1.Jissottolinja li l-istrateġija ta’ fużjoni militari-ċivili (MCF) taċ-Ċina hija programm immexxi mill-Istat li għandu l-pjan li jistrumentalizza l-lievi kollha tas-setgħa statali u kummerċjali biex jissaħħaħ u jiġi appoġġat il-Partit Komunista Ċiniż (CCP) u l-fergħa tal-armata tiegħu, l-Armata għal-Liberazzjoni tal-Poplu (PLA), b’mod partikolari billi jinkisbu u jiġu ddevjati t-teknoloġiji l-aktar avvanzati tad-dinja, bl-objettiv li jissaħħaħ ir-reġim totalitarju u tinkiseb dominanza militari;

2.Iqis li s-sistema politika u l-ekonomija taċ-Ċina, immexxija minn partit, spiss jeħtieġu lill-kumpaniji privati jallinjaw l-interessi kummerċjali tagħhom mal-Partit Komunista Ċiniż, inklużi l-attivitajiet militari, ta’ repressjoni, ta’ influwenza u ta’ ndħil politiku tal-Partit; jinnota li ċ-ċelloli tal-partit tas-Partit Komunista Ċiniż f’kumpaniji privati jintużaw b’mod komuni bħala għodod ta’ kontroll dirett tal-partit; jenfasizza li, konsegwentement, l-attivitajiet internazzjonali tal-kumpaniji Ċiniżi jappoġġjaw l-għanijiet tal-Partit Komunista Ċiniż li jespandi l-influwenza tiegħu f’pajjiżi terzi, u b’hekk jimminaw ir-rivali ġeopolitiċi u jżidu l-influwenza taċ-Ċina;

3.Jemmen li l-fużjoni militari-ċivili trid tinftiehem f’kuntest ġeopolitiku, ekonomiku u strateġiku akbar, filwaqt li jitqiesu l-interkonnessjonijiet tagħha ma’ inizjattivi oħra, bħall-Inizjattiva “Belt and Road”, l-inizjattiva Digital Silk Road (inklużi Made in China 2025, China Standards 2035), l-Inizjattiva tas-Sigurtà Globali, l-istrateġija taċ-Ċirkolazzjoni Doppja) u l-assertività u l-pożizzjonament aggressiv dejjem jikbru taċ-Ċina barra mill-pajjiż; jemmen li l-għan aħħari tal-fużjoni militari-ċivili huwa li tavvanza l-għan strateġiku fit-tul tal-istat partit li jsir il-poter ewlieni tad-dinja f’termini ta’ influwenza politika, kapaċitajiet ekonomiċi, dominanza teknoloġika u militari, u li timmina l-ordni internazzjonali bbażat fuq ir-regoli;

4.Ifakkar li l-kisba tal-primat fix-xjenza u t-teknoloġija kienet waħda mill-prijoritajiet ewlenin tal-Partit Komunista Ċiniż f’dawn l-aħħar snin u li l-istrateġija tal-fużjoni militari-ċivili tal-Partit Komunista Ċiniż tinċentiva l-kondiviżjoni tar-riżultati tar-riċerka u l-iżvilupp bejn l-industriji tad-difiża orjentati lejn is-suq u dawk Ċiniżi; jisħaq fuq it-twissijiet ripetuti mill-aġenziji tal-intelligence kontra r-riskji ta’ dipendenza ekonomika, spjunaġġ u sabotaġġ ikkawżati mill-preżenza ekonomika ta’ entitajiet minn pajjiżi terzi fl-infrastruttura kritika u s-setturi strateġiċi tagħna madwar l-UE; jinsab imħasseb, f’dan ir-rigward, dwar il-pressjoni politika asserita fl-approvazzjoni ta’ investimenti Ċiniżi speċifiċi fl-infrastruttura kritika, bħal fil-każ tad-deċiżjoni tal-gvern Ġermaniż li jaqbel mal-akkwist ta’ sehem fil-port ta’ Hamburg mill-COSCO, għall-kuntrarju tal-parir tal-istituzzjonijiet kompetenti;

5.Iwissi bir-riskju li l-kumpaniji Ċiniżi jkunu involuti b’xi mod jew ieħor fl-assi strateġiċi tal-UE, b’mod partikolari dawk b’rabtiet diretti jew indiretti mas-sistemi politiċi-militari jew tal-intelligence taċ-Ċina; jissottolinja, f’dan ir-rigward, it-tħassib tiegħu li t-teknoloġija u l-għarfien espert teknoloġiku, użat fl-attivitajiet ċivili, b’mod partikolari fl-isfera ekonomika, għadhom qed jiġu trasferiti lill-forzi militari Ċiniżi, u b’hekk tiżdied il-kapaċità tal-Armata Popolari ta’ Liberazzjoni li tiżviluppa l-ġenerazzjoni li jmiss ta’ teknoloġija militari, li tkun tista’ tintuża għal skopijiet koerċittivi fuq is-sħab fl-Asja u fid-dinja kollha; iħeġġeġ lill-Istati Membri tal-UE jżidu s-sorveljanza regolatorja u jintroduċu kontrolli speċifiċi tal-isfond fuq individwi u entitajiet ġuridiċi b’rabtiet diretti mal-gvern Ċiniż;

6.Jinsab imħasseb li 98 % tad-domanda tal-UE għall-materjali tal-art rari qed tiġi ssodisfata mir-RPĊ; jenfasizza li ċ-Ċina tipproduċi 70 % tal-batteriji fuq livell dinji (hekk kif tospita tlieta mill-ħames ġganti ewlenin tal-produzjoni ta’ batteriji), tirrappreżenta 60 % tal-produzzjoni dinjija ta’ aluminju u 75 % tal-produzzjoni ta’ siliċju, kif ukoll 94 % tal-produzzjoni globali tal-gallju u madwar 60% tal-produzzjoni tal-ġermanju, u hija r-raffinatur mexxej ta’ 60 % tal-litju u ta’ 70 % tal-ipproċessar tar-ram u tipproduċi 84 % tan-nikil f’livell dinji, kif ukoll 85 % tal-kobalt; jissottolinja li l-kumpaniji minerarji Ċiniżi huma attivi fis-Serbja (ram u deheb), fir-Repubblika Demokratika tal-Kongo (kobalt), fl-Indoneżja (nikil), fiċ-Ċilì u fl-Awstralja (litju) u li l-kważi monopolju taċ-Ċina fil-produzzjoni u fl-ipproċessar ta’ din il-materja prima kritika joħloq dipendenzi kruċjali u b’hekk jirrappreżenta mhux biss sfida ġeopolitika qawwija għall-UE, iżda wkoll riskju enormi għad-difiża u għal setturi industrijali ewlenin oħra tal-Ewropa kif ukoll għall-awtonomija strateġika miftuħa tagħha u l-istrateġija tas-sigurtà ekonomika Ewropea;

7.Jilqa’, f’dan ir-rigward, il-proposta tal-Kummissjoni għall-Att dwar il-Materja Prima Kritika u jappella għall-implimentazzjoni rapida tal-għanijiet tiegħu sabiex tissaħħaħ ir-reżiljenza tal-katina tal-provvista tal-UE; ifakkar li l-materja prima kritika hija essenzjali għas-settur tas-sigurtà u d-difiża kif ukoll għas-suċċess tat-tranżizzjonijiet diġitali u ekoloġiċi tal-UE; jistieden lill-Kummissjoni u lill-Istati Membri, f’koordinament mal-partijiet ikkonċernati tal-industrija, jimplimentaw id-deċiżjoni li gradwalment inaqqsu d-dipendenza fuq iċ-Ċina billi jiddiversifikaw is-sorsi ta’ minerali mhux maħduma kritiċi u elementi tal-materjali tal-art rari, jistabbilixxu sħubijiet strateġiċi ma’ pajjiżi terzi affidabbli bl-għan li tiġi żgurata provvista sigura u affidabbli ta’ materja prima kritika; iħeġġeġ lill-UE tassisti lill-Istati Membri fl-iżvilupp ta’ proġetti li se jimmiraw għal indipendenza akbar mill-produzzjoni Ċiniża;

8.Jirrakkomanda bil-qawwa d-diversifikazzjoni tal-fornituri u s-sħab f’inizjattivi ta’ infrastruttura kritika biex titnaqqas il-vulnerabbiltà għall-influwenzi esterni, filwaqt li jiġi żgurat li d-dipendenza fuq kwalunkwe sors uniku tiġi minimizzata;

9.Jinsab imħasseb li kejbils sottomarini privati pprovduti minn kumpaniji Ċiniżi, bħal HMN Technologies, entità affiljata mal-intelligence ċibernetika tal-Armata Popolari ta’ Liberazzjoni, jintużaw biex jappoġġjaw il-komunikazzjonijiet diplomatiċi u militari tal-UE u tal-Istati Membri; jesprimi tħassib kbir għas-sistemi tal-kejbils ta’ data sottomarini operati mill-kumpanija Ċiniża HMN Technologies, li jikkollegaw it-territorji tal-Istati Membri tal-UE u r-reġjun Indo-Paċifiku, inklużi l-bażijiet militari tal-Istati Membri u tan-NATO fir-reġjun, b’hekk jinħolqu vulnerabbiltajiet fil-qasam tas-sigurtà f’dak li għandu x’jaqsam iċ-ċibersigurtà, is-sorveljanza sottomarina, il-ġbir ta’ data u l-ġbir ta’ intelligence; f’dan ir-rigward, huwa mħasseb ukoll dwar il-bejgħ ta’ kumpanija Netherlandiża, is-sinsla tal-infrastruttura tal-internet fl-Estonja, lil kumpanija Ċiniża marbuta mal-Armata Popolari ta’ Liberazzjoni; jenfasizza l-ħtieġa ta’ sforz konġunt fost l-Istati Membri biex jiġu evitati każijiet simili;

10.Ifakkar fil-ħtieġa li titwettaq evalwazzjoni bir-reqqa tal-infrastruttura u s-servizzi tas-sigurtà tal-informazzjoni tal-istituzzjonijiet tal-UE, b’mod partikolari fir-rigward tal-komunikazzjonijiet klassifikati bejn l-istituzzjonijiet u l-missjonijiet u l-operazzjonijiet barra mill-pajjiż; ifakkar li l-katina tal-provvista sħiħa għandha titqies biex jiġi żgurat li l-kumpaniji ma jkollhom l-ebda rabta diretta jew indiretta mar-RPĊ; jappella għal dispożizzjonijiet speċifiċi fil-proċeduri ta’ akkwist tal-istituzzjonijiet tal-UE biex jiġi limitat ir-riskju ta’ interferenza, inkluż l-akkwist, il-manutenzjoni jew l-iskrutinju minn parti terza;

11.Iwissi li investimenti kbar fil-portijiet marittimi, il-ferroviji u l-ajruporti jagħtu lil Beijing l-opportunità li tissorvelja u tikkontrolla l-attivitajiet f’nodi loġistiċi ewlenin b’dimensjoni strateġika fundamentali;

12.Jenfasizza l-fatt li, fl-2022, iċ-Ċina kienet it-tieni l-akbar sieħeb kummerċjali tal-UE f’termini ta’ merkanzija; jesprimi tħassib dwar ir-relazzjoni dejjem aktar żbilanċjata bejn l-UE u ċ-Ċina fil-qasam tal-kummerċ u tal-investiment, li hija aċċentwata mid-defiċit kummerċjali rekord tal-UE ta’ EUR 396 biljun fl-2022 u d-dipendenza tagħha fuq l-importazzjonijiet u l-investimenti Ċiniżi f’ċerti setturi kritiċi; jenfasizza l-politika kummerċjali internazzjonali żbilanċjata taċ-Ċina fil-kuntest tal-istrateġija ta’ ċirkolazzjoni doppja tagħha; jitlob lill-Kummissjoni tqajjem it-tħassib tal-UE maċ-Ċina dwar il-prattiki kummerċjali ġestiti tagħha;

13.Jargumenta li qasam ewlieni tal-infrastruttura kritika tal-UE huwa n-network tagħha ta’ istituti ta’ riċerka u faċilitajiet ta’ riċerka u żvilupp, li għandhom rwol importanti fil-kapaċità tal-UE li twettaq l-impenji tagħha fir-rigward tat-tranżizzjonijiet ekoloġiċi u diġitali tagħha, flimkien ma’ setturi ewlenin bħad-difiża spazjali; ifakkar fil-vulnerabbiltajiet fil-qasam tas-sigurtà marbuta mat-trasferimenti furzati tat-teknoloġija, is-serq tal-proprjetà intellettwali u l-iżvelar tal-għarfien, kemm fl-UE kif ukoll lil hinn minnha; jitlob li jkun hemm aktar viġilanza meta jitqies theddid bħal dan għall-kapaċità tal-UE li tkun innovattiva u li trawwem it-tkabbir;

14.Jinnota li l-kumpaniji Ċiniżi diġà huma mexxejja f’teknoloġiji ewlenin użati f’setturi bħall-infrastruttura bla fili tal-5G, id-droni, il-batteriji, il-missili ipersoniċi, l-enerġija solari u mir-riħ, kif ukoll il-kriptovaluti; jesprimi t-tħassib tiegħu dwar l-użi ta’ dawn it-teknoloġiji u d-dipendenzi li joħolqu; jinnota, f’dan ir-rigward, li 100 % tar-RAN 5G f’Ċipru huwa magħmul minn tagħmir Ċiniż, u 59 % fil-każ tal-Ġermanja; jisħaq li dan imur kontra l-linji gwida tas-“Sett ta’ Għodod għas-Sigurtà tal-5G” tal-UE biex jittaffew ir-riskji għas-sigurtà fin-networks u jistieden lill-Kunsill u lill-Kummissjoni jeskludu l-użu ta’ tagħmir u software minn manifatturi bbażati fir-RPĊ f’funzjonijiet tan-network ewlieni; ifakkar li l-kumpanija Huawei kienet qed tipparteċipa fi 11-il proġett fl-ambitu ta’ Orizzont Ewropa sa Ġunju 2023, u b’hekk irċeviet finanzjament totali ta’ EUR 3,89 miljun; għalhekk, iħeġġeġ lill-UE u lill-istituzzjonijiet Ewropej iwettqu skrinjar sistematiku tal-kumpaniji Ċiniżi li jibbenefika direttament jew indirettament minn programmi Ewropej ta’ importanza strateġika għall-UE u, fejn meħtieġ, itemmu l-parteċipazzjoni tagħhom; barra minn hekk, jistieden lill-Kummissjoni tipproponi standards ta’ sigurtà addizzjonali għall-fornituri Ċiniżi tal-5G u n-network 6G tal-ġenerazzjoni li jmiss;

15.Iqis li l-applikazzjoni TikTok, proprjetà tal-konglomerat Ċiniż ByteDance, tikser il-qafas Ewropew għall-privatezza tad-data, u dan jagħmilha riskju potenzjali u sors ta’ diżinformazzjoni sostnut miċ-Ċina; jilqa’ d-deċiżjoni tal-istituzzjonijiet tal-UE u l-istituzzjonijiet f’diversi Stati Membri tal-UE li jissospendu l-użu tal-applikazzjoni TikTok fuq apparati korporattivi, kif ukoll apparati personali rreġistrati fis-servizzi tal-apparat mobbli tal-istituzzjonijiet;

16.Iwissi li d-deterjorament tal-klima ta’ sigurtà fl-Ewropa, fil-viċinat tagħha u fid-dinja kollha jirrikjedi riflessjoni urġenti fuq il-mod kif tissaħħaħ l-awtonomija strateġika tal-UE u tonqos id-dipendenza tagħha minn pajjiżi bħar-RPĊ u rivali sistemiċi li huma theddida għas-sigurtà tal-UE; jisħaq fuq il-ħtieġa li jiġi evitat li t-teknoloġiji emerġenti sensittivi u l-oġġetti kruċjali b’użu doppju, b’mod partikolari dawk li huma kritiċi għas-sigurtà u d-difiża tal-UE, jiġu trasferiti lejn destinazzjonijiet li jqajmu tħassib, li jwettqu strateġiji ta’ fużjoni militari-ċivili jew jikkollaboraw ma’ dawn l-istrateġiji; iqis li l-istabbiliment ta’ sistemi elettroniċi ta’ liċenzjar doganali u tal-esportazzjoni fl-UE kollha huwa pass kritiku lejn kontrolli tal-esportazzjoni komuni Ewropej effettivi u jħeġġeġ lill-Istati Membri kollha biex jagħmlu dawn is-sistemi operattivi sa tmiem l-2024; jistieden, barra minn hekk, lill-istituzzjonijiet tal-UE u lill-Istati Membri jsaħħu l-kooperazzjoni mas-sħab transatlantiċi u sħab oħra tal-istess fehma fil-protezzjoni tal-infrastruttura kritika, u jiddefendu d-demokrazija u jippreservaw il-valuri, is-sigurtà u l-prosperità kondiviżi tagħna;

17.Jibqa’ mħasseb bil-fatt li l-infrastruttura kritika Ewropea, min-networks tat-telekomunikazzjoni għall-faċilitajiet tal-portijiet, hija dejjem aktar vulnerabbli għall-influwenzi esterni; ifaħħar, f’dan ir-rigward, il-miżuri leġiżlattivi reċenti maħsuba biex iqawwu r-reżiljenza tal-entitajiet kritiċi fl-UE; jinnota bi tħassib, madankollu, li inizjattivi bħal dawn huma fil-biċċa l-kbira limitati għall-proċeduri ta’ skrinjar tal-IDB, u jħallu mezzi oħra miftuħa għall-Partit Komunista Ċiniż biex jikseb aċċess għal assi kritiċi u jeżerċita l-influwenza tiegħu fuqhom, inkluż permezz tal-qbid mill-elit, it-trasferimenti tat-teknoloġija u tal-proprjetà intellettwali, kif ukoll id-dipendenzi fuq il-katina tal-provvista u s-suq tal-bejgħ; jinnota li l-istabbiliment ta’ qafas bir-reqqa għall-valutazzjoni u l-immappjar tar-riskju huwa imperattiv biex jiġu identifikati l-assi tal-infrastruttura kritika u s-suxxettibbiltajiet tagħhom; iqis li huwa meħtieġ li jiġi mmappjat, traċċat u vvalutat l-aċċess taċ-Ċina u ta’ pajjiżi terzi oħra għall-infrastruttura kritika fl-UE u li wieħed jipproċedi b’mod konġunt b’miżuri ta’ mitigazzjoni fejn meħtieġ; f’dan ir-rigward, jistieden lill-Kummissjoni, bl-appoġġ tal-Istati Membri, tiġbor inventarju eżawrjenti tal-assi kritiċi u tevalwa b’mod sistematiku l-vulnerabbiltà tagħhom għal influwenzi esterni; u għalhekk jitlob l-espansjoni tal-inizjattivi leġiżlattivi biex jiġu indirizzati tali riskji;

18.Jistieden lill-Kummissjoni tikkondividi mal-Parlament, qabel tmiem din il-leġiżlatura, analiżi dettaljata tar-riskji kummerċjali marbuta ma’ teknoloġiji bħas-semikondutturi, il-computing kwantistiku, il-blockchains, l-ispazju, l-intelliġenza artifiċjali u l-bijoteknoloġiji u l-ħtieġa possibbli għal azzjoni tal-UE f’dawn l-oqsma;

19.Ifakkar li r-Regolament dwar l-iskrinjar tal-IDB Ir-Regolament (UE) 2019/452 tad-19 ta’ Marzu 2019 li jistabbilixxi qafas għall-iskrinjar tal-investimenti diretti barranin fl-Unjoni (ĠU L 79 I, 21.3.2019, p. 1). jindirizza r-riskji għas-sigurtà u għall-ordni pubbliku li jirriżultaw mill-investimenti li jkunu ġejjin minn barra l-UE; itenni l-valur miżjud ewlieni tal-mekkaniżmu ta’ skrinjar bħala għodda pertinenti li tagħti lill-UE u lill-Istati Membri ħarsa ġenerali strateġika aħjar u għarfien aqwa tas-sitwazzjoni tax-xejriet, il-miri, il-mezzi u l-metodi użati minn atturi barranin biex iżidu l-influwenza ekonomika u politika tagħhom; jappella biex l-istrumenti attwali li jindirizzaw l-IDB u s-sussidji barranin jiġu estiżi biex jinkludu proċeduri ġeneralizzati ta’ skrinjar għall-partijiet ikkonċernati kollha involuti fi proġetti ta’ infrastruttura kritika tal-UE li jinkludu l-modi kollha ta’ parteċipazzjoni fi sforzi ta’ infrastruttura kritika, inklużi impriżi kollaborattivi, sħubijiet u trasferimenti tat-teknoloġija; jissottolinja wkoll li l-evalwazzjonijiet ta’ rutina ta’ proġetti ta’ infrastruttura kritika li jinvolvu partijiet ikkonċernati mhux tal-UE huma essenzjali u jemmen li dan il-proċess għandu jinkludi l-iskrutinju tal-istrutturi tas-sjieda, id-dipendenzi fi ħdan il-ktajjen tal-provvista, u t-trasferiment tat-teknoloġija assoċjata ma’ dawn il-proġetti; iqis ukoll li huwa neċessarju li jiġu stabbiliti standards ta’ diliġenza dovuta biex jiġi identifikat l-ingranaġġ taċ-Ċina fuq l-investituri fl-infrastruttura kritika tal-UE, u jenfasizza li dan l-approċċ għandu japplika b’mod ugwali għall-pajjiżi kandidati u għall-pajjiżi kandidati potenzjali; jisħaq li l-Istati Membri, fl-aħħar mill-aħħar, huma responsabbli mill-protezzjoni tal-infrastrutturi, iżda ma implimentawx b’mod sistematiku l-linji gwida attwali fil-qasam tal-IDB; jinsab imħasseb ħafna, f’dan ir-rigward, li mhux l-Istati Membri kollha għandhom fis-seħħ jew jużaw mekkaniżmi għall-iskrinjar tal-investiment barrani fl-infrastruttura kritika; jistieden b’mod urġenti lill-Istati Membri jimplimentaw b’mod konsistenti l-leġiżlazzjoni attwali relatata mal-IDB u dwar ir-reżiljenza tal-entitajiet kritiċi;

20.Jiddispjaċih, f’dan ir-rigward, dwar in-nuqqas ta’ skrinjar adegwat tar-riskji ta’ interferenza fl-akkwist pubbliku relatat mat-tagħmir tas-sigurtà, bħall-każ tal-kuntratt iffirmat mill-ajruport ta’ Strażburgu għall-installazzjoni ta’ skanners tas-sigurtà tal-ajruport u kanċelli fornuti mis-sussidjarja Ewropea tal-kumpanija Ċiniża Nuctech, parzjalment proprjetà tal-gvern Ċiniż u marbuta bil-politika tal- “Front Magħqud”; iwissi li kwalunkwe teknoloġija bħal din tista’ tinkorpora lakuni ta’ sigurtà intrinsiċi jew tiġi aċċessata matul il-manutenzjoni tagħha; min-naħa l-oħra, jilqa’ d-deċiżjoni tal-gvern Rumen li jtemm in-negozjati mal-Korporazzjoni China General Nuclear Power, CGNPC, dwar il-kostruzzjoni ta’ reatturi nukleari 3 u 4 f’Cernavoda;

21.Jisħaq, madankollu, li jrid jinstab bilanċ strateġiku bejn, minn naħa waħda, il-karattru miftuħ tas-suq uniku tal-UE u l-attraenza tiegħu għall-investiment, u, min-naħa l-oħra, id-difiża tal-infrastruttura kritika u l-awtonomija tal-UE, filwaqt li jitqiesu l-vulnerabbiltajiet tal-UE fil-qasam tas-sigurtà, speċjalment fir-rigward tal-koerċizzjoni ekonomika jew it-theddid għall-integrità tal-infrastruttura kritika tal-UE;

22.Jistieden lill-Kummissjoni tikkunsidra modi kif iżżid l-impatt tal-opinjonijiet tagħha dwar l-iskrinjar tal-IDB, sabiex jiġu evitati distorsjonijiet tas-suq uniku u ġirja lejn l-aktar livell baxx fost l-Istati Membri; jistieden lill-Kummissjoni u lill-Istati Membri biex jżidu l-armonizzazzjoni, inkluż billi jibnu għarfien espert xieraq, u biex jimplimentaw bis-sħiħ ir-Regolament ta’ skrinjar tal-IDB; jemmen li hemm lok u ħtieġa li r-Regolament jissaħħaħ fir-rieżami li jmiss tiegħu fi tmiem is-sena; iħeġġeġ lill-Kummissjoni tippreżenta proposta leġiżlattiva ambizzjuża dwar regolament rivedut li tindirizza l-lakuni kollha li ħarġu matul l-implimentazzjoni tiegħu, u tevalwa malajr il-possibbiltà ta’ proposta leġiżlattiva dwar mekkaniżmu ta’ skrinjar għall-investimenti ’il barra; jirrakkomanda l-bini ta’ mekkaniżmu ta’ skrinjar tal-investiment ’il barra propost fuq valutazzjoni tal-impatt li tinkludi konsultazzjoni xierqa man-negozji biex tiġi minimizzata kwalunkwe konsegwenza negattiva potenzjali fuq il-kompetittività Ewropea;

23.Jilqa’ l-approċċ il-ġdid ta’ “tnaqqis tar-riskji” fl-istrateġija Ewropea għas-sigurtà ekonomika proposta tal-20 ta’ Ġunju 2023, li għandha l-għan li timmassimizza l-benefiċċji tal-ftuħ ekonomiku tal-UE u li tipproteġi, tippromwovi u ssaħħaħ l-awtonomija strateġika miftuħa tal-UE, filwaqt li timminimizza r-riskji li jirriżultaw mid-dipendenzi ekonomiċi u l-istrumentalizzazzjoni possibbli tagħhom, inklużi investimenti u kollaborazzjoni f’riċerka f’teknoloġiji abilitanti ewlenin b’applikazzjonijiet militari, fost l-oħrajn, f’oqsma bħall-computing kwantistiku, semikondutturi avvanzati u l-intelliġenza artifiċjali; jitlob l-adozzjoni rapida tal-proposti tar-Rappreżentant Għoli u tal-Kummissjoni u jistieden lill-Istati Membri jimplimentaw bis-sħiħ il-qafas regolatorju estiż tal-UE biex jeskludu entitajiet li jistgħu jikkontribwixxu għall-fużjoni militari-ċivili u jsibu alternattivi għal proġetti ffinanzjati miċ-Ċina fl-UE permezz tal-iżvilupp ta’ approċċ komprensiv għall-identifikazzjoni, il-valutazzjoni u l-ġestjoni komuni tar-riskji għas-sigurtà ekonomika Ewropea;

24.Jilqa’ b’sodisfazzjon ukoll il-proposta tar-Rappreżentant Għoli u tal-Kummissjoni biex jiġi evitat il-ħrib ta’ teknoloġiji emerġenti sensittivi billi titfassal lista ta’ teknoloġiji b’użu doppju bbażata fuq kriterji definiti b’mod ristrett u li jħarsu ’l quddiem bħan-natura abilitanti u trasformattiva ta’ teknoloġija, ir-riskju ta’ fużjoni ċivili-militari u r-riskju tal-użu ħażin tat-teknoloġija għall-ksur tad-drittijiet tal-bniedem; jistieden lill-Kummissjoni u lill-Istati Membri jidentifikaw u jimplimentaw mill-aktar fis possibbli l-miżuri ta’ protezzjoni rilevanti għal dawn it-teknoloġiji b’użu doppju;

25.Jistieden, f’dan ir-rigward, lill-Kummissjoni, f’koordinazzjoni mal-Istati Membri, tfassal mekkaniżmu ta’ rispons rapidu għall-identifikazzjoni tal-użu doppju, jew l-użu ħażin, ta’ infrastrutturi fl-UE taħt is-sjieda, il-parteċipazzjoni jew il-konċessjoni Ċiniża, li jistgħu jintużaw biex jintemmu d-drittijiet ta’ konċessjoni u/jew tiġi sospiża l-kapaċità tad-dominju fil-każijiet ta’ sjieda u parteċipazzjoni; jistieden lill-Kummissjoni tirrapporta lill-Parlament kull sena dwar:(a)l-identifikazzjoni tal-użu doppju possibbli ta’ infrastrutturi strateġiċi li jipprovdu appoġġ loġistiku u ta’ intelligence liċ-Ċina;(b)ir-rispett sħiħ tal-leġiżlazzjoni kummerċjali tal-UE, speċjalment fir-rigward tad-diliġenza dovuta, il-ġlieda kontra l-koerċizzjoni u l-oġġetti magħmula b’xogħol furzat li jidħlu fis-suq tal-UE;

26.Jilqa’ pożittivament l-adozzjoni tal-Att Ewropew dwar iċ-Ċipep, li se jżid il-kapaċità tal-UE li tipproduċi semikondutturi u se joħloq mappa strateġika, fost l-oħrajn, tan-nuqqasijiet ta’ kapaċità fil-katina tal-valur tas-semikondutturi fl-UE, u b’hekk jillimita d-dipendenza tal-UE minn pajjiżi terzi bħaċ-Ċina; jappella għal aktar proposti maħsuba biex jassiguraw il-katini tal-produzzjoni u tal-provvista tal-infrastruttura kritika u tal-materjali kritiċi fi ħdan l-UE; jistieden ukoll lill-Kummissjoni u lill-Istati Membri jiżviluppaw inizjattivi addizzjonali mmirati biex jippermettu koordinament u kollaborazzjoni aktar mill-qrib ma’ sħab u alleati tal-istess fehma, u jimmonitorjaw u jiżviluppaw aktar, fejn possibbli u f’konformità mal-għan tal-UE li tnaqqas aktar dipendenzi, kapaċitajiet ta’ produzzjoni globali u ktajjen tal-provvista fl-infrastruttura u l-materjali kritiċi li huma kruċjali għas-sigurtà u d-difiża tal-UE; jiġbed l-attenzjoni b’mod partikolari għat-Tajwan, li għandu rwol sinifikanti fil-ktajjen tal-provvista globali u fl-ordni internazzjonali bbażat fuq ir-regoli; itenni l-appoġġ fit-tul tiegħu għall-Ftehim Bilaterali ta’ Investiment bejn l-UE u t-Tajwan u kwalunkwe arranġament ta’ benefiċċju reċiproku għall-kummerċ u l-investiment bilaterali;

27.Jistieden lill-Kummissjoni tipproponi qafas leġiżlattiv ġdid biex jittaffew ir-riskji għas-sigurtà li ġejjin mill-fornituri tas-sistemi tal-kejbils sottomarini, inkluż permezz ta’ monitoraġġ aktar strett u rieżami frekwenti tal-istrutturi ta’ sjieda ta’ tali fornituri, l-investimenti preċedenti tagħhom f’sistemi tal-kejbils sottomarini u l-prossimità tas-sistemi tal-kejbils sottomarini għall-bażijiet militari Ewropej u alleati; jisħaq fuq il-bżonn li lill-fornituri ta’ sistemi tal-kejbils, bħall-kumpaniji Ċiniżi, jiġihom impedit li jaqsmu d-data mas-servizzi tal-intelligence bi skopijiet differenti minn dawk relatati mal-protezzjoni tal-infrastruttura minn intrużjonijiet esterni jew attakki malizzjużi; jappella f’dan ir-rigward għal inizjattivi mmirati lejn l-iżvilupp ulterjuri ta’ kumpaniji li għandhom sjieda Ewropea jew li huma bbażati fl-Ewropa fil-qasam tas-sistemi tal-kejbils sottomarini;

28.Jissottolinja li r-reazzjonijiet tal-UE jridu jinbnew madwar fehim aqwa tas-sitwazzjoni strateġika rilevanti ċċentrata fuq valutazzjonijiet tat-theddid transpolitiċi u transnazzjonali u studji tal-vulnerabbiltà dwar l-infrastruttura kritika; huwa tal-fehma li approċċ deċentralizzat jew b’lakuni, nieqes minn viżibbiltà u skrutinju ċari fuq proġetti b’sinifikat strateġiku għad-difiża u s-sigurtà tal-Ewropa, jista’ jagħmel ħsara kbira lill-interessi ġeopolitiċi tal-Unjoni Id-Dipartiment Tematiku għar-Relazzjonijiet Esterni tad-Direttorat Ġenerali għall-Politiki Esterni tal-Unjoni, “Security implications of China-owned critical infrastructure in the European Union” (Implikazzjonijiet għas-sigurtà tal-infrastruttura kritika li tappartjeni liċ-Ċina fl-Unjoni Ewropea), Ġunju 2023.; ifakkar fil-vulnerabbiltajiet marbuta mal-indħil barrani, speċifikament fl-ispazju tal-informazzjoni, u l-interazzjoni bejn il-proġetti tal-IDB u l-operazzjonijiet ta’ manipulazzjoni tal-informazzjoni minn atturi barranin malizzjużi;

29.Jesprimi tħassib dwar il-penetrazzjoni tar-RPĊ fis-suq tal-UE u fil-viċinat tagħha f’sens usa’; jistieden lill-Kummissjoni u lis-Servizz Ewropew għall-Azzjoni Esterna (SEAE) jiżguraw li l-miżuri meħuda biex tissaħħaħ ir-reżiljenza tal-UE quddiem l-influwenza Ċiniża, inkluż it-tnaqqis tar-riskju, id-diversifikazzjoni u t-tnaqqis tad-dipendenzi kritiċi, jiġu estiżi anki għas-sħab l-aktar stretti tal-UE, b’mod partikolari għall-pajjiżi fil-fażi ta’ adeżjoni u għal dawk li huma parti mill-politika tal-viċinat tal-UE;

30.Ifakkar li l-forzi navali tar-RPĊ għandhom mezzi u strumenti ġuridiċi biex jiżguraw li l-bastimenti u l-infrastrutturi ċivili Ċiniżi jkunu jistgħu jintużaw għal skopijiet militari u tas-sigurtà; iqis li ċ-Ċina tista’ tuża l-infrastruttura kummerċjali ċivili tagħha biex issostni l-preżenza tal-Armata Popolari ta’ Liberazzjoni fil-pajjiżi terzi; iwissi bil-fatt li l-fużjoni ċivili-militari tagħti lill-Armata Popolari ta’ Liberazzjoni l-aċċess għall-portijiet barranin, u tippermettilha tagħmel prepożizzjonament tal-appoġġ loġistiku biex issostni l-iskjeramenti navali sal-Oċean Indjan, sal-Baħar Mediterran u sal-Oċean Atlantiku; jissottolinja li r-riskji ta’ spjunaġġ huma ogħla meta l-attivitajiet kummerċjali ċivili Ċiniżi jkunu jinsabu f’ċentri loġistiċi qrib il-bażijiet navali tal-UE u tan-NATO jew fl-operaturi portwarji li ffirmaw ftehimiet biex ifornu appoġġ loġistiku lill-kumpaniji Ewropej; jistieden lill-Istati Membri jindirizzaw b’mod urġenti l-ħtieġa li jitnaqqsu r-riskji ta’ spjunaġġ u sabotaġġ fl-infrastruttura kritika, b’mod partikolari dawk b’funzjoni militari, bħall-portijiet li jintużaw min-NATO; jisħaq, f’dan ir-rigward, li l-UE u n-NATO jridu jaħdmu flimkien biex jiżviluppaw pjan fit-tul kontra l-istrateġija ta’ fużjoni militari-ċivili taċ-Ċina fl-Ewropa u jistieden l-implimentazzjoni sħiħa tar-rapport ta’ valutazzjoni finali tat-task force UE-NATO Il-Kummissjoni Ewropea, ”EU-NATO Task Force on the resilience of critical infrastructure: Final assessment reportˮ (Task Force UE-NATO dwar ir-reżiljenza tal-infrastruttura kritika: Rapport ta’ valutazzjoni finali), Ġunju 2023.;

31.Jinnota li l-portijiet huma portali għad-dinja u bħala tali jiżvolġu rwol kruċjali fl-ekonomija tal-UE; jinnota bi tħassib li l-entitajiet bi sjieda Ċiniża jew dawk ikkontrollati miċ-Ċina żiedu b’mod strateġiku l-ishma tagħhom fil-portijiet u fl-infrastruttura tal-portijiet Ewropej; jistieden lill-Kummissjoni tippreżenta qafas ta’ politika strateġika tal-UE biex tnaqqas u tillimita l-influwenza u l-kontroll operazzjonali miċ-Ċina u reġimi oħra; ifakkar ukoll li r-RPĊ tipproġetta l-poter tagħha ’il barra mill-pajjiż billi tuża network ta’ portijiet kummerċjali u faċilitajiet b’użu doppju li jipprovdu appoġġ loġistiku u ta’ intelligence lill-flotta navali Ċiniża; jinnota li fl-2022, il-kumpaniji Ċiniżi kienu s-sidien ta’ jew kienu joperaw terminals f’96 port f’53 pajjiż; jinnota barra minn hekk li f’mill-inqas disa’ portijiet, li tnejn minnhom jinsabu fl-Ewropa, il-bastimenti tal-gwerra tal-Flotta Navali tal-Armata għal-Liberazzjoni tal-Poplu (PLAN) għaddew minn tiswijiet jew manutenzjoni sinifikanti għall-bastimenti u t-tagħmir; jirrimarka li ż-żjarat navali jiżvelaw oqsma ta’ influwenza, żoni operattivi prijoritizzati, objettivi ta’ ġbir ta’ intelligence u prijoritajiet ta’ kooperazzjoni;

32. Jenfasizza l-ħtieġa ta’ approċċ ġeopolitiku għall-kooperazzjoni globali dwar l-infrastruttura kritika sabiex l-UE tiffaċċja b’suċċess l-isfidi l-ġodda tas-sigurtà; jinnota li terz tal-infrastrutturi Afrikani kollha mibnija mill-2010, inkluż madwar 50 % tan-networks 3G fl-Afrika u 70 % tan-networks 4G tagħha, ġew iffinanzjati u mibnija minn intrapriżi tal-istat Ċiniżi; jissottolinja li, matul l-aħħar 20 sena, iċ-Ċina żiedet l-impenji kummerċjali, ta’ investiment u ta’ self tagħha b’USD 160 biljun mal-Gvernijiet Afrikani u mal-intrapriżi tal-istat tagħhom b’obbligi kuntrattwali skarsi jew opaki, b’mod predominanti fit-trasport, il-ġenerazzjoni tal-enerġija, l-estrazzjoni u t-telekomunikazzjoni; jenfasizza b’mod partikolari l-fatt li kumpanija tat-telekomunikazzjoni Ċiniża waħda bniet sa 70 % tal-infrastruttura tat-teknoloġija tal-informazzjoni fl-Afrika, kif ukoll ir-rwol tal-kumpaniji Ċiniżi fil-finanzjament, il-bini, l-espansjoni u r-rinnovazzjoni ta’ mill-inqas 14-il network tat-telekomunikazzjoni intergovernattiv Afrikan ta’ natura sensittiva; jesprimi tħassib li l-mudell Ċiniż huwa attraenti b’mod ċar għal ħafna pajjiżi li ma jistgħux jew mhumiex lesti li jissodisfaw ir-rekwiżiti tal-UE għall-aċċess għal livelli ekwivalenti ta’ finanzjament, u b’hekk jespandi l-influwenza Ċiniża għad-detriment tas-sħubijiet tal-UE u jiskatta riskji ta’ dejn mhux sostenibbli għal dawn il-pajjiżi, li jagħmel ħsara lill-iżvilupp fit-tul tagħhom għad-detriment tal-popolazzjoni lokali tagħhom; jistieden lill-Kummissjoni, lis-SEAE u lill-Istati Membri jintensifikaw l-isforzi, inkluż billi jattiraw investimenti mis-settur privat, biex jimplimentaw il-Pakkett ta’ Investiment tal-Global Gateway b’valur totali ta’ EUR 150 biljun, maqbul fis-sitt Summit bejn l-UE u l-Unjoni Afrikana fi Frar 2022; iħeġġeġ lill-Kunsill u lill-Kummissjoni jimplimentaw malajr proġetti, speċjalment proġetti fanal, taħt l-inizjattiva;

33.Jissottolinja bi tħassib l-istrateġija tar-RPĊ maħsuba biex tibni “bażi ta’ kooperazzjoni għall-ekonomija blu” tul il-kosti Afrikani, inkluż permezz tal-bini ta’ laneċ tas-sajd u ta’ faċilitajiet għat-tiswija tal-bastimenti, li jkunu jistgħu jintużaw ukoll għal skopijiet militari; jenfasizza li hemm nuqqas ġenerali ta’ dettalji u ta’ trasparenza rigward dawn il-ftehimiet u dawn il-liċenzji mal-pajjiżi Afrikani; jevidenzja l-konsegwenzi ġeopolitiċi potenzjali għall-UE, speċjalment fil-pajjiżi terzi li fihom l-UE hija impenjata;

34.Jagħti istruzzjonijiet lill-President tiegħu biex tgħaddi din ir-riżoluzzjoni lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lill-Kunsill u lill-Kummissjoni.