1.á mheabhrú nach mór do CBI a áirithiú go mbeidh gníomhaíochtaí iascaireachta agus dobharshaothraithe inbhuanaithe san fhadtéarma ó thaobh an chomhshaoil de agus go mbainisteofar iad ar bhealach atá comhsheasmhach leis na cuspóirí tairbhí eacnamaíocha, sóisialta agus fostaíochta a bhaint amach, eadhon rannchuidiú le hinfhaighteacht soláthairtí bia; á mheabhrú, thairis sin, go sainítear in Airteagal 39 CFAE nach mór do CBI infhaighteacht soláthairtí a áirithiú agus caighdeán cóir maireachtála a chur ar fáil do phobail iascaigh agus dobharshaothraithe;

2.á chur in iúl gur oth léi, ó 2014 i leith, nár tugadh aird leordhóthanach ar ghnéithe socheacnamaíocha ná ar infhaighteacht an tsoláthair bia ná ar an gcur chuige bunaithe ar éiceachórais le cur chun feidhme CBI, a bhfuil gá leo go léir chun bainistiú inbhuanaithe stoc a áirithiú;

3.á mheas go bhfuil na tionchair dhiúltacha a d’eascair as sin ar earnáil na hiascaireachta níos measa ó tháinig dúshláin nua gan fasach chun cinn nárbh fhéidir a thuar in 2012, nuair a bhí CBI á cheapadh, amhail Brexit, paindéim COVID-19 agus an ghéarchéim fuinnimh; á thabhairt chun suntais go bhfuil tionchar tromchúiseach ag cogadh foghach na Rúise i gcoinne na hÚcráine, a bhfuil éifeachtaí díobhálacha aige ar limistéir amhail an tslándáil mhuirí, rud a chuireann isteach ar ghníomhaíochtaí iascaireachta, go háirithe sa Mhuir Dhubh, mar gheall ar mhianaigh ar snámh ag dul le sruth, agus as a n-eascraíonn cailliúint bithéagsúlachta, a léirítear go háirithe leis an méadú scanrúil ar bhásmhaireacht chéiticigh na Mara Duibhe;

4.á chur in iúl gur geal léi gur ghlac an tAontas bearta go pras chun tacú leis an earnáil agus chun í a mhaolú in amanna deacra; ag cur béim ar an bhfíoras, áfach, mar gheall ar éifeachtaí carnacha na staide sin, go bhfuil go leor cabhlach i ngar do thitim as a chéile agus gur bhain siad an bonn de bhrabúsacht na mílte gnólacht go dtí an pointe ina bhfuil a marthanas i mbaol, rud a d’fhéadfadh tionchar tubaisteach a bheith aige ar an bhfostaíocht agus ar an gcomhtháthú sóisialta i limistéir chósta;

5.á chur i bhfáth go mbeidh ar chur chun feidhme CBI dul in oiriúint don dúshlán a bhaineann leis an athrú aeráide a chomhrac, i gcás ina bhfuil gealltanas tugtha ag an Aontas go mbeidh sé aeráidneodrach faoi 2050;

6.á chreidiúint, dá bhrí sin, nach mór CBI a chur chun feidhme i gcónaí, agus i gcás inar gá, é a athchóiriú agus a oiriúnú dá réir;

7.á chur i bhfios go láidir gur foinse próitéine an-ardcháilíochta é bia mara agus gur cuid ríthábhachtach d’aiste bia fholláin é, a mbíonn lorg carbóin níos ísle aige de ghnáth ná bia ar talamh; á thabhairt dá haire, dá bhrí sin, go bhfuil luach straitéiseach ag an mbia mara i gcomhthéacs an Chomhaontaithe Ghlais don Eoraip agus maidir le rannchuidiú le roinnt SDGanna amhail SDG 2 ‘Díothú an Ocrais’, SDG 3 ‘Dea-Shláinte agus Folláine’, SDG 12 ‘Tomhaltas agus Táirgeadh Freagrach’, SDG 13 ‘Gníomhú ar son na hAeráide’ agus SDG 14 ‘Beathra Faoin Uisce’;

8.á mheas nach mór do CBI gach cuspóir beartais a urramú go cothrom; á chur i bhfáth gur gá cothromaíocht a choinneáil idir trí cholún na hinbhuanaitheachta in CBI; dá bhrí sin, tacaíonn sí le bearnaí a neartú, aghaidh a thabhairt orthu agus dlús a chur leis an uaillmhian i ngnéithe socheacnamaíocha agus slándála bia CBI, chomh maith le cur chuige bunaithe ar éiceachóras a chur i bhfeidhm go hiomlán agus cothrom na Féinne a bhaint amach ina ghné idirnáisiúnta;

9.á chur in iúl go bhfuil sí den tuairim gur cheart go n-áireofaí ar chuspóirí beartais iascaigh soláthar éisc don phobal a ráthú, mar chuid de shlándáil bia agus biafhlaitheas a áirithiú, pobail chósta a fhorbairt, agus aitheantas sóisialta gairmeacha a bhaineann le hiascach a chur chun cinn agus a spreagadh, chomh maith le poist a chur chun cinn agus dálaí maireachtála na n-iascairí a fheabhsú;

10.á iarraidh go ndéanfadh an Coimisiún, chun na críche sin, measúnuithe tionchair ex ante agus ex post iomlána a dhéanamh go córasach, lena n-áirítear anailísí socheacnamaíocha, sula molfar aon straitéis nó reachtaíocht nó sula ndéanfar aon chinneadh beartais trí chomhairliúchán leis na geallsealbhóirí uile a bhfuil baint acu le hearnáil an iascaigh;

11.á thabhairt dá haire, cé go leagtar béim i mBun-Rialachán CBI ar chuspóirí comhshaoil, socheacnamaíocha agus slándála bia an bheartais, go ndéileáiltear le gnéithe comhshaoil amháin i Rialachán (AE) 2016/2336 a bhaineann le stoic dhomhainfharraige; á mheas gur cheart gnéithe socheacnamaíocha agus slándála bia a ionchorprú go hiomlán sna rialacháin uile atá faoi réir an Bhunrialacháin amach anseo;

12.á iarraidh go ndéanfadh an Coimisiún agus an Chomhairle níos mó luacha a chur i gceapadh beartais maidir le tábhacht an iascaigh chun rannchuidiú leis an tslándáil bia trí tháirgí ardcháilíochta bia mara a chur ar fáil, go háirithe i ngéarchéimeanna amhail paindéim COVID-19, agus ina rannchuidiú leis an struchtúr eacnamaíoch agus sóisialta, agus le hoidhreacht chultúrtha, turasóireachta agus ghastranómach phobail chósta agus oileáin na hEorpa;

13.á chur i bhfáth go bhfuil ról straitéiseach ag iascairí agus táirgeoirí dobharshaothraithe sa slabhra luacha bia agus sa tslándáil bia, chomh maith le ról na mban, mar iascairí, máistrí soithí, deisitheoirí eangaí, cúntóirí agus pacálaithe cois cladaigh, etc., agus an gá atá acu le haitheantas a fháil;

14.á mheabhrú gur leas coiteann domhanda iad na farraigí agus na haigéin uile agus gur acmhainn phoiblí nádúrtha iad na hacmhainní muirí, gur sócmhainn iad gníomhaíochtaí agus bainistiú iascaireachta atá bunaithe ar na hacmhainní sin agus go mbaineann siad lenár n-oidhreacht choiteann, agus gur cheart na hacmhainní sin a bhainistiú bunaithe ar chomhairle eolaíoch iontaofa ar bhealach lena ráthaítear na tairbhí fadtéarmacha is airde don tsochaí uile;

15.á chreidiúint gur cheart an uasteorainn cabhrach de minimis do chuideachtaí próiseála táirgí iascaigh agus dobharshaothraithe a ailíniú leis an scéim chéanna do chuideachtaí próiseála talmhaíochta chun comhsheasmhacht a áirithiú agus slándáil bia a ráthú; á chur in iúl gur geal léi, dá bhrí sin, na leasuithe a ghlac an Coimisiún ar an scéim de minimis i ndáil leis sin;

16.á mheabhrú go mbeidh sé d’aidhm ag CBI, i measc nithe eile, ‘a áirithiú go ndéanfaidh saothrú bheo-acmhainní bitheolaíocha na mara líon na speiceas atá á saothrú a athbhunú agus a chothabháil os cionn leibhéil atá in ann uastáirgeacht inbhuanaithe a tháirgeadh’ agus ‘go mbainfear ráta saothraithe MSY amach (...) faoi 2020 ar a dhéanaí i gcás na stoc uile’ agus faoi 2025 i gcás na stoc a chumhdaítear leis an bplean bainistithe do stoic ghrinnill sa Mheánmhuir Thiar; á thabhairt chun suntais, áfach, i gcás iascaigh ilsonracha, nach féidir bainistiú speiceas atá bunaithe ar shamhail MSY a chur i bhfeidhm, fiú in iascaigh a bhfuil eolas maith orthu agus atá doiciméadaithe go heolaíoch;

17.á mheas go bhfuil tabhairt isteach MSY mar phointe tagartha bainistithe iascaigh ina spreagadh chun feabhas a chur ar staid fhoriomlán na stoc éisc; á mheabhrú, thar na blianta agus CBI á chur i bhfeidhm, go bhfuil iarrachtaí suntasacha déanta ag tionscal na hiascaireachta chun an brú iascaireachta a laghdú go dtí an pointe gur thit an cóimheas básmhaireachta iascaireachta foriomlán (F/FMSY) in 2020 faoi bhun a haon san Atlantach Thoir Thuaidh;

18.á chur i bhfáth go bhfuil sé ríthábhachtach leanúint den obair chun stoic éisc a atógáil agus a choinneáil os cionn leibhéil MSY agus dlús a chur leis, go háirithe sa Mheánmhuir ina bhfuil F/FMSY fós os cionn 1, agus a áirithiú ag an am céanna go dtáirgtear uasleibhéil inbhuanaithe bia mara, chun a áirithiú go mbeidh soláthar bia agus torthaí dearfacha sóisialta agus eacnamaíocha ar fáil d’iascairí agus do phobail chósta;

19.á mheas, i ndáil leis an méid sin, gur cheart cuspóir MSY a chur chun feidhme i bhfianaise na réaltachta praiticiúla agus i bhfianaise na ngnéithe socheacnamaíocha, comhréireachta agus slándála bia a chumhdaítear sa Chonradh agus i gcód iompair na hEagraíochta Bia agus Talmhaíochta (FAO);

20.á mheas, thairis sin, gur cheart MSY a fhorbairt mar chuid de shamhail bunaithe ar éiceachórais lena gcuimsítear na tosca uile a mbíonn tionchar acu ar stádas na stoc, lena n-áirítear idirghníomhaíochtaí speiceas, téamh domhanda agus truailliú, chun a áirithiú nach san earnáil iascaigh amháin a shannfar ídiú stoic;

21.á iarraidh go ndéanfadh an Coimisiún, tar éis comhairliúchán leathan leis na geallsealbhóirí, scrúdú ar an bhféidearthacht cuspóirí bainistithe iascaigh a thabhairt isteach lena n-áiritheofar na leibhéil stoic éisc is fearr is féidir agus feidhmíocht shocheacnamaíoch optamach na gcabhlach;

22.ag tabhairt cuireadh, i ndáil leis sin, do na Ballstáit ar mian leo tionscadail a thionscnamh, lena n-áirítear cineálacha eile beart bainistíochta amhail Uastáirgeacht Eacnamaíoch, i gcás inarb iomchuí, comhairliúcháin a sheoladh chun féachaint cén áit is fearr a bhféadfaí tionscadail trialach den sórt sin a dhéanamh;

23.ag athdhearbhú na dtuairimí a cuireadh in iúl i rún uaithi an 18 Bealtaine 2021 maidir leis an oibleagáid gabhálacha a thabhairt i dtír; á mheabhrú go bhfuil roinnt gabhálacha de thaisme nó foghabhálacha dosheachanta, go háirithe in iascaigh mheasctha, ós rud é go bhféadfadh sé go ndéanfaí damáiste d’iasc nó go bhféadfadh siad a bheith dodhíolta, róbheag nó oiriúnach mar bhia don duine ach go bhfuil toirmeasc ar a ndíol, etc.; á mheabhrú, thairis sin, in ainneoin na n-iarrachtaí leanúnacha agus an chomhoibrithe atá á ndéanamh ag na geallsealbhóirí uile, nach féidir an oibleagáid gabhálacha a thabhairt i dtír a chur chun feidhme i gceart mura bhfeabhsaítear roinnt easnamh, amhail easpa acmhainneachta stórála ar bord nó saoráidí bailithe ag an gcalafort chomh maith le húsáid leormhaith díolúintí; á chur i bhfios go gcuireann na heasnaimh sin bac ar chur chun feidhme cuí, rud a fhágann nach leor an bailiú sonraí maidir le stoic agus a fhágann gur deacair gabhálacha a mheas go cruinn, rud a chuireann bac ar mheastacháin eolaíocha iontaofa ar stoic éisc;

24.á thabhairt chun suntais nach sprioc inti féin í an oibleagáid gabhálacha a thabhairt i dtír ach gur uirlis í chun gabhálacha de thaisme a íoslaghdú; á chur i bhfáth, ina leith sin, a bhuí leis an roghnaíocht níos mó a baineadh amach le blianta beaga anuas, go bhfuil laghdú suntasach tagtha ar fhoghabháil de thaisme; á thabhairt chun suntais gur toradh é sin ar na hiarrachtaí a rinne iascairí i gcomhar leis an bpobal eolaíochta le heolas feidhmeach lena dtacaítear le teicnící agus trealamh iascaireachta níos roghnaithí a fhorbairt; á chur i bhfáth, dá bhrí sin, nach mór iarracht níos mó a dhíriú ar fhorbairt a mhaoiniú chomh maith le trealamh iascaireachta a chur in úsáid a rannchuidíonn le roghnaíocht agus le bailiú sonraí níos fearr;

25.á mheabhrú gur iarr an Pharlaimint ar an gCoimisiún measúnú a dhéanamh ar chur chun feidhme na hoibleagáide gabhálacha a thabhairt i dtír, lena n-áirítear measúnú ar thionchar socheacnamaíoch na hoibleagáide gabhálacha a thabhairt i dtír nach mór a dhéanamh do gach iascach, lena n-áirítear iascaigh ar mhionscála;

26.Thairis sin, go bhfuil an méid seo a leanas á mheas aici:–gur cheart an oibleagáid reatha gabhálacha a thabhairt i dtír a chur i bhfeidhm ar bhealach pragmatach, agus saintréithe gach iascaigh á gcur san áireamh; á chur i bhfios go láidir a thábhachtaí atá taithí na n-iascairí maidir le cathain agus cá háit le hiascaireacht a dhéanamh agus, ag an am céanna, gabhálacha de thaisme a sheachaint, agus a n-iarrachtaí á luacháil chun roghnaíocht a fheabhsú;–gur cheart malartuithe cuótaí idir na Ballstáit agus idir Eagraíochtaí Táirgeoirí, trí chomhthiomsuithe cuótaí, chomh maith le roghnaíocht theicniúil agus spásama, a spreagadh;–gur cheart aitheantas a thabhairt don tábhacht a bhaineann leis na díolúintí atá ann cheana ón oibleagáid gabhálacha a thabhairt i dtír a choinneáil, bunaithe ar an gcomhairle eolaíoch is fearr dá bhfuil ar fáil, chomh maith leis an ualach riaracháin a laghdú maidir leis an oibleagáid gabhálacha a thabhairt i dtír a chur chun feidhme; ba cheart don Choimisiún é sin a chur san áireamh agus athbhreithniú á dhéanamh aige orthu;–gur cheart athbhreithniú a dhéanamh ar chur i bhfeidhm na hoibleagáide gabhálacha a thabhairt i dtír, lena n-áirítear a raon feidhme, chun na fadhbanna a bhaineann le tachtspeiceas agus maoluithe casta a theorannú;–ba cheart an oibleagáid gabhálacha a thabhairt i dtír a rialú agus a fhorfheidhmiú go héifeachtach agus, ag an am céanna, ba cheart í a dhéanamh níos tarraingtí chun úinéireacht na n-oibreoirí a fheabhsú agus, ar an gcaoi sin, comhlíonadh a fheabhsú, go háirithe trí dhreasachtaí, mar shampla chun úsáid uirlisí intleachta saorga a spreagadh chun roghnaíocht agus sainaithint speiceas a fheabhsú, chomh maith le feabhsuithe agus oiriúnuithe leordhóthanacha a dhéanamh ar chalafoirt Eorpacha; á iarraidh go mbainfeadh na Ballstáit leas iomlán as féidearthachtaí agus tacaíocht CEMID chun na críche sin;

27.á áitiú nach féidir an cuspóir maidir le gabhálacha de thaisme a íoslaghdú a bhaint amach go leordhóthanach tríd an oibleagáid gabhálacha a thabhairt i dtír agus gur cheart é a chomhlíonadh go príomha trí bhearta teicniúla a úsáid agus gur cheart tacú leis trí ghabhálacha a dhoiciméadú ar bhealach níos fearr, ar bhonn na comhairle eolaíche is fearr atá ar fáil; á iarraidh go ndéanfadh an Coimisiún measúnú ar roghanna eile chun gabhálacha de thaisme a íoslaghdú, chomh maith le gníomhaíochtaí a mholadh chun an oibleagáid gabhálacha a thabhairt i dtír a dhéanamh níos fearr, i gcomhthráth le leanúint de bhealaí éagsúla a lorg chun an oibleagáid gabhálacha a thabhairt i dtír a chur chun feidhme agus chun trealamh níos roghnaithí a fhorbairt;

28.á mheabhrú gurb iad TACanna agus cuótaí an bealach is dírí chun básmhaireacht iascaireachta a bhainistiú, ach gur féidir fadhbanna a bheith ag baint le TACanna stoic aonair in iascaigh mheasctha (mar gheall ar an éifeacht tachtaigh iascaigh);

29.á thabhairt chun suntais gur gá feabhas a chur ar an gcomhairle eolaíoch d’iascaigh mheasctha freisin i bhfianaise thionchair an athraithe aeráide ar an aigéan, chomh maith le comhdhéanamh gabhálacha agus díláithriú speiceas a mheas, mar gheall ar an athrú aeráide, agus TACanna á socrú;

30.á chur i bhfáth, in iascaigh atá faoi bhainistiú cuótaí, go bhféadfadh fadhb na dtachtspeiceas oibríochtaí iascaireachta a dhúnadh síos roimh dheireadh an tséasúir agus go bhféadfadh impleachtaí suntasacha eacnamaíocha a bheith ann d’iascairí; á iarraidh go ndéanfadh an Coimisiún agus na Ballstáit leas a bhaint as na féidearthachtaí atá ann faoi láthair maidir le CBI, amhail malartuithe cuótaí nó solúbthachtaí idirbhliantúla agus idirspeiceas, agus béim á leagan, ag an am céanna, ar an méid sin gur cheart go n-áireofaí méid cothrom solúbthachta i gcóras maith cuótaí, ós rud é go gcuirfeadh sé ar chumas iascairí a bhfuil cuótaí breise de dhíth orthu le haghaidh tachtspeiceas agus iascairí a bhfuil cuótaí ar fáil acu teacht ar thoradh comhthairbheach;

31.á iarraidh go ndéanfadh an Coimisiún agus an Chomhairle breithniú ar TACanna a shocrú do thréimhsí níos faide ná tréimhsí bliantúla nó tréimhsí débhliantúla, go háirithe do na príomh-spriocstoic, bunaithe i gcónaí ar an gcomhairle eolaíoch is fearr atá ar fáil, chun tuilleadh intuarthachta agus deimhneachta fadtéarmaí a chur ar fáil d’iascairí agus i gcomhréir le prionsabal MSY; á iarraidh go ndéanfadh an Coimisiún agus an Chomhairle an chomhairle eolaíoch is fearr atá ar fáil a lorg maidir leis an bhféidearthacht TACanna a bhaint le haghaidh stoic áirithe, agus a áirithiú ag an am céanna go bhfanfaidh an stoc lena mbaineann laistigh de theorainneacha bitheolaíocha sábháilte sa ghearrthéarma agus sa mheántéarma;

32.á chur i bhfios go láidir go nglactar go forleathan leis an gcobhsaíocht choibhneasta, a bunaíodh dhá scór bliain ó shin, mar ionstraim bhunriachtanach chun intuarthacht fhadtéarmach agus leanúnachas a thabhairt maidir le stoic éisc a chomhroinnt idir tíortha;

33.á chur i bhfáth, in ainneoin iarrachtaí idirnáisiúnta agus iarrachtaí an Aontais chun dálaí sábháilteachta ar bord soithí iascaireachta a fheabhsú, go bhfuil easnaimh fós ann, i.e. go bhfuil feidhm, thar aon ní eile, ag na coinbhinsiúin idirnáisiúnta ina leagtar amach na rialacha agus na córais chun soithí agus daoine ar bord a chosaint maidir le soithí móra;

34.á athdhearbhú nach féidir dálaí oibre agus maireachtála ar bord a fheiceáil ar leithligh ó dhálaí sábháilteachta; á chur in iúl go bhfuil sí den tuairim go gcuireann dálaí maithe oibre agus maireachtála ar shoithí agus nuachóiriú oiriúnach orthu feabhas ar shábháilteacht, chomh maith le ham scíthe d’iascairí; á mheas go bhfuil impleachtaí díreacha ag na gnéithe sin don tsábháilteacht ar bord, ós rud é go bhfuil baint fós ag céatadán mór tionóiscí agus teagmhas ar shoithí iascaireachta le hearráid an duine, cibé acu easpa eolais, oiliúint nó tuirse is cúis leo;

35.ag tathant ar an gCoimisiún agus ar na Ballstáit na caighdeáin sábháilteachta is airde ar bord soithí a áirithiú, beag beann ar a méid; ag spreagadh na hearnála chun na dálaí is fearr is féidir a chur chun feidhme maidir le sábháilteacht ar bord;

36.agus deiseanna reatha CEMID á gcur san áireamh chun tacú le sláinte, sábháilteacht, dálaí oibre agus éifeachtúlacht fuinnimh ar bord soithí iascaireachta, á áitiú go bhféadfadh úsáid reatha olltonnáiste mar shlat tomhais chun acmhainneacht iascaireachta a thomhas san Aontas bac a chur ar fheabhas a chur ar éifeachtúlacht fuinnimh, ar shábháilteacht agus ar chompord soithí, ós rud é go gcuireann sé teorainn leis na deiseanna atá ann iad a ionadú agus a nuachóiriú nó spás a mhéadú, fiú mura gcuireann sé le cumas na soithí iascaireacht níos mó iascaireachta a dhéanamh; á chur i bhfáth go gcuireann sé sin bac ar fheabhas a chur ar na gnéithe thuasluaite, rud a chuirfeadh chun cinn ar deireadh fostaíocht, forbairt pobal cósta agus tarraingteacht na hearnála, go háirithe do dhaoine óga agus do mhná;

37.ag tabhairt dá haire an teachtaireacht ón gCoimisiún maidir le hAistriú Fuinnimh earnáil Iascaigh agus Dobharshaothraithe an Aontais COM(2023)0100., lena bhféachtar lena áirithiú go rannchuideoidh earnáil na hiascaireachta leis an tAontas a bheith aeráidneodrach in 2050, agus a áirithiú ag an am céanna go mbeidh an iascaireacht san Aontas inbhuanaithe ó thaobh na sochaí, an gheilleagair agus an chomhshaoil de; á chur i bhfios go bhfuil roinnt bacainní roimh an aistriú sin, amhail an sainmhíniú atá ann faoi láthair ar an acmhainn iascaireachta agus na teorainneacha atá léi; á mheabhrú go mbíonn innill hidrigine, amóinia nó leictreacha níos troime agus níos mó go ginearálta ná innill díosail choibhéiseacha agus, dá bhrí sin, go n-éilítear olltonnáiste breise lena suiteáil ar bord agus go bhfuil easpa teicneolaíochtaí oiriúnaithe, a gcostas ard agus easpa taighde agus forbartha ag díriú go sonrach ar na hearnálacha iascaigh agus dobharshaothraithe; á chur in iúl gur oth léi nach dtugtar aghaidh ar na bacainní sin sa teachtaireacht ón gCoimisiún;

38.á iarraidh go ndéanfadh an Coimisiún bearta a mholadh chun freagairt don ghá atá ann dícharbónú thionscal na hiascaireachta a éascú, an tsaincheist maidir le soithí iascaireachta atá ag dul in aois a réiteach agus sábháilteacht agus dálaí oibre a fheabhsú; á mheas go bhféadfaí an méid seo a leanas a áireamh ar na bearta sin, i gcás inarb iomchuí:—úsáid iomlán a bhaint as an olltonnáiste atá ar fáil laistigh d’uasteorainneacha acmhainne náisiúnta,—acmhainn iascaireachta a athshainiú, mar shampla, tríd an tonnáiste a bhaineann le ‘sóisialta agus sábháilteacht’ a eisiamh ó ríomh na hacmhainne iascaireachta,—na teorainneacha acmhainne iascaireachta a mhéadú i dtéarmaí olltonnáiste agus cumhachta innill, gan cur leis an gcumas atá ag soithí níos mó éisc a ghabháil;

39.á iarraidh go ndéanfadh an Coimisiún agus na Ballstáit é níos éasca do ghairmithe tionscail rochtain a fháil ar chistí CEMID;

40.á iarraidh, thairis sin, go ndéanfadh an Coimisiún na Ballstáit dlús a chur leis an taighde agus leis an bhforbairt, an beartas Státchabhrach a oiriúnú agus i sineirgíocht le CEMID chun cistiú leordhóthanach agus leordhóthanach a chur ar fáil, ionas go mbeidh an earnáil in ann dícharbónú chabhlach an Aontais a bhaint amach laistigh den chreat ama docht a cheanglaítear leis an gComhaontú Glas don Eoraip agus le hoibleagáidí gaolmhara eile;

41.á iarraidh freisin go ndéanfadh an Coimisiún athbhreithniú ar CEMID, i gcomhréir le Comhaontú EDT maidir le Fóirdheontais Iascaigh, a glacadh ag a 12ú Comhdháil Aireachta (MC12) an 17 Meitheamh 2022, d’fhonn neodracht carbóin a bhaint amach; á iarraidh go ndéanfaí maoiniú do shoithí nua a fhormheas, laistigh de na paraiméadair a leagtar síos i gcomhaontuithe idirnáisiúnta iascaigh;

42.á iarraidh, thairis sin, go bhforbrófaí cúnamh aistrithe eacnamaíoch chun dícharbónú a chur chun cinn, lena gcumhdófar gach roinn chabhlaigh; á áitiú gur cheart cúnamh den sórt sin a úsáid freisin chun soithí atá níos éifeachtúla, níos sábháilte, níos nuálaí ó thaobh na teicneolaíochta de agus a bhfuil níos mó fairsinge ag baint leo a chur in ionad soithí atá ann cheana, toisc go bhfuil an cabhlach an-sean, a rannchuidíonn leis an earnáil a dhéanamh níos tarraingtí agus le hathnuachan ó ghlúin go glúin a chur chun cinn;

43.á iarraidh go ndéanfadh an Coimisiún agus na Ballstáit cistiú CEMID a chomhlánú, mar shampla tríd an gCiste um Aistriú Cóir, RePower EU agus Fís Eorpach chun dícharbónú a éascú agus chun taighde a mhaoiniú, chun aistriú cóir éiceolaíoch nach bhfágann aon duine ar lár a éascú;

44.ag tathant ar an gCoimisiún agus ar na Ballstáit oibriú le chéile chun tacú le taighde agus chun trealamh agus teicnící nuálacha a cheadú le haghaidh iascaireacht roghnaíoch a rannchuidíonn go mór le hastaíochtaí CO2 agus úsáid breosla a laghdú go suntasach;

45.á aithint go bhfuil ról ríthábhachtach ag pleananna ilbhliantúla (MAPanna) mar phríomhchreataí do bhainistiú fadtéarmach réigiúnach iascaigh, bunaithe ar an gcomhairle eolaíoch, theicniúil agus eacnamaíoch is fearr atá ar fáil, ach á chur in iúl gur oth léi nár bhain siad barr a gcumais amach;

46.á iarraidh go ndéanfadh an Coimisiún measúnú ar a éifeachtaí atá na pleananna ilbhliantúla atá ann cheana á gcur chun feidhme chun a áirithiú go rannchuideoidh siad le cuspóirí CBI; i gcás inar gá, ba cheart na pleananna sin a thabhairt cothrom le dáta agus a fheabhsú, ionas go gcuirfear san áireamh iontu breithnithe socheacnamaíocha agus dálaí athraitheacha;

47.á iarraidh go bhféachfadh an Coimisiún, i gcomhar le comhpháirtithe eile sa réimse — eadhon tíortha nach bhfuil san Aontas agus Eagraíochtaí Réigiúnacha Bainistithe Iascaigh (ERBInna) ábhartha — an bhféadfaí pleananna ilbhliantúla, cosúil leo siúd atá i bhfeidhm in imchuacha farraige eile, a mholadh d’uiscí eile an Aontais, go háirithe sa Mheánmhuir Thoir agus sa Mhuir Dhubh, agus conas is féidir leo uirlisí bainistíochta atá ann cheana sna himchuacha farraige sin a chomhlánú agus oibriú leo;

48.á chur i bhfios go láidir gur gá sineirgí a áirithiú idir pleananna ilbhliantúla réigiúnacha agus na beartais shonracha mhuirí do gach imchuach;

49.á chreidiúint go bhfuil sé ríthábhachtach go mbeidh na húdaráis áitiúla agus réigiúnacha uile atá inniúil maidir le bainistiú iascaigh, chomh maith leis na Comhairlí Comhairleacha (ACanna), a bhfuil ról bunúsach acu i ndáil leis sin, rannpháirteach go hiomlán i sainiú, i bhforbairt agus i gcur chun feidhme na bpleananna ilbhliantúla i gcomhréir le CBI;

50.á chur i bhfáth gurb é an t-iascach an earnáil is mó atá ag brath ar stoic shláintiúla, tháirgiúla agus athléimneacha agus ar éiceachórais mhuirí agus go bhfuil tionchar ag na húsáidí agus na gníomhaíochtaí eile a dhéantar sa mhuirthimpeallacht ar na héiceachórais sin freisin, amhail iompar muirí agus turasóireacht, forbairt uirbeach agus cósta, saothrú amhábhar agus foinsí fuinnimh, lena n-áirítear mianadóireacht ghrinneall na farraige, chomh maith le tionchar a bheith ag truailliú mara agus athrú aeráide orthu; á chur i bhfáth, dá bhrí sin, gur gá feabhas a chur ar chur chun feidhme an chur chuige bunaithe ar éiceachórais ar an leibhéal réigiúnach, náisiúnta agus Eorpach, a bhfuil ról ríthábhachtach le himirt ag MAPanna agus ag uirlisí bainistíochta eile ina leith;

51.á chur i bhfáth go bhfuil gá le bearta bainistithe iascaigh comhsheasmhacha a bhaineann le stoic atá idir réigiúin a chumhdaítear le roinnt pleananna ilbhliantúla, agus le réigiúin nach gcumhdaítear le pleananna ilbhliantúla;

52.á mholadh go láidir, i bhfianaise thábhacht straitéiseach an iascaigh agus an dobharshaothraithe mar fhoinse bia atá sláintiúil, ar mhórán próitéine agus ar ardchaighdeán, go dtabharfaí an t-aitheantas straitéiseach breise atá tuillte dó laistigh den Choimisiún don bheartas sin agus go gcuirfí líon leordhóthanach saineolaithe ar fáil do sheirbhísí an Choimisiúin atá freagrach as an iascach agus an dobharshaothrú;

53.á iarraidh, i gcomhdhéanamh Choláiste na gCoimisinéirí amach anseo, gur cheart go mbeadh Coimisinéir ann a bheadh tiomnaithe go heisiach d’iascach, do dhobharshaothrú agus do ghnóthaí muirí;

54.á chur i bhfáth a thábhachtaí atá sé go n-áireodh an Coimisiún faisnéis atá mionsonraithe go leor ina chuid tuarascálacha bliantúla dá dtagraítear in Airteagal 50 de CBI, ionas go bhféadfar faireachán agus measúnú éifeachtach a dhéanamh ar chur chun feidhme CBI ag an gCoimisiún; á iarraidh go ndéanfadh an Coimisiún, sa bhreis air sin, agus CBI á athbhreithniú aige, Airteagal 49 a leasú chun spriocdháta a shocrú chun tuarascáil a chur faoi bhráid Pharlaimint na hEorpa agus na Comhairle 10 mbliana tar éis an athbhreithnithe agus gach cúig bliana ina dhiaidh sin;

55.á iarraidh go ndéanfadh an Coimisiún tacaíocht níos fearr a thabhairt do na Ballstáit chun urraim agus comhlíonadh chuspóirí CBI a chur chun feidhme agus a áirithiú; á chur i bhfios go láidir go bhfuil sé ríthábhachtach don Choimisiún agus do na Ballstáit a bheith trédhearcach agus acmhainní iascaigh á mbainistiú acu; á chur i bhfáth go bhfuil bainistiú trédhearcach ríthábhachtach chun ardleibhéal muiníne a áirithiú i measc shaoránaigh an Aontais agus chun dea-cháil earnáil iascaigh an Aontais a choinneáil;

56.á mholadh don Choimisiún agus don Chomhairle go dtabharfar stádas breathnóra do Pharlaimint na hEorpa, lena n-áiritheofar ionadaíocht pholaitiúil iomlán, le linn na caibidlíochta bliantúla maidir le deiseanna iascaireachta;

57.á chur i bhfáth a thábhachtaí atá sé réigiúnú a neartú in CBI, lena gceadaítear do réigiúin agus d’údaráis áitiúla a bheith níos rannpháirtí i ndréachtú, i bhforbairt agus i meastóireacht na gclár oibríochtúil náisiúnta le haghaidh iascaigh agus i mbainistiú iascaigh ar bhonn níos ginearálta, agus leas iomlán á bhaint ag an am céanna as na féidearthachtaí atá ann cheana sa CBI;

58.á thabhairt chun suntais a thábhachtaí atá sé sainiúlachtaí réigiúnacha a chur san áireamh, agus cur chuige comhchuibhithe maidir le bainistiú iascaigh ar fud an Aontais á chur i bhfeidhm ag an am céanna; ag spreagadh na mBallstát a gcomhar a mhéadú laistigh de ghrúpaí réigiúnacha, in éineacht leis na geallsealbhóirí ábhartha, le Comhairlí Comhairleacha agus leis na húdaráis áitiúla agus réigiúnacha i gcomhréir le hAirteagal 18 de bhun-Rialachán CBI chun bearta caomhnaithe réigiúnacha a cheapadh trí mholtaí comhpháirteacha atá saincheaptha níos fearr do shaintréithe gach imchuach muirí ar leith;

59.á chur i bhfáth an ról bunúsach atá ag ACanna maidir le comhar na ngeallsealbhóirí a threisiú agus maidir lena rannpháirtíocht leormhaith agus chothrom i bpróiseas cinnteoireachta an Aontais a áirithiú;

60.ag cur béim freisin ar an bhfíoras go bhfuil na Comhairlí Comhairleacha bunriachtanach chun taithí agus eolas a chur ar fáil don Choimisiún Eorpach agus do na Ballstáit, chomh maith le moltaí a thíolacadh maidir le hábhair a bhaineann le bainistiú iascaigh agus leis na gnéithe socheacnamaíocha agus caomhnaithe den iascach agus den dobharshaothrú agus fadhbanna na hearnála agus na ngeallsealbhóirí eile a mhíniú, agus ar an gcaoi sin tacú le reachtaíocht agus í a fheabhsú;

61.á chur i bhfios go láidir go bhfuil ról lárnach ag ACanna freisin i gcomhthéacs an réigiúnaithe;

62.á iarraidh go ndéanfadh an Coimisiún a áirithiú go mbeidh ról níos mó ag geallsealbhóirí réigiúnacha agus ag Comhairlí Comhairleacha sna caibidlíochtaí agus sna comhairliúcháin le tríú tíortha, go háirithe an Ríocht Aontaithe agus an Iorua; á chur i bhfios go bhfuil an Coimisiún freagrach as an gcaibidlíocht le tríú tíortha a eagrú ar bhealach lena gceadófar idirghníomhaíochtaí díreacha agus malartuithe idir geallsealbhóirí ar an dá thaobh;

63.ag tacú le comhdhéanamh na gCoistí Comhairleacha, le hionadaíocht thromlach na n-oibreoirí socheacnamaíocha i gcomparáid le grúpaí leasmhara eile;

64.á thabhairt chun suntais a thábhachtaí atá sé go mbeadh na geallsealbhóirí rannpháirteach go gníomhach sna Comhairlí Comhairleacha, in atmaisféar maith oibre bunaithe ar urraim, go n-áireofaí na tuairimí uile ó na grúpaí geallsealbhóirí éagsúla, ó rúnaíochtaí neamhchlaonta, ó chathaoirligh rothlacha agus ó athbhreithnithe feidhmíochta seachtracha, rialta agus neamhspleácha;

65.á thabhairt chun suntais a thábhachtaí atá sé ról a thabhairt do na Comhairlí Comhairleacha le hobair Pharlaimint na hEorpa, agus á mholadh, dá bhrí sin, go dtionólfaí malartuithe rialta idir ionadaithe na gCoistí Comhairleacha agus Coistí ábhartha na Parlaiminte;

66.á chur in iúl gur saoth léi an faireachán agus an trédhearcacht neamhleor maidir leis an gcaoi a gcuirtear comhairle ACanna san áireamh sa chinnteoireacht; á iarraidh go ndéanfadh an Coimisiún nós imeachta a tharraingt suas chun tuiscint níos fearr a thabhairt do na Comhairlí Comhairleacha ar thorthaí a gcuid moltaí, amhail breithniú a dhéanamh ar thuarascáil bhliantúil, chomh maith le mínithe a chur san áireamh i dtograí sonracha ón gCoimisiún, amhail in aithrisí na ngníomhartha reachtacha ábhartha, maidir leis an gcaoi ar cuireadh moltaí ACanna san áireamh;

67.á iarraidh go ndéanfadh an Coimisiún páirt chórasach agus ghníomhach a ghlacadh i gcruinnithe na gCoistí Comhairleacha agus cumarsáid níos fearr a dhéanamh maidir le luach a gcomhairle, agus á iarraidh go ndéanfadh na Ballstáit tacaíocht iomchuí a chur ar fáil d’fheidhmiú ACanna;

68.á mheas gur samhail rannpháirteach agus comhfhreagrach í an chomhbhainistíocht, bunaithe ar chur chuige ón mbun aníos, atá trédhearcach, réamhghníomhach agus daonlathach, agus a chuidíonn le comhroinnt eolais níos fearr a ghiniúint do bhainistiú iascaigh, laistigh de chultúr freagrachta, lena mbunaítear líonra muiníne agus lena rannchuidítear le coinbhleachtaí a laghdú agus bacainní a shárú chun nuálaíochtaí agus bearta riachtanacha a chur chun feidhme i mbainistiú iascaigh, chomh maith le limistéir mhuirí faoi chosaint a chruthú, a chur chun feidhme agus a bhainistiú, áit ar léiríodh go bhfuil an-rath air;

69.chur in iúl gur geal léi an togra ón gCoimisiún a fógraíodh sa Teachtaireacht uaidh maidir le CBI inniu agus amárach chun tionscadal fadbhreathnaitheachta rannpháirtíochta uile-Aontais a dhéanamh, idir earrach 2023 agus samhradh 2024, maidir le ‘Iascach na Todhchaí’ bunaithe ar agallaimh ar an láthair;

70.á iarraidh go ndéanfadh an Coimisiún a thionscnaimh pholaitiúla agus reachtacha uile (lena n-áirítear gníomhartha cur chun feidhme lena leagtar síos srianta ar iascaigh) a bhunú ar an gcomhairle eolaíoch, theicniúil agus eacnamaíoch is fearr atá ar fáil (lena n-áirítear eolas eimpíreach iascairí) agus ar chomhairliúchán agus rannpháirtíocht earnáil an iascaigh agus geallsealbhóirí ábhartha eile agus ar mheasúnuithe tionchair socheacnamaíocha roimh ré lena n-úsáidtear uirlisí nuálacha amhail na huirlisí a forbraíodh i dtionscadal CABFishman, ina ndéantar anailís ar thionchair na n-iascach ar limistéir chósta;

71.á iarraidh go ndéanfadh na Ballstáit a n-acmhainní daonna agus ábhartha a mhéadú agus iad a chur ar fáil d’fheachtais agus do thionscadail eolaíocha oiriúnacha ionas go mbeidh eolas leordhóthanach acu ar na speicis a bhfuil beartais chaomhantais dírithe orthu;

72.á iarraidh go ndéanfadh CEMID tacaíocht éifeachtach a chur ar fáil do theicnící iascaireachta níos roghnaithí agus níos lú tionchair do chabhlaigh iascaireachta an Aontais, agus go háirithe chun tacú leis na hiascairí is mó a bhfuil tionchar ag srianta orthu, bunaithe ar mheasúnuithe tionchair eolaíocha maidir le húsáid teicnící iascaireachta sonracha; ag spreagadh an Choimisiúin coincheap eolaíoch ‘pêchécologie’ (‘éiceolaíocht éisc’) a chur chun cinn a bhfuil sé mar aidhm leis bearta caomhnaithe agus úsáid inbhuanaithe bheo-acmhainní na mara a thabhairt chun réitigh;

73.á mheas gur cheart an deis a thabhairt do na ACanna rannchuidiú leis na hiarrataí ón gCoimisiún ar chomhairle ón gComhairle Idirnáisiúnta um Thaiscéalaíocht na Mara (ICES) agus ón gCoiste Eolaíoch, Teicniúil agus Eacnamaíoch um Iascach (STECF) chun comhar níos dlúithe a chothú idir eolaithe agus geallsealbhóirí;

74.á iarraidh go ndéanfadh an Coimisiún Parlaimint na hEorpa a chur ar an eolas go córasach faoi na hiarrataí sin, go háirithe an chaoi a gcuireann siad le cuspóirí CBI;

75.á chur i bhfáth gur gá a áirithiú go dtabharfar áit chothrom don iascach agus don dobharshaothrú i gcomparáid le hearnálacha eile i ndearadh beartais agus i bpleanáil spásúlachta; á mheabhrú gur gá cothromaíocht níos fearr a bhunú idir na gníomhaíochtaí eacnamaíocha éagsúla a bhaineann leis an nGeilleagar Gorm chun coinbhleachtaí a laghdú agus a sheachaint agus sineirgí a chothú, go háirithe le bonneagair inathnuaite fuinnimh mhuirí De réir thuarascáil speisialta na Cúirte Iniúchóirí maidir le ‘fuinneamh in-athnuaite amach ón gcósta san Aontas’ an 5 Iúil 2023: 'Ní mór na hiarmhairtí díobhálacha a d’fhéadfadh a bheith ag forbairt an fhuinnimh in-athnuaite amach ón gcósta ar earnáil an iascaigh a shainaithint ar bhealach níos fearr agus aghaidh a thabhairt orthu' (https://www.eca.europa.eu/ECAPublications/SR-2023-22/SR-2023-22_GA.pdf, lch 43)., tríd an Treoir maidir le pleanáil spásúil mhuirí Treoir 2014/89/AE an 23 Iúil 2014 lena mbunaítear creat do phleanáil spásúlachta mhuirí, (IO L 257, 28.8.2014, lch. 135).; á chur i bhfios go n-éilíonn sé sin rannpháirtíocht leathan agus chuimsitheach geallsealbhóirí;

76.á mheabhrú nach mór ceanglais cosanta comhshaoil a chomhtháthú in CBI d’fhonn forbairt inbhuanaithe a chur chun cinn, i gcomhréir le CFAE;

77.á chur i bhfáth nach féidir iascach a bhainistiú mar bheartas neamhspleách, agus á iarraidh go ndéanfadh an Coimisiún CBI a chur chun feidhme i sineirge le beartais phoiblí uile an Aontais a dhéanann difear don hidreasféar agus na dúshláin uile a bhaineann le limistéir mhuirí na hEorpa á gcur san áireamh;

78.á chur i bhfios go láidir, go háirithe, nach mór CBI a bheith comhsheasmhach le reachtaíocht chomhshaoil an Aontais, go háirithe leis an gcuspóir dea-stádas comhshaoil a bhaint amach mar a leagtar amach sa Treoir Réime um Straitéis Mhuirí Treoir 2008/56/CE an 17 Meitheamh 2008 lena mbunaítear creat do ghníomhaíocht Chomhphobail i réimse an bheartais comhshaoil mhuirí (an Treoir Réime um Straitéis Mhuirí) (IO L 164, 25.6.2008, lch. 19)., agus nach mór é a chur chun feidhme agus trí cholún na hinbhuanaitheachta á n-urramú go cothrom;

79.á chur i bhfáth gur gá beartais agus straitéisí eile de chuid an Aontais a chur san áireamh go leordhóthanach agus a bheith comhleanúnach le CBI;

80.á thabhairt dá haire go bhfuil gá le cur chuige iomlánaíoch, lena n-áiritheofar tacaíocht chuí d’earnáil an iascaigh agus an dobharshaothraithe, agus bearta á gcur chun feidhme atá ceaptha chun feabhas a chur ar dhálaí don chomhshaol muirí;

81.á mheabhrú go bhforáiltear le hAirteagal 13 CFAE, agus beartas iascaigh an Aontais á cheapadh agus á chur chun feidhme acu, gur cheart don Aontas agus dá Bhallstáit lánaird a thabhairt ar na ceanglais maidir le leas ainmhithe, agus forálacha reachtacha nó riaracháin agus nósanna na mBallstát á n-urramú ag an am céanna.

82.á iarraidh go ndéanfadh an Coimisiún eolas eolaíochtbhunaithe maidir le leas ainmhithe uisceacha a mhéadú tuilleadh agus an taighde sin a chur san áireamh i bhforbairtí beartais in iascaigh agus sa dobharshaothrú amach anseo; á chur i bhfáth gur cheart, in aon fhorbairtí beartais a dhéanfar amach anseo, indéantacht phraiticiúil i mbainistiú iascaigh agus dobharshaothraithe agus an tionchar eacnamaíoch agus oibríochtúil a d’fhéadfadh a bheith ann ar oibreoirí agus ar ghníomhaíochtaí a chur san áireamh, agus gur cheart machnamh a dhéanamh freisin ar an ngá atá le cothrom na Féinne idirnáisiúnta a áirithiú;

83.á mheas go bhféadfadh sé go mbeadh mearbhall ar thomhaltóirí tráth an cheannaigh mar thoradh ar tháirgí atá bunaithe ar phlandaí amháin a mhargú faoin trádainm ‘iasc’ nó faoi speicis éisc; á dhearbhú gur cheart an trádainm ‘iasc’ nó speicis éisc a fhorchoimeád sa mhargadh inmheánach do tháirgí iascaigh nó dobharshaothraithe de bhunadh ainmhíoch;

84.á iarraidh go ndéanfadh an Coimisiún athbhreithniú ar choincheap ‘limistéir atá ag brath go mór ar iascaigh’, é a thabhairt cothrom le dáta agus ábhar rialála a thabhairt dó, ionas go soláthrófar leis an aitheantas sin cóir dhifreáilte atá dírithe ar iascaigh a chaomhnú sna limistéir sin trí leithdháileadh fabhrach cuótaí iascaireachta; ag tacú leis an tuairim gur cheart go n-áireofaí ar na gnéithe sainithe de choincheap nuashonraithe ‘limistéar atá ag brath go mór ar iascaigh’ táirgeadh próitéine ainmhithe ar ardchaighdeán, an rannchuidiú le slándáil bia nó breisluach ard a áirithiú do ghabhálacha agus do tháirgí mara eile, chomh maith le tábhacht shóisialta na gníomhaíochta;

85.á thabhairt dá haire go bhféadfadh sé nach bhfreastalódh gnéithe áirithe de CBI go leormhaith ar earnáil na hiascaireachta ar mhionscála agus nach mór a ról ríthábhachtach socheacnamaíoch in go leor pobal cósta agus a ról straitéiseach in infhaighteacht an tsoláthair bia a áirithiú;

86.á chur in iúl go bhfuil sí den tuairim gur cheart a chur san áireamh go leordhóthanach in CBI cineál éagsúil, saintréithe sonracha agus fadhbanna na n-earnálacha iascaireachta agus sliogéisc ar mhionscála;

87.ag tarraingt aird ar an ngá atá le rannpháirtíocht agus rannpháirteachas níos mó gairmithe iascaireachta ar mhionscála i mbainistiú, i sainiú agus i gcur chun feidhme na mbeartas iascaigh, agus sna Comhairlí Comhairleacha chomh maith;

88.á chur in iúl go bhfuil sí den tuairim gur cheart go n-áireofaí in athbhreithniú ar CBI sainmhíniú coiteann, leathan agus iomchuí ar iascaigh mhionscála, ceardiascaireacht agus iascaigh chósta; á chur i bhfáth gur cheart go mbeadh an sainmhíniú sin pragmatach, intomhaiste agus soiléir; ag cur béim freisin ar an bhfíoras gur cheart go dtiocfadh an sainmhíniú sin as measúnú iomchuí lena gcuirtear san áireamh saintréithe agus critéir shonracha na coda ar mhionscála, seachas díriú ar fhad an tsoithigh amháin, chun teacht ar shainmhíniú ar iascaigh ar mhionscála a léiríonn réaltacht na deighleoige ar bhealach níos fearr;

89.á iarraidh go ndéanfadh an Coimisiún, in éineacht leis na Comhairlí Comhairleacha, sainmhíniú comhchuibhithe a mholadh le cur san áireamh in athbhreithniú ar Bhunrialachán CBI chun go gcumhdófar reachtaíocht iascaigh uile an Aontais leis, i gcás inarb iomchuí; á mheas nár cheart go mbeadh tionchar ag aon cheann de na hathruithe a leagtar amach thuas ar chur chun feidhme CEMID le linn na tréimhse buiséadaí reatha;

90.á chur i bhfáth gur gá leasú a dhéanamh ar Rialachán (CE) Uimh. 1967/2006 ón gComhairle maidir le bearta bainistíochta do shaothrú inbhuanaithe acmhainní iascaigh sa Mheánmhuir ar a dtugtar freisin ‘Rialachán na Meánmhara’, lena leagtar síos rialacha i dtaca le saintréithe teicniúla trealaimh iascaireachta agus a n-úsáidí agus atá as dáta ar an drochuair agus, dá bharr sin, a chuireann bac ar phríomhspriocanna an Chomhbheartais Iascaigh a chomhlíonadh, go háirithe iad siúd a bhaineann le hiascaigh ar mhionscála;

91.ag cur béim ar an bhfíoras, faoi Airteagal 17, agus na deiseanna iascaireachta atá ar fáil dá gcabhlach á leithdháileadh acu, go n-úsáidfidh na Ballstáit critéir thrédhearcacha agus oibiachtúla, lena n-áirítear critéir de chineál comhshaoil, sóisialta agus eacnamaíoch; á chur i bhfáth gur faoi na Ballstáit atá sé na critéir a úsáideann siad agus deiseanna iascaireachta á leithdháileadh acu a chinneadh;

92.á chur in iúl gur geal léi go gceadaítear leis na modhanna leithdháilte atá ann faoi láthair, atá bunaithe den chuid is mó ar chearta stairiúla, leibhéal áirithe cobhsaíochta eacnamaíche in earnáil na hiascaireachta, rud a d’fhéadfadh a bheith ina choinníoll lena gcuirtear ar chumas oibreoirí a bheith nuálach agus teicnící níos inbhuanaithe a ghlacadh;

93.á chur i bhfáth go bhfágann córas deiseanna iascaireachta atá inrochtana go héasca mar aon le critéir thrédhearcacha maidir lena chur i bhfeidhm praiticiúil gur féidir grinnscrúdú níos fearr, cothrom na Féinne, comhdheiseanna do na páirtithe leasmhara uile agus níos mó intuarthachta, cobhsaíochta agus deimhneachta dlíthiúla a bheith ann d’iascairí;

94.á chur in iúl gur saoth léi an easpa trédhearcachta maidir le dáileadh deiseanna iascaireachta i mBallstáit áirithe agus á iarraidh go ndéanfaí na critéir a phoibliú, i gcomhréir leis an reachtaíocht is infheidhme maidir le cosaint sonraí;

95.á mheas gur cheart na modhanna leithdháilte a fhorbairt agus a chur i bhfeidhm le rannpháirtíocht na bpobal iascaireachta, na n-údarás réigiúnach agus na ngeallsealbhóirí ábhartha eile, agus a áirithiú go ndéanfar ionadaíocht chothrom ar gach cuid cabhlaigh, ar gach eagraíocht táirgeoirí agus ar gach eagraíocht oibrithe, bunaithe ar an gcomhairle eolaíoch is fearr atá ar fáil, agus gur cheart coimircí amhail tréimhsí fógra a áireamh iontu chun ligean d’iascairí oiriúnú i gcás ina gcinnfidh na Ballstáit a modh leithdháilte a athrú;

96.ag tathant ar an gComhairle sainiúlachtaí agus riachtanais gach roinne cabhlaigh a chur san áireamh, lena n-áirítear an roinn ar mhionscála, agus deiseanna iascaireachta á leithdháileadh;

97.ag meabhrú ról Airteagal 17 de CBI mar uirlis chun dreasachtaí a chur ar fáil d’iascaigh ar bheagán tionchair agus ar mhionscála agus gur faoi na Ballstáit atá sé leas a bhaint as na deiseanna a chuirtear ar fáil leis, amhail dreasachtaí chun trealamh iascaireachta níos roghnaithí a úsáid nó teicnící iascaireachta a úsáid ar lú a n-ídiú fuinnimh nó a dtionchar ar ghnáthóga;

98.á thabhairt dá haire go gcuirfidh an Coimisiún tús le plé i measc na mBallstát agus na ngeallsealbhóirí d’fhonn vade mecum a ullmhú maidir le leithdháileadh deiseanna iascaireachta chun trédhearcacht a fheabhsú, cleachtais inbhuanaithe iascaireachta a chur chun cinn ar fud an Aontais, agus tacú le hiascaigh ar mhionscála agus le hiascaigh chósta;

99.á chur i bhfios go láidir an ról atá ag POnna maidir le hinbhuanaitheacht a chur chun cinn, maidir le rannchuidiú le hinfhaighteacht an tsoláthair bia agus maidir le feabhas a chur ar fhás agus ar fhostaíocht in earnálacha na hiascaireachta agus an dobharshaothraithe tríd an méid seo a leanas, inter alia:—gníomhaíochtaí comhchoiteanna a bhainistiú agus a chur chun feidhme;—táirgeoirí, céad cheannaitheoirí agus tomhaltóirí a nascadh sa slabhra soláthair,—táirgí iascaireachta inmharthana agus inbhuanaithe a chur chun cinn do thomhaltóirí trí pháirt a ghlacadh i scéimeanna deimhniúcháin;—comhlíonadh an rialacháin iascaireachta a chur chun cinn, tacú le hinrianaitheacht agus trédhearcacht agus cáilíocht sonraí a fheabhsú i ndearbhuithe gabhála chun iascaireacht NNN a chomhrac;—cuótaí iascaireachta a dháileadh agus a bhainistiú i roinnt Ballstát;

100.á thabhairt dá haire thairis sin, i roinnt mhaith Ballstát, nach mbaineann mórán iascairí ar mhionscála le POnna, agus go bhfuil a POnna tiomnaithe féin ag níos lú iascairí ar mhionscála, rud a chuireann teorainn lena n-acmhainneacht tairbhe a bhaint as an gcainéal sin chun rochtain a fháil ar chuótaí iascaireachta; ag spreagadh, dá bhrí sin, an Choimisiúin agus na mBallstát cruthú POnna d’iascairí ar mhionscála agus ag iascairí ar mhionscála a éascú agus a spreagadh;

101.á chur i bhfáth gur cheart go mbeadh comhlachais iascairí amhail ceardchuallachtaí, a shaothraíonn príomhchuspóirí PO faoi Chomheagraíocht na Margaí Rialachán (AE) Uimh. 1379/2013 an 11 Nollaig 2013 maidir le comheagrú na margaí i dtáirgí iascaigh agus dobharshaothraithe (IO L 354, 28.12.2013, lch. 1)., incháilithe chun cabhair airgeadais a fháil ar chomhchéim le heagraíochtaí táirgeoirí atá aitheanta faoi láthair; á áitiú, ina leith sin, gur cheart do na Ballstáit lena mbaineann, don Choimisiún agus do cheardchuallachtaí, i gcomhar lena chéile, roghanna agus réitigh ábhartha a bhreithniú;

102.á chur i bhfios go bhfuil caighdeáin CBI ar na caighdeáin is airde ar fud an domhain agus go gcuireann siad go mór le hinbhuanaitheacht chomhshaoil, eacnamaíoch agus shóisialta agus, cé go bhféadfaí feabhas a chur ar chúrsaí fós, go léirítear leis an dul chun cinn a rinneadh le blianta beaga anuas an méid is féidir a dhéanamh chun rannchuidiú tuilleadh, ar thaobh amháin, le hinbhuanaitheacht na stoc éisc agus na ngnáthóg agus, ar an taobh eile, tuilleamh iascairí agus longúinéirí a mhéadú; á thabhairt chun suntais go bhfuil sé ríthábhachtach, i measc tosca eile, ardchaighdeáin a chur chun cinn maidir le hinbhuanaitheacht chomhshaoil, eacnamaíoch agus shóisialta earnáil an iascaigh chun glúin nua iascairí a mhealladh agus chun cobhsaíocht eacnamaíoch fhadtéarmach a chur ar fáil don earnáil;

103.á thabhairt dá haire gur ábhar imní atá ag dul i méid do mhuintir na hEorpa é cosaint an chomhshaoil, go háirithe na glúnta óga; á chur i bhfáth a thábhachtaí atá bainistiú inbhuanaithe iascaigh chun iascairí óga a mhealladh; á iarraidh, ina leith sin, go ndéanfaí iascaireacht ísealtionchair a chur chun cinn;

104.á iarraidh go ndéanfadh an Coimisiún, thairis sin, a áirithiú go ndéanfar cuid de na ranníocaíochtaí airgeadais faoi na Comhaontuithe Comhpháirtíochta maidir le hIascaigh Inbhuanaithe a leithdháileadh freisin, i gcás inar féidir, ar lánpháirtiú níos fearr daoine óga agus ban in earnálacha an iascaigh agus an dobharshaothraithe, ar athbhunú na muirthimpeallachta agus ar fheabhas a chur ar an eolas faoi staid na haeráide agus na muirthimpeallachta;

105.á chur i bhfáth gur gá daoine óga a mhealladh ní hamháin chuig gníomhaíochtaí iascaireachta mara, ach freisin chuig bainistiú fiontar iascaireachta agus dobharshaothrú, chun athnuachan glúine a áirithiú ar fud earnáil iomlán an bhia uiscigh;

106.á thabhairt chun suntais go bhfuil athnuachan glúine tábhachtach chun dul i ngleic leis na dúshláin dhéimeagrafacha atá os comhair na gceantar cósta agus na limistéar tuaithe máguaird, go háirithe, agus go rannchuideoidh sí lena n-oidhreacht chultúrtha a chaomhnú;

107.á chur in iúl gur geal léi go gcuireann CEMID 2021-2027 cúnamh agus tacaíocht ar fáil d’iascairí óga a dhéanann soitheach nó fiontar iascaireachta a cheannach don chéad uair; á iarraidh, ina leith sin, go ndéanfadh an Coimisiún agus na Ballstáit athnuachan glúine a chur chun cinn trí thacú le daoine ar mian leo tús a chur le gairm in earnáil an iascaigh agus bacainní a bhaint, amhail aghaidh a thabhairt ar an gcostas ard a bhaineann le gnó a thosú, éagobhsaíocht ioncaim, neamhionannas inscne agus an easpa cobhsaíochta gairme;

108.á iarraidh go ndéanfadh an Coimisiún, i gcomhar leis na Ballstáit, bearta nua a chur ar fáil, chomh maith leis an earnáil chun bearta a dhéanamh, lena spreagfar cuimsiú daoine óga agus ban ar gach leibhéal den earnáil agus lena gcuirfear athnuachan glúine chun cinn ar bhealach níos fearr, go háirithe trí gach post i slabhra luacha na hiascaireachta agus an dobharshaothraithe a dhéanamh níos tarraingtí, níos sábháilte agus le pá níos fearr;

109.á chur i bhfáth a thábhachtaí atá sé faisnéis agus oiliúint chuí a áirithiú, go háirithe do dhaoine óga, chun comhroinnt eolais a áirithiú go háirithe i ndáil le rannchuidiú an iascaigh le saincheisteanna inbhuanaitheachta; á chreidiúint go bhfuil sé sin tábhachtach chun a staid phearsanta a ráthú, rannchuidiú le feabhas a chur ar a n-ioncam, agus trí leathnú a dhéanamh ar chomhtháthú a bpobal áitiúil, go háirithe sna réigiúin chósta is iargúlta, ina bhfuil níos lú deiseanna fostaíochta;

110.á chur i bhfios go láidir nach mór cuspóirí an Chomhaontaithe Ghlais don Eoraip agus an gá atá le haistriú digiteach a áirithiú i ngeilleagar gorm inbhuanaithe a chur san áireamh san athnuachan glúine; á mheas, áfach, nár cheart go mbeadh coimhlint idir na glúine mar thoradh ar athnuachan glúine agus gur cheart iascairí de gach aois a áireamh, lena n-áiritheofar cothromaíocht san aistriú éiceolaíoch agus digiteach chun a áirithiú nach gcaillfear oidhreacht na taithí; á iarraidh, thairis sin, go bhfeabhsófaí soghluaisteacht agus deiseanna fostaíochta ar fud an Aontais, gan deacrachtaí ná srianta maidir le haitheantas a thabhairt do scileanna agus oiliúint iascairí;

111.á aithint go bhfuil ról tábhachtach ag mná maidir le tacaíocht lóistíochta agus riaracháin do shoithí iascaireachta agus maidir le margaíocht agus próiseáil éisc; á thabhairt chun suntais, áfach, gur minic a dhéantar dearmad ar an ról sin nó gur ar éigean a bhfeictear é, go háirithe mar iascairí nó mar mháistrí soithigh chomh maith lena ról san eolaíocht;

112.á iarraidh, dá bhrí sin, go ndéanfadh an Coimisiún tionscnaimh a sheoladh chun obair na mban san iascach a aithint agus chun feabhas a chur ar infheictheacht a róil, trí thacú lena n-ionchorprú ina réimsí éagsúla, agus trí thacú le hionadaíocht níos fearr na mban i ngach eagraíocht agus eintiteas ionadaíoch, agus íocaíocht chomhionann idir na hinscní a áirithiú;

113.á mheabhrú go gceanglaítear leis an Straitéis maidir le Comhionannas Inscne do 2020-2025 go dtacóidh cistí ábhartha an Aontais le gníomhaíochtaí, amhail CEMID, chun cothromaíocht oibre is saoil na mban agus rannpháirtíocht i margadh an tsaothair a chur chun cinn, infheistíochtaí i saoráidí cúraim a chur chun cinn, tacú le fiontraíocht na mban, agus leithscaradh inscne a chomhrac;

114.á iarraidh go ndéanfadh an Coimisiún agus na Ballstáit iarracht a áirithiú nach mór do gach clár agus gníomhaíocht atá dírithe ar dhaoine óga a mhealladh chuig earnáil na hiascaireachta a dhéantar faoi CBI rannchuidiú le comhionannas inscne a bhaint amach;

115.á iarraidh go ndéanfadh an Coimisiún tuilleadh iarrachta chun CBI a chur chun cinn mar shamhail bheartais do rialachas na n-aigéan, trí úsáid a bhaint as seasamh an Aontais in ERBInna, i gcomhaontuithe saorthrádála agus i gComhaontuithe Comhpháirtíochta Iascaigh Inbhuanaithe, agus ar bhonn níos ginearálta i bhfóraim idirnáisiúnta; á chur i bhfáth go mbeidh sé sin bunriachtanach chun iomaíocht chóir a áirithiú d’oibreoirí an Aontais agus chun leasanna earnálacha iascaigh agus dobharshaothraithe an Aontais a chosaint ar an leibhéal domhanda;

116.á iarraidh go ndéanfadh an Coimisiún faireachán ar dháileadh ranníocaíochtaí airgeadais an Aontais, lena n-áiritheofar go leithdháilfear iad sin ar na hearnálacha iascaigh agus dobharshaothraithe;

117.á iarraidh go neartófaí ról ERBInna agus á iarraidh go ndéanfadh an Coimisiún creat ginearálta a mholadh do na sainorduithe caibidlíochta maidir le rannpháirtíocht sna heagraíochtaí sin; á iarraidh, thairis sin, go ndéanfadh an Coimisiún rannpháirtíocht na Parlaiminte a áirithiú ag na céimeanna is luaithe de dhréachtú beart agus moltaí lena nglacadh laistigh de ERBInna, ar bhealach nach mbaineann an bonn de sheasamh caibidlíochta an Aontais;

118.á mheas nár cheart limistéar aigéin ná acmhainn ábhartha iascaigh a bheith ann nach gcumhdaítear leis an ERBI ábhartha; á iarraidh go ndéanfadh an Coimisiún cruthú ERBInna nua a chur chun cinn, i gcás inar gá, chomh maith leis na ERBInna atá ann cheana a oiriúnú, i bhfóraim idirnáisiúnta, chun feabhas a chur ar chosaint na stoc éisc agus ar bhainistiú inbhuanaithe acmhainní iascaigh agus chun gníomhaíochtaí inbhuanaithe na gcabhlach atá ag oibriú sna limistéir sin a chosaint;

119.á chur i bhfios go gcuireann SFPAnna le tíortha nach bhfuil san Aontas tairbhí frithpháirteacha ar fáil don Aontas agus do thíortha comhpháirtíochta araon; á chur i bhfios go láidir go n-áirítear sna SFPAnna a rinneadh le déanaí clásail maidir le cearta an duine agus go ndéantar riachtanais na bpobal áitiúil a chomhtháthú iontu;

120.á mheas go bhfuil sé ríthábhachtach go n-urramóidh an Coimisiún gach gné den dlí idirnáisiúnta go hiomlán agus é i mbun na gné seachtraí de CBI;

121.á iarraidh go ndéanfadh an Coimisiún a áirithiú go ndéanfar cuspóirí CBI a chomhtháthú go hiomlán i seasamh an Aontais i ngach fóram idirnáisiúnta comhshaoil, amhail an Coinbhinsiún maidir leis an Éagsúlacht Bhitheolaíoch (CBD) nó an Coinbhinsiún maidir le Trádáil Idirnáisiúnta i Speicis Fauna agus Flora Fiáine i mBaol (CITES), ina bpléitear ceisteanna a bhaineann le hacmhainní bitheolaíocha na mara;

122.á mheas nach mór táirgí bia uiscigh a allmhairítear a bheith faoi réir nósanna imeachta diana faireacháin agus deimhniúcháin, chun a áirithiú go dtagann siad ó iascaigh inbhuanaithe, agus faoi réir ardchaighdeáin sláinte, chomhshaoil agus shóisialta, atá chomh dian céanna leis na cinn a chuirtear i bhfeidhm ar tháirgí an Aontais; á chur in iúl go bhfuil sí den tuairim gur cheart é sin a éileamh trí bhíthin clásail shonracha sna comhaontuithe trádála nua arna gcaibidliú ag an Aontas;

123.á chur i bhfios go bhfuil an córas inrianaitheachta le haghaidh táirgí bia uiscigh úra, reoite agus próiseáilte a allmhairítear isteach san Aontas, lena n-áirítear le haghaidh luanta tuinnín a allmhairítear faoi chóras na dtaraif-chuótaí uathrialaitheacha (ATQanna), bunriachtanach chun ionchais tomhaltóirí a chomhlíonadh trí fhaisnéis d’fhonn sábháilteacht bia a fheabhsú agus seiceálacha ar allmhairí tríú tír a cheadú, in éineacht le bearta chun iascaireacht NNN a chomhrac; á iarraidh go mbeadh cur chuige níos comhchuibhithe ann san Aontas i ndáil le reachtaíocht an Aontais a bhaineann le NNN a chur chun feidhme;

124.á mheabhrú gurb é an tAontas an margadh allmhairiúcháin is mó agus is tarraingtí do tháirgí bia mara agus dobharshaothraithe; á iarraidh go ndéanfaí an seasamh tráchtála sin a ghiaráil chun leasanna thomhaltóirí an Aontais a chosaint maidir le hardchaighdeáin agus earnálacha an Aontais a chur chun cinn, chun cosc a chur ar a chomhpháirtithe éirí as comhaontuithe nó gealltanas agus chun cothrom na Féinne a chothú ar an leibhéal idirnáisiúnta, go háirithe maidir le caighdeáin shóisialta, eacnamaíocha agus chomhshaoil;

125.á chur in iúl gur geal léi go n-ionchorpraítear sa Chomhaontú Trádála agus Comhair idir an tAontas agus an Ríocht Aontaithe nasc díreach idir forálacha trádála agus iascaigh; á iarraidh go ndéanfadh an Coimisiún agus an Chomhairle a áirithiú go mbeidh an chaibidlíocht iascaigh leis an Ríocht Aontaithe agus le stáit chósta eile san Atlantach Thoir Thuaidh nasctha freisin le saincheisteanna a bhaineann le trádáil agus rochtain ar mhargadh aonair an Aontais;

126.á chur i bhfios go láidir a thábhachtaí atá beartas neamhfhulaingthe an Aontais maidir le hiascaireacht NNN, i bhfianaise go bhfuil sé fós ag tarlú ar an leibhéal idirnáisiúnta, lena n-áirítear samplaí ó easpa trédhearcachta maidir le hoibríochtaí iascaireachta neamhdhleathacha go sclábhaíocht nua-aimseartha, amhail i gcás roinnt soithí Síneacha, agus á chur in iúl gur oth léi go bhfuil bia mara neamhúdaraithe fós á dhíol ar roinnt margaí an Aontais;

127.á chur i bhfios nach mór don Choimisiún agus do na Ballstáit dlús a chur lena n-iarrachtaí dul i ngleic le hiascaireacht NNN agus a áirithiú nach gcuirfidh tomhaltas bia mara san Aontas leis;

128.á iarraidh go ndéanfadh an Coimisiún ról EFCA maidir le hiascaireacht NNN a chomhrac a neartú;

129.á iarraidh go n-áireofaí roinn maidir le dul i ngleic le hiascaireacht NNN i ngach comhaontú saorthrádála le tríú tíortha;

130.á mheas nach dtugtar aghaidh go leordhóthanach, le gnéithe áirithe de CBI, ar riachtanais shonracha na réigiún is forimeallaí; á iarraidh go ndéanfadh an Coimisiún agus na Ballstáit lena mbaineann aghaidh a thabhairt ar an staid sin ar bhonn Airteagal 349 CFAE agus trí chur chuige réigiúnaithe, mar a chumhdaítear in CBI, agus, i gcás inar gá, na coigeartuithe is gá a dhéanamh;

131.ag tarraingt aird ar ghnéithe sonracha na n-earnálacha iascaigh agus dobharshaothraithe sna réigiúin is forimeallaí; á iarraidh ar an gCoimisiún clár roghanna a mholadh a bhaineann go sonrach le hiargúltacht agus oileánachas (POSEI) d’iascach agus dobharshaothrú, cosúil leo sin na talmhaíochta;

132.á chur i bhfáth go bhfuil tacaíocht an Aontais agus náisiúnta chun cabhlaigh iascaireachta ar mionscála a athnuachan ríthábhachtach do na réigiúin sin; á iarraidh go ndéanfadh an Coimisiún, go háirithe, a threoirlínte maidir leis an anailís ar an gcothromaíocht idir acmhainneacht iascaireachta agus deiseanna iascaireachta (COM(2014)0545) a oiriúnú do shaintréithe na réigiún is forimeallaí;

133.á chur i bhfios go láidir a thábhachtaí atá sé staidéir láidre a dhéanamh chun measúnú a dhéanamh ar acmhainní bitheolaíocha na mara in uiscí uile an Aontais agus, go háirithe, sna réigiúin is forimeallaí;

134.á áitiú gur gá tacú le modhanna roghnaitheacha iascaireachta, amhail gléasanna comhthiomsaithe éisc ar ancaire a úsáideann cabhlaigh mhionscála sna ORanna, ar choinníoll go rannchuidíonn feistí den sórt sin le hiascaireacht inbhuanaithe agus roghnaíoch;

135.á chur i bhfáth gur gá na hacmhainní is gá a chur ar fáil chun feabhas a chur ar an eolas eolaíoch ar limistéir eacnamaíocha eisiacha na ORanna;

136.á chur i bhfáth gur príomhdhúshláin iad maolú agus oiriúnú don athrú aeráide nach dtéitear i ngleic leo go leordhóthanach leis an gComhbheartas Iascaigh atá ann faoi láthair;

137.á chur i bhfáth nach mbeidh brí leis na hiarrachtaí a dhéanann tionscal na hiascaireachta chun inbhuanaitheacht na stoc a fheabhsú agus chun gealltanas a thabhairt iad a choinneáil i ndea-bhail a luaithe a bhainfear dea-stádas amach mura dtugtar aghaidh ar an athrú aeráide;

138.ag cur béim láidir ar an ngá atá le taighde eolaíoch chun díriú níos mó ar na hidirghníomhaíochtaí idir athruithe comhshaoil mar gheall ar an athrú aeráide agus stoic éisc, ionas nach gcuirfear an milleán ar ídiú stoc ar thionscal na hiascaireachta amháin;

139.á chur i bhfáth nach cúis leis an athrú aeráide iad iascairí agus an chuid eile den slabhra bia mara ach gur íospartaigh iad dá bharr;

140.á mheas go bhfuil earnáil an dobharshaothraithe in ann rannchuidiú go comhsheasmhach le seirbhísí éiceachórais don tsochaí, agus gur féidir le dobharshaothrú locháin, algaí agus sliogéisc rannchuidiú le dícharbónú gheilleagar an Aontais agus leis an athrú aeráide a mhaolú; á chur i bhfáth, áfach, go bhfuil ceapadh carbóin ag feirmeoireacht algaí agus sliogéisc teoranta ag brath ar an modh táirgthe agus ar an úsáid nuair a shaothraítear an táirge; á iarraidh go ndéanfadh na Ballstáit slabhraí soláthair gairide éifeachtúla a chur chun cinn, i gcás inarb iomchuí, d’fhonn rannchuidiú leis an athrú aeráide a chomhrac;

141.á chur i bhfios gur féidir le cleachtais áirithe dobharshaothraithe, amhail diúilicíní nó feirmeoireacht oisrí agus ilsaothrú críche locháin, a bheith ina samhlacha rathúla do chórais chreidmheasa astaíochtaí amach anseo, i gcomhthéacs reachtaíocht aeráide an Aontais; á iarraidh go dtacódh an Coimisiún agus na Ballstáit leis an gcineál sin gnó ghlais;

142.á iarraidh go leanfadh na Ballstáit de spreagadh a thabhairt d’fheirmeoireacht algaí a chur chun cinn agus úsáid agus forbairt algaí mar bhia agus mar bheatha a éascú; á thabhairt chun suntais go bhfuil acmhainneacht neamhshaothraithe i bhfeirmeoireacht algaí chun poist nua a chruthú agus seirbhísí éiceachórais a sholáthar agus bia agus beatha atá níos neamhdhíobhálaí don chomhshaol;

143.á iarraidh go ndéanfadh an Coimisiún Eorpach a chur san áireamh, agus athbhreithniú á dhéanamh ar an gComhbheartas Iascaigh, go bhfuil athrú tagtha ar shaintréithe an aigéin (teocht, dlús, salandacht, sáithiú ocsaigine, etc.) le 10 mbliana anuas;

144.á thabhairt chun suntais go bhfuil gá le héiceachórais níos athléimní trí limistéir mhuirí faoi chosaint atá nasctha agus a bhainistítear go héifeachtach, mar bhonn d’earnálacha iascaireachta eacnamaíocha atá athléimneach agus brabúsach;

145.á chur i bhfáth, i gcás iascaigh, go mbaintear amach athléimneacht i gcoinne an athraithe aeráide trí limistéir iascaireachta éagsúlaithe agus trí speicis spriocdhírithe;

146.ag spreagadh an Choimisiúin agus na mBallstát acmhainní daonna agus airgeadais a mhéadú d’eolaíocht iascaigh a bhaineann leis an athrú aeráide agus leis an gcabhlach a dhícharbónú, agus anailís á déanamh ar thionchar an athraithe aeráide ar staid an iascaigh agus ar a chomhshaol;

147.á iarraidh go mbeadh nuálaíocht ann maidir le faireachán a dhéanamh ar thionchar an athraithe aeráide ar stoic faoi chuimsiú dlúthchomhar idir an pobal eolaíochta agus geallsealbhóirí, chun an imoibríocht a mhéadú agus chun uirlisí bainistithe oiriúnaithe a fhorbairt;

148.á iarraidh go ndéanfadh an Coimisiún uirlisí agus cistiú leordhóthanach a cheapadh do na hearnálacha a ndéanann an t-athrú aeráide difear dóibh;

149.á iarraidh go ndéanfadh an Coimisiún, chun an geilleagar ciorclach a chur chun cinn in earnáil an iascaigh, cláir Eorpacha a chur ar bun d’iascairí chun bruscar a bhailiú ar muir, más féidir leo déanamh amhlaidh, le linn tréimhsí nach bhfuil siad in ann dul i mbun iascaireachta, agus ar an gcaoi sin a n-ioncam a fhorlíonadh;

150.á iarraidh go ndéanfadh an Coimisiún agus na Ballstáit aghaidh a thabhairt ar fhorálacha uile CBI nár cuireadh chun feidhme agus obair leantach a dhéanamh ina leith;

151.á chur i bhfáth a phráinní agus a riachtanaí atá sé feabhas a chur ar bhailiú sonraí ó ghabhálacha iascaigh áineasa; ag tathant ar an gCoimisiún agus ar na Ballstáit Rialachán (AE) 2017/1004 a áireamh sa Chreat Eorpach maidir le Bailiú Sonraí Rialachán (AE) 2017/1004 an 17 Bealtaine 2017 maidir le creat Aontais a bhunú maidir le bailiú, bainistiú agus úsáid sonraí in earnáil an iascaigh agus maidir le tacaíocht a thabhairt do chomhairle eolaíochta a mhéid a bhaineann leis an gcomhbheartas iascaigh agus lena n-aisghairtear Rialachán (CE) Uimh. 199/2008 ón gComhairle (IO L 157, 20.6.2017, lch. 1)., gach speiceas atá faoi réir TACanna agus cuótaí, chomh maith leis na speicis sin a áirítear i bpleananna bainistíochta ilbhliantúla (MAPanna) agus faoin oibleagáid gabhálacha a thabhairt i dtír;

152.á chur i bhfáth go bhfuil gá le sonraí chun measúnú a dhéanamh ar thionchar iascaigh áineasa an Aontais ar éiceachóras na mara agus ar acmhainní bitheolaíocha na mara in uiscí an Aontais, lena n-áirítear sonraí maidir le foghabháil, go háirithe speicis atá cosanta faoi dhlí an Aontais nó faoin dlí idirnáisiúnta, sonraí maidir le tionchair iascaigh áineasa ar ghnáthóga muirí, lena n-áirítear limistéir mhuirí leochaileacha, agus sonraí maidir le tionchair iascaigh ar ghréasáin bhia;

153.á chur i bhfios go láidir go bhféadfadh tionchar suntasach a bheith ag an iascaireacht áineasa ar stoic éisc; á chur in iúl gur geal léi an dul chun cinn a rinneadh san athbhreithniú ar an Rialachán maidir le Rialú ar Iascach agus á iarraidh go ndéanfadh na Ballstáit a áirithiú go ndéanfar iascaigh áineasa ar bhealach atá comhoiriúnach le cuspóirí CBI;

154.á mheabhrú a thábhachtaí atá an dobharshaothrú chun slándáil fhadtéarmach an tsoláthair bia a ráthú agus chun rannchuidiú le freastal ar éileamh méadaitheach an domhain ar bhia uisceach, chomh maith lena rannchuidiú chun fás agus fostaíocht a chruthú do shaoránaigh an Aontais, chun éiceachórais agus bithéagsúlacht a chaomhnú ar bhealach níos fearr agus chun a bheith mar chuid de bhainistiú níos ciorclaí acmhainní;

155.á chur i bhfáth go bhfuil lorg carbóin níos ísle ag bia mara feirmshaothraithe, mar fhoinse próitéine le haghaidh bia, agus gur gá an úsáid is lú is féidir a bhaint as acmhainní nádúrtha a bhaineann le beostoc talún eile, agus go bhfuil ról tábhachtach aige chun cabhrú le córas bia inbhuanaithe a thógáil;

156.á aithint go bhfuil ról ag na treoirlínte straitéiseacha agus na pleananna straitéiseacha náisiúnta ilbhliantúla chun dobharshaothrú inbhuanaithe athléimneach a fhorbairt;

157.á chur in iúl gur oth léi go bhfuil dobharshaothrú na hEorpa marbhánta ó 2014 i leith agus nach bhfuil ach dul chun cinn teoranta déanta maidir leis an ualach riaracháin a laghdú agus maidir leis an dobharshaothrú a chomhtháthú sa phleanáil mhuirí, chósta agus spásúlachta intíre;

158.á chur i bhfios go láidir go bhfuil dobharshaothrú na hEorpa i bhfad óna acmhainneacht iomlán a bhaint amach agus go bhfuil ráta spleáchais allmhairiúcháin an Aontais an-ard ós rud é go ndéantar beagnach 75 % den bhia mara iomlán a ídítear san Aontas a allmhairiú ó thríú tíortha;

159.á iarraidh go ndéanfadh an Coimisiún agus na Ballstáit fás an dobharshaothraithe ísealtionchair ar an gcomhshaol a chur chun cinn, lena n-áirítear ní hamháin moilisc agus algaí ach feirmeoireacht fionnuisce agus éisc eite mhuirí freisin, seachas fás an dobharshaothraithe ísealtrófaigh a chur chun cinn; á chur i bhfáth go háirithe a thábhachtaí atá táirgeadh éisc eite i soláthar mhargadh an Aontais, mar gheall ar scála na dtonnáistí allmhairithe atá i gceist (94 % in 2021);

160.á mheabhrú go leanann tíortha móra táirgeoirí neamh-AE d’fhás a n-earnáil feirmeoireachta éisc eite a chur chun cinn go mór, agus gurb é an tAontas an príomhmhargadh onnmhairiúcháin atá acu;

161.á iarraidh go dtacódh an Coimisiún agus na Ballstáit go gníomhach le cur chun feidhme na dtreoirlínte straitéiseacha athbhreithnithe agus na bpleananna náisiúnta ilbhliantúla agus a inbhuanaitheacht fhadtéarmach a chur chun cinn agus béim á leagan ní hamháin ar inbhuanaitheacht chomhshaoil ach ar inbhuanaitheacht eacnamaíoch agus shóisialta dhobharshaothrú an Aontais freisin;

162.á chur in iúl gur oth léi nach ndéanann beartas trádála reatha an Aontais cothrom na Féinne a choimirciú idir táirgeoirí an Aontais agus táirgeoirí neamh-AE a chuirfidh ar chumas earnáil an dobharshaothraithe torthaí eacnamaíocha inbhuanaithe a bhaint amach agus mar chúiteamh air sin rannchuidiú le forbairt shóisialta agus eacnamaíoch réigiúin an Aontais;

163.á mheabhrú a thábhachtaí atá an dobharshaothrú chun slándáil fhadtéarmach an tsoláthair bia a ráthú agus chun rannchuidiú le freastal ar éileamh méadaitheach an domhain ar bhia uisceach, chomh maith leis an méid a chuireann sé le fás agus fostaíocht a chruthú do shaoránaigh an Aontais, le héiceachórais agus bithéagsúlacht a chaomhnú ar bhealach níos fearr agus le bheith mar chuid de bhainistiú níos ciorclaí acmhainní; á chur in iúl gur oth léi go bhfuil dobharshaothrú na hEorpa marbhánta ó 2014 agus go bhfuil dul chun cinn teoranta déanta maidir leis an ualach riaracháin a laghdú agus maidir leis an dobharshaothrú a chomhtháthú i bpleanáil mhuirí, chósta agus spásúlachta intíre; á chur i bhfáth go bhfuil dobharshaothrú na hEorpa i bhfad ó lánacmhainneacht agus go ndéantar 75 % den bhia mara a thomhlaítear san Aontas a shaothrú i saoráidí lasmuigh den Aontas; á iarraidh go dtacódh an Coimisiún go gníomhach le cur chun feidhme na dtreoirlínte straitéiseacha athbhreithnithe agus na bpleananna náisiúnta athbhreithnithe agus a n-inbhuanaitheacht fhadtéarmach chomhshaoil, eacnamaíoch agus shóisialta a chur chun cinn;

164.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún, agus chuig rialtais agus parlaimintí na mBallstát.