P9_TA(2024)0038It-theddida ta’ karestija wara t-tixrid tal-kunflitt fis-SudanRiżoluzzjoni tal-Parlament Ewropew tat-18 ta' Jannar 2024 dwar it-theddida ta’ karestija wara t-tixrid tal-kunflitt fis-Sudan (2024/2505(RSP))Il-Parlament Ewropew,

–wara li kkunsidra r-riżoluzzjonijiet preċedenti tiegħu dwar is-Sudan,

–wara li kkunsidra d-Dikjarazzjoni ta’ Impenn ta’ Jeddah għall-Protezzjoni taċ-Ċittadini tas-Sudan,

–wara li kkunsidra d-Dikjarazzjoni Universali tad-Drittijiet tal-Bniedem,

–wara li kkunsidra l-Artikoli 144(5) u 132(4) tar-Regoli ta’ Proċedura tiegħu,

A.billi l-kunflitt vjolenti bejn il-Forzi Armati Sudaniżi u l-Forzi ta’ Appoġġ Rapidu għadu l-mutur ewlieni wara l-insigurtà alimentari akuta u ta’ theddida għall-ħajja fis-Sudan, li tolqot lil 18-il miljun persuna, u li 5 miljun minnhom jinsabu f’livelli ta’ ġuħ ta’ emerġenza;

B.billi aktar minn 7.5 miljun persuna ġew spostati b’mod furzat fis-Sudan u lil hinn minnu, u dan wassal għal tbatija severa, b’mod partikolari fost in-nisa u t-tfal; billi s-Sudan issa għandu l-akbar numru ta’ persuni spostati fid-dinja;

C.billi madwar 12 000 persuna nqatlu fil-kunflitt; billi l-attakki b’motivazzjoni etnika, b’mod partikolari kontra l-komunità tal-Masalit, żdiedu fid-Darfur u fil-pajjiż kollu, u dan kabbar b’mod serju r-riskju ta’ tindif etniku; billi l-vjolenza sesswali ntużat b’mod sistematiku;

D.billi l-kunflitt aggrava b’mod drammatiku n-nuqqasijiet ta’ provvisti bażiċi u ta’ fjuwil f’żoni b’aċċess umanitarju ristrett; billi l-kunflitt espanda għal żoni fejn jiġu prodotti l-qmuħ; billi l-pajjiż għandu l-ogħla rata ta’ malnutrizzjoni tat-tfal globalment;

E.billi l-attakki fuq il-ħaddiema umanitarji u l-infrastruttura wasslu biex l-organizzazzjonijiet jissospendu l-operazzjonijiet, u b’hekk fixklu s-sigurtà alimentari;

F.billi fl-2023 il-Kummissjoni mmobilizzat aktar minn EUR 128 miljun għar-rispons umanitarju tagħha fis-Sudan;

1.Jikkundanna bil-qawwa l-vjolenza kontinwa bejn il-fazzjonijiet armati rivali fis-Sudan, il-ksur tad-drittijiet tal-bniedem u l-insigurtà alimentari li tirriżulta; jiddeplora l-attakki ripetuti kontra ċ-ċivili u jfakkar lill-fazzjonijiet kollha dwar l-obbligi tagħhom skont id-dritt internazzjonali;

2.Jistieden lill-partijiet kollha fil-kunflitt iwaqqfu minnufih l-ostilitajiet, jiffaċilitaw aċċess umanitarju sikur, f’waqtu u mingħajr xkiel, inkluż billi jissodisfaw l-impenji ta’ Jeddah tagħhom, u jfittxu riżoluzzjoni paċifika negozjata għall-kunflitt; jappoġġja bis-sħiħ l-isforzi reġjonali u internazzjonali kollha f’dan ir-rigward; jistieden lill-partijiet esterni fil-kunflitt joqogħdu lura minn interferenzi li jikkontribwixxu għall-kunflitt u l-instabbiltà;

3.Jissottolinja l-ħtieġa li jiġi żgurat aċċess ekwu għall-għajnuna umanitarja għaċ-ċivili li huma soġġetti għal ġlied kontinwu, għal nuqqas ta’ ikel, ta’ ilma u ta’ fjuwil, għal komunikazzjonijiet u elettriku limitati, u għal prezzijiet għoljin ħafna għal oġġetti essenzjali;

4.Jistieden lill-UE u lill-Istati Membri tagħha jżidu l-finanzjament ta’ emerġenza għar-rispons umanitarju fis-Sudan kollu u fil-pajjiżi ġirien tiegħu; jissottolinja l-ħtieġa ta’ appoġġ speċifiku għas-superstiti tal-vjolenza sesswali, inklużi l-mekkaniżmi ta’ protezzjoni, kura, trattament u appoġġ;

5.Jitlob lill-UE tissanzjona lil dawk responsabbli għall-ksur tad-drittijiet tal-bniedem skont ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem; jistieden lill-Kunsill tas-Sigurtà tan-NU jissanzjona l-ksur tal-embargo tal-armi tan-NU fuq id-Darfur u jespandi dan l-embargo fil-pajjiż kollu;

6.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-awtoritajiet tas-Sudan, lill-Unjoni Afrikana, lis-Segretarju Ġenerali tan-Nazzjonijiet Uniti u lill-Parlament Pan-Afrikan.