1.Jisħaq li l-livell ġenerali ta’ tgawdija tad-drittijiet tal-bniedem madwar id-dinja jiddependi, fost affarijiet oħra, mill-imġiba tal-korporazzjonijiet, minħabba l-iskala attwali tal-globalizzazzjoni u l-internazzjonalizzazzjoni tal-attivitajiet tan-negozju u l-ktajjen tal-valur; jenfasizza, f’dan il-kuntest, l-importanza li l-intrapriżi kummerċjali jkunu jistgħu jibbażaw fuq governanza pubblika tajba u sistema u qafas legali komprensivi u li jiffunzjonaw tajjeb sabiex jissodisfaw l-obbligi tagħhom tad-drittijiet tal-bniedem;

2.Jappoġġja bil-qawwa l-implimentazzjoni sħiħa, ġewwa u barra l-UE, tal-istandards internazzjonali dwar kondotta responsabbli tan-negozju biex tikkomplimenta u tissaħħaħ l-implimentazzjoni tal-UNGPs; jissottolinja l-importanza tal-UNGPs u l-Linji Gwida tal-OECD u l-appoġġ wiesa’ li jgawdu; ifakkar li l-UNGPs jikkostitwixxu l-uniku qafas globali li jagħti dettalji dwar ir-responsabbiltà korporattiva għall-prevenzjoni u l-indirizzar tar-riskju ta’ impatti negattivi fuq id-drittijiet tal-bniedem marbuta mal-attività tan-negozju; jisħaq li kwalunkwe ħidma li ssir fuq l-LBI għandha tiżgura allinjament sħiħ ma’ dawn l-istandards;

3.Jisħaq li peress li r-responsabbiltà soċjali korporattiva hija biss fuq bażi volontarja u għalhekk mhijiex inkorporata fi strumenti infurzabbli, din tista’ toħloq distorsjonijiet tas-suq u kompetizzjoni inġusta għall-intrapriżi li jagħżlu li jikkonformaw mal-istandards internazzjonali jew li huma soġġetti għal obbligi nazzjonali jew reġjonali; jirrikonoxxi li għalkemm inkiseb xi progress, għadu qed iseħħ ksur tad-drittijiet tal-bniedem; jilqa’, għalhekk, l-isforzi biex jinħolqu kundizzjonijiet ekwi u l-insegwiment ta’ impenn appoġġjat globalment għal imġiba responsabbli fin-negozju; jilqa’, barra minn hekk, il-bidla attwali f’termini ta’ żviluppi normattivi minn inizjattivi ta’ liġi mhux vinkolanti għal standards vinkolanti;

4.Jissottolinja l-importanza li jingħalqu l-lakuni legali u regolatorji li qed jiġu sfruttati minn xi intrapriżi kummerċjali, inklużi l-investituri, a skapitu tad-drittijiet tal-bniedem u l-ambjent;

5.Jinnota bi tħassib li fis-sistemi ġudizzjarji ta’ ħafna pajjiżi, jippersistu bosta ostakli proċedurali, sostantivi u prattiċi fir-rigward tal-aċċess tal-vittmi għall-ġustizzja, inklużi diffikultajiet fl-identifikazzjoni tal-qorti kompetenti, ostakli relatati mal-istandards ġuriżdizzjonali, perjodi qosra ta’ limitazzjoni statutorja, responsabbiltà limitata jew mhux ċara minħabba strutturi korporattivi kumplessi, aċċess għal rappreżentanza u informazzjoni legali, kostijiet projbittivi ta’ rappreżentanza barra mill-pajjiż, kif ukoll inugwaljanzi oħra bejn rikorrenti u konvenuti; jinnota bi tħassib, barra minn hekk, każijiet ta’ vittmi li jiffaċċjaw intimidazzjoni jew vjolenza min-negozji involuti b’rispons għall-fatt li jfittxu ġustizzja; jenfasizza li l-persuni jew il-gruppi vulnerabbli jew emarġinati, li jistgħu jirrikjedu attenzjoni addizzjonali fil-kuntest tal-attivitajiet ta’ involviment tal-partijiet ikkonċernati, qed jiffaċċjaw ostakli akbar biex jibbenefikaw b’mod ekwu minn pagamenti ta’ kumpens jew forom oħra ta’ restituzzjoni;

6.Jisħaq fuq l-importanza li jiġu inklużi r-regolamentazzjoni ekstraterritorjali bbażata fuq il-kumpaniji omm u l-aċċess għall-ġustizzja għall-vittmi ta’ ksur tad-drittijiet tal-bniedem korporattivi tranżnazzjonali fl-istat ta’ oriġini tal-korporazzjonijiet tranżnazzjonali (TNCs); jenfasizza, b’mod partikolari, il-ħtieġa li jiġu definiti obbligi ċari għat-TNCs fir-rigward tal-qerda tat-tħaddim tat-tfal u tax-xogħol furzat mill-ktajjen tal-provvista u l-operazzjonijiet tagħhom;

7.Jappoġġa bil-qawwa l-ħidma li qed titwettaq fin-NU permezz tal-OEIGWG biex jiġi żviluppat l-istrument; jesprimi l-apprezzament tiegħu għall-ħidma tal-Presidenti suċċessivi mill-Ekwador fit-tmexxija ta’ dan l-isforz kumpless u jilqa’ r-rwol ta’ appoġġ tal-grupp “Friends of the Chair”;

8.Jistieden lill-President tal-OEIGWG u lill-Istati Membri tan-NU jiżguraw li n-negozjati jitwettqu b’mod trasparenti, bi djalogu sinifikattiv mal-partijiet ikkonċernati kollha, inklużi s-soċjetà ċivili, it-trade unions u r-rappreżentanti tal-ħaddiema u s-settur privat, b’attenzjoni xierqa mogħtija lill-partijiet ikkonċernati vulnerabbli; jinsisti, barra minn hekk, fuq l-importanza li jiġi żgurat involviment attiv mir-reġjuni kollha, bl-għan li jiġi żviluppat strument effettiv li jirrifletti d-diversità globali tar-realtajiet legali, soċjali u ekonomiċi li jaffettwaw id-drittijiet tal-bniedem u li jibbaża fuq l-aħjar prattiki implimentati fil-livell domestiku u reġjonali; iħeġġeġ lill-organizzazzjonijiet reġjonali tad-drittijiet tal-bniedem u ekonomiċi, kif ukoll lill-awtoritajiet, biex jgħinu jiffaċilitaw dan l-involviment universali;

9.Ifakkar li l-UE għandha impenn ibbażat fuq it-Trattat li tippromwovi d-drittijiet tal-bniedem madwar id-dinja u soluzzjonijiet multilaterali fin-NU għal problemi komuni, li għad irid jiġi rifless fil-parteċipazzjoni tagħha fl-OEIGWG b’mandat ta’ negozjar;

10.Jirrikonoxxi l-OEIGWG bħala l-uniku forum globali u multilaterali fejn qed jiġu diskussi regoli obbligatorji dwar in-negozju u d-drittijiet tal-bniedem u, għalhekk, iqis li huwa kruċjali li l-UE li tinvolvi ruħha b’mod attiv f’dan il-proċess, flimkien ma’ massa kritika ta’ membri tan-NU, sabiex jintlaħaq eżitu bbażat fuq il-kunsens li jista’ jibbaża fuq appoġġ wiesa’ madwar id-dinja;

11.Jissottolinja li l-aħħar żviluppi normattivi fil-livell tal-UE dwar in-negozju u d-drittijiet tal-bniedem huma passi inizjali importanti biex jiġi indirizzat l-aċċess għall-ġustizzja u d-drittijiet tal-vittmi, li jinsabu fiċ-ċentru tal-LBI bħala trattat ewlieni dwar id-drittijiet tal-bniedem; jisħaq, f’dan ir-rigward, fuq in-natura, l-objettivi u l-kamp ta’ applikazzjoni komplementari, kif ukoll il-ħtieġa ta’ koerenza bejn iż-żewġ binarji normattivi, li se joperaw f’livelli differenti;

12.Jemmen li l-UE għandha tinvolvi ruħha b’mod attiv fin-negozjati li għaddejjin, b’mod partikolari biex tkompli tiżviluppa l-abbozz tal-LBI, filwaqt li tiffoka fuq il-vittmi ta’ abbużi relatati man-negozju tul il-katina tal-valur, tneħħi l-ostakli għall-ġustizzja u r-rimedju effettiv, tiżgura kundizzjonijiet ekwi u ċertezza tad-dritt għan-negozji, filwaqt li tqis il-karattru partikolari tal-intrapriżi żgħar u ta’ daqs medju (SMEs), u ssaħħaħ il-kooperazzjoni billi tuża l-perspettivi internazzjonali u l-aħjar prattiki; iqis li dan l-involviment fl-aħħar mill-aħħar jikkontribwixxi biex jiġu żgurati implimentazzjoni u infurzar aħjar tad-drittijiet tal-bniedem fuq livell internazzjonali, filwaqt li jikkontribwixxi bl-istess mod għal kundizzjonijiet ekwi internazzjonali u jipprovdi strument globali li jkun kemm appoġġjat b’mod wiesa’ kif ukoll ratifikat fost l-istati fir-reġjuni kollha, inkluż iżda mhux limitat għall-Unjoni Ewropea, u li jibqa’ rilevanti fid-dawl tat-theddid għad-drittijiet tal-bniedem li qed jevolvi;

13.Jilqa’ l-impenn tal-Kunsill li l-UE se ssaħħaħ l-impenn tagħha u tipparteċipa b’mod attiv fl-OEIGWG; iqis, madankollu, li l-uniku mod sinifikattiv u tanġibbli biex jiġi ppromulgat dan l-impenn iddikjarat huwa billi jiġi adottat mandat tal-UE għan-negozjati; iħeġġeġ lill-Kunsill, għalhekk, jadotta mandat ambizzjuż għan-negozjati malajr kemm jista’ jkun sabiex l-UE tkun tista’ tipparteċipa b’mod attiv fin-negozjati bl-għan li ssawwar l-LBI futur; jisħaq li l-pożizzjoni tal-UE trid timmira għal dispożizzjonijiet b’saħħithom f’termini ta’ mekkaniżmi ta’ infurzar u monitoraġġ, kif ukoll fir-rigward tal-aċċess għall-ġustizzja għal dawk affettwati minn ksur;

14.Jistieden lill-Istati Membri, sadanittant, jinvolvu ruħhom fil-proċess fuq bażi individwali filwaqt li jikkoordinaw il-pożizzjonijiet tagħhom matul in-negozjati, sabiex jiddefendu pożizzjoni tal-UE b’saħħitha, komuni u ċara, filwaqt li jippreżentaw b’mod kostruttiv l-inizjattivi leġiżlattivi li għandhom l-għan li jirregolaw l-attivitajiet kummerċjali fir-rigward tad-drittijiet tal-bniedem u l-obbligi relatati mal-klima, filwaqt li juru apprezzament għall-progress li sar s’issa; jistenna li s-Servizz Ewropew għall-Azzjoni Esterna (SEAE) u l-Kummissjoni, b’mod partikolari d-Delegazzjoni tal-UE għan-NU f’Ġinevra, ikollhom rwol proattiv u kostruttiv f’dan il-proċess;

15.Jistieden lill-Kummissjoni, lis-SEAE u lill-Istati Membri jimpenjaw ruħhom b’mod proattiv mal-istati msieħba kollha u jinkludu s-suġġett fid-djalogi tagħhom ma’ pajjiżi mhux tal-UE u organizzazzjonijiet reġjonali, b’mod partikolari fil-qafas tad-djalogi strutturati tal-UE dwar id-drittijiet tal-bniedem; iħeġġeġ lill-UE tilħaq, b’mod partikolari, lis-sħab ewlenin li bħalissa qed jiżviluppaw l-oqfsa tagħhom stess dwar in-negozju u d-drittijiet tal-bniedem fil-livell nazzjonali, bħall-Brażil u l-Ġappun, u fil-livell reġjonali, bħall-Kummissjoni Afrikana dwar id-Drittijiet tal-Bniedem u tal-Popli u l-Kummissjoni Inter-Amerikana dwar id-Drittijiet tal-Bniedem;

16.Jilqa’ l-abbozz aġġornat tal-LBI, ippubblikat f’Lulju 2023, u jqis li joffri bażi soda u promettenti għall-avvanz tan-negozjati, filwaqt li jirrikonoxxi wkoll il-ħtieġa għal titjib u allinjament mal-UNGPs, il-Linji Gwida tal-OECD u standards internazzjonali attwali oħra;

17.Jemmen li l-UE għandha tistinka għal LBI li jkun kompatibbli mal-iżviluppi normattivi li għaddejjin fil-livell tal-UE u komplementari għalihom, u b’hekk tikkontribwixxi għall-ħolqien ta’ qafas legali globali aktar koerenti dwar in-negozju u d-drittijiet tal-bniedem;

18.Jappoġġja kamp ta’ applikazzjoni wiesa’ għal-LBI li jiżgura li r-responsabbiltà tapplika tul il-ktajjen tal-valur globali; iqis li l-fatt li l-istati partijiet jingħataw il-flessibbiltà li jiddifferenzjaw, skont il-leġiżlazzjoni domestika tagħhom, kif l-intrapriżi kummerċjali, b’mod partikolari l-SMEs, iwettqu l-obbligi ta’ prevenzjoni skont l-LBI, b’mod proporzjonat mad-daqs, is-settur, is-sjieda, il-kuntest operattiv u s-severità tal-impatti tagħhom fuq id-drittijiet tal-bniedem, jipprovdi flessibbiltà importanti għall-adattament nazzjonali u jkun konsistenti mal-kamp ta’ applikazzjoni universali tal-UNGPs; jenfasizza li f’ħafna reġjuni tad-dinja, l-intrapriżi mikro, żgħar u ta’ daqs medju (MSMEs) spiss huma l-forza mexxejja tal-ekonomiji lokali; jissottolinja li l-MSMEs jirrappreżentaw 90 % tan-negozji, 60 sa 70 % tal-impjiegi u 50 % tal-prodott domestiku gross madwar id-dinja; itenni l-importanza li jiġi żgurat li l-obbligi u r-rekwiżiti fl-istrument ikunu proporzjonati mad-daqs, ir-riżorsi u l-ingranaġġ tal-kumpaniji, u jitlob lill-UE tipprovdi salvagwardji għall-MSMEs fin-negozjati dwar l-istrument;

19.Jemmen li l-attivitajiet kummerċjali għandhom jinftiehmu f’konformità mal-UNGPs;

20.Jinsisti li ambitu wiesa’ ta’ strumenti internazzjonali, inklużi iżda mhux limitati għad-Dikjarazzjoni Universali tad-Drittijiet tal-Bniedem, it-trattati internazzjonali ewlenin kollha dwar id-drittijiet tal-bniedem u l-konvenzjonijiet fundamentali tal-Organizzazzjoni Internazzjonali tax-Xogħol, għandhom ikunu koperti taħt l-LBI, f’konformità mal-universalità u l-indiviżibbiltà tad-drittijiet tal-bniedem;

21.Jesprimi dispjaċir għall-fatt li diversi referenzi għall-ambjent u t-tibdil fil-klima, inkluż fir-rigward tar-responsabbiltà, tneħħew mill-kamp ta’ applikazzjoni tal-LBI fl-aħħar abbozz; iqis li l-UE u l-Istati Membri għandhom jistinkaw biex l-impatt ambjentali u klimatiku tal-attivitajiet kummerċjali jiġi inkluż fil-kamp ta’ applikazzjoni tal-LBI, f’konformità mal-leġiżlazzjoni, il-politiki u l-ambizzjoni tal-UE f’dan il-qasam, u għalhekk jirriflettu r-realizzazzjoni dejjem akbar tal-impatt tal-attivitajiet kummerċjali fir-rigward tat-tibdil fil-klima u d-degradazzjoni ambjentali, li min-naħa tagħhom għandhom impatt fuq id-drittijiet tal-bniedem;

22.Jisħaq li l-LBI għandu jipprevedi qafas ambizzjuż, komprensiv, reattiv u obbligatorju għall-prevenzjoni tal-abbużi tad-drittijiet tal-bniedem mill-korporazzjonijiet, b’mod partikolari billi jistabbilixxi l-obbligu għall-istati partijiet li jadottaw miżuri leġiżlattivi, regolatorji u miżuri oħra xierqa u effettivi biex jipprevjenu l-abbuż korporattiv u jiżguraw il-prattika tad-diliġenza dovuta ambjentali u r-rispett tad-drittijiet tal-bniedem mill-intrapriżi kummerċjali kollha; jinnota, f’dan ir-rigward, li l-fatt li l-istati partijiet jingħataw il-flessibbiltà li jadattaw l-oqfsa preventivi tagħhom għas-sistemi legali tagħhom stess, filwaqt li jippreżervaw il-primazija tad-drittijiet tal-bniedem, ikun fattur ewlieni fl-iżgurar ta’ aderenza wiesgħa mal-LBI;

23.Jitlob lill-UE u lill-Istati Membri biex jiżguraw, f’konformità mad-dispożizzjonijiet fl-ambitu tal-UNGPs, li l-qafas ta’ prevenzjoni tal-LBI jobbliga lill-atturi korporattivi jwettqu diliġenza dovuta msaħħa meta joperaw f’żoni fejn ir-riskju ta’ ksur gravi tad-drittijiet tal-bniedem ikun akbar, bħal żoni milquta minn kunflitti jew territorji taħt okkupazzjoni jew annessjoni, inkluż billi jiżdiedu referenzi għad-dritt umanitarju internazzjonali, il-liġi kriminali internazzjonali u dritt konswetudinarju internazzjonali fil-kamp ta’ applikazzjoni tal-LBI; jemmen li l-LBI għandu jindirizza wkoll aspetti relatati mal-attivitajiet korporattivi f’żoni milquta minn diżastri jew fir-rigward ta’ komunitajiet vulnerabbli għat-tibdil fil-klima, li qed isiru dejjem aktar rilevanti fil-kuntest tal-kriżi klimatika;

24.Jemmen li l-obbligu għall-kumpaniji li jadottaw approċċ ibbażat fuq ir-riskju u jwettqu valutazzjonijiet regolari tal-impatt tad-drittijiet tal-bniedem qabel u matul l-operazzjonijiet, u li jqisu l-ħtiġijiet ta’ dawk f’riskju akbar, jikkostitwixxu elementi partikolarment importanti għall-qafas ta’ prevenzjoni tal-LBI, inkluż billi jintegraw perspettiva tal-ġeneri, iżda anke billi jitqiesu kwistjonijiet li jikkonċernaw gruppi f’riskju ta’ vulnerabbiltà jew emarġinazzjoni, bħall-komunitajiet indiġeni u tradizzjonali, il-minoranzi u d-difensuri tad-drittijiet tal-bniedem u tal-ambjent;

25.Jitlob li l-LBI jipprovdi rwol ċentrali lill-partijiet ikkonċernati affettwati, b’mod partikolari permezz tal-obbligu li tiġi promossa l-parteċipazzjoni attiva u sinifikanti tal-partijiet ikkonċernati rilevanti, inklużi t-trade unions, l-organizzazzjonijiet mhux governattivi, il-popli indiġeni u l-organizzazzjonijiet ibbażati fil-komunità, kif ukoll is-settur privat, fl-implimentazzjoni tal-leġiżlazzjoni, politiki u miżuri oħra, b’attenzjoni speċjali għall-aċċess għall-ġustizzja u r-rimedji;

26.Jitlob li l-LBI jipprovdi definizzjoni ta’ parteċipazzjoni attiva u sinifikattiva tal-partijiet ikkonċernati rilevanti, inkluż permezz ta’ involviment interattiv imwettaq in bona fide, fuq bażi kontinwa, b’segwitu xieraq, li jinvolvi l-identifikazzjoni u t-tneħħija ta’ ostakli potenzjali għall-involviment, u jiżgura l-parteċipazzjoni sikura tal-partijiet ikkonċernati mingħajr biża’ ta’ rappreżalja;

27.Jisħaq fuq l-importanza għall-UE u l-Istati Membri li jiżguraw li l-LBI jinkludi d-dmir li jipproteġi d-drittijiet u s-sikurezza tad-difensuri tad-drittijiet tal-bniedem, tad-difensuri tal-ambjent, tal-ġurnalisti, tal-ħaddiema u tal-popli indiġeni u ta’ gruppi emarġinati oħra, u biex jintegra l-kunsiderazzjoni għal dawn il-gruppi fl-istrument kollu; jinsisti, b’mod partikolari, fuq l-importanza li jiġi stabbilit il-prinċipju tal-kunsens liberu, minn qabel u infurmat tal-popli indiġeni;

28.Jistieden lill-UE u lill-Istati Membri jappoġġjaw l-inklużjoni fl-LBI tal-ġlieda kontra l-korruzzjoni skont il-Konvenzjoni tan-NU kontra l-Korruzzjoni, filwaqt li jirrikonoxxu li l-korruzzjoni tiffaċilita, tipperpetwa u tistituzzjonalizza l-ksur tad-drittijiet tal-bniedem;

29.Jinsab imħasseb dwar ir-riskji tal-forum-shopping u l-impatt tiegħu fuq kundizzjonijiet ekwi, anke fil-kuntest tal-UE; iħeġġeġ strumenti fil-livell tal-UE biex itaffu dawn ir-riskji, inkluż mekkaniżmu ta’ monitoraġġ; jenfasizza, għalhekk, il-ħtieġa li jiġi żgurat li l-pajjiżi jimplimentaw mekkaniżmi robusti u effettivi, iżda prattiċi u proporzjonali, ta’ infurzar u monitoraġġ tal-konformità; jinsisti, barra minn hekk, fuq ir-rekwiżit li l-istati partijiet iwettqu rapportar regolari u fil-fond; jinnota r-rwol potenzjali, f’dan ir-rigward, tal-proċessi adottati biex jiġu żviluppati pjanijiet ta’ azzjoni nazzjonali dwar in-negozju u d-drittijiet tal-bniedem; jinnota li l-mandat tal-UE għandu jiżgura li r-rekwiżiti jitfasslu b’tali mod li jkunu jistgħu jiġu allinjati mal-leġiżlazzjoni attwali tal-UE f’dan il-qasam;

30.Jistenna li l-UE u l-Istati Membri jippromwovu dispożizzjonijiet robusti dwar l-aċċess għall-ġustizzja, inkluż l-aċċess għal rimedju ġudizzjarju bbażat fl-istat, fl-LBI, f’konformità mal-impenn tagħhom li jipproteġu lill-vittmi, jiġġieldu l-impunità u jiddefendu l-UNGPs;

31.Jenfasizza l-ħtieġa li d-dispożizzjonijiet tal-LBI dwar id-drittijiet tal-vittmi u d-detenturi tad-drittijiet jispjegaw il-mezzi biex jiġi żgurat id-dritt għal aċċess ġust, adegwat, fil-pront, mhux diskriminatorju, xieraq u sensittiv għall-ġeneru għall-ġustizzja, riparazzjonijiet individwali jew kollettivi u rimedju effettiv fir-rigward ta’ abbużi tad-drittijiet tal-bniedem ikkawżati jew ikkontribwiti minn kumpaniji; jinnota li dan għandu jinkludi d-dritt għal rimedju kollettiv, aċċess għal għajnuna legali, li wieħed jinstema’ fl-istadji kollha tal-proċedimenti, informazzjoni miżmuma minn intrapriżi kummerċjali kif definit fil-ġuriżdizzjonijiet ikkonċernati, u protezzjoni minn rappreżalji u rivittimizzazzjoni; iqis li fl-abbozz għandhom jiġu previsti mekkaniżmi biex jittaffa l-piż evidenzjarju fuq il-vittmi biex jiġi ffaċilitat id-dritt tal-vittma li jkollha aċċess għal rimedju; iqis ukoll li l-Istati partijiet għandhom jippermettu l-adozzjoni ta’ miżuri interim jew ta’ prekawzjoni f’każijiet urġenti;

32.Jinsisti li l-LBI għandu jinkludi d-dmir għall-istati partijiet li jiżviluppaw sistema komprensiva u adegwata ta’ responsabbiltà legali li tirreaġixxi għall-ħtiġijiet tal-vittmi, fir-rigward tar-rimedju, u proporzjonata għall-gravità tal-abbuż, filwaqt li tevita li tiffaċilita talbiet abbużivi; jinsisti, barra minn hekk, li l-LBI għandu jistabbilixxi kundizzjonijiet li fihom ir-responsabbiltà tal-kumpaniji tista’ tiġi stabbilita kif xieraq għall-ħsara li huma responsabbli għaliha;

33.Jinsisti li l-LBI għandu jindirizza l-ostakli prattiċi u proċedurali li jħabbtu wiċċhom magħhom il-vittmi ta’ abbuż korporattiv meta jfittxu l-ġustizzja, fost l-oħrajn, billi jindirizza l-isfidi li jiffaċċjaw il-qrati meta jitolbu ġuriżdizzjoni f’varjetà ta’ sitwazzjonijiet, u jiżgura li l-istatuti tal-limitazzjonijiet ikunu adegwati u mhux restrittivi bla bżonn; jinsisti fuq l-importanza li tingħata attenzjoni xierqa lil persuni jew gruppi vulnerabbli jew emarġinati f’dan il-kuntest;

34.Jilqa’ l-proposta għall-istabbiliment ta’ fond internazzjonali għall-vittmi taħt l-LBI li jipprovdi għajnuna legali u finanzjarja lill-vittmi li qed ifittxu aċċess għal rimedji;

35.Jinsisti li l-LBI għandu jagħti biżżejjed setgħat lill-Konferenza tal-Partijiet biex tistabbilixxi mekkaniżmi għall-monitoraġġ tal-implimentazzjoni tal-LBI u tagħmel rakkomandazzjonijiet għal passi ulterjuri possibbli; iqis li l-kumitat stabbilit skont l-LBI għandu jingħata s-setgħa li jirċievi u jikkunsidra komunikazzjonijiet u lmenti minn individwi, komunitajiet jew ir-rappreżentanti tagħhom dwar abbużi tad-drittijiet tal-bniedem minn intrapriżi kummerċjali koperti mil-LBI li jmorru kontra d-dispożizzjonijiet tal-LBI, u li jikkonċernaw ksur minn stat parti ta’ kwalunkwe dritt stabbilit fl-LBI;

36.Jistieden lill-Kummissjoni żżid l-appoġġ finanzjarju u tekniku tagħha għall-awtoritajiet nazzjonali f’pajjiżi mhux tal-UE dwar in-negozju u d-drittijiet tal-bniedem, b’mod partikolari permezz ta’ (i) l-adozzjoni u l-implimentazzjoni ta’ pjanijiet ta’ azzjoni nazzjonali fl-ambitu tal-UNGPs, (ii) l-iżvilupp ta’ mekkaniżmi mhux ġudizzjarji, bħall-uffiċċji tal-ombudsman jew il-punti ta’ kuntatt nazzjonali, (iii) inizjattivi leġiżlattivi li għandhom l-għan li jipproteġu lill-informaturi u li jirregolaw l-attivitajiet kummerċjali fir-rigward tad-drittijiet tal-bniedem u l-obbligi relatati mal-ambjent, u (iv) il-promozzjoni u l-forniment ta’ rimedji aċċessibbli u effiċjenti għall-vittmi; iħeġġeġ lill-Kummissjoni żżid l-appoġġ tagħha għall-organizzazzjonijiet tas-soċjetà ċivili f’dawn l-oqsma;

37.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lill-President tal-Kunsill tad-Drittijiet tal-Bniedem tan-NU u lill-President tal-Grupp ta’ Ħidma Intergovernattiv Miftuħ.