1.Jevidenzja t-twissijiet ripetuti mill-aġenziji tal-intelligence dwar ir-riskji ta’ dipendenza ekonomika, spjunaġġ u sabotaġġ ikkawżati mill-preżenza ekonomika u l-involviment operattiv ta’ entitajiet minn pajjiżi mhux tal-UE fl-infrastruttura kritika u s-setturi strateġiċi tagħna, bħall-portijiet AIVD, MIVD and NCTV, Dreigingsbeeld Statelijke Actoren 2, Novembru 2022., inkluż l-attivitajiet ta’ bastimenti barranin;

2.Jappella lill-Kummissjoni tippreżenta qafas ta’ politika strateġika tal-UE biex tnaqqas u tillimita l-influwenza u l-kontroll finanzjarju u operattiv eżerċitat fuq il-portijiet tal-UE u fil-proċessi u l-operazzjonijiet interni tagħhom minn pajjiżi mhux tal-UE, inklużi każijiet ta’ parteċipazzjoni u kontroll fil-ġestjoni ta’ awtorità portwarja, fl-ispirtu li jinstab bilanċ bejn li l-ambjent ta’ investiment jibqa’ miftuħ u l-mitigazzjoni tar-riskji; jappella lill-Kummissjoni u lill-Istati Membri jimmonitorjaw ukoll l-involviment ta’ pajjiżi terzi fil-portijiet ta’ pajjiżi ġirien fl-ambitu tal-Politika Ewropea tal-Viċinat u l-Politika tat-Tkabbir;

3.Jappella lill-Kummissjoni tipproponi qafas għall-monitoraġġ u għar-rapportar fuq bażi kontinwa, b’mod konġunt mal-Istati Membri, dwar l-influwenza tal-pajjiżi mhux tal-UE fil-portijiet tal-UE, b’mod partikolari fil-portijiet TEN-T, fil-ġestjoni tat-terminals tal-UE u fit-tbaħħir globali tal-kontejners u tivvaluta r-rabtiet potenzjali bejn l-azzjonijiet ta’ pajjiż mhux tal-UE partikolari f’dawn is-setturi;

4.Jisħaq li l-limitazzjoni tal-investimenti barranin, b’mod partikolari minn intrapriżi fejn l-istat huwa s-sid jew għandu kontroll jew influwenza, f’port individwali fi Stat Membru wieħed tista’ taffettwa b’mod negattiv il-pożizzjoni kompetittiva ta’ dak il-port meta mqabbla ma’ portijiet ġirien li ma għandhomx dawn il-limitazzjonijiet, u dan jissottolinja l-ħtieġa ta’ strateġija Ewropea konġunta għall-portijiet; iqis li t-tixrid asimmetriku tal-investimenti barranin bejn il-pajjiżi tal-UE jista’ jhedded l-unità, il-kapaċitajiet ta’ maniġġar ta’ kriżijiet u r-reżiljenza tal-UE; jitlob lill-Kummissjoni tanalizza l-impatt potenzjali fuq l-impjiegi u l-kummerċ fil-livell lokali u tal-UE li jista’ jirriżulta mil-limitazzjoni tal-investimenti mhux tal-UE fil-portijiet Ewropej;

5.Iħeġġeġ lill-awtoritajiet portwarji nazzjonali, lill-Istati Membri u lill-Kummissjoni jiżviluppaw format adegwat għall-kooperazzjoni strateġika bejn il-portijiet Ewropej sabiex jitnaqqas ir-riskju li atturi esterni jilagħbuhom kontra xulxin;

6.Jisħaq li minkejja l-eżistenza ta’ mekkaniżmi protettivi fil-livell tal-UE, bħall-iskrinjar tal-investimenti diretti barranin u r-regoli tal-kompetizzjoni, dawn l-istrumenti mhumiex biżżejjed biex jindirizzaw is-saħħa ekonomika dejjem akbar tas-setgħat esterni permezz ta’ kumpaniji individwali, inklużi intrapriżi kkontrollati jew influwenzati mill-istat, u jiddependu ħafna fuq l-implimentazzjoni minn Stati Membri individwali;

7.Jissottolinja l-importanza li tiżdied il-kooperazzjoni tal-UE fl-iskrinjar u l-imblokkar ta’ investimenti deħlin f’infrastruttura kritika fejn ma jistgħux jiġu esklużi impatti negattivi kbar fuq Stati Membri oħra jew fuq l-UE fl-intier tagħha, u li din il-kooperazzjoni għandha tinkludi l-kondiviżjoni ta’ informazzjoni dwar it-theddid u l-opportunitajiet;

8.Iħeġġeġ bil-qawwa lill-Kummissjoni biex issaħħaħ ir-rwol tal-miżuri protettivi għall-portijiet permezz ta’ reviżjoni ambizzjuża tar-Regolament dwar l-Investimenti Diretti Barranin Ir-Regolament (UE) 2019/452 tal-Parlament Ewropew u tal-Kunsill tad-19 ta’ Marzu 2019 li jistabbilixxi qafas għall-iskrinjar tal-investimenti diretti barranin fl-Unjoni (ĠU L 79I, 21.3.2019, p. 1). (ir-Regolament dwar l-IDB), inkluż billi tagħmel sistema ta’ skrinjar tal-investiment dirett barrani obbligatorja fl-Istati Membri kollha, filwaqt li tiżgura li l-proċessi ta’ skrinjar ikunu ċari u oġġettivi u li d-definizzjonijiet, il-kamp ta’ applikazzjoni u l-aspetti proċedurali jkunu konsistenti fl-Istati Membri kollha, sabiex jiġu żgurati kundizzjonijiet ekwi fl-UE kollha;

9.Jissottolinja wkoll l-importanza kruċjali tal-mekkaniżmu fl-Artikolu [47] tar-Regolament TEN-T rivedut [xxx/2024], li jagħti mandat lill-Istati Membri biex jiskrinjaw l-investimenti ta’ pajjiżi terzi fl-infrastruttura tat-TEN-T għar-riskji potenzjali tagħhom għas-sigurtà jew l-ordni pubbliku, li jridu jitqiesu bħala komplementari għad-dispożizzjonijiet tar-Regolament dwar l-IDB, peress li dan il-mekkaniżmu japplika kemm għall-investimenti fl-infrastruttura (pereżempju bl-akkwist ta’ ishma f’terminal) kif ukoll għal xogħlijiet ta’ infrastruttura mwettqa fl-UE minn kumpanija ta’ pajjiż terz (pereżempju f’akkwist pubbliku biex jinbena terminal f’port Ewropew) u jisħaq li l-applikazzjoni effettiva tiegħu għall-infrastruttura tal-port ikkonċernat għandhom ikunu pedament ta’ strateġija portwarja Ewropea;

10.Jissottolinja l-importanza tal-monitoraġġ tal-implimentazzjoni tar-Regolament (UE) 2022/2560 dwar sussidji barranin li joħolqu distorsjoni fis-suq intern; jappella lill-Kummissjoni timmonitorja mill-qrib is-suq tas-settur portwarju u, jekk meħtieġ, tintervjeni ex officio kif previst fl-Artikolu 9 ta’ dan ir-Regolament;

11.Jappella lill-Kummissjoni tirriċerka u tivvaluta l-impatt tal-integrazzjoni vertikali fil-loġistika marittima, tar-Regolament dwar l-Eżenzjoni ta’ Kategorija għall-Konsorzji, li ser jiskadi fl-2024, u tal-formazzjoni ta’ alleanzi ta’ tbaħħir tal-kontejners fuq l-influwenza tal-pajjiżi mhux tal-UE fil-portijiet tal-UE; jappella lill-Kummissjoni tintervjeni kull meta jkun meħtieġ, sabiex tiżgura kompetizzjoni ġusta, bilanċ ta’ poter ġust u kundizzjonijiet ekwi għall-atturi kollha fl-ekosistema portwarja;

12.Jissottolinja li, b’mod partikolari, il-preżenza aggregata ta’ intrapriżi taħt il-kontroll u/jew l-influwenza tal-istat Ċiniż fil-portijiet u n-nodi tan-network ewlieni tan-Network Trans-Ewropew tat-Trasport (TEN-T) għandha implikazzjonijiet importanti għar-reżiljenza u s-sigurtà tan-nodi individwali u tan-network kollu kemm hu; ifakkar li l-preżenza ta’ investituri terzi fil-portijiet tista’ xxekkel ir-rwol ta’ użu doppju tagħhom;

13.Jappella lill-Kummissjoni u lill-Istati Membri jwettqu b’urġenza valutazzjoni tar-riskju tal-involviment taċ-Ċina fl-infrastrutturi marittimi, li tinkludi l-impatt ta’ dan fuq ix-xogħol u l-ambjent, id-dipendenzi u valutazzjoni tal-konġestjonijiet fit-trasport tal-merkanzija miċ-Ċina lejn l-UE u t-trażbord u li l-valutazzjoni għandha tinkludi wkoll pajjiżi oħra mhux tal-UE;

14.Ifakkar li s-settur marittimu u s-settur portwarju fl-Ewropa huma kkaratterizzati minn akkumulazzjoni ta’ strutturi ta’ governanza differenti li għandhom mezzi differenti biex jippermettu investimenti, li jvarjaw minn skemi ta’ liċenzjar u konċessjoni, fuq l-għoti ta’ sjieda ta’ infrastruttura tal-portijiet, sa setgħa kompletament operazzjonali fuq l-awtoritajiet portwarji; jevidenzja f’dan ir-rigward l-importanza tal-miżuri ta’ mitigazzjoni tar-riskju tal-korpi tal-ġestjoni portwarja biex jissalvagwardjaw il-kontroll permezz tal-istabbiliment ta’ diversi kundizzjonijiet (operattivi, soċjali, ambjentali, eċċ.), li skonthom għandu jitħaddem terminal; jissottolinja, madankollu, il-limiti ta’ approċċ ibbażat esklużivament fuq konċessjonijiet portwarji u/jew kuntratti ta’ kiri;

15.Jissuġġerixxi li l-Istati Membri kollha jintroduċu liġijiet u jiżviluppaw pjanijiet ta’ kontinġenza għal xenarju ta’ kunflitt kbir jew stat ieħor ta’ emerġenza, jew għal każijiet ta’ użu ħażin ċar jew użu doppju ta’ infrastruttura kritika b’riperkussjonijiet negattivi għas-sigurtà jew l-ordni pubbliku, sabiex ikunu jistgħu jieħdu kontroll mill-ġdid tal-portijiet, tat-terminals u ta’ infrastrutturi marittimi oħra, inkluż il-kanċellazzjoni tad-drittijiet ta’ konċessjoni u/jew is-sospensjoni tal-kapaċità ta’ dominju f’każijiet ta’ proprjetà u parteċipazzjoni;

16.Jappella biex l-investimenti pubbliċi u privati sinifikanti fil-portijiet li jinsabu fit-territorji ekstra-Ewropej u fir-reġjuni ultraperiferiċi jsiru raggruppamenti strateġiċi għat-trasport multimodali, il-ġenerazzjoni, il-ħżin u d-distribuzzjoni tal-enerġija kif ukoll id-difiża; jappella lill-Kummissjoni biex fil-proposta tagħha tinkludi dispożizzjonijiet biex tillimita l-influwenza u l-kontroll operazzjonali minn pajjiżi mhux tal-UE f’dawk il-portijiet;

17.Jappella lill-Kummissjoni u lill-Istati Membri jindirizzaw b’mod speċifiku l-ħtieġa li jipprevjenu u jnaqqsu r-riskji ta’ spjunaġġ u sabotaġġ fil-portijiet b’użu doppju jew funzjoni militari, bħall-portijiet li jintużaw min-NATO, inkluż permezz ta’ bastimenti barranin;

18.Jappella lill-Kummissjoni u lill-Istati Membri jindirizzaw l-użu ta’ teknoloġija affidabbli fil-loġistika marittima u fil-funzjonament tat-terminals tal-kontejners; jesprimi t-tħassib tiegħu dwar id-dipendenza dejjem akbar fuq produtturi mhux tal-UE għal tagħmir ta’ sigurtà (fil-fruntieri) fil-portijiet, inklużi l-krejnijiet ship-to-shore li jistgħu jiġbru data dwar l-oriġini u d-destinazzjoni tal-kontejners; iħeġġeġ investimenti fir-riċerka u fl-iżvilupp f’dawk l-oqsma sabiex il-kumpaniji tal-UE jkunu minn tal-ewwel fil-produzzjoni u fil-bejgħ ta’ dawn it-teknoloġiji;

19.Iqis li operazzjonijiet loġistiċi kumplessi u diġitali ħafna jwasslu għal vulnerabbiltà akbar fl-interruzzjonijiet ta’ ktajjen loġistiċi sħaħ; jitlob, għaldaqstant, li l-aċċess li entitajiet barranin ikkontrollati jew influwenzati mill-istat għandhom għal operazzjonijiet u informazzjoni tal-port jiġi limitat u mmonitorjat;

20.Jappella lill-Kummissjoni tagħti attenzjoni partikolari għat-theddida li jistgħu joħolqu l-investimenti barranin għall-proprjetà intellettwali, b’mod partikolari permezz ta’ trasferimenti ta’ teknoloġija furzata;

21.Jenfasizza li livell għoli ta’ ċibersigurtà u reżiljenza ċibernetika tal-atturi kollha fil-portijiet tagħna huwa kruċjali biex jiġu evitati l-ispjunaġġ u t-tfixkil serju tas-sistemi u l-operazzjonijiet portwarji, filwaqt li r-riskju ta’ theddid ċibernetiku żdied b’mod sinifikanti fl-aħħar ftit snin; jitlob lill-Kummissjoni tagħmel aktar riċerka u tiġbor data dwar il-kopertura u r-riskji tal-involviment tal-kumpaniji mhux tal-UE fiċ-ċibersigurtà u s-sigurtà tad-data fl-infrastruttura kritika u tappoġġja l-iżvilupp ta’ pjanijiet ta’ kontinġenza komprensivi għall-portijiet bl-appoġġ tekniku u operattiv tal-Aġenzija Ewropea għas-Sigurtà Marittima; iqis li r-riskju ta’ effetti kollaterali negattivi minn nuqqas ta’ ċibersigurtà minn port għal ieħor huwa kbir u li għalhekk għandhom jinżammu standards għoljin mill-Istati Membri kollha u li hija rakkomandata l-kondiviżjoni tal-aħjar prattiki u esperjenzi;

22.Jevidenzja l-importanza li qed tikber tal-protezzjoni tal-infrastruttura kritika fuq il-baħar u taħt l-ilma (inklużi l-pipelines tal-enerġija, in-networks tal-komunikazzjoni u l-faċilitajiet tal-enerġija rinnovabbli lil hinn mill-kosta) għas-sikurezza u għas-sigurtà tal-ilmijiet tal-UE u tal-operazzjonijiet fihom;

23.Jissottolinja li filwaqt li l-kondiviżjoni tad-data fil-loġistika tikkontribwixxi għall-effiċjenza, l-aġilità u r-reżiljenza tal-ktajjen tal-provvista, l-użu ta’ pjattaformi mhux tal-UE fejn l-istat huwa s-sid jew għandu kontroll jew influwenza fil-portijiet joħloq riskji ekonomiċi u strateġiċi għall-UE u għandu jiġi evitat;

24.Jiddeplora l-fatt li l-portijiet tal-UE jintużaw b’mod ħażin mill-organizzazzjonijiet kriminali bħala punti ta’ dħul ewlenin għad-drogi illeċiti, li għandu effett fuq is-soċjetà kollha kemm hi u jimmina s-sikurezza tal-portijiet, tal-bliet fil-viċinat u tar-residenti tagħhom; jappella lill-Kummissjoni tippreżenta miżuri għal kooperazzjoni Ewropea effettiva fil-ġlieda kontra t-traffikar tad-drogi, l-estrazzjoni u s-sovverżjoni kriminali; jilqa’ f’dan ir-rigward il-pjan direzzjonali tal-Kummissjoni tat-18 ta’ Ottubru 2023 għall-ġlieda kontra t-Traffikar tad-Droga u l-Kriminalità Organizzata u jissottolinja l-ħtieġa ta’ approċċ ikkoordinat tal-UE għall-ġlieda kontra kull tip ta’ kriminalità organizzata transnazzjonali;

25.Jisħaq li l-portijiet Ewropej huma partikolarment esposti għat-traffikar ta’ prodotti illeċiti oħra, bħal armi jew prodotti foloz, kif ukoll għal frodi doganali u tal-VAT u li huwa wkoll meħtieġ li tissaħħaħ il-ġlieda kontra dawn l-attivitajiet; jissottolinja f’dan ir-rigward l-importanza tal-kooperazzjoni bejn il-korpi tal-ġestjoni tal-portijiet u l-awtoritajiet tal-infurzar tal-liġi, inkluż fl-użu ta’ għodod u data diġitali biex jiġu żgurati operazzjonijiet portwarji sikuri u siguri; iqis li, meta jkun hemm ġustifikazzjoni legali suffiċjenti, il-portijiet għandhom ikunu jistgħu jaċċessaw l-għodod kollha li jeħtieġu biex jikkontribwixxu għas-sigurtà tagħhom;

26.Jissottolinja li s-sigurtà tal-portijiet tiddependi mir-reżiljenza tagħhom għat-tibdil fil-klima u fl-ambjent; jappella, għaldaqstant, lill-Kummissjoni twettaq studju biex tanalizza r-riskji klimatiċi għall-portijiet Ewropej u l-infrastruttura tat-trasport relatata, filwaqt li tistabbilixxi kategoriji ta’ riskji (pereżempju livelli tal-baħar li qegħdin jogħlew, għargħar, sħana estrema) biex tanalizza r-riskji skont ir-reġjun u tidentifika l-miżuri biex jiġu indirizzati dawn ir-riskji, inklużi l-ispejjeż ta’ dawn il-miżuri u l-investimenti meħtieġa; jappella lill-Istati Membri jwettqu valutazzjoni tar-riskju ambjentali fit-tul tal-infrastruttura portwarja kritika tagħhom u jieħdu miżuri ta’ adattament f’waqthom;

27.Jisħaq fuq ir-rwol vitali li għandhom il-portijiet fit-tranżizzjoni tal-enerġija kif stabbilit fil-Patt Ekoloġiku tal-UE, bħala ċentri tal-enerġija għall-konverżjoni, il-kundizzjonament u l-ħżin tat-trasportaturi tal-enerġija, għall-ġenerazzjoni tal-enerġija, għall-importazzjoni ta’ materja prima kritika, bħala ċentri tal-qbid u ħżin tad-diossidu tal-karbonju, bħala stazzjonijiet tas-servizz u ċentri tal-manifattura għall-faċilitajiet tal-enerġija lil hinn mill-kosta u bħala nodi fis-sistemi tat-trasport li jappoġġjaw it-tranżizzjoni tal-enerġija;

28.Ifakkar li sal-2030, l-UE għandha l-għan li timporta 10 miljun tunnellata ta’ idroġenu ekoloġiku u li, biex tilħaq dan l-għan, strateġija komprensiva dwar l-importazzjoni, il-koordinament u l-iżvilupp tal-infrastruttura hija essenzjali għall-Istrateġija Ewropea tal-Portijiet u għandha tiġi stabbilita minnufih;

29.Jappella lill-Kummissjoni u lill-Istati Membri jindirizzaw il-ħtieġa dejjem akbar ta’ investimenti fil-portijiet u fit-terminals u l-infrastruttura tagħhom sabiex ikunu jistgħu jaqdu r-rwol tagħhom fit-tranżizzjoni tal-enerġija; jappella lill-Kummissjoni tanalizza u tindirizza l-ħtieġa li jitħaffef il-proċess għall-ħruġ tal-permessi tal-espansjonijiet tal-portijiet fil-kuntest tat-tranżizzjoni tal-enerġija, bħall-varar ta’ enerġija eolika, sabiex il-portijiet ma jsirux ostaklu fit-tranżizzjoni tal-enerġija; jevidenzja l-ħtieġa ta’ ġestjoni aktar sostenibbli tal-ispazju marittimu u tal-kosti biex jiġi sfruttat il-potenzjal tal-enerġija rinnovabbli lil hinn mill-kosta; iħeġġeġ l-użu ta’ żoni tal-port għall-varar tal-enerġija fotovoltajka u eolika;

30.Jisħaq fuq l-importanza ta’ żieda fis-sinerġiji bejn in-network tat-trasport trans-Ewropew u n-network tal-enerġija trans-Ewropew;

31.Jitlob lill-Kummissjoni tinkludi l-portijiet fl-istrateġija tagħha għal Ekonomija Ċirkolari u tassisti lill-Istati Membri u lill-awtoritajiet portwarji lokali billi tipprovdi gwida dwar l-implimentazzjoni ta’ proġetti relatati maċ-ċirkolarità; jappella lill-Kummissjoni tindirizza l-problema li dejjem qed tikber ta’ tnixxija taż-żejt fil-portijiet u fil-kanali tat-tbaħħir;

32.Jitlob lill-Kummissjoni tagħti r-riżultati fir-rigward tal-ambizzjoni tagħha ta’ bidla modali kif imressqa fil-Patt Ekoloġiku u tindirizza l-isfidi li jifdal għall-passaġġi fuq l-ilma interni u, speċjalment, biex jissaħħaħ l-użu tal-merkanzija ferrovjarja fil-portijiet u l-konnettività tagħhom mal-art interna;

33.Jissottolinja li tranżizzjoni tal-enerġija fil-portijiet, fl-industrija tal-bini tal-vapuri kif ukoll fis-settur marittimu mhux se tkun possibbli mingħajr forza tax-xogħol b’ħiliet speċjalizzati u finanzjament pubbliku u privat adegwat; iħeġġeġ lill-Kummissjoni tipprovdi opportunitajiet ta’ taħriġ, edukazzjoni u tagħlim tul il-ħajja li jibqgħu validi fil-futur, u li jiġi promoss id-djalogu soċjali, biex il-ħaddiema tal-portijiet jitqiegħdu fiċ-ċentru tat-tranżizzjoni diġitali u ekoloġika, u biex l-industrija ssir aktar attraenti għan-nisa; jisħaq li r-rwol soċjetali importanti tal-portijiet li jipprovdu bosta impjiegi diretti u indiretti u jisħaq fuq il-ħtieġa li jiġu ssalvagwardjati kundizzjonijiet tax-xogħol ġusti u sikuri għall-ħaddiema kollha tal-portijiet u tas-settur marittimu; jevidenzja li l-kriżijiet reċenti wrew li l-baħħara, il-membri tal-ekwipaġġ, is-sajjieda u l-ħaddiema tal-portijiet huma ħaddiema “tal-ewwel linja” essenzjali u l-benesseri tagħhom huwa vitali biex id-dinja tibqa’ għaddejja;

34.Jisħaq li Strateġija Portwarja Ewropea għandu jkollha l-kompetittività tal-portijiet bħala waħda mill-prijoritajiet ewlenin;

35.Jisħaq li t-tisħiħ tal-pożizzjoni ekonomika tal-portijiet tal-UE u t-titjib tal-kompetittività tagħhom f’ekonomija globali huma kruċjali biex jiġu limitati l-influwenza barranija u r-riskji għas-sigurtà kif ukoll għas-sovranità tal-katina tal-provvista tal-Ewropa; iqis li l-leġiżlazzjoni Ewropea m’għandhiex timmina l-kompetittività tal-portijiet tal-UE u toħloq rilokazzjoni tal-emissjonijiet tal-karbonju u tan-negozju għall-portijiet barra l-UE;

36.Jissottolinja r-riskji ta’ delokalizzazzjoni tal-attivitajiet ta’ trażbord tal-kontejners lejn portijiet mhux tal-UE bl-għan li jiġu evitati r-rekwiżiti tad-Direttiva dwar is-sistema tal-UE għall-iskambju ta’ kwoti tal-emissjonijiet (ETS) Id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi sistema għall-iskambju ta’ kwoti ta’ emissjonijiet ta’ gassijiet serra fl-Unjoni u li temenda d-Direttiva 96/61/KE (ĠU L 275, 25.10.2003, p. 32). u r-Regolament FuelEU Maritime Ir-Regolament (UE) 2023/1805 tal-Parlament Ewropew u tal-Kunsill tat-13 ta’ Settembru 2023 dwar l-użu ta’ fjuwils rinnovabbli u b’livell baxx ta’ emissjonijiet tal-karbonju fit-trasport marittimu u li jemenda d-Direttiva 2009/16/KE (ĠU L 234, 22.9.2023, p. 48).; jappella għall-applikazzjoni stretta tad-dispożizzjonijiet dwar il-monitoraġġ tat-trażbord ta’ dawn iż-żewġ leġislazzjonijiet biex tiġi identifikata u pprojbita tali mġiba kif ukoll għal valutazzjoni dwar jekk dawn id-dispożizzjonijiet humiex biżżejjed biex jiskoraġġixxu b’mod effettiv l-imġiba evażiva għad-detriment kemm tal-ambjent kif ukoll tat-tkabbir u l-impjiegi fl-Ewropa u jekk humiex meħtieġa miżuri addizzjonali;

37.Jappella lill-Kummissjoni tanalizza u tindirizza l-ħtiġijiet ta’ investiment tal-portijiet Ewropej sabiex jibqgħu kompetittivi fil-futur u taħdem lejn klima ta’ investiment aktar stabbli inklużi t-trasparenza u l-prevedibbiltà tal-valutazzjonijiet tal-investimenti, kemm pubbliċi kif ukoll privati;

38.Jissottolinja li sabiex tinżamm il-kompetittività tal-portijiet tal-UE u l-funzjonament ta’ Strateġija Ewropea tal-Portijiet possibbli, għandhom jiġu evitati piżijiet amministrattivi eċċessivi li jistgħu jimminaw il-ħidma ta’ tali strateġija;

39.Jenfasizza li strateġija Ewropea konsistenti għall-portijiet hija essenzjali biex tiġi żgurata kompetizzjoni ġusta; iħeġġeġ li jkun hemm aktar kooperazzjoni bejn il-portijiet Ewropej u l-eliminazzjoni ta’ prattiki dannużi bħall-ipprezzar aktar baxx milli suppost;

40.Iqis li unjoni doganali li tiffunzjona tajjeb hija fundamentali għall-kompetittività, għas-sostenibbiltà u għar-reżiljenza tal-UE; jemmen li unjoni doganali riformata u msaħħa b’kodiċi doganali komuni se tippreserva l-integrità tas-suq uniku, filwaqt li tgħin biex tinżamm il-kompetittività tal-UE fit-tranżizzjoni doppja ekoloġika u diġitali u tiġi evitata l-kompetizzjoni inġusta bejn il-portijiet Ewropej;

41.Jisħaq li d-differenzi fil-politiki tal-proċedura doganali fil-punti tad-dħul tal-UE fl-unjoni doganali spiss ifixklu l-flussi kummerċjali u tipperikola l-integrità tas-suq uniku Ewropew;

42.Ifakkar fl-importanza li jkun hemm fis-seħħ kontrolli doganali armonizzati fil-portijiet Ewropej kollha biex tiġi evitata applikazzjoni differenti ta’ standards sanitarji jew ta’ diliġenza dovuta; jinsisti li l-Kummissjoni tiżgura li l-kontrolli doganali fl-UE kollha jsegwu l-istess standards, permezz ta’ mekkaniżmu dirett unifikat ta’ kontroll doganali, b’koordinazzjoni mal-Istati Membri u b’konformità sħiħa mal-prinċipju tas-sussidjarjetà;

43.Ifakkar li l-portijiet mhumiex assi awtonomi peress li għandhom posthom f’ekosistema vasta tat-trasport fuq l-ilma ta’ loġistika u industrija marittima u ktajjen tal-provvista xprunati mid-domanda tal-importaturi u l-esportaturi Ewropej;

44.Jinsab imħasseb dwar il-fatt li l-kumpaniji tat-trasport marittimu tal-UE li qed jiffaċċjaw leġiżlazzjoni restrittiva dwar il-kabotaġġ marittimu fiċ-Ċina, li effettivament ma tħallihomx iwettqu operazzjonijiet ta’ kabotaġġ bejn il-portijiet Ċiniżi, meta l-operazzjonijiet ta’ kabotaġġ jikkostitwixxu element ewlieni tal-mudell kummerċjali tal-kumpaniji tat-trasport marittimu Ċiniżi f’ċerti portijiet tal-UE u bejniethom; jappella lill-Kummissjoni tesplora l-possibbiltà li tintroduċi liġi reċiproka tal-UE dwar il-kabotaġġ marittimu li tista’ tapplika għal ċerti trasportaturi mhux tal-UE, bħaċ-Ċina; ifakkar fil-fatt li n-nuqqas ta’ reċiproċità tal-investiment fil-portijiet tagħmel ħsara lill-interessi tal-UE;

45.Jissottolinja l-importanza tal-inizjattiva tal-UE Global Gateway bħala alternattiva strateġika globali għall-Inizjattiva Ċiniża “Belt and Road”; jenfasizza l-potenzjal tal-proġetti tal-Global Gateway fl-industrija marittima (eż. l-infrastruttura tal-portijiet, il-konnessjoni bejn l-art interna u ferrovjarja, l-idroġenu ekoloġiku) biex jinħoloq network ta’ portijiet li jiffaċilitaw il-kummerċ u l-investiment u s-sħubijiet ta’ benefiċċju reċiproku;

46.Jisħaq fuq il-ħtieġa urġenti li jittejbu s-saħħa, il-kapaċità u r-reżiljenza tal-konnessjonijiet maż-żoni interni tal-portijiet Ewropej, partikolarment dawk li huma parti mit-TEN-T, filwaqt li titqies il-ħtieġa ta’ tnaqqis fl-emissjonijiet u effiċjenza enerġetika u bl-għan li ssir kemm jista’ jkun bidla mit-trasport intern għal dak ferrovjarju u bil-passaġġi fuq l-ilma interni filwaqt li ssir tħejjija wkoll għall-impatti tat-tibdil fil-klima bħal avvenimenti tat-temp estrem u livelli baxxi tal-ilma f’passaġġi fuq l-ilma interni;

47.Jissuġġerixxi li l-Kummissjoni tistabbilixxi “atlas” ta’ portijiet Ewropej li jimmappja, fost affarijiet oħra, id-disponibbiltà li l-portijiet kummerċjali Ewropej għandhom ta’ provvista tal-enerġija fuq l-art u l-fjuwils alternattivi, l-infrastruttura interna (b’mod partikolari l-ferroviji) u l-korsiji tat-tbaħħir, li possibbilment jista’ jinbena abbażi tal-mapep interattivi tat-TENtec u l-Osservatorju Ewropew tal-Fjuwils Alternattivi u li iżda għandu jinkludi wkoll portijiet iżgħar u aktar informazzjoni; iqis li tali mmappjar jista’ jgħin biex jifforma bażi fattwali ġenerali għall-iżvilupp kontinwu tal-portijiet tal-UE u l-industriji relatati, bħat-trasport tal-merkanzija u tal-passiġġieri, it-traffiku tal-kruċieri, is-sajd, l-enerġija eolika, il-bunkering tal-fjuwil u l-manifattura;

48.Jissottolinja l-importanza tal-manifattura marittima, bħall-bini tal-vapuri u l-katina tal-provvista tiegħu, fl-UE bħala pedament għaż-żamma ta’ settur fuq l-ilma prosperuż; jappella lill-Kummissjoni tirriċerka u tivvaluta l-impatt tad-dipendenza tal-Ewropa fuq manifattura marittima barranija, tiddefinixxi b’mod urġenti strateġija ambizzjuża Ewropea dwar l-industrija marittima u tieħu miżuri adegwati biex issaħħaħ il-kompetittività u r-reżiljenza tat-tarzni tal-Ewropa u l-ktajjen tal-provvista kollha tagħhom;

49.Jappella lill-Kummissjoni tintroduċi qafas diġitali abilitanti li jistimula programmi għall-innovazzjoni u d-diġitalizzazzjoni ulterjuri tal-portijiet, bħall-programmi dwar portijiet intelliġenti, bl-għan li jittejbu l-effiċjenza, il-produttività u s-sostenibbiltà tal-portijiet; jissottolinja, b’mod partikolari, il-potenzjal tad-diġitalizzazzjoni għall-ottimizzazzjoni tal-waqfiet fil-portijiet (biex jitnaqqsu l-ħinijiet ta’ stennija fl-ilmijiet kostali u fil-portijiet), il-wasliet eżatt fil-ħin, is-sistemi avvanzati ta’ navigazzjoni (għall-iffrankar tal-fjuwil u t-tnaqqis tal-emissjonijiet), is-sistemi ta’ identifikazzjoni awtomatika (għal aktar sikurezza fuq il-baħar u infurzar aħjar tad-dispożizzjonijiet ambjentali) kif ukoll għal droni u soluzzjonijiet ta’ intelliġenza artifiċjali li jwasslu għal deċiżjonijiet aħjar dwar l-infrastruttura tal-portijiet;

50.Jenfasizza li se jkun meħtieġ li jiġu allokati finanzjament u strumenti ta’ finanzjament adegwati lill-portijiet biex dawn jibqgħu kompetittivi, ikollhom rwol ta’ faċilitaturi fit-tranżizzjoni ekoloġika u jrażżnu r-riskji ta’ influwenza barranija; jitlob biex jiżdied il-finanzjament allokat għall-portijiet taħt il-Faċilità Nikkollegaw l-Ewropa; jissottolinja l-importanza tal-investimenti privati fil-portijiet u li l-kumpaniji huma dawk li jipprovdu impjieg u innovazzjoni fil-portijiet u madwarhom;

51.Jappella biex isir Summit Portwarju Ewropew fejn ikomplu jiġu żviluppati l-kwistjonijiet imsemmija hawn fuq u jiġu esplorati l-possibbiltajiet għal kooperazzjoni msaħħa bejn il-portijiet Ewropej għal dan l-għan;

52.Jappella lill-Kummissjoni tippreżenta Strateġija Portwarja Ewropea komprensiva li tindirizza l-kwistjonijiet imsemmija hawn fuq sa tmiem l-2024;

53.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.