1.Iqis li ċ-ċittadinanza tal-UE tinkludi l-identità demokratika Ewropea kondiviża u komuni u d-drittijiet, id-dmirijiet ċiviċi u l-libertajiet speċifiċi marbuta magħha, u li l-eżerċizzju ta’ dawk id-drittijiet, kemm online kif ukoll offline, isaħħaħ ir-rabta taċ-ċittadini mal-UE u l-leġittimità demokratika tagħha, kif ukoll joffrilhom drittijiet addizzjonali;

2.Jirrimarka li l-kostruzzjoni taċ-ċittadinanza tal-UE trid timxi ’l quddiem biex tindirizza l-ħtiġijiet u l-isfidi tal-UE fis-seklu 21, filwaqt li tirrikonoxxi l-potenzjal tal-innovazzjoni diġitali u l-ħtieġa għal approċċ bilanċjat biex tiġi indirizzata l-kumplessità ġġenerata mill-globalizzazzjoni u t-teknoloġiji ġodda; jisħaq li d-diġitalizzazzjoni tal-proċessi demokratiċi, flimkien ma’ litteriżmu diġitali insuffiċjenti u aċċess għat-teknoloġija tal-informazzjoni u tal-komunikazzjoni, tirriskja li tikkontribwixxi għal distakk diġitali dejjem akbar fl-eżerċizzju tad-drittijiet taċ-ċittadinanza, u tħalli parti mill-pubbliku aljenat mill-proġett Ewropew;

3.Iqis li l-multilingwiżmu fi ħdan l-istituzzjonijiet tal-UE u fl-interazzjoni tagħhom maċ-ċittadini huwa aspett essenzjali biex jissaħħaħ il-kunċett ta’ ċittadinanza tal-UE; jenfasizza, f’dan ir-rigward, li l-konklużjoni tal-Kunsill tat-13 ta’ Ġunju 2005 pprevediet li l-lingwi mhux uffiċjali tal-UE rikonoxxuti fi Stat Membru jew f’parti mit-territorju tiegħu jistgħu jintużaw miċ-ċittadini tal-UE fl-interazzjoni tagħhom mal-istituzzjonijiet tal-UE, kif ukoll jintużaw uffiċjalment fl-istituzzjonijiet jew fil-korpi tal-UE, inkluż il-Parlament Ewropew;

4.Jirrimarka li l-Parlament appella għall-ħolqien ta’ statut taċ-ċittadinanza tal-UE fir-riżoluzzjoni tiegħu tat-12 ta’ Frar 2019 dwar l-implimentazzjoni tad-dispożizzjonijiet tat-Trattat relatati maċ-ċittadinanza tal-UE u fir-riżoluzzjoni tiegħu tal-10 ta’ Marzu 2022 dwar ir-Rapport 2020 dwar iċ-Ċittadinanza tal-UE: it-tisħiħ tal-pożizzjoni taċ-ċittadini u l-protezzjoni ta’ drittijiethom; ifakkar li l-CoFE ssottolinjat l-importanza li tissaħħaħ iċ-ċittadinanza tal-UE billi semmiet fil-konklużjonijiet tagħha li tali statut ikun għodda utli biex il-prinċipji u l-valuri tal-UE jsiru aktar tanġibbli;

5.Jiddispjaċih għall-fatt li l-Kummissjoni, fil-komunikazzjoni tagħha ta’ segwitu dwar il-CoFE Il-komunikazzjoni tal-Kummissjoni tas-17 ta’ Ġunju 2022 bit-titolu “Konferenza dwar il-Futur tal-Ewropa – Naqilbu l-Viżjoni f’Azzjoni Konkreta” (COM(2022)0404)., ma semmietx speċifikament it-tisħiħ taċ-ċittadinanza tal-UE u modi potenzjali biex dan jintlaħaq; ifakkar li l-Kunsill wera r-rieda li jsaħħaħ iċ-ċittadinanza fil-valutazzjoni teknika li ppubblika fir-rigward tal-CoFE, iżda la għadu ppropona, la ħa u lanqas wettaq miżuri sabiex jintlaħaq dan il-għan;

6.Ifakkar li l-Kummissjoni se tippubblika r-Rapport tagħha tal-2023 dwar iċ-Ċittadinanza tal-UE qabel tmiem is-sena u jistenna li tipproponi inizjattivi ġodda biex issaħħaħ iċ-ċittadinanza tal-UE u tindirizza n-nuqqasijiet tal-implimentazzjoni tagħha; jiddispjaċih għall-fatt li din id-darba, il-Kummissjoni għażlet li tippubblika sejħa għall-evidenza u mhux konsultazzjoni pubblika kif għamlet fis-snin preċedenti; ifakkar li r-riżultati tas-sejħa għal evidenza ma fihomx ħarsa ġenerali komprensiva tal-aħħar żviluppi u tal-lakuni fl-implimentazzjoni; jisħaq li r-rapport għandu jitħejja abbażi ta’ data aġġornata;

7.Jinsab imħasseb dwar diffikultajiet speċifiċi li jimpedixxu l-eżerċizzju sħiħ tad-drittijiet u tal-libertajiet li jirriżultaw miċ-ċittadinanza tal-UE;

8.Jiddeplora l-fatt li ċ-ċittadini mobbli aktarx li jeżerċitaw anqas id-dritt tagħhom li jivvutaw u jikkontestaw għal kariga fl-elezzjonijiet Ewropej u muniċipali fl-Istati Membri tar-residenza tagħhom, u r-raġunijiet għal dan jinkludu informazzjoni insuffiċjenti, ostakli lingwistiċi, diffikultajiet fir-reġistrazzjoni għall-vot u r-rata baxxa ta’ suċċess ta’ kandidati barranin;

9.Jinsab imħasseb ħafna dwar il-prattika ta’ ċerti Stati Membri li jċaħħdu liċ-ċittadini tagħhom mid-dritt tal-vot fl-elezzjonijiet parlamentari nazzjonali meta jgħixu barra minn pajjiżhom b’mod permanenti jew temporanju, u dan iwassal għall-esklużjoni tagħhom mill-ħajja politika kemm fil-pajjiż tal-oriġini tagħhom kif ukoll fil-pajjiż ta’ residenza tagħhom;

10. Jenfasizza li ż-żona Schengen hija waħda mill-akbar kisbiet tal-UE; jisħaq li l-ostakli kollha għal-libertà ta’ moviment fi ħdan l-UE għandhom jitneħħew biex jinkisbu drittijiet ugwali ta’ ċittadinanza tal-UE għaċ-ċittadini Ewropej kollha; jappella għall-adeżjoni tar-Rumanija u tal-Bulgarija maż-żona Schengen, f’konformità mar-riżoluzzjonijiet tal-Parlament;

11.Jinsab imħasseb dwar il-fatt li ċ-ċittadini mobbli tal-UE, speċjalment dawk minn gruppi vulnerabbli, jiġu trattati mill-Istati Membri ta’ residenza tagħhom b’mod differenti minn kif jiġu trattati n-nazzjonali fir-rigward tal-aċċess għall-benefiċċji; jistieden lill-Istati Membri jimplimentaw kif xieraq il-każistika tal-Qorti tal-Ġustizzja tal-UE (QĠUE) li tipprojbixxi tali diskriminazzjoni;

12. Jinsab imħasseb dwar id-diffikultajiet u l-isfidi li jiffaċċjaw iċ-ċittadini li jgħixu fir-reġjuni transfruntiera tal-UE, speċjalment fil-każ ta’ għeluq tal-fruntieri b’riżultat ta’ kriżijiet madwar l-UE jew reġjonali; jistieden, f’każijiet bħal dawn, lill-Istati Membri jżommu kooperazzjoni transfruntiera u, meta xieraq, interazzjoni mill-qrib mal-awtoritajiet lokali u reġjonali rilevanti;

13.Jinsab imħasseb dwar l-eżistenza ta’ nuqqasijiet fl-implimentazzjoni tad-Direttiva dwar il-Protezzjoni Konsulari u ta’ nuqqasijiet fil-funzjonament tan-networks konsulari tal-Istati Membri, filwaqt li jinnota li dawn żdiedu wara l-ħruġ tar-Renju Unit mill-UE; jiddeplora, f’dan ir-rigward, il-fatt li ċ-ċittadini tal-UE għandhom aċċess limitat għall-protezzjoni u l-assistenza konsulari f’xi pajjiżi mhux tal-UE;

14.Jirrimarka li kien hemm każijiet fejn żewġ persuni li huma nazzjonali ta’ żewġ Stati Membri differenti ma setgħux iwettqu ċerti formalitajiet, pereżempju, jiżżewġu, fir-rappreżentanza konsulari ta’ wieħed mill-Istati Membri, avolja l-Istat Membru l-ieħor ma għandux rappreżentanza konsulari aċċessibbli f’dak il-pajjiż;

15.Iqis li n-nuqqas ta’ uniformità fir-regoli tal-Istati Membri dwar l-akkwist u t-telf taċ-ċittadinanza nazzjonali wassal għal differenzi fir-rigward tal-akkwist u t-telf taċ-ċittadinanza tal-UE, u li dawn id-differenzi rriżultaw, f’xi każijiet, fi ksur tal-prinċipji u tal-valuri tal-UE;

16.Jisħaq li għad hemm diversi każijiet fejn l-akkwist ta’ dritt ta’ residenza derivat għal nazzjonali mhux tal-UE li d-dipendenti minuri tagħhom huma ċittadini tal-UE jiġi rrifjutat, minkejja l-iżviluppi fil-każistika tal-QĠUE;

17. Itenni t-tħassib tiegħu dwar id-diskriminazzjoni mġarrba minn koppji tal-istess sess u mit-tfal tagħhom meta jeżerċitaw id-dritt fundamentali għal-libertà ta’ moviment fi ħdan l-UE;

18.Jistieden lill-Istati Membri u lill-awtoritajiet reġjonali u lokali jimplimentaw bis-sħiħ id-direttivi eżistenti dwar id-drittijiet taċ-ċittadini mobbli u minnufih jindirizzaw in-nuqqasijiet eżistenti differenti fid-dawl tal-elezzjonijiet Ewropej li ġejjin; jappella għall-ħolqien ta’ kampanji ta’ sensibilizzazzjoni mmirati fil-pajjiż ta’ residenza biex iċ-ċittadini mobbli tal-UE jiġu infurmati dwar id-dritt tagħhom li jivvutaw u li jikkontestaw għal kariga fl-elezzjonijiet Ewropej u muniċipali f’dak il-pajjiż; itenni t-talba tiegħu biex id-drittijiet taċ-ċittadini mobbli jiġu estiżi għall-elezzjonijiet nazzjonali u reġjonali;

19.Jistieden lill-Istati Membri jiggarantixxu d-dritt tan-nazzjonali espatrijati tagħhom li jivvutaw fil-pajjiż ta’ oriġini tagħhom, fejn ikun rikonoxxut, billi joħolqu l-kundizzjonijiet regolatorji li jippermettu l-vot tagħhom u billi jneħħu kwalunkwe ostaklu burokratiku li jxekkel u kultant jipprevjeni l-eżerċizzju ta’ dan id-dritt; jistieden, b’mod partikolari, lill-Istati Membri jiggarantixxu tali drittijiet b’mod ugwali u jeliminaw kwalunkwe tip ta’ trattament differenzjali fost in-nazzjonali espatrijati tagħhom f’dak li għandu x’jaqsam ma’ votazzjoni remota, speċjalment il-vot bil-posta, meta applikabbli; jappella għall-applikazzjoni uniformi tad-dritt tal-vot fl-elezzjonijiet Ewropej għaċ-ċittadini tal-UE residenti barra mill-UE;

20.Jistieden lill-Kummissjoni tadotta komunikazzjoni ġdida li tiċċara ċerti kunċetti ewlenin li jinsabu fid-Direttiva 2004/38/KE dwar id-dritt taċ-ċittadini tal-UE u tal-familji tagħhom li jiċċaqilqu u jirrisjedu liberament fl-UE, sabiex tipprovdi lill-Istati Membri b’linji gwida aġġornati li jistgħu jikkontribwixxu għat-titjib tal-implimentazzjoni tad-Direttiva fil-livell nazzjonali, u b’hekk jibbenefikaw iċ-ċittadini tal-UE u l-membri tal-familja tagħhom;

21.Jitlob lill-UE tippromwovi l-adozzjoni ta’ Karta Ewropea vinkolanti dwar id-Drittijiet Diġitali, inklużi drittijiet taċ-ċittadinanza diġitali, li tibni fuq id-Dikjarazzjoni Ewropea dwar id-Drittijiet u l-Prinċipji Diġitali għad-Deċennju Diġitali;

22.Jilqa’ l-proposta tal-Kummissjoni li taġġorna u ttejjeb id-Direttiva dwar il-Protezzjoni Konsulari sabiex issaħħaħ id-dritt taċ-ċittadini tal-UE għall-protezzjoni konsulari, b’mod partikolari f’sitwazzjonijiet ta’ kriżi, inkluż billi tagħti lid-delegazzjonijiet tal-UE rwol aktar attiv fl-assistenza liċ-ċittadini tal-UE sottorappreżentati;

23.Jistieden lill-Istati Membri jtemmu l-programmi tal-“viżi tad-deheb” u l-iskemi għall-investituri u kwalunkwe skema nazzjonali simili oħra li twassal għall-akkwist taċ-ċittadinanza tagħhom u tinvolvi l-bejgħ dirett jew indirett u l-abbuż taċ-ċittadinanza tal-UE, peress li dawn jikkompromettu l-kunċett proprju ta’ ċittadinanza tal-UE u jiksru l-prinċipji u l-valuri tal-UE; iħeġġeġ lill-Istati Membri jissalvagwardjaw l-integrità u l-valur taċ-ċittadinanza tal-UE; jistieden lill-Kummissjoni tieħu kwalunkwe azzjoni meħtieġa, bħal pereżempju tirreferi lill-Istati Membri rilevanti lill-QĠUE;

24. Jappella, f’dan il-kuntest tar-reviżjoni li jmiss tat-Trattati, biex il-Parlament u l-Kunsill ikunu jistgħu, f’konformità mal-proċedura leġiżlattiva ordinarja, jadottaw dispożizzjonijiet komuni dwar il-prevenzjoni tal-bejgħ ta’ passaporti, jew abbużi oħra rigward l-akkwist u t-telf taċ-ċittadinanza tal-UE minn nazzjonali ta’ pajjiżi terzi, bl-għan li jiġu approssimati l-kundizzjonijiet li skonthom tista’ tinkiseb tali ċittadinanza;

25.Jistieden lill-Istati Membri u lill-awtoritajiet rilevanti jadattaw il-kurrikuli eżistenti tal-iskejjel jew joħolqu oħrajn ġodda biex jgħallmu l-istorja tal-Ewropa u tal-Unjoni Ewropea u tal-funzjonament tagħha sabiex jippromwovu ċ-ċittadinanza attiva u l-valuri komuni Ewropej u tiżdied is-sensibilizzazzjoni dwar il-valur miżjud li tkun ċittadin Ewropew u tal-UE; jisħaq li t-tisħiħ tad-dimensjoni Ewropea tal-edukazzjoni ċivika u l-iżgurar ta’ aċċess ugwali għal kulħadd, anke bl-użu tal-għodod diġitali kollha għad-dispożizzjoni tagħna, se jippermettu liċ-ċittadini tal-UE jaġixxu bħala ċittadini infurmati u jipparteċipaw bis-sħiħ fil-ħajja ċivika, politika u soċjali kemm fil-livell Ewropew kif ukoll f’dak nazzjonali; jisħaq li Erasmus+ jista’ jaqdi rwol importanti biex l-edukazzjoni tal-UE tingħata spinta permezz ta’ mobbiltà fit-tagħlim għal kulħadd, irrispettivament mill-età, il-ġeneru, l-impjieg jew il-livell ta’ edukazzjoni;

26.Jistieden lill-Kummissjoni tiżviluppa konsultazzjonijiet pubbliċi mfassla għaċ-ċittadini kollha tal-UE, speċjalment għaż-żgħażagħ, sabiex tiżdied il-parteċipazzjoni taċ-ċittadini tal-UE; iħeġġeġ lill-Kummissjoni taġġorna l-mod li bih jitwettqu l-konsultazzjonijiet pubbliċi sabiex jissaħħu l-involviment ċiviku u l-parteċipazzjoni minn varjetà usa’ ta’ ċittadini Ewropej, f’konformità mal-eżempju ta’ suċċess tal-CoFE; jistieden lill-Kummissjoni, f’dan ir-rigward, biex tkompli ttejjeb il-portal “Semma’ Leħnek”, filwaqt li tisfrutta t-teknoloġiji ġodda, u tikkomunika dwar kif il-feedback taċ-ċittadini jikkontribwixxi għal inizjattivi differenti;

27.Jappella għall-ħolqien ta’ punt uniku ta’ servizz għall-għodod parteċipattivi kollha tal-UE, bħall-Inizjattiva taċ-Ċittadini Ewropej, il-petizzjonijiet lill-Parlament, l-ilmenti lill-Ombudsman Ewropew, il-konsultazzjonijiet pubbliċi u d-Djalogi maċ-Ċittadini, u biex tissaħħaħ l-effiċjenza ta’ dawn l-għodod, b’mod partikolari billi jiġi żgurat li dawn jikkontribwixxu għat-tfassil tal-aġenda Ewropea, filwaqt li jiġi ggarantit ukoll li d-demokrazija rappreżentattiva tissaħħaħ fil-proċess ta’ teħid tad-deċiżjonijiet; jistieden lill-Kummissjoni, lill-Istati Membri u lill-awtoritajiet reġjonali u lokali jżidu l-isforzi tagħhom fil-komunikazzjoni lill-pubbliku dwar l-istrumenti parteċipattivi eżistenti;

28.Itenni l-proposta tiegħu li jinħoloq mekkaniżmu permanenti ta’ konsultazzjoni maċ-ċittadini li jippermetti liċ-ċittadini, speċjalment liż-żgħażagħ, jiddeliberaw dwar il-prijoritajiet u l-politiki tal-UE, filwaqt li jikkontribwixxi għall-applikazzjoni, fost affarijiet oħra, ta’ “kontroll taż-żgħażagħ” fil-leġiżlazzjoni bl-għan li jikkomplementa u mhux jissostitwixxi d-demokrazija parlamentari rappreżentattiva; jipproponi li r-rappreżentanti tal-Parlament għandhom jiġu infurmati dwar dawn id-deliberazzjonijiet sabiex ikunu jistgħu jivvalutaw jekk għandhomx jipprovdu segwitu, jekk ikun xieraq;

29.Jipproponi li tiġi kkunsidrata l-introduzzjoni ta’ karta taċ-ċittadini Ewropej, li tista’, pereżempju, tiffaċilita l-eżerċizzju tad-drittijiet taċ-ċittadinanza u l-vot fl-elezzjonijiet Ewropej kif ukoll l-użu ta’ strumenti parteċipattivi;

30. Jissottolinja r-rwol sinifikanti tal-uffiċċji ta’ Europe Direct fiż-żieda tal-parteċipazzjoni taċ-ċittadini fil-livell lokali fil-ħajja demokratika tal-UE; iħeġġeġ lill-Istati Membri u lill-entitajiet fil-livell reġjonali u lokali biex iżidu l-kooperazzjoni ma’ dawn l-uffiċċji;

31. Jistieden lill-Kummissjoni żżid l-użu tagħha tal-media soċjali u tal-għodod diġitali, b’enfasi partikolari fuq it-tisħiħ tal-involviment taż-żgħażagħ u ta’ persuni b’diżabbiltà fil-proċess demokratiku, u b’hekk tippromwovi l-involviment tagħhom, filwaqt li tirrikonoxxi wkoll li fl-Istati Membri tbaxxiet l-età għall-eżerċizzju tad-dritt tal-vot għall-elezzjonijiet Ewropej; jistieden lill-Kummissjoni, f’dan ir-rigward, tagħti spinta l-promozzjoni tal-parteċipazzjoni demokratika billi żżid id-djalogu tagħha maċ-ċittadini u s-sensibilizzazzjoni fost iċ-ċittadini dwar l-impatt tal-leġiżlazzjoni tal-UE fuq il-ħajja tagħhom ta’ kuljum;

32. Iqis li, fid-dawl tal-influwenza dejjem akbar tal-isfera diġitali fuq il-ħajja taċ-ċittadini, speċjalment il-media soċjali u l-IA, jibqa’ essenzjali li l-Istati Membri u l-istituzzjonijiet Ewropej iżommu l-enfasi tagħhom fuq il-ħolqien ta’ politiki pubbliċi ġodda u l-implimentazzjoni ta’ mekkaniżmi effettivi mmirati lejn is-salvagwardja tad-drittijiet fundamentali online u l-ġlieda kontra l-indħil barrani u d-diżinformazzjoni, peress li jirrappreżentaw theddid eżistenzjali għad-demokrazija u l-eżerċizzju proprju tad-drittijiet taċ-ċittadini;

33.Iħeġġeġ lill-Kunsill u lill-Kummissjoni jerġgħu jibdew in-negozjati dwar ir-reviżjoni tar-Regolament (KE) Nru 1049/2001 Ir-Regolament (KE) Nru 1049/2001 tal-Parlament Ewropew u tal-Kunsill tat-30 ta’ Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni, ĠU L 145, 31.5.2001, p. 43. bl-għan li jiġi żgurat li ċ-ċittadini tal-UE jkunu jistgħu jeżerċitaw bis-sħiħ id-dritt tagħhom ta’ aċċess għad-dokumenti u li jiskrutinizzaw l-istituzzjonijiet, il-korpi, l-uffiċċji u l-aġenziji tal-UE.

34. Itenni l-ħtieġa li jitfassal statut taċ-ċittadinanza tal-UE, abbażi tal-Artikolu 25 tat-TFUE, li jikkompila d-drittijiet eżistenti u futuri taċ-ċittadinanza sabiex isaħħaħ l-infurzabbiltà tad-drittijiet taċ-ċittadinanza u jiżgura l-ugwaljanza taċ-ċittadini, filwaqt li jtejjeb il-koeżjoni u jirrispondi għall-bidliet soċjali, ekonomiċi, politiċi u diġitali; ifakkar li dan għandu jitwettaq fil-qafas tat-Trattati;

35.Jissuġġerixxi li, fil-qasam tal-parteċipazzjoni u tad-drittijiet politiċi, tal-libertà ta’ moviment u ċ-ċittadinanza diġitali, u f’konformità mal-leġiżlazzjoni eżistenti u futura tal-UE, iċ-ċittadini għandu jkollhom, b’mod partikolari:–rappreżentanza demokratika fil-listi elettorali li tkun ibbilanċjata bejn il-ġeneri;–pjattaforma diġitali interattiva permanenti li permezz tagħha ċ-ċittadini jkunu jistgħu jressqu l-proposti u l-ideat tagħhom fil-lingwi uffiċjali kollha tal-UE;–ir-rikonoxximent tal-perjodi ta’ studju, mhux biss il-kwalifiki u l-kompetenzi professjonali, bħala ekwivalenti biex ikunu jistgħu jaħdmu fi Stat Membru ieħor;–aċċess universali għall-internet biex jiġu żgurati l-inklużjoni u aċċess ugwali taċ-ċittadini għall-ambjent diġitali;–il-ġestjoni minn individwu tal-identità tiegħu stess, li tmur lil hinn mill-protezzjoni li diġà teżisti fir-rigward tad-data personali fl-ambjent diġitali;–il-wirt diġitali tad-data diġitali ta’ persuna mejta;–l-iżvilupp ta’ sistemi tal-IA li jkunu sikuri, trasparenti, traċċabbli u ssorveljati min-nies u mill-istituzzjonijiet regolatorji;

36.Jappella għall-inklużjoni ta’ klawżola ta’ nondiskriminazzjoni orizzontali fl-istatut taċ-ċittadinanza tal-UE bħala salvagwardja addizzjonali tal-ugwaljanza fl-eżerċizzju tad-drittijiet taċ-ċittadinanza, bil-ħsieb li tiġi żgurata n-nondiskriminazzjoni u jiġu protetti ċ-ċittadini, b’mod partikolari membri ta’ gruppi vulnerabbli u emarġinati u persuni li jgħixu fir-reġjuni transfruntiera tal-UE;

37.Jistieden lill-Kummissjoni tmexxi kampanji mmirati ta’ sensibilizzazzjoni b’rabta mad-drittijiet u mad-dmirijiet ċiviċi li jirriżultaw miċ-ċittadinanza tal-UE u mill-istatut, inkluż billi tintroduċi pakkett tal-UE biex tipprovdi informazzjoni dwar iċ-ċittadinanza tal-UE, u tiddedika aktar riżorsi għaċ-ċittadinanza tal-UE; jenfasizza li bir-rivoluzzjoni diġitali u teknoloġika, iċ-ċittadini saru l-veru pilastri tas-sistemi demokratiċi tagħna u se jkunu dawk li jiddefenduhom;

38.Jieħu nota tal-pakkett dwar iċ-ċittadinanza, b’mod partikolari r-Rapport dwar iċ-Ċittadinanza tal-UE tal-2023, ippubblikat mill-Kummissjoni fis-6 ta’ Diċembru 2023 li jkompli javvanza ċ-ċittadinanza tal-UE u jagħmilha aktar tanġibbli għaċ-ċittadini tal-UE; jistieden lill-Kummissjoni tqis ir-rakkomandazzjonijiet inklużi f’dan ir-rapport u tieħu l-passi meħtieġa biex timplimentahom skont il-proċedura fl-ambitu tat-Trattati;

39.Itenni t-talba tiegħu biex titlaqqa’ Konvenzjoni għar-reviżjoni tat-Trattati, kif previst fl-Artikolu 48 tat-TUE; jemmen bis-sħiħ li l-Konvenzjoni għandha tivvaluta bir-reqqa kif iċ-ċittadinanza tal-UE tista’ tissaħħaħ aktar;

40.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.