P9_TA(2024)0035L-attivitajiet tal-Ombudsman Ewropew – rapport annwali 2022Riżoluzzjoni tal-Parlament Ewropew tas-17 ta’ Jannar 2024 dwar l-attivitajiet tal-Ombudsman Ewropew - rapport annwali 2022 (2023/2120(INI))Il-Parlament Ewropew,

–wara li kkunsidra r-rapport annwali rigward l-attivitajiet tal-Ombudsman Ewropew fis-sena 2022,

–wara li kkunsidra l-Artikolu 10(3) tat-Trattat dwar l-Unjoni Ewropea,

–wara li kkunsidra l-Artikoli 15, 24(3), 228 u 298(1) tat-Trattat dwar il-Funzjonament tal-Unjoni Ewropea (TFUE),

–wara li kkunsidra l-Artikoli 11, 41, 42 u 43 tal-Karta tad-Drittijiet Fundamentali tal-Unjoni Ewropea (“il-Karta”),

–wara li kkunsidra l-Konvenzjoni tan-NU dwar id-Drittijiet tal-Persuni b’Diżabbiltà (UN CRPD),

–wara li kkunsidra r-Regolament (UE, Euratom) 2021/1163 tal-Parlament Ewropew tal-24 ta’ Ġunju 2021 li jistabbilixxi r-regolamenti u l-kundizzjonijiet ġenerali li jirregolaw it-twettiq tad-dmirijiet tal-Ombudsman (Statut tal-Ombudsman Ewropew) u li jħassar id-Deċiżjoni 94/262/KEFA, KE, Euratom ĠU L 253, 16.7.2021, p. 1.,

–wara li kkunsidra l-Kodiċi Ewropew ta’ Mġiba Amministrattiva Tajba, kif adottat mill-Parlament fis-6 ta’ Settembru 2001,

–wara li kkunsidra l-Ftehim Qafas ta’ Kooperazzjoni konkluż bejn il-Parlament u l-Ombudsman Ewropew fil-15 ta’ Marzu 2006, li daħal fis-seħħ fl-1 ta’ April 2006,

–wara li kkunsidra r-riżoluzzjonijiet preċedenti tiegħu dwar l-attivitajiet tal-Ombudsman Ewropew,

–wara li kkunsidra l-Artikoli 54 u 142(2) tar-Regoli ta’ Proċedura tiegħu,

–wara li kkunsidra r-rapport tal-Kumitat għall-Petizzjonijiet (A9-0414/2023),

A.billi r-rapport annwali rigward l-attivitajiet tal-Ombudsman Ewropew fis-sena 2022 ġie ppreżentat formalment lill-President tal-Parlament Ewropew fit-28 ta’ April 2023 u billi l-Ombudsman, is-Sinjura Emily O’Reilly, ippreżentat ir-rapport lill-Kumitat għall-Petizzjonijiet fis-27 ta’ Ġunju 2023 fi Brussell;

B.billi l-Artikoli 20, 24 u 228 tat-TFUE jagħtu s-setgħa lill-Ombudsman Ewropew li jilqa’ lmenti li jikkonċernaw każijiet ta’ amministrazzjoni ħażina fl-attivitajiet tal-istituzzjonijiet, il-korpi, l-uffiċċji u l-aġenziji tal-Unjoni, bl-eċċezzjoni tal-Qorti tal-Ġustizzja tal-Unjoni Ewropea fl-eżerċizzju tal-funzjonijiet ġudizzjarji tagħha;

C.billi l-Artikolu 15 tat-TFUE jistipula li “sabiex tiġi promossa t-tmexxija tajba u sabiex tiġi assigurata l-parteċipazzjoni tas-soċjetà ċivili, l-istituzzjonijiet, il-korpi u l-organi tal-Unjoni għandhom iwettqu x-xogħol tagħhom b’mod kemm jista’ jkun miftuħ” u li “kull ċittadin tal-Unjoni, u kull persuna fiżika jew ġuridika li toqgħod jew li jkollha l-uffiċċju reġistrat tagħha fi Stat Membru, għandha jkollha d-dritt għall-aċċess għal dokumenti tal-istituzzjonijiet, il-korpi u l-organi tal-Unjoni”; billi l-iżgurar li ċ-ċittadini tal-UE jirċievu servizzi ta’ kwalità u li l-amministrazzjoni tal-UE twieġeb għall-bżonnijiet u għat-tħassib tagħhom huwa essenzjali sabiex jiġu protetti d-drittijiet u l-libertajiet fundamentali taċ-ċittadini;

D.billi l-Artikolu 41 tal-Karta, li jirrigwarda d-dritt għal amministrazzjoni tajba, jgħid li “kull persuna għandha d-dritt li dak kollu li jirrigwardaha jiġi ttrattat b’mod imparzjali u ġust u fi żmien raġonevoli mill-istituzzjonijiet, il-korpi u l-organi tal-Unjoni”;

E.billi l-Artikolu 43 tal-Karta jistabbilixxi li kull ċittadin tal-Unjoni, u kull persuna fiżika jew ġuridika li tirrisjedi jew li jkollha l-uffiċċju rreġistrat tagħha fi Stat Membru għandu d-dritt li jirrikorri għand l-Ombudsman Ewropew f’każijiet ta’ amministrazzjoni ħażina fl-attivitajiet tal-istituzzjonijiet, tal-korpi jew tal-aġenziji tal-Unjoni, bl-eċċezzjoni tal-Qorti tal-Ġustizzja tal-Unjoni Ewropea fl-eżerċizzju tal-funzjonijiet ġudizzjarji tagħha;

F.billi l-Artikolu 298(1) tat-TFUE jistabbilixxi li fit-twettiq tal-missjonijiet tagħhom, l-istituzzjonijiet, il-korpi u l-organi tal-Unjoni għandu jkollhom l-appoġġ ta’ amministrazzjoni Ewropea miftuħa, effiċjenti u indipendenti;

G.billi fl-2022, l-Ombudsman fetħet 348 inkjesta, li minnhom, 348 kienu msejsa fuq ilmenti waqt li 4 kienu inkjesti fuq inizjattiva proprja, filwaqt li għalqet 330 inkjesta (325 ibbażati fuq ilmenti u 5 fuq inizjattiva proprja);

H.billi fl-2022, il-maġġoranza l-kbira tal-inkjesti kienu jinvolvu l-Kummissjoni (197 inkjesta jew 57,1 %), filwaqt li warajha kien hemm l-Uffiċċju Ewropew tal-Għażla tal-Persunal (22 inkjesta jew 6,3 %), il-Parlament Ewropew (19-il inkjesta jew 5,5 %), u s-Servizz Ewropew għall-Azzjoni Esterna (16-il inkjesta jew 4,6 %); billi l-inkjesti li kien fadal kienu mqassma kif ġej: l-Aġenzija Ewropea għall-Gwardja tal-Fruntiera u tal-Kosta (Frontex) (14-il inkjesta jew 4,3 %), l-Aġenzija tal-Unjoni Ewropea għas-Sigurtà fl-Avjazzjoni (7 inkjesti jew 2 %), istituzzjonijiet jew korpi oħra tal-UE (46 inkjesta jew 13,5 %), u aġenziji oħra tal-UE (23 inkjesta jew 6,7 %);

I.billi fl-2022, l-akbar perċentwal tal-inkjesti tal-Ombudsman kien jikkonċerna lill-Kummissjoni, fejn l-attivitajiet amministrattivi tagħha jirċievu attenzjoni pubblika konsiderevoli, peress li hija l-eżekuttiv tal-UE;

J.billi fl-inkjesti magħluqa mill-Ombudsman fl-2022, f’37 % tal-każijiet instab li ma kienx hemm amministrazzjoni ħażina, f’46,1 % tal-każijiet instabet soluzzjoni min-naħa tal-istituzzjoni, fi 12,7 % tal-każijiet ma kienx iġġustifikat li ssir aktar investigazzjoni waqt li f’4,5 % tal-każijiet instabet amministrazzjoni ħażina;

K.billi t-tliet punti ta’ tħassib ewlenin fl-inkjesti magħluqa mill-Ombudsman fl-2022 kienu t-trasparenza u l-obbligu ta’ rendikont (eż. l-aċċess għall-informazzjoni u d-dokumenti) (32 %), il-kultura tas-servizz (20 %) u r-rispett għad-drittijiet fundamentali (15 %); billi tħassib ieħor kien jinkludi l-użu xieraq ta’ diskrezzjoni (inkluż fi proċeduri ta’ ksur), ir-reklutaġġ, il-ġestjoni tajba ta’ kwistjonijiet ta’ persunal, ir-rispett għad-drittijiet proċedurali, il-ġestjoni xierqa ta’ proċeduri ta’ ksur, il-ġestjoni finanzjarja tajba, l-etika u l-parteċipazzjoni pubblika fit-teħid ta’ deċiżjonijiet tal-UE;

L.billi fl-2022, l-Ombudsman talbet lill-Kunsill biex jagħti aċċess b’aktar ħeffa għad-dokumenti leġiżlattivi, sabiex il-pubbliku jkun jista’ jipparteċipa b’mod effettiv fid-diskussjonijiet dwar abbozzi ta’ liġijiet tal-UE L-Ombudsman Ewropew, “Il-Kunsill għandu jagħti aċċess pubbliku aktar malajr għad-dokumenti leġislattivi”, 29 ta’ Ġunju 2022.;

M.billi l-Ombudsman sabet amministrazzjoni ħażina L-Ombudsman Ewropew, “Deċiżjoni dwar ir-rifjut tal-Kummissjoni Ewropea ta’ aċċess pubbliku għal messaġġi testwali li sar skambju tagħhom bejn il-President tal-Kummissjoni u l-Uffiċjal Kap Eżekuttiv ta’ kumpanija farmaċewtika dwar ix-xiri ta’ vaċċin kontra l-COVID-19 (każ 1316/2021/MIG)”, 12 ta’ Lulju 2022. L-Ombudsman Ewropew, “L-Ombudsman tikkritika kif il-Kummissjoni ttrattat it-talba għal aċċess għall-messaġġi testwali tal-President”, 28 ta’ Jannar 2022. fil-mod kif il-Kummissjoni ttrattat talba għal aċċess pubbliku għall-messaġġi bejn il-President tagħha u s-CEO ta’ kumpanija farmaċewtika (Pfizer);

N.billi fl-2022, l-Ombudsman fetħet inkjesta dwar kif il-Bank Ċentrali Ewropew (BĊE) jittratta r-“revolving doors” L-Ombudsman Ewropew, “L-Ombudsman tiftaħ inkjesta dwar kif il-BĊE jittratta r-“revolving doors””, 3 ta’ Marzu 2022.;

O.billi l-Ombudsman fetħet inkjesta strateġika dwar id-dewmien sistemiku u sinifikattiv fil-mod kif il-Kummissjoni Ewropea tittratta t-talbiet għal aċċess pubbliku għad-dokumenti; billi l-inkjesta tal-Ombudsman sabet amministrazzjoni ħażina fil-mod kif il-Kummissjoni ttrattat dan it-tip ta’ talbiet, u notevolment it-talbiet għal rieżami tad-deċiżjonijiet inizjali (“applikazzjonijiet konfermatorji”) L-Ombudsman Ewropew, “Deċiżjoni dwar iż-żmien li tieħu l-Kummissjoni Ewropea biex tittratta t-talbiet għal aċċess pubbliku għad-dokumenti (inkjesta strateġika OI/2/2022/OAM)”, 18 ta’ Settembru 2023.;

P.billi fl-2022, l-Ombudsman wettaq ukoll inkjesti u inizjattivi strateġiċi usa’ fi kwistjonijiet sistemiċi fl-istituzzjonijiet tal-UE, li jkopru kwistjonijiet etiċi, manuvri ta’ “revolving doors”, l-obbligu ta’ rendikont fit-teħid ta’ deċiżjonijiet, aċċess għal dokumenti u drittijiet fundamentali;

Q.billi fl-2022, l-Ombudsman ħarġet rakkomandazzjoni lill-Kunsill biex jagħti aċċess pubbliku sħiħ għad-dokumenti leġiżlattivi mitluba, wara inkjesta dwar ir-rifjut tal-Kunsill li jagħmel dan fil-kuntest tan-negozjati dwar l-abbozz ta’ “Att dwar is-Swieq Diġitali”, li warajha l-Ombudsman ikkonkludiet li kien hemm amministrazzjoni ħażina;

R.billi fl-2022, l-Uffiċċju tal-Ombudsman kompla qajjem kuxjenza pubblika dwar ir-rwol tal-Ombudsman fiż-żamma ta’ standards għoljin ta’ trasparenza u ta’ obbligu ta’ rendikont fl-amministrazzjoni tal-UE;

S.billi l-Ombudsman iddeċidiet li tniedi konsultazzjoni pubblika dwar it-trasparenza u l-parteċipazzjoni fit-teħid ta’ deċiżjonijiet tal-UE relatati mal-ambjent, fid-dawl tal-emerġenza klimatika u tad-degradazzjoni ambjentali u tal-ekosistema, bil-ħsieb li tagħmel valutazzjoni tal-approċċ tal-UE, bħala parti għall-Konvenzjoni ta’ Aarhus, fl-iżgurar ta’ livell għoli ta’ aċċess pubbliku għal informazzjoni ambjentali u ta’ parteċipazzjoni pubblika fit-teħid ta’ deċiżjonijiet relatati mal-ambjent;

T.billi fl-2022, l-Ombudsman ħeġġet lill-Kummissjoni biex tittratta l-aċċess għal talbiet ta’ dokumenti li jikkonċernaw il-fondi ta’ rkupru tal-UE b’konsistenza akbar u biex tispjega aħjar ir-raġunament tagħha meta tiddeċiedi li ma tirrilaxxax l-informazzjoni mitluba L-Ombudsman Ewropew, “L-Ombudsman tappella għal trasparenza mtejba fir-rigward tal-fondi ta’ rkupru tal-UE”, 1 ta’ Diċembru 2022.;

U.billi fl-2022, l-Ombudsman fetħet inkjesta dwar ir-rifjut tal-Kummissjoni Ewropea li tagħti aċċess pubbliku għal dokumenti relatati mal-proposta għal regolament tagħha dwar l-Ispazju Ewropew tad-Data dwar is-Saħħa L-Ombudsman Ewropew, “Ir-rifjut tal-Kummissjoni Ewropea li tagħti aċċess pubbliku għad-dokumenti relatati mal-proposta tagħha għal Regolament dwar l-Ispazju Ewropew tad-Data dwar is-Saħħa (COM(2022) 197 final)”, inkjesta miftuħa fit-28 ta’ Novembru 2022.;

V.billi fl-2022, l-Ombudsman fetħet inkjesta dwar il-mod kif il-Kummissjoni ttrattat talba għal aċċess pubbliku għad-dikjarazzjonijiet tal-interessi tal-membri tal-Bord tal-Iskrutinju Regolatorju tagħha L-Ombudsman Ewropew, “Kif il-Kummissjoni Ewropea indirizzat talba għal aċċess pubbliku għad-dikjarazzjonijiet tal-interessi tal-membri tal-Bord tal-Iskrutinju Regolatorju tagħha”, deċiżjoni maħruġa fl-20 ta’ Diċembru 2022.;

W.billi l-Ombudsman enfasizzat li r-regoli tal-UE dwar l-akkwist pubbliku mhumiex robusti jew ċari biżżejjed biex jipprevjenu kunflitti ta’ interess u kkritikat lill-Kummissjoni għall-iskrutinju kritiku insuffiċjenti tagħha qabel ma tat kuntratt biex isir studju dwar l-integrazzjoni ta’ għanijiet ambjentali, soċjali u ta’ governanza fir-regoli bankarji tal-UE, lil BlackRock Investment Management, kumpanija li tiġġestixxi l-investimenti fis-setturi tal-fjuwils fossili u tal-banek, li huma oqsma li jaqgħu fl-ambitu tar-regoli ambjentali, soċjali u ta’ governanza l-ġodda;

1.Jilqa’ r-rapport annwali għall-2022 ippreżentat mill-Ombudsman Ewropew;

2.Jifraħ lis-Sinjura Emily O’Reilly għax-xogħol tajjeb tagħha u l-isforzi kontinwi tagħha biex ittejjeb il-prattiki amministrattivi u biex tippromwovi l-obbligu ta’ rendikont u t-trasparenza sħiħa tal-istituzzjonijiet, il-korpi, l-uffiċċji u l-aġenziji tal-UE, kif ukoll biex tiżgura l-aċċessibbiltà tad-dokumenti tal-UE għaċ-ċittadini tal-UE;

3.Jesprimi l-apprezzament tiegħu għall-kooperazzjoni kostruttiva kontinwa tal-Ombudsman Ewropew mal-Parlament Ewropew, u notevolment mal-Kumitat għall-Petizzjonijiet, kif ukoll ma’ istituzzjonijiet oħra tal-UE; itenni l-impenn tiegħu li jappoġġja lill-Ombudsman fil-qadi ta’ dmirijietha;

4.Jifraħ lill-Uffiċċju tal-Ombudsman għat-titjib sinifikanti fir-rata ta’ effiċjenza fit-tul tal-inkjesti għall-każijiet magħluqa, li minn medja ta’ 13-il xahar fl-2013 tjieb għal medja ta’ inqas minn 6 xhur fl-2022; jissottolinja li r-riżultati miksuba jkopru diversi oqsma tal-amministrazzjoni tal-UE b’riżorsi limitati;

5.Jistieden lill-Kunsill jikkonforma bis-sħiħ mal-istandards ta’ trasparenza ta’ demokrazija parlamentari u parteċipattiva, kif meħtieġ skont it-Trattati u mitlub mill-Ombudsman; ifakkar li l-Qorti tal-Ġustizzja tal-UE stipulat li l-prinċipji ta’ pubbliċità u trasparenza huma inerenti għall-proċess leġiżlattiv tal-UE u li n-nuqqas ta’ trasparenza u informazzjoni jdgħajjef il-fiduċja taċ-ċittadini fil-leġittimità tal-proċess leġiżlattiv tal-UE b’mod ġenerali;

6.Jistieden lill-Kunsill jagħti liċ-ċittadini aċċess f’waqtu għad-dokumenti leġiżlattivi tiegħu matul il-proċeduri leġiżlattivi li jkunu għaddejjin sabiex iħares bis-sħiħ id-dritt taċ-ċittadini bbażat fuq it-Trattati li jipparteċipaw fil-ħajja demokratika tal-Unjoni, li min-naħa tiegħu isaħħaħ il-fiduċja taċ-ċittadini fil-proċess ġenerali tat-teħid tad-deċiżjonijiet tal-UE;

7.Jilqa’ l-ftuħ ta’ inkjesta fuq inizjattiva proprja biex tivvaluta kif il-Kummissjoni tiżgura li l-interazzjonijiet tagħha mar-rappreżentanti tal-industrija tat-tabakk ikunu trasparenti; jissottolinja li n-nuqqas tal-Kummissjoni kollha kemm hi li tippubblika b’mod proattiv id-dettalji tal-laqgħat tagħha mal-lobbisti tat-tabakk kien jikkostitwixxi amministrazzjoni ħażina, kif indikat mill-Ombudsman fis-sejbiet preliminari tagħha; ifakkar li l-UE ffirmat u kkonfermat formalment il-Konvenzjoni Qafas tal-Organizzazzjoni Dinjija tas-Saħħa dwar il-Kontroll tat-Tabakk u hija obbligata tikkonforma mad-dispożizzjonijiet tagħha li jistabbilixxu li l-interazzjonijiet mal-industrija tat-tabakk għandhom isiru biss meta strettament meħtieġ mil-lat regolatorju kif ukoll li jagħmlu dawk l-interazzjonijiet trasparenti sabiex jiġi evitat li l-industrija tat-tabakk ikollha impatt negattiv fuq il-politiki tas-saħħa pubblika;

8.Iqis li huwa ta’ importanza enormi li l-Ombudsman tvara investigazzjoni biex tivvaluta l-livell ta’ indipendenza tal-Grupp Konsultattiv tal-Industrija tal-Pjattaforma tal-Enerġija tal-UE stabbilit mill-Kummissjoni;

9.Japprova r-riżultat tal-eżami tal-Ombudsman ta’ kif il-Kummissjoni tiżgura li l-esperti esterni involuti fl-evalwazzjoni tal-proposti tal-proġetti taħt il-Fond Ewropew għad-Difiża ma jkollhomx kunflitti ta’ interess; jissottolinja l-importanza enormi li titwettaq valutazzjoni bir-reqqa tal-kunflitti ta’ interess qabel ma jinħatru l-esperti u li jiġi żgurat li l-obbligi ta’ trasparenza u etika jiġu implimentati b’mod robust;

10.Jilqa’ l-proposta tal-Kummissjoni, bi tweġiba għas-sejbiet tal-Ombudsman wara l-inkjesta tagħha dwar il-każ BlackRock, li temenda r-Regolament Finanzjarju biex tinkludi l-għażla li l-offerenti jiġu rrifjutati jekk ikollhom kunflitt ta’ interess; jistieden lill-Kummissjoni tikkonforma għalkollox mas-suġġerimenti tal-Ombudsman billi tadotta regoli msaħħa u aktar ċari mmirati lejn il-prevenzjoni ta’ kwalunkwe kunflitt ta’ interess fil-proċeduri kollha relatati mal-akkwist pubbliku, inkluż għal-linji gwida interni tagħha;

11.Jenfasizza l-fatt li, wara inkjesta mill-Ombudsman dwar il-fenomenu tar-“revolving doors”, il-Kummissjoni qed ittejjeb il-ġestjoni tagħha tal-kwistjoni u titlob informazzjoni mingħand persunal preċedenti dwar kif qed jikkonformaw mar-restrizzjonijiet rilevanti; jinnota l-pubblikazzjoni b’aktar ħeffa mill-Kummissjoni ta’ ħarsa ġenerali annwali tagħha tal-membri tal-persunal anzjani li jitolbu permess biex jiċċaqilqu għal impjieg ġdid, u l-valutazzjoni tagħha ta’ dawn it-talbiet; jissottolinja li l-Kummissjoni ma għandha tagħti l-ebda awtorizzazzjoni fejn l-impjieg ikkonċernat ma jkunx jista’ jkun soġġett għal restrizzjonijiet li jtaffu b’mod adegwat ir-riskji ta’ kunflitti ta’ interess jew fejn dawk ir-restrizzjonijiet ma jkunux jistgħu jkunu mmonitorjati u infurzati b’mod kredibbli, inkluż l-obbligu għall-impjegatur il-ġdid li jagħmel ir-restrizzjonijiet pubbliċi; jemmen li l-Kummissjoni għandha tippubblika b’mod f’waqtu l-informazzjoni dwar l-attivitajiet kollha ta’ wara s-servizz ta’ ex-membri tal-persunal anzjani li hija tivvaluta, u b’hekk ittejjeb l-iskrutinju pubbliku ta’ dawn id-deċiżjonijiet, li huwa essenzjali għal skopijiet ta’ monitoraġġ; jilqa’ l-fatt li l-persunal bil-liv mhux imħallas issa huwa pprojbit milli jieħu impjieg f’oqsma fejn hemm riskju ta’ kunflitt ta’ interess; iħeġġeġ lill-Ombudsman timmonitorja l-mod ta’ kif il-Kummissjoni tittratta dawn il-kwistjonijiet;

12.Jilqa’ l-inkjesta fuq inizjattiva proprja miftuħa mill-Ombudsman biex jevalwa kif il-BĊE jamministra l-kwistjoni tar-“revolving doors” u japprova s-sejħa tal-Ombudsman lill-BĊE biex japplika regoli aktar stretti li jirregolaw iċ-ċaqliq tal-persunal fis-settur privat; jappoġġja r-rakkomandazzjoni li l-persunal tal-BĊE għandu jkun soġġett għal rekwiżiti stretti ta’ preklużjoni u li l-perjodu li matulu ex-persunal tal-BĊE jkunu pprojbiti milli jagħmlu lobbjar lil ex-kollegi tagħhom għandu jiżdied;

13.Jissottolinja li Qatargate tefa’ dawl ġdid dwar il-lobbjar u dwar it-tfassil tal-politika fl-UE; jirrikonoxxi l-valutazzjoni kritika tal-Ombudsman tal-iskandlu u jilqa’ l-iżvilupp ta’ miżuri ġodda mfassla biex itejbu l-istandards ta’ integrità fi ħdan il-Parlament Ewropew biex jissalvagwardjaw id-demokrazija tal-UE; iqis dawn l-azzjonijiet bħala l-ewwel pass importanti biex jissaħħaħ il-qafas regolatorju tal-UE, peress li għandhom l-għan li jrawmu standards ogħla tal-etika u kontra l-korruzzjoni u b’hekk jagħmlu lill-istituzzjonijiet tal-UE eżempji ta’ integrità u ta’ obbligu ta’ rendikont;

14.Jilqa’ l-isforzi kontinwi tal-Ombudsman biex ittejjeb it-trasparenza u l-etika fir-rigward tal-lobbjar, b’mod partikolari billi talbet lill-Kummissjoni ssaħħaħ il-Kodiċi ta’ Kondotta għall-Kummissarji, toħloq rekord pubbliku tal-laqgħat bejn il-Kummissarji u l-lobbisti u tippubblika b’mod proattiv l-ispejjeż tal-ivvjaġġar tal-Kummissarji;

15.Jissottolinja li l-parteċipazzjoni taċ-ċittadini fit-teħid tad-deċiżjonijiet tal-UE hija importanti għal-leġittimità tagħha; japprezza l-impenn tal-Ombudsman li jrawwem l-l-obbligu ta’ rendikont fit-teħid tad-deċiżjonijiet tal-UE, speċjalment fil-qasam tad-deċiżjonijiet ambjentali; jilqa’ u jappoġġja t-talbiet tal-Ombudsman lill-Bank Ewropew tal-Investiment (BEI) biex jieħu diversi passi ta’ trasparenza biex il-pubbliku jkun jista’ jara aktar faċilment l-impatt ambjentali potenzjali tal-proġetti li jiffinanzja kif ukoll l-intenzjoni tal-Ombudsman li żżid l-iskrutinju tagħha tal-attivitajiet tal-BEI, fid-dawl tas-segwitu insuffiċjenti tal-BEI sal-lum, b’mod partikolari fir-rigward tal-pubblikazzjoni f’waqtha ta’ informazzjoni dwar proġetti relatati mal-ambjent u mal-finanzi tal-BEI sabiex jingħata żmien biżżejjed lill-pubbliku biex iqajjem tħassib;

16.Ifaħħar il-ħidma tal-Ombudsman fil-prijoritizzazzjoni tal-valutazzjoni tagħha tat-trasparenza tat-teħid ta’ deċiżjonijiet ambjentali tal-UE, wara, inter alia, is-sejba tagħha ta’ amministrazzjoni ħażina fin-nuqqas tal-Kummissjoni li tikkunsidra sew l-impatt ambjentali tal-ftehim kummerċjali UE-Mercosur qabel ma kkonkludiet in-negozjati, in-nuqqasijiet severi tal-Kummissjoni fil-mod kif trattat it-talbiet għal aċċess pubbliku għal informazzjoni ambjentali kif ukoll in-nuqqas ta’ regoli ċari biex jiġi żgurat li l-esperti li tikkonsulta l-Kummissjoni, fil-kuntest tat-tfassil tal-politika ambjentali, ma jkunux soġġetti għal kunflitti ta’ interess;

17.Jissottolinja li l-Ombudsman ħasset li hu ta’ dispjaċir il-fatt li t-trasparenza proattiva fil-parti l-kbira seħħet biss wara li l-pjanijiet nazzjonali tal-Faċilità għall-Irkupru u r-Reżiljenza (RRF) kienu diġà ġew approvati, u b’hekk il-pubbliku ma setax isegwi n-negozjati b’mod adegwat; jinsab imħasseb dwar il-fatt li l-Kummissjoni qed iddum ħafna biex tittratta talbiet għal aċċess pubbliku għal dokumenti relatati mal-Faċilità għall-Irkupru u r-Reżiljenza, li f’xi każijiet jieħdu sena jew aktar; iħeġġeġ lill-Kummissjoni tinkoraġġixxi lill-Istati Membri jużaw portal pubbliku biex jelenkaw ir-riċevituri kollha tal-finanzjament fl-ambitu tal-Faċilità għall-Irkupru u r-Reżiljenza, tkompli tippubblika l-valutazzjonijiet preliminari tagħha tat-talbiet għal pagament tal-Istati Membri u tinforma lill-pubbliku b’dettalji konkreti dwar il-ħidma superviżorja u tal-awditjar tagħha sabiex ikun żgurat obbligu ta’ rendikont sinifikanti għall-fondi kollha li jintefqu, jilqa’ l-pubblikazzjoni mill-Organizzazzjoni għall-Kooperazzjoni u l-Iżvilupp Ekonomiċi, f’kollaborazzjoni mal-Uffiċċju tal-Ombudsman Ewropew, tad-dokument ta’ politika intitolat “Lejn prinċipji ta’ prattika tajba għat-trasparenza tal-gvern fl-użu tal-fondi ta’ rkupru”, li jipprovdi gwida lill-gvernijiet dwar l-iżgurar tat-trasparenza u tal-obbligu ta’ rendikont fl-użu tal-fondi għall-irkupru mill-COVID-19, jilqa’, f’dan ir-rigward, l-isforzi tal-Ombudsman biex ittejjeb l-istandards ta’ trasparenza relatati mal-Faċilità għall-Irkupru u r-Reżiljenza;

18.Jenfasizza li fl-inizjattiva strateġika tagħha dwar kif il-Kummissjoni Ewropea żgurat it-trasparenza u r-rappreżentanza bbilanċjata tal-interessi fl-ambitu tal-politika agrikola komuni, l-Ombudsman sabet li kienu neqsin elementi ewlenin tal-pjanijiet strateġiċi nazzjonali tal-PAK, inklużi miżuri speċifiċi dwar linji baġitarji u objettivi intermedji li kellhom jiġu sodisfatti, u dan għamilha diffiċli għaċ-ċittadini u għall-partijiet ikkonċernati biex jifhmu l-kundizzjonijiet li bihom l-Istati Membri setgħu jużaw l-assistenza pprovduta mill-politika agrikola komuni l-ġdida; jappoġġja t-talba tal-Ombudsman lill-Kummissjoni biex tiżvela b’mod proattiv aktar informazzjoni dwar l-approvazzjoni tal-pjanijiet strateġiċi tal-Istati Membri fl-ambitu tal-politika agrikola komuni; jitlob lill-Kummissarju għall-Agrikoltura u lill-kabinett tiegħu, kif ukoll lid-Direttorat Ġenerali għall-Agrikoltura u l-Iżvilupp Rurali tal-Kummissjoni jikkonformaw mar-rakkomandazzjonijiet tal-Ombudsman u jfittex rappreżentanza ġusta u bbilanċjata tal-interessi kemm tal-bdiewa kif ukoll tas-soċjetà ċivili fil-laqgħat u l-iskambji mar-rappreżentanti tal-interessi, peress li, kif indikat mill-Ombudsman fl-ittra tagħha ta’ Frar 2022, il-Kummissarju għall-Agrikoltura u l-kabinett tiegħu kellhom aktar laqgħat mar-rappreżentanti tal-industrija milli ma’ organizzazzjonijiet ambjentali u organizzazzjonijiet oħra bħall-istituzzjonijiet tar-riċerka; jitlob li l-Kummissjoni tassumi rwol attiv fl-iżgurar tal-konformità mal-obbligi ta’ trasparenza imposti fuq l-Istati Membri, inkluż l-obbligu li tiżvela l-entitajiet usa’ li jappartjenu għalihom il-benefiċjarji tal-fondi u l-obbligu li tippubblika l-ammont totali ta’ pagamenti riċevuti minn benefiċjarju, bil-għan li jiġi ggarantit li l-pubbliku jkollu aċċess għall-informazzjoni kollha meħtieġa dwar il-benefiċjarji tal-finanzjament tal-PAK;

19.Jiddispjaċih li l-approċċ tal-Kummissjoni għat-twaqqif ta’ gruppi ta’ djalogu ċivili fi kwistjonijiet koperti mill-PAK ma kienx konformi mar-rakkomandazzjonijiet tal-Ombudsman u kellu diversi lakuni, u b’mod partikolari nuqqas li jimplimenta b’mod trasparenti u ċar rappreżentanza bilanċjata bejn l-interessi ekonomiċi u dawk mhux ekonomiċi fil-kompożizzjoni tal-gruppi;

20.Jenfasizza l-importanza għall-istituzzjonijiet kollha li jittrattaw it-talbiet għall-aċċess għal dokumenti fil-ħin, sabiex tiġi ppreservata r-rilevanza tal-informazzjoni; jappoġġja r-rapport speċjali tal-Ombudsman fl-inkjesta strateġika tagħha dwar iż-żmien li tieħu l-Kummissjoni biex tittratta talbiet għal aċċess pubbliku għad-dokumenti L-Ombudsman Ewropew, “L-Ombudsman titlob lill-Parlament jaġixxi dwar id-dewmien tal-Kummissjoni fit-trattament tat-talbiet għall-aċċess għad-dokumenti”, 6 ta’ April 2022.; jinsab imħasseb dwar id-dewmien sistemiku u sinifikanti tal-Kummissjoni fl-ipproċessar ta’ tali talbiet; jissottolinja li l-aċċess pubbliku għad-dokumenti huwa dritt fundamentali skont ir-Regolament 1049/2001 Ir-Regolament (KE) Nru 1049/2001 tal-Parlament Ewropew u tal-Kunsill tat-30 ta’ Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni (ĠU L 145, 31.5.2001, p. 43).; iħeġġeġ lill-Kummissjoni ttejjeb il-prattiki amministrattivi tagħha sabiex tirrispetta l-iskedi ta’ żmien stabbiliti mil-leġiżlatur u turi b’mod ċar u proattiv li t-trasparenza hija r-regola u prijorità fit-trattament tagħha tat-talbiet għal aċċess pubbliku għad-dokumenti; jenfasizza l-ħtieġa li l-istituzzjonijiet tal-UE jiddedikaw riżorsi umani suffiċjenti għat-titjib tal-effiċjenza fil-ġestjoni tat-talbiet għall-aċċess għal dokumenti; ifakkar li l-Ombudsman irrakkomandat ristrutturament fundamentali tal-approċċ tal-Kummissjoni għall-ipproċessar tal-aċċess għal talbiet għal dokumenti;

21.Jirrikonoxxi l-inkjesta tal-Ombudsman dwar in-nuqqas tal-Kummissjoni li tidentifika u għaldaqstant li tivvaluta l-iżvelar ptenzjali tal-messaġġi testwali skambjati bejn il-President tal-Kummissjoni u s-CEO ta’ kumpanija farmaċewtika dwar ix-xiri ta’ vaċċin tal-COVID-19; jinsab imħasseb li l-approċċ tal-Kummissjoni kien jikkostitwixxi amministrazzjoni ħażina; jissottolinja li l-messaġġi testwali u istantanji relatati max-xogħol huma “dokumenti” skont ir-Regolament 1049/2001 u jenfasizza li r-rispett ta’ dan il-prinċipju huwa ta’ importanza partikolari; jilqa’ r-rakkomandazzjonijiet tal-Ombudsman lill-amministrazzjoni tal-UE dwar ir-reġistrazzjoni ta’ messaġġi testwali u instantanji relatati max-xogħol; jenfasizza kemm hu importanti li l-istituzzjonijiet tal-UE jikkonformaw għalkollox ma’ dawn ir-rakkomandazzjonijiet sabiex il-prattiki tal-amministrazzjoni tal-UE jkunu konformi mal-metodi moderni tal-komunikazzjoni; jieħu nota tar-rispons tal-Kummissjoni li se toħroġ aktar gwida dwar l-għodod moderni ta’ komunikazzjoni, bħal pereżempju l-messaġġi testwali;

22.Jistieden lill-Kunsill jitgħallem lezzjoni mill-inkjesta tal-Ombudsman dwar ir-rifjut tiegħu li jagħti aċċess pubbliku sħiħ għad-dokumenti relatati man-negozjati dwar l-abbozz tal-“Att dwar is-Swieq Diġitali”, li, fl-2022, irriżulta fil-konklużjoni tal-Ombudsman li kien hemm amministrazzjoni ħażina; jistieden lill-Kunsill japplika l-ogħla standards ta’ trasparenza f’dawn il-każijiet, speċjalment meta l-Ombudsman diġà identifikat problemi f’inkjesti strateġiċi preċedenti dwar it-trasparenza tal-proċess leġiżlattiv tiegħu u dwar it-teħid ta’ deċiżjonijiet tiegħu matul il-kriżi tal-COVID-19; ifakkar li t-trasparenza hija waħda mill-prinċipji ewlenin stabbiliti fit-Trattati tal-UE u li nuqqas ta’ trasparenza jissogra li jnaqqas il-fiduċja taċ-ċittadini fl-istituzzjonijiet Ewropej u fl-UE kollha kemm hi;

23.Jisħaq fuq l-importanza tal-investigazzjonijiet tal-Ombudsman dwar il-konformità tad-drittijiet tal-bniedem mill-amministrazzjoni tal-UE; jappoġġja t-talba tal-Ombudsman lill-Kummissjoni biex tistabbilixxi portal ġdid u separat għall-indirizzar tal-ilmenti għall-allegati abbużi tad-drittijiet tal-bniedem, u biex tagħmilha aċċessibbli għall-ilmenti relatati mad-drittijiet tal-bniedem minn organizzazzjonijiet tas-soċjetà ċivili u partijiet ikkonċernati oħra f’pajjiżi li magħhom l-UE għandha ftehimiet kummerċjali;

24.Jirrimarka li l-Ombudsman wettqet inkjesta strateġika dwar kif il-Frontex tikkonforma mal-obbligi tagħha fir-rigward tad-drittijiet fundamentali u tat-trasparenza fl-ambitu tal-mandat estiż tagħha skont ir-Regolament 2019/1896 Ir-Regolament (UE) 2019/1896 tal-Parlament Ewropew u tal-Kunsill tat-13 ta’ Novembru 2019 dwar il-Gwardja Ewropea tal-Fruntiera u tal-Kosta u li jħassar ir-Regolamenti (UE) Nru 1052/2013 u (UE) 2016/1624, ĠU L 295, 14.11.2019, p. 1., jenfasizza l-importanza li jiġu applikati standards għoljin ta’ trasparenza biex jingħata lok ta’ skrutinju pubbliku u biex jiġi żgurat rispett sħiħ għad-drittijiet fundamentali fl-operazzjonijiet kollha tal-Frontex biex ittejjeb l-obbligu ta’ rendikont tagħha; jistieden lill-Frontex tiżgura segwitu adegwat għar-rakkomandazzjonijiet maħruġa mill-Ombudsman;

25.Jinnota l-inkjesta tal-Ombudsman dwar is-sistema ta’ monitoraġġ tal-Kummissjoni tar-rispett tal-awtoritajiet Kroati għad-drittijiet fundamentali fil-kuntest ta’ operazzjonijiet ta’ ġestjoni tal-fruntieri appoġġjati minn fondi tal-UE, li fil-konklużjoni tagħha, l-Ombudsman ikkritikat lill-Kummissjoni għad-dewmien tagħha fl-istabbiliment ta’ mekkaniżmu ta’ monitoraġġ xieraq għall-ġestjoni tal-fruntieri min-naħa tal-awtoritajiet Kroati; iħeġġeġ lill-Kummissjoni biex dejjem tirreaġixxi fil-pront għas-suġġerimenti tal-Ombudsman għal titjib, b’mod partikolari f’każijiet bħal dan, meta jiġu identifikati nuqqasijiet sinifikanti;

26.Jilqa’ l-fatt li, fuq il-bażi tar-rakkomandazzjonijiet prattiċi tal-Ombudsman dwar l-użu tal-lingwi uffiċjali meta jikkomunika mal-pubbliku, in-network tal-aġenziji tal-UE qabel dwar il-linji gwida dwar il-politiki multilingwi;

27.Jieħu nota li fl-2022, l-Istatut tal-Ombudsman Ewropew ġie aġġornat b’dispożizzjonijiet ta’ implimentazzjoni li jiddettaljaw il-proċeduri ta’ ħidma tal-Uffiċċju tal-Ombudsman; jemmen li d-dispożizzjonijiet il-ġodda se jikkontribwixxu biex titjieb il-ħidma tal-Ombudsman;

28.Jilqa’ l-impenn tal-Ombudsman li jimmonitorja l-implimentazzjoni tal-amministrazzjoni tal-UE tas-CRPD tan-NU; japprezza l-ħidma tal-Ombudsman bħala membru tal-Qafas tal-UE għas-CRPD tan-NU;

29.Jissottolinja r-riżultati tal-inkjesta fuq inizjattiva proprja tal-Ombudsman dwar kif il-Kummissjoni timmonitorja l-Fondi Strutturali u ta’ Investiment tal-UE biex tiżgura li l-fondi jintużaw biex jissaħħu d-drittijiet tal-persuni b’diżabbiltà għal għajxien indipendenti u inklużjoni; jilqa’ s-suġġeriment ta’ gwida aktar ċara dwar il-ħtieġa li tiġi promossa d-deistituzzjonalizzazzjoni fil-kuntest tal-użu tal-Fondi Strutturali u ta’ Investiment tal-UE;

30.Iħeġġeġ lill-Ombudsman tkompli l-iskambji dwar l-esperjenzi u l-aħjar prattiki mal-ombudsmen nazzjonali permezz tan-Network Ewropew tal-Ombudsmen (ENO); japprezza li l-konferenza annwali tan-Network Ewropew tal-Ombudsmen tal-2022 iffukat fuq l-aħjar prattiki għall-għajnuna lir-refuġjati u indirizzat l-effetti tad-diġitalizzazzjoni tas-servizzi pubbliċi fuq id-drittijiet taċ-ċittadini; ifaħħar iż-żieda tal-uffiċċji tal-ombudsman tal-Ukrajna u tal-Moldova man-Network Ewropew tal-Ombudsmen;

31.Jilqa’ l-isforzi kontinwi tal-Ombudsman biex ikompli jtejjeb il-viżibbiltà tal-attivitajiet tagħha, inkluż permezz ta’ għodod online u s-sit web multilingwi li joffri assistenza f’kull waħda mill-24 lingwa uffiċjali tal-UE;

32.Jilqa’ b’sodisfazzjon id-djalogu siewi u fit-tul bejn l-Ombudsman u l-Kumitat għall-Petizzjonijiet tal-Parlament Ewropew; jissottolinja li l-kollaborazzjoni intensiva bejn dawn iż-żewġ korpi tgħin biex tiżdied ir-rendikont demokratiku tal-istituzzjonijiet tal-UE u tqarribhom lejn iċ-ċittadini;

33.Jagħti istruzzjonijiet lill-President tiegħu biex tgħaddi din ir-riżoluzzjoni u r-rapport tal-Kumitat għall-Petizzjonijiet lill-Kunsill, lill-Kummissjoni, lill-Ombudsman Ewropew, lill-gvernijiet u lill-parlamenti tal-Istati Membri kif ukoll lill-ombudsmen tagħhom jew lill-entitajiet kompetenti simili.