1.á thabhairt dá haire gurb é príomhchuspóir NHCR a áirithiú go mbeidh maímh i leith bianna bunaithe ar fhianaise eolaíoch a bhfuil glacadh ginearálta léi agus gur féidir a bheith ag súil leis go dtuigfidh an gnáth-thomhaltóir iad; á chur i bhfios go láidir, i gcleachtas, go ndéantar maímh mhíthreoracha a thuairisciú i ndíolachán bia ar líne agus as líne araon;

2.á chur i bhfios go bhfuil méadú ag teacht ar an spéis atá ag tomhaltóirí i bhfaisnéis faoi bhia An tAontas Eorpach, ‘Eurobarometer – Making our food fit for the future – new trends and challenges’[Eorabharaiméadar — Ár mbia a chur in oiriúint don todhchaí — treochtaí agus dúshláin nua] , Deireadh Fómhair 2020.; á chur i bhfáth gur gá a áirithiú go bhfuil faisnéis faoi luach cothaitheach nó sláinte na mbianna a thaispeántar ar lipéid agus atá á n-úsáid chun críocha cur i láthair, margaíochta agus fógraíochta cruinn, eolaíochtbhunaithe agus fiúntach; á iarraidh go ndéanfaí liosta na maíomh údaraithe maidir le cothúchán agus sláinte i leith bia a thabhairt cothrom le dáta go rialta, i gcomhréir le forbairtí eolaíocha i réimsí an bhia agus an chothúcháin;

3.á chur i bhfáth gur gá a áirithiú go leanfaidh maímh shláinte de bheith ailínithe le beartais agus tosaíochtaí sláinte AE; á athdhearbhú a thábhachtaí atá discréid an Choimisiúin gan maímh a údarú nuair a d’fhéadfadh sé go gcuirfí teachtaireachtaí contrártha agus mearbhallacha in iúl do thomhaltóirí mar thoradh orthu Breithiúnas ón gCúirt Bhreithiúnais an 8 Meitheamh 2017, Dextro Energy GmbH & Co. KG v an Coimisiún Eorpach, C-296/16, ECLI:EU:C:2017:437.;

4.á mheabhrú gur cheart, faoi Airteagal 4 de NHCR, go mbeadh próifílí cothaitheach bunaithe ag an gCoimisiún chun srian a chur ar mhaímh chothúcháin agus shláinte i leith bianna ina bhfuil leibhéal ard saille, siúcra agus/nó salainn faoin 19 Eanáir 2009; á chur in iúl gur oth léi nár cuireadh isteach an togra ón gCoimisiún maidir le próifílí cothaitheach go fóill, in ainneoin go bhfuil sé beartaithe do 2022 mar chuid d’athbhreithniú ar reachtaíocht AE maidir le faisnéis faoi bhia do thomhaltóirí; á áitiú go bhfuil sé ábhartha agus riachtanach fós próifílí cothaitheach a shocrú le tairseacha sonracha cothaitheach le haghaidh maímh shláinte agus chothúcháin a úsáid, i gcomhréir le hAirteagal 4 de NHCR, chun cuspóirí NHCR a bhaint amach;

5.á mheabhrú nár cheart go gcuirfeadh maímh tomhaltóirí amú maidir le fíorluach cothaitheach táirge; á thabhairt chun suntais, in éagmais próifílí cothaitheach, gur féidir le maímh béim a chur ar ghné dhearfach de tháirge atá míshláintiúil ar an iomlán nó de tháirge a sháraíonn na tairseacha do chothaithigh shonracha, amhail saill, siúcra agus salann; á chur i bhfios go bhfuil go leor táirgí bia, lena n-áirítear roinnt táirgí a mhargaítear i dtreo leanaí, fós ag úsáid maímh shláinte agus chothúcháin in ainneoin go bhfuil leibhéil arda cothaitheach ar ábhar imní iad iontu; á chur i bhfios go láidir gur gá próifílí cothaitheach sonracha a fhorbairt, dá bhforáiltear in Airteagal 4 de NHCR agus i gcomhréir le cuspóirí NHCR, chun teorainn a chur leis an úsáid a bhaintear as maímh chothúcháin agus shláinte ar bhianna ina bhfuil leibhéal ard saille, siúcra agus/nó salainn; á chur i bhfios go láidir go bhféadfadh na próifílí cothaitheach a bheidh ann amach anseo, ar cheart iad a bheith bunaithe ar fhianaise eolaíoch láidir agus neamhspleách, cabhrú le tomhaltóirí roghanna eolasacha, sláintiúla agus inbhuanaithe a dhéanamh faoi tháirgí bia;

6.á chur in iúl gur oth léi nach bhfuil ann do chur chuige córasach atá bunaithe ar fhianaise maidir le timpeallachtaí bia a chruthú a chabhraíonn le tomhaltóirí roghanna eolasacha a dhéanamh agus a spreagann aistriú i dtreo aistí bia níos sláintiúla, lena n-áirítear méadú ar thomhaltas bianna atá bunaithe ar phlandaí, amhail torthaí agus glasraí úra, gráinní iomlána agus léagúim; á mheas, sa bhreis ar NHCR a chur chun feidhme i gceart, gur cheart don Choimisiún agus do na Ballstáit níos mó a infheistiú in oideachas bia agus cothúcháin, amhail feachtais faisnéise, trí chláir éagsúla, lena n-áirítear EU4Health, go háirithe trí thacú le gníomhaíochtaí i scoileanna d’fhonn leanaí agus déagóirí a mhúineadh faoi aistí bia sláintiúla agus cothroma; á thabhairt chun suntais go bhfuil tionchar ag deitéarmanaint shóisialta i litearthacht tomhaltóirí maidir le maímh i leith bia; á chur i bhfios nach leor astu féin soláthar faisnéise, feachtais oideachais agus feasachta chun roghanna eolasacha tomhaltóirí a áirithiú agus gur gá beartais lena bhfeabhsaítear timpeallachtaí bia a bheith ag gabháil leo;

7.á thabhairt chun suntais gur gnách go ndéanann tomhaltóirí ró-thomhaltas ar tháirgí bia a mhaíonn go gcuireann siad sláinte níos fearr chun cinn, ar a dtugtar ‘an éifeacht luain’; á mholadh go n-áireofaí tairseacha úsáide íosta agus uasta araon ar lipéid táirgí gach bia agus forbhia a bhfuil maímh shláinte ag gabháil leo, mar aon le moladh dul i gcomhairle le gairmí cúraim sláinte go háirithe, roimh forbhianna a ithe, chun idirghníomhaíochtaí díobhálacha a d’fhéadfadh a bheith ann le cóireálacha sonracha a sheachaint agus chun nach dtreiseofaí neamhoird itheacháin a d’fhéadfadh a bheith ann; á thabhairt chun suntais go meastar go leanfaidh neamhshiméadracht faisnéise de bheith ann, i dtimpeallacht bhia atá ag athrú go tapa agus á iarraidh go ndéanfar taighde a chistiú maidir le tuiscint tomhaltóirí ar mhaímh;

8.á chur in iúl gur oth léi an mhoill ar an togra le haghaidh athbhreithniú ar Rialachán (AE) Uimh. 1169/2011 maidir le faisnéis bhia a sholáthar do thomhaltóirí i ndáil le forbairt lipéad cothúcháin ar aghaidh an phacáiste, ar léiríodh go gcabhraíonn siad go héifeachtach le tomhaltóirí roghanna bia agus deochanna níos sláintiúla a dhéanamh; á iarraidh ar an gCoimisiún agus ar na Ballstáit tomhaltóirí a spreagadh agus cabhrú leo roghanna eolasacha, sláintiúla agus inbhuanaithe a dhéanamh maidir le táirgí bia trí lipéad cothúcháin éigeantach comhchuibhithe AE ar aghaidh an phacáiste a ghlacadh, a luaithe is féidir, a fhorbrófar bunaithe ar bhonn fianaise eolaíoch láidir agus neamhspleách agus ar thuiscint tomhaltóirí atá léirithe; á thabhairt dá haire go léirítear i staidéir nach féidir éifeachtaí bia ar an tsláinte a mhíniú leis an gcomhdhéanamh cothaitheach amháin, ach leis an leibhéal próiseála freisin, go háirithe i gcás bianna sárphróiseáilte; á chur i bhfáth, dá bhrí sin, go bhféadfadh sé a bheith chun leasa na sláinte poiblí agus na dtomhaltóirí faisnéis a áireamh maidir le próiseáil bia ar lipéid chothúcháin ar aghaidh an phacáiste léirmhínitheacha agus go bhféadfadh sé a bheith éifeachtach ó thaobh cabhrú le tomhaltóirí roghanna bia níos sláintiúla a dhéanamh; á iarraidh go ndéanfaí bearta rialála chun an t-ualach a chuireann bianna ardphróiseáilte ar an tsláinte phoiblí a laghdú;

9.á thabhairt dá haire go bhfuil go leor de na maímh a úsáidtear ar mhargadh AE maidir le cothaithigh nach mbíonn in easnaimh ina n-aistí bia ach ag roinnt bheag tomhaltóirí Eorpacha; á iarraidh ar an gCoimisiún scrúdú a dhéanamh ar an acmhainneacht reachtach atá ann sainchúram EFSA a leathnú chun measúnú a dhéanamh ar ábharthacht úsáid na maíomh sin a chur san áireamh, chomh maith le scrúdú a dhéanamh ar an mbonn eolaíoch do na maímh sin; ag tacú go láidir le foilsiú leanúnach treoirlínte sonracha ag EFSA de réir úsáid maímh;

10.á iarraidh ar an gCoimisiún meastóireacht a dhéanamh ar an bhféidearthacht srian a chur le húsáid an mhaímh cheadaithe maidir le cothúchán ‘gan siúcra breise’ le haghaidh táirgí ina bhfuil milseoirí nó leibhéil arda shaorshiúcraí;

11.á thabhairt chun suntais, fiú nuair a thugtar bunús eolaíoch do mhaímh maidir le bainne foirmle do naíonáin, amhail an maíomh sláinte ‘cuireann iontógáil DHA le gnáthfhorbairt amhairc naíonán suas le 12 mhí d’aois’, gur cheart go seachnódh a n-úsáid tionchar a imirt ar roghanna beathaithe do naíonáin agus feabhsuithe ar bhainne foirmle do naíonáin a theorannú Munblit, D. et al., ‘Health and nutrition claims for infant formula are poorly substantiated and potentially harmful’, British Medical Journal, Imleabhar 369, Airteagal m875, 2020, agus Cheung, K.Y., et al., ‘Health and nutrition claims for infant formula: international cross sectional survey’, British Medical Journal, Imleabhar 380, Eagrán 8371, 2023.;

12.ag tacú le réamhchomhairliúcháin a bhunú idir monaróirí agus EFSA chun a chur ar chumas EFSA a ionchais a chur in iúl i gcomhthéacs a n-iarraidh ar mhaíomh a chur isteach, agus prionsabal neamhspleáchas EFSA á urramú ag an am céanna;

13.á chur i bhfios go bhfágann an easpa comhchuibhithe ar leibhéal AE maidir le haicmiú substaintí luibheolaíocha mar bhia nó mar leigheas gur féidir substaint plandaí a lipéadú mar ‘bia’ i mBallstát amháin agus mar ‘leigheas’ i mBallstát eile; á chur i bhfios go láidir go gcuireann na neamhréireachtaí sin dúshláin roimh mhonaróirí agus rialtóirí agus go bhféadfadh siad tionchar diúltach a imirt ar shábháilteacht agus ar dhea-bhail tomhaltóirí, ós rud é gur deacair do thomhaltóirí idirdhealú a dhéanamh idir cógais luibhe traidisiúnta agus forbhianna luibheolaíocha bunaithe ar an tsubstaint chéanna planda/na substaintí céanna plandaí, rud a d’féadfadh míthuiscintí maidir lena n-úsáid a bheith mar thoradh air;

14.á chur i bhfios nach ann do liosta dearfach ná diúltach AE de shubstaintí luibheolaíocha a úsáidtear i mbianna agus i bhforbhianna, agus nach ann do liosta cuimsitheach d’éifeachtaí tairbhiúla ná díobhálacha na luibheolaíochta ar an tsláinte, rud a fhágann éagothromaíochtaí reachtacha i measc na mBallstát, ilroinnt an mhargaidh agus go sroicheann táirgí a d’fhéadfadh a bheith neamhshábháilte tomhaltóirí;

15.ag diúltú d’fhionraí leanúnach na meastóireachta ar mhaímh ar luibheanna agus á chur i bhfios go bhfuil ábhair mhóra imní dlí ann maidir le húsáid leanúnach na maíomh ‘ar feitheamh’ faoi bhearta idirthréimhseacha NHCR; á thabhairt chun suntais go bhfuil géarghá ann aghaidh a thabhairt ar liosta na maíomh ‘ar feitheamh’ maidir le luibheolaíochtaí trí thuilleadh meastóireachta a dhéanamh ar na maímh sin mar bheart a bhfuil géarghá leis chun tomhaltóirí a chosaint, mar a sainaithníodh i dtuarascáil mheastóireachta 2020 ón gCoimisiún maidir le NHCR; á chur in iúl gur cúis mhór bhuartha di go bhféadfaí tomhaltóirí a chur ar míthreoir agus go bhféadfadh sé go mbeadh riosca sláinte ag baint leo dá leanfaí de mhaímh ‘ar feitheamh’ a úsáid faoi bhearta idirthréimhseacha NHCR, ós rud é go bhféadfaidís glacadh leis go bréagach go ndearnadh measúnú eolaíoch ar na maímh ‘ar feitheamh’ agus go ndearnadh an riosca a bhainistiú;

16.á mheas go bhfuil sé ríthábhachtach do EFSA agus don Choimisiún athbhreithniú a dhéanamh go pras, i gcomhréir le forálacha NHCR, ar na maímh ‘ar feitheamh’ shláinte a bhaineann le luibheolaíocht i mbianna; á iarraidh ar an gCoimisiún diúltú do na maímh sin ón liosta ‘ar feitheamh’ a ndearnadh measúnú diúltach orthu cheana féin;

17.ag tathant ar na Ballstáit comhoibriú go héifeachtach chun cur chuige comhordaithe a bhunú maidir le forbhianna luibheolaíocha agus á iarraidh ar an gCoimisiún treoir a chur ar fáil ina leith sin; á iarraidh ar an gCoimisiún agus ar na Ballstáit liosta diúltach ar leibhéal AE de luibheanna a úsáidtear i mbia a bhunú gan mhoill, agus é sin bunaithe ar a dtocsaineacht nó ar a n-éifeachtaí díobhálacha sláinte atá sainaitheanta cheana féin sna Ballstáit;

18.á iarraidh ar an gCoimisiún treoir nuashonraithe a chur ar fáil maidir le conas déileáil le cleachtais mhargaíochta a úsáidtear chun dul timpeall ar NHCR;

19.á iarraidh ar an gCoimisiún agus ar na Ballstáit líonra eolais a chur ar bun a bheidh dírithe ar thacú leis an meitheal um maímh chothúcháin agus shláinte; á chur i bhfios gur cheart go gcuideodh an líonra sin le malartú dea-chleachtas a éascú, bearnaí sa léirmhíniú a líonadh i measc na mBallstát agus aghaidh a thabhairt ar éagothromaíochtaí forfheidhmiúcháin;

20.á thabhairt chun suntais gur glacadh NHCR tráth nach raibh ról chomh mór sin ag na meáin shóisialta fós san fhógraíocht agus i ndíol bianna agus forbhianna; á chur in iúl gur cúis bhuartha di go bhfuil a mhéid a rialaíonn NHCR go héifeachtach cumarsáidí ar líne a bhaineann leis an tsláinte faoi bhianna fós doiléir;

21.á chur in iúl gur cúis bhuartha di go bhfuil maímh chothúcháin agus shláinte neamhúdaraithe agus mhíthreoracha ann ar líne; á chur i bhfáth gur gá a áirithiú go mbeidh NHCR fós ábhartha sa timpeallacht ar líne, go háirithe toisc go bhféadfadh grúpaí leochaileacha áirithe, amhail leanaí agus déagóirí, a bheith an-íogair do mhaímh áirithe shláinte agus d’fhaisnéis bhia a chomhroinntear ar na meáin shóisialta agus go bhféadfadh sé sin a sláinte fhisiciúil agus mheabhrach a chur i mbaol; á mheas go bhfuil sé tábhachtach, ina leith sin, a shainiú cad is cumarsáid tráchtála ann maidir le bianna agus forbhianna ar na meáin shóisialta;

22.á iarraidh go dtabharfaí aird athnuaite ar chur chuige éifeachtach uile-Aontais a bhaint amach chun dul i ngleic le nochtadh leanaí agus déagóirí d’fhógraíocht agus do mhargaíocht bianna próiseáilte ina bhfuil leibhéal ard saille, siúcra agus salainn ar na meáin chraolacháin agus sna meáin dhigiteacha; á iarraidh ar an gCoimisiún machnamh a dhéanamh ar ghníomhaíocht reachtach a dhéanamh chun sláinte an ghrúpa tomhaltóirí leochaileacha sin a chosaint;

23.á iarraidh ar an gCoimisiún treoirlínte cuimsitheacha a dhréachtú chun NHCR a fhorfheidhmiú ar líne; á mheas gur cheart go leagfaí amach sna treoirlínte sin nósanna imeachta agus caighdeáin shoiléire chun faireachán agus rialáil a dhéanamh ar mhaímh shláinte ar líne, lena n-áiritheofaí cruinneas agus trédhearcacht na maíomh sin agus lena ndéanfaí folláine tomhaltóirí a chosaint faoi chuimsiú an Ghnímh um Sheirbhísí Digiteacha; á chur i bhfios go bhfuil freagrachtaí ar na Ballstáit agus ar sholáthraithe na n-ardán ar líne mar a bunaíodh leis an nGníomh um Sheirbhísí Digiteacha, eadhon gníomhú i gcoinne scaipeadh ábhair neamhdhleathaigh agus trédhearcacht a áirithiú do thomhaltóirí maidir le fógraíocht ar líne;

24.á iarraidh ar an gCoimisiún agus ar na Ballstáit ardán a chruthú chun dea-chleachtais a roinnt maidir le forfheidhmiú NHCR ar líne agus comhoibriú a spreagadh i measc údaráis inniúla na mBallstát;

25.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.