i ngníomhaíochtaí faoi chlár CERV ríthábhachtach chun acmhainneacht eagraíochtaí na sochaí sibhialta a fhorbairt le haghaidh an rannpháirteachais shibhialta agus chun luachanna an Aontais a chur chun cinn i dtíortha nach Ballstáit den Aontas iad; á chur i dtreis nach le comhaontuithe aontachais a chuirtear tús leis an rannpháirteachas gníomhach agus leis an tiomantas gníomhach do luachanna Eorpacha agus gur toradh iad ar obair sheanbhunaithe ag gníomhaithe agus ag eagraíochtaí na sochaí sibhialta chun na smaointe sin a chur chun cinn agus chun tacú le gníomhaithe áitiúla i dtíortha nach Ballstáit den Aontas iad; ag spreagadh an Choimisiúin chun rannpháirtíocht saoránach neamh-AE a éascú trí ESSanna neamh-AE a bheith rannpháirteach i ngníomhaíochtaí CERV; á iarraidh, dá bhrí sin, go gcumhdófar le clár CERV costais rannpháirtíochta ionadaithe na sochaí sibhialta, ar a laghad dóibh siúd ó thíortha is iarrthóirí agus ó thíortha comhlachaithe, bíodh a dtír rannpháirteach i gclár CERV nó ná bíodh; á chur i bhfios go láidir gur gá aghaidh a thabhairt ar na dúshláin a bhaineann leis an gcogadh san Úcráin trí thionscadail a spreagadh le comhpháirtithe na hÚcráine trí ghníomhaíochtaí cuimhneacháin agus trí ghníomhaíochtaí rannpháirtíochta daonlathaí agus trí oidhreacht chultúir na hÚcráine a aisghabháil;

15.ag athdhearbhú a hiarrata go mbeadh clár CERV ina huirlis ghníomhaíochta i réimse na comhfhiosachta stairiúla Eorpaí trí thacú go gníomhach le struchtúir arb é is aidhm dóibh cuimhne stairiúil chriticiúil a chothú, mar shampla maidir le taighde trasnáisiúnta agus cuairt a thabhairt ar áiteanna cuimhne, san Aontas agus níos faide i gcéin araon; ag cáineadh, go háirithe, an athbhreithniúchais staire agus cultúir; á iarraidh ar an gCoimisiún agus ar na Ballstáit aird ar leith a thabhairt ar shaincheisteanna sochaíocha íogaire a bhféadfaí úsáid a bhaint astu mar uirlisí;

16.á iarraidh go dtacódh clár CERV leis an dinimic atá ag teacht chun cinn ó thaobh nascadh bailte agus líonraí bailte a cheangal le nascadh institiúidí oideachais, rud a d’fhéadfadh an ghné Eorpach, malartú dea-chleachtas agus muintearas a threisiú;

17.ag tathant ar an gCoimisiún na nósanna imeachta riaracháin a shimpliú tuilleadh le haghaidh comhpháirtíochtaí creata ceithre bliana le haghaidh deontais oibriúcháin, go háirithe maidir le saintréithe sonracha na huirlise TF a úsáidtear, ar cosúil í a bheith níos oiriúnaí do dheontais ghníomhaíochta;

18.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.