1.á chur i bhfáth, sa tréimhse 2014-2020, nach ndearnadh ach 28 % de na straitéisí don fhorbairt uirbeach inbhuanaithe a chur chun feidhme trí ICCanna; á iarraidh ar an gCoimisiún gníomhú chun úsáid na n-uirlisí sin a spreagadh chun TA2030 a fhorbairt, go háirithe trí ghníomhaíochtaí cumarsáide treisithe ;

2.ag cur béim ar an rannchuidiú luachmhar leis an bhforbairt chríochach a dhéantar trí ghníomhaíochtaí a chuirtear chun feidhme trí CLLD amhail na gníomhaíochtaí sin faoi chlár LEADER; á iarraidh ar an gCoimisiún agus ar na Ballstáit LEADER a threisiú trína imchlúdach buiséadach a mhéadú trí ardleibhéal neamhspleáchais a ráthú do na Grúpaí Gníomhaíochta Áitiúla maidir lena mbunreacht agus a gcinnteoireacht agus tríd an ualach riaracháin a laghdú;

3.á iarraidh ar an gCoimisiún úsáid a bhaint as torthaí thuarascáil mheastóireachta 2024 atá ar na bacáin don chlárthréimhse 2014-2020, chomh maith le torthaí na ngníomhaíochtaí a chuirtear ar fáil trí CLLD amhail na gníomhaíochtaí sin faoi chlár LEADER, chun tacú le cláir don tréimhse 2021-2027; á thabhairt dá haire a thábhachtaí atá an anailís cháilíochtúil ar uirlisí forbartha críochaí; á chur in iúl gur oth léi, i ndáil leis sin, conclúid na tuarascála speisialta ó Chúirt Iniúchóirí na hEorpa maidir le LEADER agus CLLD nach bhfuil a dtairbhí léirithe go leordhóthanach;

4.á chur in iúl gur geal léi Lámhleabhar na straitéisí forbartha críochaí agus áitiúla agus an Lámhleabhar maidir le straitéisí forbartha inbhuanaithe uirbí mar threoracha do gach leibhéal riaracháin maidir le ceapadh, cur chun feidhme agus faireachán a dhéanamh ar straitéisí críochacha agus áitiúla, lena n-áirítear straitéisí uirbeacha, forbartha; á chreidiúint gur cheart scaipeadh dea-chleachtas a chothú d’fhonn a áirithiú go mbeidh tionscadail éifeachtach agus inbhuanaithe; á chur in iúl gur oth léi, áfach, foilsiú déanach na lámhleabhar sin agus ag moladh don Choimisiúin treoirlínte tráthúla a chur ar fáil chun an próiseas chun na cláir a fhorbairt a shimpliú; á thabhairt chun suntais gur gá tuilleadh treoraíochta agus níos mó solúbthachta a chur ar fáil do na Ballstáit maidir le cur chun feidhme CB5 ‘Eoraip níos gaire do na saoránaigh’, agus maidir leis na gníomhaíochtaí chun é a bhaint amach, agus iad a ailíniú leo siúd a leagtar amach in TA2030 agus dreasachtaí a chruthú chun níos mó cistithe a leithdháileadh ar CB5;

5.á iarraidh ar na Ballstáit pleanáil spásúlachta straitéiseach a chur chun cinn lena gcuirtear san áireamh críocha ina n-iomláine lasmuigh de limistéir chathrach, uirbeacha agus uirbeacha feidhme; á iarraidh, thairis sin, ar na Ballstáit naisc thuaithe-uirbeacha a neartú mar bhealach chun forbairt chríochach níos cothroime a bhaint amach ar fud an Aontais agus chun pleanáil agus cur chun feidhme trasteorann a mheas trí chineálacha cur chuige ón mbun aníos amhail CLLD/ICC;

6.á iarraidh ar an gCoimisiún agus ar an gComhairle cistiú a chur i leataobh do limistéir thuaithe agus do réigiúin a bhfuil míbhuntáistí móra buana nádúrtha nó déimeagrafacha acu ar an mbealach céanna go bhfuil 8 % de chistí an bheartais chomhtháthaithe curtha i leataobh chun cláir a fhorbairt faoin gClár Oibre Uirbeach; á thabhairt dá haire gur cheart na cistí sin a úsáid go príomha trí uirlisí forbartha críochaí comhtháite;

7.á chur san áireamh go bhfuil acmhainneachtaí léirithe ag na húdaráis áitiúla agus réigiúnacha i gcur chun feidhme agus i mbainistiú na n-uirlisí críochacha, agus á mheas go bhfuil gá le hathrú ó bhonn i rannpháirtíocht na n-údarás áitiúil agus réigiúnach i bpleanáil, i gcur chun feidhme agus i mbainistiú uirlisí críochacha; á iarraidh go ndéanfar prionsabal na comhpháirtíochta a chur chun feidhme go héifeachtach agus comhairliúchán domhain a dhéanamh leis na húdaráis áitiúla agus réigiúnacha agus le geallsealbhóirí eile sula ndéanfar gníomhaíochtaí ICC agus CLLD a shainiú; á thabhairt chun suntais a thábhachtaí atá an cur chuige ón mbun aníos maidir le forbairt chríochach, agus saoránaigh á gcumhachtú chun úinéireacht a ghlacadh ar fhorbairt a gcríoch;

8.á iarraidh go ndéanfaí straitéisí forbartha críochaí nó áitiúla arna gcistiú ag níos mó ná clár amháin a chumasc in aon rian amháin, i gcomhréir le hAirteagal 28 RTF agus le tacaíocht ón gCoimisiún, i gcás inar gá, chun moilleanna agus bacainní riaracháin a chosc; á chur in iúl gur geal léi an fhéidearthacht, a tugadh isteach sa chlárthréimhse 2021-2027, príomhchiste a ainmniú maidir le straitéisí arna gcistiú ag níos mó ná ciste amháin;

9.á thabhairt dá haire gur bearta cruthaithe iad ionstraimí críochacha, amhail CLLD agus ICCnna, chun AE a thabhairt níos gaire do na saoránaigh; á thabhairt dá haire go léirítear leis na sonraí ar Bhord STRAT don tréimhse 2014-2020 go raibh ról tábhachtach ag CLLDanna i bhforbairt na straitéisí críochacha, agus béim á leagan ar an spéis láidir atá ann ar an leibhéal áitiúil páirt ghníomhach a ghlacadh i bhforbairt na straitéisí sin; á iarraidh ar na Ballstáit agus ar an gCoimisiún bainistiú riaracháin na gcistí a shimpliú, go háirithe cásanna ina ndtarraingíonn CLLDanna ó níos mó ná ciste amháin; á chur i bhfáth gurb iad ICCanna an phríomhuirlis a úsáideann na Ballstáit le leithdháileadh níos mó de chistí CFRE, ós rud é go bhféadfaidís na méideanna a ionsú go tapa agus go bhfuil siad in ann roinnt príomhaiseanna atá i gclár amháin nó i roinnt clár a chumhdach;

10.á chur i bhfios go láidir go ndéantar idirdhealú soiléir idir na Ballstáit atá tiomanta do ICCanna nó CLLDanna a fhorbairt agus na Ballstáit nach bhfuil; á iarraidh ar an gCoimisiún an difreáil sin a shoiléiriú chun éagothromaíochtaí geografacha a sheachaint agus chun foráil a dhéanamh do thacaíocht theicniúil shaincheaptha do na Ballstáit nár bhain úsáid as na huirlisí críochacha sin; ag moladh do na Ballstáit uile úsáid níos mó a bhaint as na huirlisí forbartha críochaí comhtháite mar a shainítear in Airteagal 28 CPR agus chun a áirithiú go n-urramófar an chomhpháirtíocht mar a shainítear in Airteagal 8 CPR; á chur in iúl go bhfuil sí den tuairim gur cheart go mbeadh uirlisí forbartha críochaí comhtháite éigeantach do na Ballstáit;

11.á chur in iúl gur geal léi na simplithe teicniúla ar fhorbairt chríochach a tugadh isteach sa chlárthréimhse 2021-2027; á iarraidh, áfach, ar an gCoimisiún agus ar na Ballstáit na rialacháin riaracháin bhreise is gá a choinneáil chomh híseal agus is féidir agus díriú níos mó ar chomhréireacht, ós rud é, go comhréireach, go bhfuil ualaí riaracháin níos airde (do thairbhithe) ar thionscadail bheaga agus go bhfuil costais riaracháin (i gcás údaráis clár) acu ná tionscadail níos mó faoi láthair;

12.á mheas gur fíor-ionstraim chuí é TA2030 a bhfuil sé mar aidhm léi gné spásúil na n-éagothroimí a laghdú agus comhtháthú AE a áirithiú trí bhainistiú a dhéanamh ar gach ceann dá réigiúin a bhfuil a saintréithe féin acu; á chreidiúint, dá bhrí sin, gur cheart go mbeadh sochaithe agus críocha níos rannpháirtí maidir le tábhacht an Chláir Oibre sin a aithint; á iarraidh ar an gCoimisiún ról TA2030 a mhodhnú a fhágfaidh go mbeidh níos mó i gceist leis ná treoir bainistíochta críche amháin;

13.á thabhairt faoi deara go moltar in TA2030 ní hamháin freagairtí beartais áitbhunaithe ar dhúshláin chríochacha, ach go soláthraítear leis freisin fís agus uaillmhian don chuspóir comhtháthaithe chríochaigh trí rannpháirtíocht níos fearr na n-údarás áitiúil agus réigiúnach agus na saoránach;

14.á thabhairt chun suntais, cé go bhfuil ilchistiú ar cheann de phríomhchuspóirí na n-uirlisí comhtháite críochacha, go léirítear sna torthaí reatha go bhféadfadh sé a bheith deacair fós i roinnt tíortha ilchistiú a úsáid, go háirithe ós rud é, sa tréimhse reatha, nach bhfuil CETFT (forbairt tuaithe) san áireamh a thuilleadh in CPR agus, dá bhrí sin, go mbeadh gá le bearta breise agus sonracha chun rialacha CETFT agus cistí beartais comhtháthaithe eile a ailíniú (i.e. cistí éagsúla AE a úsáid le haghaidh tionscadail chomhtháite ar an leibhéal áitiúil lena dtugtar aghaidh ar roinnt cuspóirí beartais);

15.á iarraidh ar na Ballstáit príomhshruthú inscne a chur chun cinn go gníomhach agus treoirthionscadail TA2030 á n-ullmhú agus á gcur chun feidhme ar an láthair;

16.á chur i bhfáth go bhfuil ioncam agus cáilíocht saoil atá cothrom agus díniteach do shaoránaigh agus dá dteaghlaigh i gceantair thuaithe fíor-riachtanach chun dul chun cinn sóisialta agus forbairt rathúil chríochach agus áitiúil a áirithiú; á áitiú gur gá dálaí maithe oibre agus maireachtála agus cosaint shóisialta a áirithiú do chách;

17.á chur i bhfáth a thábhachtaí atá sé feabhas a chur ar chomhleanúnachas na mbeartas agus promhadh leas na tuaithe a dhéanamh ar thionscnaimh um fhorbairt chríochach chomhtháite an Aontais amach anseo agus ar thionscnaimh ábhartha eile chun measúnú a dhéanamh ar chomhleanúnachas agus ar chomhlántacht bheartais an Aontais agus ar an tionchar a d’fhéadfadh a bheith acu ar na limistéir thuaithe, agus ar an gcaoi sin teacht roimh dhídhaonrú na tuaithe go héifeachtach agus athnuachan ó ghlúin go glúin, rochtain chomhionann ar sheirbhísí fíor-riachtanacha ardcháilíochta agus cruthú post i limistéir thuaithe a éascú; á chur i bhfáth a thábhachtaí atá an sásra um promhadh leas na tuaithe freisin nuair a dhéanann na Ballstáit measúnú ar thionchar na reachtaíochta atá beartaithe i gceantair thuaithe; á chur i bhfios go láidir a thábhachtaí atá sé go mbeadh na húdaráis áitiúla agus réigiúnacha rannpháirteach i sainiú agus i gcur chun feidhme sásraí um promhadh leas na tuaithe, agus i rialachas na sásraí sin ar an leibhéal AE agus ar an leibhéal náisiúnta araon, chun an t-eisiamh sóisialta a bhaineann le hiompar a chomhrac agus chun feabhas a chur ar inrochtaineacht chríochach na limistéar lena mbaineann chun feabhas a chur ar an gcomhar trasteorann agus tuaithe-uirbeach, ar rochtain ar idirlíon leathanbhanda agus ar sheirbhísí leordhóthanacha, go háirithe cúram sláinte agus oideachas, chomh maith le héagsúlú an gheilleagair tuaithe agus athbheochan na limistéar tuaithe, ag méadú tharraingteacht na limistéar sin agus ag áirithiú todhchaí inbhuanaithe do na pobail sin;

18.á chur i bhfáth gur cheart go mbeadh ról lárnach ag gníomhaíochtaí TA2030 i gcomhaontuithe agus cláir chomhpháirtíochta; á chur i bhfios gur cheart na gníomhaíochtaí sin a bheith níos cinntithí maidir le leithdháileadh cistí agus an gá atá le comhtháthú TA2030 i mbeartais AE a chur chun cinn, agus béim á leagan ar leibhéil rialachais atá níos gaire don talamh; á chreidiúint gur cheart cistiú leordhóthanach agus modheolaíocht maidir le leithdháileadh a chur ar fáil do TA2030 sa chreat airgeadais ilbhliantúil a bheidh ann amach anseo, ar cheart iad a chur in oiriúint do gach críoch;

19.á chur i bhfios go láidir go bhfuil sé ríthábhachtach tosaíochtaí agus cuspóirí TA2030 a áireamh in ionstraimí reachtacha agus i gcláir reachtacha chistí an bheartais comhtháthaithe, ar cheart iad a chur in oiriúint do gach críoch; á chur in iúl gur geal léi gníomhaíochtaí píolótacha TA2030 a forbraíodh agus iarrann sí ar na Ballstáit agus ar an gCoimisiún leanúint d’infheistíocht a dhéanamh sna gníomhaíochtaí sin, a gcothromaíocht gheografach a fheabhsú agus iad a chomhordú ar bhealach níos fearr le prionsabail TA2030;

20.á chur i bhfáth gur gá ról a thabhairt don Pharlaimint, go háirithe a Coiste inniúil um Fhorbairt Réigiúnach, sna gníomhaíochtaí píolótacha chun a áirithiú go bhfuil siad i gcomhréir le tosaíochtaí reatha AE, agus chun torthaí na ngníomhaíochtaí píolótacha a chur chun cinn agus iad a chur in iúl ar leibhéal AE, agus iad a chomhtháthú agus a chomhordú le tionscnaimh amhail an beartas comhtháthaithe, go háirithe CFRE agus Interreg;

21.á iarraidh go mbeadh straitéis ann chun sineirgí a éascú idir cistí éagsúla AE maidir le tionscadail a chuirtear chun feidhme trí uirlisí críochacha agus chun simpliú riaracháin a dhéanamh ar ghníomhaíochtaí píolótacha a mhaoinítear le níos mó ná ciste amháin chun na bacainní riaracháin a laghdú agus chun iarratais ar na tionscadail sin a éascú;

22.á chreidiúint go bhféadfadh ról ríthábhachtach a bheith ag gnólachtaí i straitéisí forbartha críochaí; á iarraidh ar an gCoimisiún tacú le socruithe le haghaidh comhar idir cuideachtaí agus údaráis áitiúla agus réigiúnacha d’fhonn tionscadail forbartha críochaí a fhorbairt lena gcothaítear cruthú post agus fás eacnamaíoch;

23.á chur i bhfios go bhfuil acmhainneacht ollmhór ag TA2030 agus na treoirthionscadail atá ann faoi láthair agus a bheidh ann amach anseo chun aghaidh a thabhairt ar riachtanais an-éagsúil na limistéar neamhuirbeach, lena n-áirítear limistéir thuaithe, limistéir shléibhtiúla, oileáin agus limistéir chósta, limistéir iargúlta agus limistéir inar tearc an daonra agus go leor cineálacha eile críoch ina bhfuil meascán de ghnéithe uirbeacha agus tuaithe taobh le taobh; á thabhairt chun suntais, go háirithe, gur minic a bhíonn dúshláin dhéimeagrafacha roimh cheantair thuaithe, dlús íseal daonra agus rochtain theoranta ar sheirbhísí leasa ghinearálta agus cáilíocht na seirbhísí sin, cé nach mbíonn sé d’acmhainn acu i gcónaí réitigh nuálacha a cheapadh agus a chur chun feidhme, agus ar an gcaoi sin gur féidir leo tairbhe mhór a bhaint as malartú dea-chleachtas;

24.á chur i bhfáth gur gá gníomhaíochtaí agus éachtaí na dtreoirthionscadal a scaipeadh ar bhealach níos fearr mar shamplaí de chur chun feidhme chistí an Aontais; á chur in iúl go bhfuil sí i bhfabhar comhdháil dhébhliantúil chun na gníomhaíochtaí píolótacha a chur i láthair na n-údarás áitiúil agus réigiúnach, chomh maith le gníomhaithe ábhartha ar an leibhéal náisiúnta agus ar leibhéal an Aontais, agus í a nascadh le himeachtaí eile amhail iad siúd faoin gComhshocrú Tuaithe nó faoi Fhóram na gCathracha;

25.á iarraidh ar na Ballstáit a gcláir oibre chríochacha a fhorbairt i gcomhréir le TA2030 mar bhonn chun a straitéisí críochacha a chlársceidealú, agus sainiúlachtaí agus riachtanais an-éagsúil gach ceann dá réigiúin á gcur san áireamh, agus a bheidh ina ndreasacht, agus chun an próiseas cinnteoireachta agus dearadh beartas críochach agus uirbeach a spreagadh; á iarraidh, thairis sin, ar na Ballstáit straitéisí críochacha éagsúla a chumasú do réigiúin uile an Aontais, lena n-áirítear limistéir thuaithe, limistéir a bhfuil an t-asitriú tionsclaíoch ag dul dóibh, réigiúin a bhfuil míbhuntáistí móra buana nádúrtha nó déimeagrafacha acu, amhail na réigiúin is faide ó thuaidh agus na réigiúin a bhfuil dlús fíoríseal daonra iontu, oileáin, réigiúin trasteorann agus réigiúin shléibhtiúla;

26.á thabhairt chun suntais gur féidir le dea-fheidhmíocht na struchtúr rialachais an meascán is fearr de thosaíochtaí infheistíochta a chinneadh chun an comhordú il-leibhéil ingearach agus cothrománach is gá a bhaint amach chun straitéisí comhtháite forbartha a dhearadh agus a chur ar fáil;

27.á iarraidh ar na Ballstáit agus ar an gCoimisiún cur chun feidhme TA2030 a chur chun cinn thar ghníomhaíochtaí píolótacha, agus creat tagartha gníomhaíochta a dhéanamh den ionstraim sin lena soláthraítear treoirlínte nithiúla agus oiriúnathe do chríocha AE chun feabhas a chur ar a bhfeidhmíocht; á thabhairt chun suntais go bhfuil deis ann cistiú réigiúnach a a nascadh le tosaíochtaí TA2030 a bhaint amach, agus á iarraidh ar an gCoimisiún táscairí faireacháin a fhorbairt a nascfaidh TA2030 agus úsáid chistí an bheartais chomhtháthaithe, go háirithe CFRE;

28.á athdhearbhú gur gá beartas an Aontais maidir le maolú agus oiriúnú don athrú aeráide a neartú go práinneach, agus i bhfianaise na treochta méadaithí teagmhas adhaimsire san Aontas le blianta beaga anuas agus le míonna anuas; á iarraidh, dá bhrí sin, ar na húdaráis phoiblí leanúint den chomhrac i gcoinne an athraithe aeráide; á thabhairt chun suntais, sa chomhthéacs sin, gur gá dlús a chur le huaillmhian agus cáilíocht na dtionscadal píolótach laistigh den chuspóir ‘Eoraip Ghlas’ agus dá céad tosaíocht ‘Comhshaol sláintiúil’; á chur i bhfáth go bhfuil an fhorbairt chríochach ríthábhachtach chun réigiúin athléimneacha a thógáil agus chun cur chun feidhme inbhuanaithe chistiú an bheartais chomhtháthaithe a áirithiú;

29.á chur in iúl gur geal léi an togra ó Choiste Eacnamaíoch agus Sóisialta na hEorpa maidir le cur chun cinn cairte uile-Eorpaí um chearta agus freagrachtaí tuaithe/uirbeacha; á chur in iúl go bhfuil sí suite de freisin go bhfuil gá le tuilleadh comhair le limistéir uirbeacha chun a áirithiú nach bhfágfar aon limistéar ná saoránach ‘ar an trá fholamh’ san aistriú cóir chuig Aontas Eorpach a bheidh aeráidneodrach, inbhuanaithe agus rathúil, lena bhféachfar le tiomantas tuaithe agus uirbeach a bhaint amach do chur chuige cothrom agus lena léireofar an breisluach a bhaineann le heagraíochtaí tuaithe agus eagraíochtaí uirbeacha a bheith ag obair le chéile;

30.á chur i bhfios go láidir gur gá forbairt níos cothroime ar réigiúin AE a áirithiú trí leithdháileadh níos fearr chistí AE a ráthú, lena n-áirítear tacaíocht don chomhbheartas talmhaíochta, laistigh de na Ballstáit agus eatarthu; ag cur béim ar an bhfíoras nach féidir forbairt chríochach inbhuanaithe agus fhadtéarmach a bhaint amach má leithdháiltear tacaíocht ar réigiúin éagsúla de réir sonraí stairiúla;

31.á thabhairt dá haire go bhfuil méadú ag teacht ar feadh an ama ar an líon daoine a thograíonn maireachtáil i gcathracha agus oibriú i gceantair thuaithe; á iarraidh ar an gCoimisiún cláir a cheapadh lena gcuirfear gach críoch san áireamh, lena n-áirítear limistéir uirbeacha, limistéir uirbeacha agus limistéir fheidhmiúla; ag spreagadh an Choimisiúin chun LEADER a dhearadh sa chaoi gur féidir le cathracha beaga é a úsáid;

32.á iarraidh ar an gCoimisiún an taithí a fuarthas maidir le cur chun feidhme TA2030 a nascadh leis an mbeartas comhtháthaithe amach anseo agus le moltaí ón nGrúpa Ardleibhéil um Thodhchaí an Bheartais Chomhtháthaithe chun míchothromaíochtaí críochacha agus neamhréireanna feidhmiúla a shárú ar bhealach níos éifeachtaí; á chur i bhfios an deis a chuireann TA2030 ar fáil mar uirlis chun measúnú a dhéanamh ar thionchar an bheartais chomhtháthaithe maidir le cuspóir an chomhtháthaithe chríochaigh;

33.á iarraidh ar an gCoimisiún agus ar na Ballstáit athbhreithniú comhleanúnach a dhéanamh ar TA2030 faoi dheireadh 2024, lena n-áirítear athbhreithniú críochnúil ar a chóras rialachais, an dul chun cinn atá déanta maidir lena chur chun feidhme agus ábharthacht a thosaíochtaí, mar a leagtar amach in TA2030;

34.á chur in iúl gur geal léi gné cheangailteach na modheolaíochta a thuairiscítear i Lámhleabhar na straitéisí forbartha críochaí agus áitiúla agus lena dtugtar an tosaíocht chéanna do bheartais chríochacha agus a thugtar do bheartais uirbeacha;

35.á iarraidh go mbeadh creat aonair ann le haghaidh straitéisí atá dírithe ar fhorbairt uirbeach agus ar fhorbairt chríochach níos leithne araon, lena ndéileálfar le ceanglais chríochacha ina n-iomláine; á chur i bhfáth go bhféadfadh sé sin bacainní maorlathacha a laghdú go suntasach maidir le cistí a fháil;

36.á iarraidh ar an gCoimisiún a áirithiú go gcuirfear cistí chun feidhme go cuí agus go gcuirfear ionstraimí críochacha chun feidhme, agus tús áite á thabhairt do bhainistiú éifeachtúil gan maorlathas díréireach; á chur i bhfios go láidir gur gá rochtain ar chistí a shimpliú trí ‘ionaid ilfhreastail’ a shainaithint do thairbhithe féideartha ciste comhtháthaithe AE ICC nó tionscadail CLLD, go háirithe chun rochtain a fháil ar fhaisnéis maidir leis an gcineál maoinithe, ceanglais riaracháin agus incháilitheacht;

37.ag aithint ról na Comhairle Eorpaí i bhforbairt ghníomhaíochtaí críochacha na mBallstát; á iarraidh ar na Ballstáit acmhainní daonna leordhóthanacha a chur ar fáil d’údaráis bhainistíochta agus do chomhlachtaí cur chun feidhme araon atá i gceannas ar ICCnna nó ar CLLDanna, chun tacaíocht theicniúil agus seirbhísí comhairleacha a áirithiú go sonrach do Ghrúpaí Gníomhaíochta Áitiúla agus do chomhpháirtithe ICC agus chun comhlíonadh na rialachán a chumasú;

38.á iarraidh ar an gCoimisiún a rannpháirtíocht sa bheartas críochach a mhéadú trí bheartas comhtháthaithe agus rialachas na réigiún a neartú chun comhtháthú agus micrea-chomhtháthú a chur chun cinn trí shainiúlachtaí gach réigiúin a chumhdach, trí chinnteoireacht a fheabhsú ar anleibhéal áitiúil agus réigiúnach agus trí uirlisí atá ann cheana a chur i bhfeidhm chun bainistiú ionstraimí reachtacha a fheabhsú; á iarraidh, thairis sin, ar an gCoimisiún agus ar na Ballstáit leanúint de thacaíocht a thabhairt do chistí an bheartais chomhtháthaithe chun athléimneacht na forbartha críochaí a mhéadú, go háirithe chun a bheith in ann éifeachtaí imeachtaí gan choinne a mhaolú, réigiúin a chosaint ar fhulaingt na n-iarmhairtí agus seasamh leis an bprionsabal ‘gan dochar a dhéanamh don chomhtháthú’;

39.á chur in iúl gur eol di an tionchar atá ag cinntí Sheimeastar AE ar chomhtháthú críochach agus, dá bhrí sin, ar an acmhainneacht cláir chríochacha a fhorbairt; á athdhearbhú, dá bhrí sin, gur gá gné chríochach an tSeimeastair Eorpaigh a neartú agus an comhghaol idir an beartas comhtháthaithe agus rialachas eacnamaíoch na hEorpa a fheabhsú, agus údaráis áitiúla agus réigiúnacha rannpháirteach ag gach céim de na nósanna imeachta a bhaineann leis an Seimeastar Eorpach agus leis na moltaí tírshonracha;

40.á iarraidh ar Choiste Eorpach na Réigiún agus Coiste Eacnamaíoch agus Sóisialta na hEorpa ról níos gníomhaí a bheith acu san obair leantach agus i bhforbairt bhreise TA2030; á iarraidh ar an gCoimisiún staidéar a dhéanamh ar acmhainneacht gach réigiúin dúshláin dhomhanda amach anseo a dhéanfaidh difear don chomhtháthú críochach a mhaolú; á thabhairt dá haire go gcuirfeadh sé sin uirlis mhearfhreagartha ar fáil lena gceadófaí solúbthacht agus acmhainní á leithdháileadh nó á n-athneartú, de réir staid fíor-ama réigiúin AE;

41.á thabhairt chun suntais a ábhartha atá na huirlisí críochacha ó thaobh rannpháirtíocht mhéadaithe agus chuimsitheach na sochaí sibhialta agus na rialtas áitiúil agus réigiúnach de; á iarraidh ar an gCoimisiún féachaint ar bhealaí nua chun feasacht bhreise a mhúscailt maidir lena réasúnaíocht agus chun an úsáid a bhaintear as ICCanna agus as CLLDanna a mhéadú go suntasach, agus freisin trí chéatadán a d’fhéadfaí a úsáid i gcreat an bheartais chomhtháthaithe tar éis 2027 a chur ar leataobh;

42.á iarraidh ar an mBanc Eorpach Infheistíochta méadú a dhéanamh ar an leithdháileadh airgeadais atá beartaithe do chistí beartais chomhtháthaithe atá tiomnaithe do chothromaíocht agus dea-fheidhmiú na réigiún a choimirciú;

43.á threorú dá hUachtarán an rún seo a chur ar aghaidh chuig an gComhairle, chuig an gCoimisiún agus chuig parlaimintí náisiúnta agus réigiúnacha na mBallstát.