1.Jenfasizza li s-CETA jiddependi fuq relazzjoni bbażata fuq ir-regoli u l-valuri li tippromwovi ambjent ekonomiku aktar sigur u stabbli bejn is-sħab kummerċjali, li huwa partikolarment importanti fil-kuntest ta’ inċertezzi ġeopolitiċi akbar, mibni fuq il-prinċipji tal-iżvilupp sostenibbli u r-rispett għad-drittijiet tal-bniedem u l-istandards tax-xogħol u ambjentali; iqis li tali prevedibbiltà tista’ trawwem it-tkabbir ekonomiku, l-iskambju ta’ merkanzija, il-forniment ta’ servizzi, il-parteċipazzjoni fl-akkwist pubbliku, l-attraenza tal-investiment, l-impjiegi ta’ kwalità, il-ħolqien ta’ aktar impjiegi u impjiegi b’pagi aħjar, u kundizzjonijiet tax-xogħol u standards tal-għajxien imtejba; jinnota, madankollu, li s-CETA jeħtieġ li jsaħħaħ aktar l-iżvilupp sostenibbli u r-rispett għad-drittijiet tal-bniedem u tax-xogħol, u jipproteġi l-klima;

2.Jinnota b’sodisfazzjon li bejn l-2016 u l-2022, il-kummerċ fil-merkanzija bejn l-UE u l-Kanada żdied b’66 %, filwaqt li l-kummerċ fis-servizzi bejn l-UE u l-Kanada żdied b’46 %, u qabeż il-kummerċ l-ieħor li jsir barra mill-UE; jinnota l-fatt li l-esportazzjonijiet tal-merkanzija tal-UE lejn il-Kanada żdiedu b’47 % matul l-ewwel ħames snin tal-applikazzjoni proviżorja, fejn l-akbar qligħ ġie rreġistrat fil-każijiet ta’ prodotti manifatturati, prodotti kimiċi kif ukoll prodotti tal-ikel u tal-annimali; jinnota li l-biċċa l-kbira tat-tħassib espress qabel l-applikazzjoni proviżorja tal-Ftehim rigward l-influss ta’ prodotti agrikoli Kanadiżi fis-suq tal-UE, ma mmaterjalizzax; josserva li l-esportazzjonijiet Kanadiżi lejn l-UE raw żieda ta’ 46,4 %, u l-akbar qligħ ġie rreġistrat fil-minerali, il-ħaġar prezzjuż u l-metalli, u ż-żjut u l-fjuwils minerali;

3.Jissottolinja ż-żieda konsiderevoli fil-kummerċ bilaterali ta’ ikel u prodotti agrikoli bejn l-UE u l-Kanada, b’żieda ta’ 62 % fl-esportazzjonijiet agroalimentari tal-UE lejn il-Kanada u ta’ 52 % fl-importazzjonijiet tal-UE ta’ tali prodotti mill-Kanada mill-bidu tal-applikazzjoni proviżorja tas-CETA; jinnota li dan ħoloq benefiċċji sinifikanti għall-produtturi u l-esportaturi taż-żewġ naħat, u b’hekk ikkontribwixxa wkoll għall-ħolqien tal-impjiegi; jilqa’ ż-żieda sostanzjali fl-għadd ta’ mikroimpriżi u impriżi żgħar u ta’ daqs medju tal-Unjoni li jesportaw lejn il-Kanada, kif ukoll iż-żieda fil-valur tal-prodotti esportati tagħhom, filwaqt li jinnota li l-ftehim għaldaqstant jissodisfa b’mod sinifikanti l-interessi tagħhom;

4.Jisħaq li, fl-implimentazzjoni tas-CETA, bħal fil-każ ta’ kwalunkwe ftehim kummerċjali ieħor tal-UE, għandhom jitqiesu b’mod xieraq ir-rispett tal-produzzjoni agrikola sostenibbli, tar-reċiproċità u taż-żamma ta’ standards għoljin, b’mod partikolari l-istandards sanitarji, fitosanitarji u veterinarji, kif ukoll ta’ kontrolli adegwati u tal-monitoraġġ tal-konformità reċiproka ma’ dawk l-istandards;

5.Jilqa’ l-fatt li, matul il-pandemija, kif ukoll fis-sitwazzjoni diffiċli maħluqa mill-gwerra ta’ aggressjoni Russa kontra l-Ukrajna, il-flussi kummerċjali bejn il-partijiet ġeneralment urew li huma reżiljenti, u b’hekk irreżistew il-pressjoni fuq il-ktajjen tal-provvista u kkontribwew għat-tisħiħ tas-sigurtà tal-ikel; huwa tal-fehma li s-CETA għandu jservi bħala għodda biex jiffaċilita l-kooperazzjoni u l-azzjoni konġunta fir-rikostruzzjoni tal-Ukrajna ladarba tintemm il-gwerra;

6.Jissottolinja li l-esportazzjonijiet tal-UE huma kruċjali għall-impjiegi; jilqa’ l-fatt li s-CETA kkontribwixxa għall-ħolqien ta’ opportunitajiet ta’ impjiegi ġodda, hekk kif l-ammont ta’ impjiegi appoġġjati mill-esportazzjonijiet tal-UE lejn il-Kanada żdied minn 624 000 fl-2017 għal aktar minn 700 000 fl-2021;

7.Jisħaq fuq l-importanza tal-faċilitazzjoni tal-mobilità tal-forza tax-xogħol mogħtija fl-ambitu tas-CETA, peress li dan jgħin biex jiġi żgurat it-trasferiment adegwat tal-ħiliet bejn l-UE u l-Kanada u jiġu evitati nuqqasijiet ta’ ħaddiema kwalifikati; jilqa’, f’dan ir-rigward, il-konklużjoni b’suċċess fl-2022 tal-ewwel Ftehim ta’ Rikonoxximent Reċiproku fl-ambitu tas-CETA għall-kwalifiki tal-arkitetti; huwa tal-fehma li l-Karta Blu tal-UE tista’ tiffaċilita l-iskambji ulterjuri bejn żewġ ekonomiji kompetittivi li għandhom popolazzjoni b’livell għoli ta’ edukazzjoni; jissottolinja li l-programmi ta’ skambju bejn l-istituzzjonijiet akkademiċi tal-UE u dawk Kanadiżi jistgħu jikkontribwixxu aktar għall-mobilità tal-forza tax-xogħol meħtieġa fit-tul;

8.Jinnota li l-aktar żewġ kategoriji ta’ prodotti importanti li l-UE u l-Kanada jesportaw lejn xulxin huma l-makkinarju u t-tagħmir tat-trasport, li jammontaw għal madwar 34 % kemm tal-esportazzjonijiet kif ukoll tal-importazzjonijiet, u l-prodotti kimiċi, farmaċewtiċi u tal-plastik, li jammontaw għal madwar 20 % tal-esportazzjonijiet u l-importazzjonijiet totali; jinnota, madanakollu, li s-settur tal-estrazzjoni minerarja, b’mod partikolari l-fertilizzanti, in-nikil, l-uranju u r-ramel bituminuż, huwa sinifikanti ħafna fl-importazzjonijiet mill-Kanada, meta mqabbel ma’ sħab kummerċjali oħra, u jammonta għal kważi 20 % tal-importazzjonijiet totali tal-UE mill-Kanada; jenfasizza li l-aċċess għal materja prima kritika minn sħab kummerċjali affidabbli, inkluża l-Kanada, huwa element ewlieni tal-Istrateġija tal-UE dwar il-Materja Prima Kritika u huwa vitali biex titwettaq tranżizzjoni ekoloġika sostenibbli;

9.Jisħaq li l-kooperazzjoni dwar l-aċċess għall-materja prima kritika hija essenzjali fix-xenarju ġeopolitiku attwali, kif ukoll għal tranżizzjonijiet ekoloġiċi u ġusti, u jilqa’ l-iffirmar f’Lulju 2021 tas-Sħubija Strateġika bejn l-UE u l-Kanada dwar il-Materja Prima Kritika fil-qafas tas-CETA, li għandu jgħin biex jiġu integrati l-ktajjen tal-valur tal-materja prima bejn l-UE u l-Kanada u titrawwem kollaborazzjoni fix-xjenza, it-teknoloġija u l-innovazzjoni; jinnota li dan jikkostitwixxi komponent importanti tal-istrateġija Ewropea ta’ sigurtà ekonomika; huwa konvint li l-estrazzjoni tal-materja prima jeħtieġ li sseħħ b’rispett tal-istandards ambjentali u d-drittijiet tax-xogħol u tal-bniedem, inklużi d-drittijiet tal-popli indiġeni;

10.Jilqa’ l-fatt li l-kumpaniji Ewropej u dawk Kanadiżi qed jagħmlu użu dejjem akbar u kontinwu tal-preferenzi mogħtija mis-CETA, b’rati tal-utilizzazzjoni tal-preferenzi ta’ 60 % fl-2022 kemm għall-UE kif ukoll għall-Kanada meta mqabbla ma’ 40 % u 52 % rispettivament fl-2018; jinnota b’interess li l-kumpaniji ż-żgħar qed jużaw il-preferenzi aktar mill-kumpaniji l-kbar u li r-rati tal-utilizzazzjoni huma ogħla b’mod sinifikanti għall-industriji agroalimentari meta mqabbla mal-industriji tal-manifattura; jisħaq li r-rati baxxi tal-utilizzazzjoni f’setturi ewlenin minn diversi membri tal-UE jindikaw telf ta’ ffrankar tal-ispejjeż u gwadanji soċjali mnaqqsa mill-Ftehim; jinkoraġġixxi liż-żewġt sħab ikomplu jippromwovu azzjoni għas-sensibilizzazzjoni tas-CETA fost il-partijiet ikkonċernati fiż-żewġ reġjuni, inkluż permezz tal-pjattaforma tal-UE “Access2Markets”; jissottolinja l-importanza li jiġu ffaċilitati opportunitajiet ġodda għan-negozji u l-konsumaturi permezz tal-kummerċ diġitali f’konformità mal-istandards tal-UE;

11.Jinnota li r-rata tal-utilizzazzjoni tal-kwota tariffarja għall-importazzjonijiet taċ-ċanga u tal-vitella lejn l-UE, fl-2021 kienet biss 3 %, u li l-esportaturi tal-UE kabbru s-sehem mis-suq tagħhom fil-Kanada, b’tali mod li l-UE tesporta aktar ċanga ffriżata lejn il-Kanada milli timporta minnha; jinnota, madankollu, li r-rata tal-utilizzazzjoni ta’ din il-kwota tariffarja tista’ tinbidel maż-żmien bħala riżultat ta’ varjazzjonijiet fis-swieq tal-esportazzjoni l-oħra tal-Kanada, b’mod partikolari l-Istati Uniti u ċ-Ċina;

12.Jenfasizza li skont ir-rapport tal-awditjar tad-Direttorat Ġenerali tal-Kummissjoni għas-Saħħa u s-Sikurezza Alimentari, il-Kanada għad trid timplimenta b’mod sodisfaċenti r-rakkomandazzjonijiet li saru fl-awditu tad-Direttorat Ġenerali dwar it-traċċabbiltà u l-kwalità tas-sistemi ta’ kontroll fis-seħħ li jirregolaw il-produzzjoni taċ-ċanga u tal-majjal maħsuba għall-esportazzjoni lejn l-Unjoni Ewropea;

13.Jilqa’ l-introduzzjoni ta’ ċertifikat ta’ esportazzjoni armonizzat tal-UE għall-esportazzjoni ta’ pollam frisk minn Stati Membri awtorizzati, li sar operattiv fl-2021; jistieden lill-Kummissjoni tirsisti favur progress ulterjuri f’ċertifikati simili għal-laħam ipproċessat u l-laħam tan-nagħaġ u tal-mogħoż, filwaqt li żżid l-isforzi biex tiżgura sistemi ta’ traċċabbiltà aktar sodi għall-prodotti tal-laħam; jistieden lill-Kummissjoni, fil-qafas tal-Kumitat ta’ Ġestjoni u f’kooperazzjoni mal-awtoritajiet Kanadiżi u mal-Istati Membri, tagħmel progress fir-rikonoxximent tas-sistemi ta’ spezzjoni li fadal tal-laħam sabiex l-Istati Membri li baqa’ jkunu jistgħu jesportaw il-laħam lejn il-Kanada;

14.Jinnota, b’dispjaċir, li s-CETA ma japplikax b’mod ġenerali l-prinċipju ta’ reġjonalizzazzjoni, u lill-UE jqisha spazju uniku fir-rigward tat-trobbija tal-bhejjem biss, iżda mhux fir-rigward tas-settur tal-frott u l-ħxejjex, u dan ifisser li kull Stat Membru jkollu, b’mod individwali, jinnegozja r-rekwiżiti tal-esportazzjoni għal kull prodott u jaqbel ma’ dawn ir-rekwiżiti; jitlob li din il-lakuna timtela mill-aktar fis possibbli fil-qafas tal-Kumitat Konġunt ta’ Ġestjoni UE-Kanada;

15.Jistieden lill-Kummissjoni taġevola l-kooperazzjoni li għaddejja mal-awtoritajiet Kanadiżi mmirata biex tagħti aktar attenzjoni lill-garanziji għall-istandards fil-qasam tat-trattament xierqa tal-annimali fl-ambitu tas-CETA u tevalwa l-fattibbiltà li ddaħħal, fil-futur, klawżoli mera f’dan l-ambitu biex tiggarantixxi l-ekwivalenza tal-istandards dwar it-trattament xieraq tal-annimali u b’hekk kundizzjonijiet ta’ parità bejn il-prodotti li joriġinaw mill-annimali tal-UE u dawk importati;

16.Jiġbed l-attenzjoni għall-fatt li l-politika kummerċjali tal-UE, u b’mod partikolari s-CETA, għandhom impatt ekonomiku qawwi fuq ir-reġjuni ultraperiferiċi u jisħaq għalhekk fuq il-bżonn li jitħarsu l-interessi ta’ tali reġjuni fl-ambitu ta’ negozjati futuri jew ta’ reviżjoni possibbli tal-Ftehim;

17.Isostni li parti mid-dazji u mill-kwoti tariffarji applikati fuq il-prodotti tal-UE għandha tiġi allokata lill-operaturi rreġistrati fir-reġjuni ultraperiferiċi, fid-dawl tal-qagħda ekonomika tagħhom; jisħaq fuq il-fatt li t-trattament differenzjat għall-operaturi tar-reġjuni ultraperiferiċi huwa kruċjali biex jiġu żgurati l-kompetittività tal-impriżi u d-distribuzzjoni ġusta tad-dazji u l-kwoti tariffarji bejn l-aġenti kummerċjali billi jiġi evitat li l-benefiċċji jiġu limitati għal għadd żgħir ta’ operaturi;

18.Jieħu nota tal-fatt li r-rata medja ta’ utilizzazzjoni tal-kwota tariffarja għall-esportazzjonijiet tal-ġobon tal-UE hija 98 %; jitlob, madanakollu, sistema Kanadiża ta’ ġestjoni tal-kwoti tariffarji aktar trasparenti u flessibbli għall-prodotti tal-ħalib, b’mod partikolari l-kwota tal-ġobon, u jħeġġeġ lill-awtoritajiet Kanadiżi jmexxu malajr kemm jista’ jkun bir-rieżami potenzjali tas-sistema;

19.Jenfasizza l-importanza li s-sistema tal-indikazzjonijiet ġeografiċi tiġi rikonoxxuta bħala komponent kruċjali tal-Ftehim; jissottolinja l-ħtieġa tal-infurzar effettiv ulterjuri tal-protezzjoni tal-indikazzjonijiet ġeografiċi għad-detenturi tad-drittijiet tal-UE fil-Kanada, sabiex tiġi żgurata l-fiduċja fil-funzjonament korrett tal-Ftehim;

20.Jieħu nota tal-fatt li matul l-ewwel sitt snin tal-applikazzjoni proviżorja tas-CETA, l-esportazzjonijiet tal-UE lejn il-Kanada u l-importazzjonijiet tagħha mill-Kanada fis-settur tas-servizzi żdiedu b’54 % u 74 %, rispettivament, bl-akbar żidiet fis-servizzi tat-trasport, fis-servizzi kummerċjali u fis-servizzi tal-informazzjoni, tal-informatika u tat-telekomunikazzjonijiet, b’mod partikolari għall-benefiċċju ta’ Stati Membri iżgħar tal-UE fejn is-servizzi għandhom rwol sinifikanti fl-istruttura ekonomika tal-pajjiż;

21.Jilqa’ l-isforzi konkreti biex jiġi ffaċilitat l-aċċess għall-akkwist pubbliku, bħall-Punt ta’ Aċċess Uniku fil-Kanada; huwa tal-fehma li anke jekk ħafna aktar negozji tal-UE qed jipparteċipaw b’suċċess f’sejħiet għall-offerti Kanadiżi, bħal fil-każ tat-trasport reġjonali tal-passiġġieri bil-ferrovija f’Ontario jew fil-każ tal-pontijiet f’Montreal, il-fornituri tal-UE jistgħu saħansitra jieħdu vantaġġ ulterjuri mill-opportunitajiet offruti, b’mod partikolari rigward proġetti ta’ infrastruttura u offerti għal kuntratti provinċjali u muniċipali;

22.Jistieden lill-partijiet jagħmlu disponibbli l-appoġġ u l-għodod legali u amministrattivi kollha li għandhom bżonn l-SMEs biex jinvolvu ruħhom fil-kummerċ u l-investiment fl-ambitu tas-CETA, sabiex titrawwem żieda fl-iskambji u tissaħħaħ il-parteċipazzjoni ħalli jkunu jistgħu jaħsdu l-benefiċċji tas-CETA, inkluż permezz ta’ miżuri attivi li jiffaċilitaw l-internazzjonalizzazzjoni tal-SMEs, jissimplifikaw il-proċeduri u jindirizzaw l-ostakli tekniċi għall-kummerċ li jaffettwaw lill-SMEs b’mod sproporzjonat; jilqa’, f’dan ir-rigward, ir-rakkomandazzjoni dwar l-SMEs adottata mill-Kumitat Konġunt fl-2018, u l-pjanijiet ta’ azzjoni sussegwenti, inklużi azzjonijiet konkreti bħat-tnedija tal-pjattaforma Access2Markets f’Ottubru 2020, li tappoġġja lill-SMEs permezz ta’ informazzjoni prattika dwar il-ftehimiet kummerċjali u l-ostakli għall-kummerċ; jistenna li l-evalwazzjoni ex post tipprovdi data dwar l-evoluzzjoni tas-sehem tal-kummerċ bejn l-UE u l-Kanada mwettaq mill-SMEs; jistieden lill-Partijiet jikkontemplaw il-possibbiltà ta’ kapitolu sħiħ dwar l-SMEs analogu għal dawk fil-ftehimiet ma’ New Zealand u ċ-Ċilì;

23.Fid-dawl tal-importanza tas-settur tal-ekonomija soċjali u solidali fil-Kanada u l-pjan ta’ azzjoni għall-ekonomija soċjali adottat mill-Kummissjoni fid-9 ta’ Diċembru 2021 Il-komunikazzjoni tal-Kummissjoni tad-9 ta’ Diċembru 2021 bit-titolu “Bini ta’ ekonomija għas-servizz tan-nies: pjan ta’ azzjoni għall-ekonomija soċjali” (COM(2021)0778)., jistieden lill-Kumitat Konġunt jidentifika liema miżuri konkreti jistgħu jiġu implimentati biex tiġi promossa aktar kooperazzjoni bejn l-atturi tal-ekonomija soċjali u solidali madwar l-Atlantiku;

24.Iħeġġeġ liż-żewġ partijiet ikomplu l-attivitajiet ta’ sensibilizzazzjoni tagħhom, b’attenzjoni partikolari fuq l-SMEs u l-atturi tal-Ekonomija Soċjali u Solidali, biex iqajmu kuxjenza dwar l-opportunitajiet offruti mis-CETA permezz ta’ kampanji ta’ informazzjoni mmirati, filwaqt li jiżguraw li l-benefiċċji tal-Ftehim jiġu kondiviżi b’mod ugwali bejn l-irġiel u n-nisa;

25.Jilqa’ l-adozzjoni tar-rakkomandazzjoni dwar il-Kummerċ u l-Ġeneru mill-Kumitat Konġunt CETA sa mill-2018, li tinkludi l-impenn li jiġu kondiviżi metodi u proċeduri għall-ġbir ta’ data diżaggregata skont il-ġeneru, l-użu ta’ indikaturi, metodoloġiji ta’ monitoraġġ u evalwazzjoni, u l-analiżi ta’ statistika ffukata fuq il-ġeneru marbuta mal-kummerċ; jissottolinja li l-kummerċ għandu jkun ta’ benefiċċju għal kulħadd, u b’mod speċifiku jsaħħaħ l-emanċipazzjoni ekonomika tan-nisa; iħeġġeġ bil-qawwa lill-Kumitat Konġunt CETA jkompli jimmonitorja l-impatti tal-Ftehim fuq il-ġeneru; huwa tal-fehma li l-ħidma mwettqa taħt il-pjan ta’ azzjoni adottat b’mod konġunt tista’ sservi ta’ eżempju għal ftehimiet kummerċjali oħra, anke meta ma jkun hemm l-ebda kapitolu ddedikat dwar il-kummerċ u l-ġeneru fil-ftehim innifsu; ifakkar fir-riżoluzzjoni tal-Parlament dwar il-Pjan ta’ Azzjoni dwar il-Ġeneru III Ir-Riżoluzzjoni tal-Parlament Ewropew tal-10 ta’ Marzu 2022 dwar il-Pjan ta’ Azzjoni tal-UE dwar il-Ġeneru III (ĠU C 347, 9.9.2022, p. 150). u jħeġġeġ lill-Kummissjoni tippubblika data diżaggregata skont il-ġeneru aktar faċilment aċċessibbli dwar l-użu tal-Ftehim, b’mod partikolari fir-rigward tal-kapitoli dwar l-akkwist pubbliku u dwar il-kummerċ u x-xogħol;

26.Jistieden lill-Kummissjoni tevita li l-prinċipju ta’ prekawzjoni jiddgħajjef bħala prinċipju bażiku tal-Unjoni Ewropea minqux fit-Trattati u garanti tal-ħarsien tal-bdiewa u taċ-ċittadini Ewropej; jenfasizza l-importanza li jiġi promoss il-prinċipju ta’ prekawzjoni fl-aspetti kollha tal-kummerċ u li tiġi żgurata l-applikazzjoni tiegħu, filwaqt li jiġu evitati l-ostakli inġustifikati għall-kummerċ;

27.Jissottolinja li s-CETA jipprovdi qafas li jrawwem kemm il-kummerċ kif ukoll l-azzjoni klimatika billi jinkludi impenji għall-kooperazzjoni dwar kwistjonijiet ambjentali ta’ interess komuni marbuta mal-kummerċ, bħat-tibdil fil-klima, kif muri mir-rakkomandazzjoni dwar il-kummerċ, l-azzjoni klimatika u l-Ftehim ta’ Pariġi, b’mod partikolari bil-promozzjoni ta’ teknoloġiji nodfa; jissottolinja l-importanza li l-produzzjoni globali tal-enerġija bbażata l-Kanada taċċellera t-tranżizzjoni lejn l-enerġija nadifa billi tipproduċi enerġija minn riżorsi rinnovabbli; jilqa’ t-tkabbir ta’ 27 % tal-kummerċ tal-merkanzija ambjentali mill-bidu tal-applikazzjoni proviżorja; jinnota, madankollu, li l-Kanada qieset elementi ta’ inizjattivi leġiżlattivi u mhux leġiżlattivi Ewropej fir-rigward tal-Patt Ekoloġiku Ewropew bħala ostakli tekniċi għall-kummerċ; jistieden lill-Partijiet isibu sinerġiji mal-implimentazzjoni tal-Mekkaniżmu ta’ Aġġustament tal-Karbonju fil-Fruntieri (CBAM) u inizjattivi oħra fl-UE, u jappoġġaw b’mod konġunt il-ħidma biex jiġu żviluppati metodoloġiji konġunti jew komparabbli tal-emissjonijiet tal-karbonju fil-livell internazzjonali;

28.Jilqa’ t-tnedija tas-Sħubija Diġitali bejn l-UE u l-Kanada bħala faċilitatur ewlieni tat-tranżizzjoni ekoloġika u dik diġitali; jistieden liż-żewġ partijiet isaħħu l-kooperazzjoni tagħhom fil-qafas tal-implimentazzjoni tas-CETA dwar kwistjonijiet ta’ interess reċiproku strateġiku bħall-intelliġenza artifiċjali, iċ-ċibersigurtà u l-ġlieda kontra d-diżinformazzjoni;

29.Jilqa’ l-involviment attiv u l-monitoraġġ tal-implimentazzjoni tas-CETA mill-Gruppi Konsultattivi Domestiċi u l-Forum tas-Soċjetà Ċivili, li jiġbru mijiet ta’ rappreżentanti minn madwar l-UE u l-Kanada, inklużi n-negozji, l-organizzazzjonijiet ambjentali u tax-xogħol, is-soċjetà ċivili, l-akkademja kif ukoll rappreżentanti tal-popli indiġeni mill-Kanada, u jikkontribwixxu b’mod attiv għall-ħidma b’mod partikolari tal-Kumitat għall-Kummerċ u l-Iżvilupp Sostenibbli (TSD) permezz tad-dikjarazzjonijiet konġunti tagħhom; iħeġġeġ lill-Kummissjoni u lill-Bord tat-TSD jagħtu segwitu għall-proposti tagħhom; jisħaq li l-mandat tal-Gruppi Konsultattivi Domestiċi għandu jkun ukoll li jqisu l-impatt għas-sostenibbiltà tal-Ftehim sħiħ; jissottolinja l-valur tal-inklużjoni ta’ kunsiderazzjonijiet dwar l-impatt fuq is-sostenibbiltà u d-drittijiet tal-bniedem tal-kapitolu dwar il-protezzjoni tal-investiment fil-ħidma tagħhom;

30.Jistieden liż-żewġ partijiet jiżguraw integrazzjoni aħjar tal-bdiewa b’azjenda agrikola żgħira fil-Gruppi Konsultattivi Domestiċi fil-kuntest tat-tiġdid ta’ dawn il-gruppi;

31.Jinsisti fuq l-implimentazzjoni effettiva tal-impenji speċifiċi marbuta mad-dispożizzjonijiet dwar it-TSD, inkluż ir-rieżami bikri tat-TSD li dwaru ttieħed impenn fl-Istrument Interpretattiv Konġunt, li għadu ma sarx, bħala partijiet integrali tas-CETA u essenzjali biex jintlaħqu l-objettivi stabbiliti; jieħu nota li fl-2024, il-Kummissjoni se twettaq evalwazzjoni ex post tas-CETA, inkluż il-kapitolu tiegħu dwar it-TSD , bl-involviment ta’ esperti indipendenti, u din se tkun opportunità biex tivvalutah kontra l-approċċ il-ġdid tal-Kummissjoni ta’ Ġunju 2022 u biex tikkunsidra li taċċetta l-proposti konkreti mressqa mill-Kanada fl-2020 ħalli jingħata kamp ta’ applikazzjoni aktar vinkolanti lil ċerti dispożizzjonijiet ta’ dan il-kapitolu; ifakkar li l-Kumitat Konġunt jista’ jipprovdi deċiżjoni vinkolanti li tistabbilixxi pjanijiet direzzjonali ta’ implimentazzjoni biex tissaħħaħ il-kooperazzjoni f’oqsma fejn l-evalwazzjoni ex post tidentifika n-nuqqasijiet u jistenna azzjoni attiva f’dan ir-rigward; jemmen li l-isforzi mmirati lejn implimentazzjoni aħjar tal-kapitolu dwar it-TSD jew ir-rieżami tiegħu għandhom ikunu preċeduti minn konsultazzjoni sinifikanti tal-partijiet ikkonċernati kollha;

32.Jinnota li r-Renju Unit ma baqax membru tal-Unjoni Ewropea wara l-applikazzjoni proviżorja tas-CETA; jinnota li r-Renju Unit u l-Kanada qablu dwar sensiela ta’ arranġamenti kummerċjali bilaterali biex iqisu dan, inkluż fir-rigward tal-użu u l-akkumulazzjoni tal-kwoti tariffarji; jinnota li xi wħud minn dawn il-ftehimiet se jieqfu japplikaw wara l-2024, u dan jista’ jippreżenta tfixkil minuri fi ktajjen tal-provvista stabbiliti; jistieden lill-Kummissjoni tesplora l-possibbiltà ta’ ftehimiet ġodda fejn dan it-tfixkil jista’ jaffettwa b’mod negattiv lill-operaturi ekonomiċi tal-Unjoni;

33.Jistieden lill-partijiet jirrieżaminaw is-CETA, ladarba jiġi ratifikat, billi jagħmlu użu mill-klawżola ta’ rieżami, sabiex jintroduċu mekkaniżmu xieraq u effettiv għas-soluzzjoni tat-tilwim għat-TSD, inkluża l-kunsiderazzjoni ta’, fost diversi metodi ta’ infurzar, sanzjonijiet bħala deterrent li għandhom jintużaw, bħala l-aħħar rimedju, fil-każ ta’ ksur serju; jenfasizza x-xewqa tiegħu li tiġi kkontemplata l-istituzzjonalizzazzjoni tal-kooperazzjoni li għaddejja dwar il-kummerċ u l-ġeneru f’dan ir-rieżami; jenfasizza li dan ir-rieżami għandu jikkunsidra l-introduzzjoni ta’ dispożizzjonijiet speċifiċi b’saħħithom dwar id-drittijiet tal-popli indiġeni, inkluża l-Konvenzjoni Nru 169 tal-Organizzazzjoni Internazzjonali tax-Xogħol u d-Dikjarazzjoni tan-Nazzjonijiet Uniti dwar id-Drittijiet tal-Popli Indiġeni;

34.Iħeġġeġ lill-Belġju, lill-Bulgarija, lil Ċipru, lil Franza, lill-Greċja, lill-Ungerija, lill-Irlanda, lill-Italja, lill-Polonja u lis-Slovenja jirratifikaw malajr is-CETA, peress li dan se jkun essenzjali anke biex jiġi aġġornat il-Ftehim, u jtenni l-importanza tal-applikazzjoni sħiħa tas-CETA, inklużi d-dispożizzjonijiet tiegħu dwar il-protezzjoni tal-investiment;

35.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni, kif ukoll lill-Gvern u lill-Parlament tal-Kanada.