1.Ifakkar li l-PKS trid tiżgura li l-attivitajiet tas-sajd u tal-akkwakultura jkunu ambjentalment sostenibbli fit-tul u jkunu ġestiti b’mod konsistenti mal-objettivi biex jinkisbu vantaġġi ekonomiċi, soċjali u okkupazzjonali, u jingħata kontribut għad-disponibbiltà tal-provvisti tal-ikel; ifakkar barra minn hekk li l-Artikolu 39 tat-TFUE jistabbilixxi li l-PKS għandha tiggarantixxi d-disponibbiltà tal-provvisti, u tassigura livell ġust ta’ għajxien għall-komunitajiet tas-sajd u tal-akkwakultura;

2.Jiddispjaċih bil-fatt li, mill-2014, l-implimentazzjoni tal-PKS ma qisitx biżżejjed l-aspetti soċjoekonomiċi, id-disponibbiltà tal-provvista tal-ikel jew l-approċċ ekosistemiku, ilkoll kemm huma elementi neċessarji biex tiġi żgurata ġestjoni sostenibbli tal-istokkijiet;

3.Iqis li l-impatti negattivi konsegwenti fuq is-settur tas-sajd ġew iggravati mill-fatt li tfaċċaw sfidi ġodda mingħajr preċedent li ma setgħux jitbassru fl-2012, meta l-PKS ġiet maħsuba, bħall-Brexit, il-pandemija tal-COVID-19 u l-kriżi enerġetika; jenfasizza l-impatt gravi tal-aggressjoni Russa kontra l-Ukrajna, li qed ikollha effetti negattivi f’setturi bħas-sigurtà marittima, b’interruzzjonijiet konsegwenti tal-attivitajiet tas-sajd, b’mod partikolari fil-Baħar l-Iswed, minħabba l-mini f’wiċċ il-baħar li jinġarru mill-kurrent, u li jwasslu għal telf ta’ bijodiversità, fatt rifless b’mod partikolari fiż-żieda allarmanti fil-mortalità taċ-ċetaċji tal-Baħar l-Iswed;

4.Jilqa’ l-adozzjoni rapida min-naħa tal-UE ta’ miżuri maħsuba li jsostnu u jtaffu s-settur fi żminijiet diffiċli; jenfasizza, madankollu, li l-effetti kumulattivi ta’ din is-sitwazzjoni wasslu għal bosta flotot fuq ix-xifer il-kollass u kkompromettew il-kapaċità ta’ eluf ta’ impriżi li jagħmlu qligħ sal-punt li s-sopravivenza tagħhom stess tinsab f’riskju, b’effetti potenzjalment devastanti fuq l-impjiegi u l-koeżjoni soċjali fiż-żoni kostali;

5.Jisħaq fuq il-fatt li l-implimentazzjoni tal-PKS se jkollha tadatta ruħha għall-isfida tal-ġlieda kontra t-tibdil fil-klima, li fir-rigward tagħha l-UE impenjat ruħha li tilħaq in-newtralità klimatika sal-2050;

6.Jemmen, għaldaqstant, li l-PKS trid tkompli tiġi implimentata u, meta neċessarju, riformata u adattata f’dan is-sens;

7.Jissottolinja li l-prodotti tal-baħar huma sors li fih ħafna proteini u huma parti essenzjali ta’ dieta għal saħħa tajba, li ġeneralment għandhom impronta karbonika aktar baxxa meta mqabbla mal-ikel li joriġina mill-art; jinnota għaldaqstant il-valur strateġiku tal-prodotti tal-baħar fil-kuntest tal-Patt Ekoloġiku Ewropew u biex jingħata kontribut lil diversi SDGs, bħall-SDG nru 2 “Eradikazzjoni tal-ġuħ”, l-SDG nru 3 “Saħħa tajba u benesseri”, l-SDG nru 12 “Konsum u produzzjoni responsabbli”, l-SDG nru 13 “Azzjoni dwar il-klima” u l-SDG nru 14 “Ħajja taħt l-ilma”;

8.Iqis li l-PKS trid tirrispetta bl-istess mod l-objettivi politiċi kollha; jisħaq fuq il-bżonn li jinżamm bilanċ bejn it-tliet pilastri tas-sostenibbiltà tal-PKS; isostni għaldaqstant it-tisħiħ, l-indirizzar tal-lakuni u l-intensifikazzjoni tal-ambizzjoni fid-dimensjoni soċjoekonomika u tas-sigurtà tal-ikel tal-PKS, kif ukoll l-applikazzjoni bis-sħiħ ta’ approċċ ekosistemiku u l-ksib ta’ kundizzjonijiet ekwi fid-dimensjoni internazzjonali tagħha;

9.Huwa tal-fehma li l-objettivi ta’ politika tas-sajd jenħtieġ li jinkludu l-garanzija tal-provvista tal-ħut lill-pubbliku, bħala parti mill-iżgurar tas-sigurtà u tas-sovranità tal-ikel, l-iżvilupp tal-komunitajiet kostali, u s-sostenn u l-inkoraġġiment tar-rikonoxximent tal-professjonijiet relatati mas-sajd, kif ukoll il-promozzjoni tal-impjiegi u t-titjib tal-kundizzjonijiet tal-ħajja tas-sajjieda;

10.Jistieden lill-Kummissjoni, għal dak l-għan, twettaq b’mod sistematiku valutazzjonijiet tal-impatt ex ante u ex post sħaħ, fosthom analiżijiet soċjoekonomiċi, qabel ma tiġi proposta kwalunkwe strateġija jew leġiżlazzjoni jew tittieħed kwalunkwe deċiżjoni politika bil-konsultazzjoni tal-partijiet ikkonċernati kollha involuti fis-settur tas-sajd;

11.Josserva li, filwaqt li r-Regolament Bażiku tal-PKS jenfasizza l-objettivi ambjentali, soċjoekonomiċi u ta’ sigurtà tal-ikel tal-istrateġija, ir-Regolament (UE) 2016/2336 relatat mal-istokkijiet tal-baħar fond jirrigwarda esklużivament l-aspetti ambjentali; iqis li fil-futur ir-regolamenti kollha subordinati għar-Regolament Bażiku jenħtieġ li jintegraw bis-sħiħ l-aspetti soċjoekonomiċi u tas-sigurtà tal-ikel;

12.Jistieden lill-Kummissjoni u lill-Kunsill jagħtu aktar valur, fit-tfassil tal-politiki, lill-importanza tas-sajd biex jikkontribwixxi għas-sigurtà tal-ikel billi jforni prodotti tal-baħar ta’ kwalità għolja, speċjalment f’sitwazzjonijiet ta’ kriżi bħall-pandemija tal-COVID-19, kif ukoll biex jikkontribwixxi għall-istruttura ekonomika u soċjali u għall-patrimonju kulturali, turistiku u gastronomiku tal-komunitajiet tal-kosti u tal-gżejjer tal-Ewropa;

13.Jisħaq ir-rwol strateġiku tas-sajjieda u tal-produtturi tal-akkwakultura fil-katina tal-valur tal-ikel u fis-sigurtà tal-ikel, kif ukoll ir-rwol tan-nisa bħala sajjieda, kaptani, sewwejja tax-xbieki, assistenti fuq l-art, dawk responsabbli mill-ippakkjar, eċċ. u l-bżonn li tali rwol jiġi rikonoxxut;

14.Ifakkar li l-ibħra u l-oċeani kollha huma beni komuni globali u li r-riżorsi tal-baħar huma riżorsa pubblika naturali, li l-attivitajiet u l-ġestjoni tas-sajd huma riżorsa bbażata fuq dawn ir-riżorsi u jagħmlu parti mill-patrimonju komuni tagħna, u li dawn ir-riżorsi jenħtieġ li jkunu ġestiti abbażi ta’ pariri xjentifiċi affidabbli b’mod li jiggarantixxi l-akbar benefiċċji fit-tul għas-soċjetà kollha;

15.Jemmen li l-limitu massimu tal-għajnuna de minimis applikabbli għall-kumpaniji li joperaw fis-settur tal-ipproċessar tal-ħut u tal-akkwakultura jenħtieġ li jkun allinjat mal-istess skema applikabbli għall-kumpaniji tal-ipproċessar tal-prodotti agrikoli, bil-għan li tiġi żgurata l-koerenza u tiġi garantita s-sigurtà tal-ikel; jilqa’ għalhekk l-emendi adottati mill-Kummissjoni għall-iskema de minimis f’dan ir-rigward;

16.Ifakkar li l-PKS għandha, fost affarijiet oħra “tfittex li tiżgura li l-isfruttament ta’ riżorsi bijoloġiċi ħajjin tal-baħar jirripristina l-popolazzjonijiet tal-ispeċijiet mistada u jżommhom ’il fuq minn livelli li jistgħu jipproduċu r-rendiment massimu sostenibbli” u li r-“rata ta’ sfruttament tar-rendiment massimu sostenibbli għandha (...) tintlaħaq (...) sa mhux aktar tard mill-2020 għall-istokkijiet kollha” u sal-2025 għall-istokkijiet koperti mill-pjan ta’ ġestjoni għall-istokkijiet tal-ħut tal-qiegħ fil-Mediterran tal-Punent; jenfasizza, madankollu, li għas-sajd multispeċifiku, huwa impossibbli li tiġi applikata l-ġestjoni tal-ispeċijiet ibbażata fuq il-mudell MSY, anke f’sajd xjentifikament magħruf u dokumentat sew;

17.Iqis li l-introduzzjoni tar-rendiment massimu sostenibbli bħala punt ta’ referenza għall-ġestjoni tas-sajd kienet fattur determinanti għat-titjib tal-istat ġenerali tal-istokkijiet tal-ħut; ifakkar li, fis-snin tal-applikazzjoni tal-PKS, is-settur tas-sajd għamel sforzi konsiderevoli biex inaqqas il-pressjoni tas-sajd sal-punt li fl-2020, fl-Atlantiku tal-Grigal, ir-rata kumplessiva ta’ mortalità mis-sajd (F/FMSY) kienet anqas minn wieħed;

18.Jenfasizza li huwa kruċjali li jitkompla u jitħaffef ix-xogħol tal-irkupru u taż-żamma tal-istokkijiet tal-ħut u ’l fuq mil-livelli tar-rendiment massimu sostenibbli, speċjalment fil-Mediterran fejn l-F/FMSY għadu ogħla minn 1, filwaqt li jiġi żgurat li jintlaħqu l-livelli massimi sostenibbli ta’ produzzjoni tal-prodotti tal-baħar, bil-għan li jiġu żgurati s-sigurtà tal-ikel u redditu soċjali u ekonomiku pożittiv għas-sajjieda u għall-komunitajiet kostali;

19.Iqis, f’dan ir-rigward, li l-objettiv tar-rendiment massimu sostenibbli jenħtieġ li jiġi implimentat fid-dawl tar-realtà prattika u b’kunsiderazzjoni tad-dimensjonijiet soċjoekonomiċi, tal-proporzjonalità u tas-sigurtà tal-ikel minquxa fit-Trattat u fil-kodiċi ta’ kondotta tal-Organizzazzjoni tal-Ikel u l-Agrikoltura (FAO);

20.Iqis ukoll li r-rendiment massimu sostenibbli jenħtieġ li jkun żviluppat bħala parti minn mudell ekosistemiku li jħaddan l-fatturi kollha li jinfluwenzaw l-istat tal-istokkjiet, bħall-interazzjonijiet bejn l-iipeċijiet, it-tisħin globali jew it-tniġġis, bil-għan li jiġi evitat li r-responsabbiltà għat-tnaqqis tal-istokk ma tingħatax biss lis-settur tas-sajd;

21.Jistieden lill-Kummissjoni, wara konsultazzjoni wiesgħa tal-partijiet ikkonċernati, teżamina l-possibbiltà li ddaħħal objettivi ta’ ġestjoni tas-sajd li jiżguraw l-ottimizzazzjoni tal-livelli tal-istokkijiet tal-ħut u tal-prestazzjonijiet soċjoekonomiċi tal-flotot;

22.Jistieden, f’dan ir-rigward, lill-Istati Membri li jixtiequ jagħtu bidu għal proġetti, inklużi tipi oħra ta’ miżuri ta’ ġestjoni bħar-rendiment ekonomiku massimu, ivaraw, meta jkun il-każ, konsultazzjonijiet biex jaraw fejn ikun l-aħjar li dawn il-proġetti bi prova jsiru;

23.Itenni l-fehmiet espressi fir-riżoluzzjoni tiegħu tat-18 ta’ Mejju 2021 dwar l-obbligu ta’ ħatt l-art; ifakkar li xi qabdiet mhux mixtieqa jew aċċessorji huma inevitabbli, speċjalment fis-sajd imħallat, billi l-ħut jista’ jkun danneġġjat, ma jkunx tajjeb għall-bejgħ, ikun taħt id-daqs jew adatt għall-konsum mill-bniedem iżda l-bejgħ tiegħu jkun ipprojbit, eċċ.; ifakkar ukoll li, minkejja l-isforzi u l-kollaborazzjoni li għaddejja min-naħa tal-partijiet ikkonċernati kollha, l-obbligu ta’ ħatt l-art ma jistax jiġi implimentat b’mod korrett jekk ma jissewwewx ċerti nuqqasijiet, bħan-nuqqas ta’ kapaċità ta’ ħżin abbord jew fil-faċilitajiet ta’ ġbir fil-portijiet kif ukoll użu adegwat tal-eżenzjonijiet; jindika li dawn in-nuqqasijiet ixekklu l-implimentazzjoni korretta, u dan jirriżulta fi ġbir ta’ data insuffiċjenti f’dawk li huma stokkijiet u jagħmilha diffiċli li jsiru stimi eżatti tal-qabdiet, b’hekk dan jostakola l-istimi xjentifiċi affidabbli tal-istokkijiet tal-ħut;

24.Jenfasizza li l-obbligu ta’ ħatt l-art mhuwiex għan fih innifsu iżda strument biex jonqsu sal-minimu l-qabdiet mhux mixtieqa; jisħaq, f’dan ir-rigward, li bis-saħħa tas-selettività akbar li nkisbet f’dawn l-aħħar snin, ġie rreġistrat tnaqqis konsiderevoli fil-qabdiet aċċessorji mhux mixtieqa; jenfasizza li dan huwa frott l-isforzi min-naħa tas-sajjieda f’kollaborazzjoni mal-komunità xjentifika, b’għarfien applikat li jsostni l-iżvilupp ta’ aktar tekniki u rkaptu tas-sajd selettiv; jisħaq, għaldaqstant, li aktar sforzi għandhom jiġu kkonċentrati fuq il-finanzjament tal-iżvilupp kif ukoll tal-użu ta’ rkaptu tas-sajd li jikkontribwixxi għas-selettività u għat-titjib fil-ġbir tad-data;

25.Ifakkar li l-Parlament talab lill-Kummissjoni tivvaluta l-implimentazzjoni tal-obbligu ta’ ħatt l-art, inkluża valutazzjoni tal-impatt soċjoekonomiku tal-obbligu ta’ ħatt l-art li għandu jsir għall-attivitajiet kollha tas-sajd, anki dak fuq skala żgħira;

26.Iqis ukoll li:–l-obbligu attwali ta’ ħatt l-art għandu jiġi applikat b’mod pragmatiku, filwaqt li jqis il-karatteristiċi speċifiċi ta’ kull attività tas-sajd; jisħaq fuq l-importanza tal-esperjenza tas-sajjieda relatata mal-mument meta u mal-post fejn tistad filwaqt li jiġu evitati l-qabdiet mhux mixtieqa, jiġu valorizzati l-isforzi tagħhom biex titjieb is-selettività,–l-iskambji ta’ kwoti bejn l-Istati Membri u l-organizzazzjonijiet tal-produtturi, permezz ta’ riżorsi tal-kwoti, kif ukoll is-selettività teknika u spazjotemporali, jenħtieġ li jiġu inkoraġġiti,–l-importanza li jinżammu l-eżenzjonijiet eżistenti għall-obbligu ta’ ħatt l-art, abbażi tal-aqwa pariri xjentifiċi disponibbli, jenħtieġ li tiġi rikonoxxuta, kif ukoll it-tnaqqis tal-piż amministrattiv fl-implimentazzjoni tal-obbligu ta’ ħatt l-art; hija u tirrevedihom, jenħtieġ li l-Kummissjoni tqis dawn l-aspetti,–l-applikazzjoni tal-obbligu ta’ ħatt l-art, inkluż il-kamp ta’ applikazzjoni tiegħu, jenħtieġ li tiġi rieżaminata sabiex jiġu limitati l-problemi tal-ispeċijiet bi kwota limitanti u d-derogi kumplessi,–l-obbligu ta’ ħatt l-art jenħtieġ li jiġi kkontrollat u infurzat b’mod effikaċi u, fl-istess ħin, isir aktar attraenti biex titjieb is-sjieda min-naħa tal-operaturi u b’hekk il-konformità, speċjalment permezz ta’ inċentivi, pereżempju biex jitħeġġeġ l-użu ta’ strumenti tal-intelliġenza artifiċjali biex jitjiebu s-selettività u l-identifikazzjoni tal-ispeċijiet, kif ukoll isiru titjib u adattamenti adegwati fil-portijiet Ewropej; jistieden lill-Istati Membri jisfruttaw bis-sħiħ il-possibbiltajiet u l-appoġġ tal-FEMSA għal dan l-iskop;

27.Jinsisti li l-objettiv li jiġu minimizzati l-qabdiet mhux mixtieqa ma jistax jintlaħaq biżżejjed permezz tal-obbligu ta’ ħatt l-art u jenħtieġ li jintlaħaq primarjament billi jintużaw miżuri tekniċi u jiġi appoġġat permezz ta’ dokumentazzjoni aħjar tal-qabdiet, abbażi tal-aqwa parir xjentifiku disponibbli; jistieden lill-Kummissjoni tivvaluta alternattivi oħra għall-minimizzazzjoni tal-qabdiet mhux mixtieqa, kif ukoll tipproponi azzjonijiet biex l-obbligu ta’ ħatt l-art jaħdem aħjar, parallelament mat-tfittxija kontinwa ta’ modi differenti biex jiġi implimentat l-obbligu ta’ ħatt l-art u jiġi żviluppat aktar l-irkaptu tas-sajd selettiv;

28.Ifakkar li t-TACs u l-kwoti huma l-aktar mod dirett għall-ġestjoni tal-mortalità mis-sajd, iżda t-TACs ta’ stokk wieħed jistgħu jkunu problematiċi fis-sajd imħallat (minħabba l-effett ta’ kwoti limitanti);

29.Jenfasizza l-bżonn li jitjiebu l-pariri xjentifiċi relatati mas-sajd imħallat, anki fid-dawl tar-riperkussjonijiet tat-tibdil fil-klima fuq l-oċeani, kif ukoll meta dak li jkun iqis l-kompożizzjoni tal-qabdiet u l-ispostament tal-ispeċijiet, minħabba t-tibdil fil-klima, meta jiġu ffissati t-TACs;

30.Jenfasizza li fis-sajd fir-reġim ta’ ġestjoni tal-kwoti, il-problema tal-ispeċijiet bi kwota limitanti għandha l-potenzjal li tagħlaq l-operazzjonijiet tas-sajd qabel tmiem l-istaġun b’implikazzjonijiet ekonomiċi potenzjalment sinifikanti għas-sajjieda; jistieden lill-Kummissjoni u lill-Istati Membri jużaw l-possibbiltajiet attwali fl-ambitu tal-PKS, bħall-iskambji ta’ kwoti jew il-flessibbiltajiet interannwali u interspeċi, filwaqt li f’dan ir-rigward jissottolinja li sistema tal-kwoti tajba jenħtieġ li tinkludi grad ta’ flessibbiltà ġust, inkwantu jkun jippermetti lis-sajjieda li jkollhom bżonn kwoti addizzjonali għal speċi bi kwota limitanti u lis-sajjieda bi kwoti disponibbli jaslu għal riżultat reċiprokament vantaġġuż;

31.Jistieden lill-Kummissjoni u lill-Kunsill jikkunsidraw jiffissaw TACs għal perjodu itwal minn sena jew semestru, b’mod partikolari għall-istokkijiet ewlenin fil-mira, dejjem abbażi tal-aqwa pariri xjentifiċi disponibbli, bil-għan li jipprevedu aktar prevedibbiltà u ċertezza fit-tul għas-sajjieda u bi qbil mal-prinċipju MSY; jistieden lill-Kummissjoni u lill-Kunsill ifittxu l-aqwa pariri xjentifiċi disponibbli rigward il-possibbiltà li jitneħħew it-TACs għal ċerti stokkijiet, filwaqt li jiżguraw li l-istokk ikkonċernat jibqa’, fit-terminu qasir u medju, fil-limiti bijoloġiċi sikuri;

32.Jissottolinja li l-istabbiltà relattiva, stabbilita erbgħin sena ilu, hija aċċettata b’mod wiesa’ bħala strument essenzjali biex jipprovdi prevedibbiltà u kontinwità fit-tul fil-kondiviżjoni tal-istokkijiet tal-ħut bejn il-pajjiżi;

33.Jisħaq li, minkejja l-isforzi internazzjonali u tal-UE biex jitjiebu l-kundizzjonijiet tas-sikurezza abbord il-laneċ tas-sajd, għad hemm nuqqasijiet, jiġifieri l-konvenzjonijiet internazzjonali li jistabbilixxu r-regoli u s-sistemi għall-protezzjoni tal-opri tal-baħar u l-persuni abbord japplikaw l-ewwel u qabel kollox għal opri tal-baħar akbar;

34.Itenni li l-kundizzjonijiet tax-xogħol u tal-ħajja abbord ma jistgħux jitqiesu separati mill-kundizzjonijiet tas-sikurezza; huwa tal-fehma li l-kundizzjonijiet tajba tax-xogħol u tal-ħajja abbord, kif ukoll modernizzazzjoni adegwata tagħhom, għandhom effetti pożittiv fuq is-sikurezza u fuq il-ħin għall-mistrieħ tas-sajjieda; itenni li dawn l-aspetti għandhom riperkussjonijiet diretti fuq is-sikurezza abbord, peress li perċentwal imdaqqas ta’ korrimenti u inċidenti fuq il-laneċ tas-sajd għadu marbut ma’ żbalji tal-bniedem, ikkaġunati minħabba nuqqas ta’ għarfien u taħriġ jew minħabba għeja;

35.Iħeġġeġ lill-Kummissjoni u lill-Istati Membri jiżguraw l-ogħla standards ta’ sikurezza abbord l-opri tal-baħar, ikun xi jkun id-daqs tagħhom; jinkoraġġixxi s-settur jimplimenta l-aħjar kundizzjonijiet possibbli f’termini ta’ sikurezza abbord;

36.Jinsisti fuq il-fatt li, fid-dawl tal-possibbiltajiet offruti bħalissa mill-FEMSA bħala sostenn għas-saħħa, għas-sikurezza, għall-kundizzjonijiet tax-xogħol u għall-effiċjenza enerġetika abbord il-laneċ tas-sajd, l-użu attwali tat-tunnellaġġ gross bħala kriterju għall-kejl tal-kapaċità ta’ sajd fl-UE jaf jostakola t-titjib tal-effiċjenza enerġetika, tas-sikurezza u tal-kumdità tal-opri tal-baħar, inkwantu jillimita l-possibbiltajiet li jiġu sostitwiti u modernizzati jew li jiżdied l-ispazju, anki jekk ma tiżdiedx il-kapaċità ta’ sajd tal-opri tal-baħar; jisħaq fuq il-fatt li dan, min-naħa tiegħu, ixekkel it-titjib tal-karatteristiċi msemmijin qabel, li fl-aħħar mill-aħħar jafu jippromwovu l-impjiegi, l-iżvilupp tal-komunitajiet kostali u l-attraenza tas-settur, b’mod partikolari għaż-żgħażagħ u għan-nisa;

37.Jieħu nota tal-komunikazzjoni tal-Kummissjoni dwar it-Tranżizzjoni tal-Enerġija tas-settur tas-Sajd u tal-Akkwakultura tal-UE COM(2023)0100., li timmira li tiżgura li s-settur tas-sajd jikkontribwixxi għall-objettiv li l-UE tilħaq in-newtralità klimatika fl-2050 u, fl-istess ħin, tiżgura li s-sajd fl-UE jkun sostenibbli fuq livell soċjali, ekonomiku u ambjentali; jiġbed l-attenzjoni għall-fatt li din it-tranżizzjoni jkollha tħabbat wiċċha ma’ għadd ta’ ostakli, bħad-definizzjoni u l-limiti attwali tal-kapaċità ta’ sajd; ifakkar li, b’mod ġenerali, il-magni li jaħdmu bl-idroġenu jew bl-ammonijaka jew il-magni elettriċi huma itqal u ikbar meta mqabbla mal-magni diżil ekwivalenti u li, għaldaqstant, l-installazzjoni abbord tagħhom tirrikjedi tunnellaġġ gross ikbar, u barra minn hekk hemm nuqqas ta’ teknoloġiji adegwati, il-kostijiet għoljin tagħhom u l-assenza ta’ attivitajiet ta’ riċerka u żvilupp speċifikament iċċentrati fuq is-setturi tas-sajd u tal-akkwakultura; jiddispjaċih li dawn l-ostakli mhumiex indirizzati fil-komunikazzjoni tal-Kummissjoni;

38.Jistieden lill-Kummissjoni tipproponi miżuri biex twieġeb għall-ħtieġa li tiġi ffaċilitata d-dekarbonizzazzjoni tal-industrija tas-sajd, tissolva l-kwistjoni tat-tixjiħ tal-laneċ tas-sajd u jittejbu s-sikurezza u l-kundizzjonijiet tax-xogħol; iqis li tali miżuri jistgħu, fejn xieraq, jinkludu:–użu sħiħ tat-tunnellaġġ gross disponibbli fi ħdan il-limiti massimi tal-kapaċità nazzjonali,–definizzjoni mill-ġdid tal-kapaċità tas-sajd, pereżempju, billi jiġi eskluż it-tunnellaġġ relatat ma’ “soċjali u ta’ sikurezza” mill-kalkolu tal-kapaċità tas-sajd,–żieda fil-limiti tal-kapaċità tas-sajd mil-lat ta’ tunnellaġġ gross u ta’ saħħa tal-magni, mingħajr ma tiżdied il-kapaċità tal-bastimenti li jaqbdu aktar ħut;

39.Jistieden lill-Kummissjoni u lill-Istati Membri jagħmluha aktar faċli għall-professjonisti tal-industrija biex jaċċessaw il-fondi tal-FEMSA;

40.Jistieden ukoll lill-Kummissjoni u lill-Istati Membri jaċċelleraw ir-riċerka u l-iżvilupp, jadattaw il-politika dwar l-Għajnuna mill-Istat u f’sinerġija mal-FEMSA jipprovdu finanzjament adegwat u suffiċjenti, sabiex is-settur ikun jista’ jikseb id-dekarbonizzazzjoni tal-flotta tal-UE fil-perjodu ta’ żmien strett meħtieġ mill-Patt Ekoloġiku Ewropew u obbligi relatati oħra;

41.Jistieden ukoll lill-Kummissjoni tirrieżamina l-FEMSA, f’konformità mal-Ftehim tad-WTO dwar is-Sussidji tas-Sajd, adottat fit-12-il Konferenza Ministerjali tiegħu (MC12) fis-17 ta’ Ġunju 2022, bil-ħsieb li tintlaħaq in-newtralità karbonika; jitlob li jiġi approvat finanzjament għal opri tal-baħar ġodda, fil-parametri stabbiliti fil-ftehimiet internazzjonali tas-sajd;

42.Jitlob ukoll li tiġi żviluppata assistenza għat-tranżizzjoni ekonomika biex tiġi avvanzata d-dekarbonizzazzjoni, li tkopri s-segmenti kollha tal-flotta; jinsisti, peress li l-flotta hija antika ħafna, li tali assistenza għandha tintuża wkoll biex tissostitwixxi l-opri tal-baħar eżistenti b’opri tal-baħar aktar effiċjenti, sikuri, teknoloġikament innovattivi u spazjużi li jikkontribwixxu biex is-settur isir aktar attraenti u biex jiġi promoss it-tiġdid ġenerazzjonali;

43.Jistieden lill-Kummissjoni u lill-Istati Membri jikkomplementaw il-finanzjament tal-FEMSA, pereżempju permezz tal-Fond għal Tranżizzjoni Ġusta, RePower EU u Orizzont Ewropa biex jiffaċilitaw id-dekarbonizzazzjoni u jiffinanzjaw ir-riċerka, sabiex tiġi ffaċilitata tranżizzjoni ekoloġika ġusta li ma tħalli lil ħadd jibqa’ lura;

44.Iħeġġeġ lill-Kummissjoni u lill-Istati Membri jaħdmu flimkien biex jappoġġjaw ir-riċerka u jippermettu rkaptu u tekniki innovattivi għal sajd selettiv li jikkontribwixxu għal tnaqqis sostanzjali fl-emissjonijiet tas-CO2 u fl-użu tal-fjuwil;

45.Jirrikonoxxi r-rwol essenzjali tal-pjanijiet pluriennali (MAPs) bħala oqfsa ewlenin għall-ġestjoni fit-tul tas-sajd reġjonali, abbażi tal-aħjar pariri xjentifiċi, tekniċi u ekonomiċi disponibbli, iżda jiddispjaċih li dawn ma laħqux il-potenzjal sħiħ tagħhom;

46.Jistieden lill-Kummissjoni tivvaluta kemm il-pjanijiet pluriennali eżistenti qed jiġu implimentati b’mod effettiv, sabiex jiġi żgurat li jikkontribwixxu għall-objettivi tal-PKS; fejn meħtieġ, dawn il-pjanijiet għandhom jiġu aġġornati u mtejba, sabiex iqisu kunsiderazzjonijiet soċjoekonomiċi u kundizzjonijiet li qed jinbidlu;

47.Jistieden lill-Kummissjoni tesplora, f’koordinazzjoni ma’ sħab oħra fil-qasam, jiġifieri pajjiżi mhux tal-UE u l-Organizzazzjonijiet Reġjonali tal-Ġestjoni tas-Sajd (RFMOs) rilevanti, jekk pjanijiet pluriennali simili għal dawk fis-seħħ f’baċiri oħra tal-baħar jistgħux jiġu proposti għall-bqija tal-ilmijiet tal-UE, b’mod partikolari fil-Lvant tal-Mediterran u fil-Baħar l-Iswed, u kif dawn jistgħu jikkomplementaw u jaħdmu flimkien mal-għodod ta’ ġestjoni li jeżistu diġà f’dawn il-baċiri tal-baħar;

48.Jissottolinja l-ħtieġa li jiġu żgurati sinerġiji bejn il-pjanijiet pluriennali reġjonali u l-politiki marittimi speċifiċi għal kull baċir;

49.Jemmen li huwa imperattiv li l-awtoritajiet lokali u reġjonali kollha kompetenti għall-ġestjoni tas-sajd, kif ukoll il-Kunsilli Konsultattivi (ACs), li għandhom rwol fundamentali f’dan ir-rigward, ikunu involuti bis-sħiħ fid-definizzjoni, l-iżvilupp u l-implimentazzjoni tal-pjanijiet pluriennali f’konformità mal-PKS;

50.Jenfasizza li s-sajd huwa s-settur l-aktar dipendenti fuq stokkijiet b’saħħithom, produttivi u reżiljenti u ekosistemi tal-baħar u li dawn l-ekosistemi huma milquta wkoll mill-ħafna użi oħra tal-ambjent tal-baħar, u mill-attivitajiet li jseħħu fih, bħat-trasport marittimu u t-turiżmu, l-iżvilupp urban u tal-kosta, l-isfruttament tal-materja prima u s-sorsi tal-enerġija, inkluża l-estrazzjoni minn qiegħ il-baħar, apparti li huma milquta mit-tniġġis tal-baħar u t-tibdil fil-klima; konsegwentement, jenfasizza l-ħtieġa li tittejjeb l-implimentazzjoni tal-approċċ ibbażat fuq l-ekosistema fil-livell reġjonali, nazzjonali u Ewropew, fejn il-pjanijiet pluriennali u għodod oħra ta’ ġestjoni għandhom rwol kruċjali x’jaqdu;

51.Jisħaq fuq il-ħtieġa ta’ miżuri konsistenti ta’ ġestjoni tas-sajd fir-rigward ta’ stokkijiet transżonali f’reġjuni koperti minn diversi pjanijiet pluriennali, kif ukoll għal reġjuni mhux koperti mill-pjanijiet pluriennali;

52.Jirrakkomanda b’qawwa, minħabba l-importanza strateġika tas-sajd u l-akkwakultura bħala sors ta’ ikel tajjeb għas-saħħa, b’ħafna proteini u b’livell għoli ta’ kwalità, li din il-politika tingħata r-rikonoxximent strateġiku addizzjonali li jistħoqqilha fi ħdan il-Kummissjoni u li s-servizzi responsabbli tal-Kummissjoni jkollhom għadd adegwat ta’ esperti fis-sajd u fl-akkwakultura;

53.Jitlob li, fil-kompożizzjonijiet futuri tal-Kulleġġ tal-Kummissarji, ikun hemm Kummissarju ddedikat esklussivament għas-sajd, l-akkwakultura u l-affarijiet marittimi;

54.Jenfasizza l-importanza li l-Kummissjoni tinkludi informazzjoni dettaljata biżżejjed fir-rapporti annwali tagħha kif imsemmi fl-Artikolu 50 tal-PKS, sabiex l-implimentazzjoni tal-PKS mill-Kummissjoni tkun tista’ tiġi mmonitorjata u vvalutata b’mod effettiv; jistieden ukoll lill-Kummissjoni, meta tirrevedi l-PKS, temenda l-Artikolu 49 sabiex tistabbilixxi skadenza għal rapport li għandu jiġi ppreżentat lill-Parlament Ewropew u lill-Kunsill għaxar snin wara r-rieżami u kull ħames snin minn dakinhar ’il quddiem;

55.Jistieden lill-Kummissjoni tappoġġja aħjar lill-Istati Membri fl-implimentazzjoni u fl-iżgurar tar-rispett tal-objettivi tal-PKS u tal-konformità magħhom; jissottolinja li huwa essenzjali li l-Kummissjoni u l-Istati Membri jkunu trasparenti fil-ġestjoni tagħhom tar-riżorsi tas-sajd; jenfasizza li ġestjoni trasparenti hija vitali biex jiġi żgurat livell għoli ta’ fiduċja fost iċ-ċittadini tal-UE u biex tinżamm ir-reputazzjoni tajba tas-settur tas-sajd tal-UE;

56.Jipproponi lill-Kummissjoni u lill-Kunsill li l-Parlament Ewropew jingħata status ta’ osservatur, filwaqt li tiġi żgurata rappreżentanza politika sħiħa, fin-negozjati annwali dwar l-opportunitajiet tas-sajd;

57.Jenfasizza l-importanza li tissaħħaħ ir-reġjonalizzazzjoni fil-PKS, b’mod li jippermetti lir-reġjuni u lill-awtoritajiet lokali jkunu aktar involuti fl-abbozzar, l-iżvilupp u l-evalwazzjoni tal-programmi operattivi nazzjonali għas-sajd u fil-ġestjoni tas-sajd b’mod aktar ġenerali, filwaqt li jsir użu sħiħ mill-possibilitajiet eżistenti fil-PKS;

58.Jenfasizza l-importanza li jitqiesu l-ispeċifiċitajiet reġjonali, filwaqt li jiġi applikat approċċ armonizzat għall-ġestjoni tas-sajd madwar l-UE; iħeġġeġ lill-Istati Membri jżidu l-kooperazzjoni tagħhom fi ħdan il-gruppi reġjonali, flimkien mal-partijiet ikkonċernati rilevanti, il-Kunsilli Konsultattivi u l-awtoritajiet lokali u reġjonali f’konformità mal-Artikolu 18 tar-Regolament Bażiku tal-PKS sabiex ifasslu miżuri ta’ konservazzjoni reġjonali permezz ta’ rakkomandazzjonijiet konġunti li jkunu mfassla aħjar għall-karatteristiċi speċifiċi ta’ kull baċir marittimu partikolari;

59.Jenfasizza r-rwol fundamentali tal-Kunsilli Konsultattivi fit-tisħiħ tal-kooperazzjoni tal-partijiet ikkonċernati u fl-iżgurar tal-parteċipazzjoni adegwata u ġusta tagħhom fil-proċess tat-teħid tad-deċiżjonijiet tal-UE;

60.Jenfasizza wkoll li l-Kunsilli Konsultattivi huma essenzjali biex jipprovdu esperjenza u għarfien lill-Kummissjoni Ewropea u lill-Istati Membri, kif ukoll biex jippreżentaw rakkomandazzjonijiet dwar kwistjonijiet relatati mal-ġestjoni tas-sajd u mal-aspetti soċjoekonomiċi u ta’ konservazzjoni tas-sajd u l-akkwakultura u jispjegaw il-problemi tas-settur u ta’ partijiet ikkonċernati oħra, u b’hekk jappoġġjaw u jtejbu l-leġiżlazzjoni;

61.Jissottolinja li l-Kunsilli Konsultattivi għandhom ukoll rwol ewlieni fil-kuntest tar-reġjonalizzazzjoni;

62.Jistieden lill-Kummissjoni tiżgura li l-partijiet ikkonċernati reġjonali u l-Kunsilli Konsultattivi jkollhom rwol akbar fin-negozjati u l-konsultazzjonijiet ma’ pajjiżi terzi, speċjalment ir-Renju Unit u n-Norveġja; jindika li l-Kummissjoni hija responsabbli għall-organizzazzjoni tan-negozjati ma’ pajjiżi terzi b’mod li jingħata lok għal interazzjonijiet u skambji diretti bejn il-partijiet ikkonċernati fuq iż-żewġ naħat;

63.Jappoġġja l-kompożizzjoni tal-Kunsilli Konsultattivi, b’maġġoranza fir-rappreżentanza ta’ operaturi soċjoekonomiċi meta mqabbla ma’ gruppi oħra ta’ interess;

64.Jenfasizza l-importanza tal-parteċipazzjoni attiva tal-partijiet ikkonċernati fil-Kunsilli Konsultattivi, f’atmosfera ta’ ħidma tajba bbażata fuq ir-rispett, l-inklużjoni tal-opinjonijiet kollha mill-gruppi differenti ta’ partijiet ikkonċernati, segretarjati imparzjali, presidenti b’rotazzjoni u rieżamijiet tal-prestazzjoni esterni, regolari u indipendenti;

65.Jenfasizza l-importanza li l-Kunsilli Konsultattivi jiġu involuti fil-ħidma tal-Parlament Ewropew, u għaldaqstant jirrakkomanda li jsiru skambji regolari bejn ir-rappreżentanti tal-Kunsilli Konsultattivi u l-Kumitati rilevanti tal-Parlament;

66.Jiddeplora l-fatt li m’hemmx biżżejjed monitoraġġ u trasparenza fir-rigward ta’ kif il-parir tal-Kunsilli Konsultattivi jitqies fit-teħid ta’ deċiżjonijiet; jistieden lill-Kummissjoni tfassal proċedura biex tagħti lill-Kunsilli Konsultattivi fehim aħjar tar-riżultati tar-rakkomandazzjonijiet tagħhom, bħall-kunsiderazzjoni ta’ rapport annwali, kif ukoll l-inklużjoni ta’ spjegazzjonijiet fi proposti speċifiċi mill-Kummissjoni, bħal fil-premessi tal-atti leġiżlattivi rilevanti, dwar kif tqiesu r-rakkomandazzjonijiet tal-Kunsilli Konsultattivi;

67.Jistieden lill-Kummissjoni tipparteċipa b’mod sistematiku u attiv fil-laqgħat tal-Kunsilli Konsultattivi u tikkomunika aħjar dwar il-valur tal-parir tagħhom, kif ukoll lill-Istati Membri biex jipprovdu appoġġ xieraq għall-funzjonament tal-Kumitati Konsultattivi;

68.Iqis li l-koġestjoni hija mudell parteċipattiv u b’responsabbiltà konġunta, ibbażat fuq approċċ minn isfel għal fuq, li huwa trasparenti, proattiv u demokratiku, u li jgħin biex tiġi ġġenerata aktar kondiviżjoni tal-għarfien għall-ġestjoni tas-sajd, fi ħdan kultura ta’ responsabbiltà, filwaqt li tistabbilixxi network ta’ fiduċja u tikkontribwixxi biex jonqsu l-kunflitti u biex jingħelbu l-ostakli għall-implimentazzjoni tal-innovazzjonijiet u l-miżuri meħtieġa fil-ġestjoni tas-sajd, kif ukoll fil-ħolqien, l-implimentazzjoni u l-ġestjoni ta’ Żoni tal-Baħar Protetti, fejn uriet li rnexxiet ħafna;

69.Jilqa’ l-proposta tal-Kummissjoni mħabbra fil-Komunikazzjoni tagħha dwar il-PKS illum u għada biex twettaq, bejn ir-rebbiegħa tal-2023 u s-sajf tal-2024, proġett ta’ prospettiva parteċipattiv madwar l-UE kollha dwar “Is-Sajd tal-Futur” ibbażat fuq intervisti fil-post;

70.Jistieden lill-Kummissjoni tibbaża l-inizjattivi politiċi u leġiżlattivi kollha tagħha (inkluż l-atti ta’ implimentazzjoni li jistabbilixxu restrizzjonijiet fuq is-sajd) fuq l-aħjar pariri xjentifiċi, tekniċi u ekonomiċi disponibbli (inkluż l-għarfien empiriku tas-sajjieda) u l-konsultazzjoni u l-parteċipazzjoni tas-settur tas-sajd u partijiet ikkonċernati rilevanti oħra u fuq valutazzjonijiet tal-impatt soċjoekonomiku preċedenti bl-użu ta’ għodod innovattivi bħal dawk żviluppati fil-proġett CABFishman, li janalizza l-impatti tas-sajd fuq iż-żoni tal-kosta;

71.Jistieden lill-Istati Membri jżidu r-riżorsi umani u materjali tagħhom u jgħammruhom għal kampanji u proġetti xjentifiċi adatti sabiex ikollhom biżżejjed għarfien tal-ispeċijiet li jkunu fil-mira tal-politiki ta’ konservazzjoni;

72.Jitlob li l-FEMSA jipprovdi appoġġ effettiv għal tekniki tas-sajd aktar selettivi u b’inqas impatt fuq il-flotot tas-sajd tal-UE, u b’mod partikolari biex jappoġġja lis-sajjieda milquta l-aktar mir-restrizzjonijiet, abbażi ta’ valutazzjonijiet tal-impatt xjentifiċi dwar l-użu ta’ tekniki tas-sajd speċifiċi; iħeġġeġ lill-Kummissjoni tippromwovi l-kunċett xjentifiku tal-“pixxekoloġija” li għandu l-għan li jirrikonċilja l-miżuri ta’ konservazzjoni u l-użu sostenibbli tar-riżorsi ħajjin tal-baħar;

73.Iqis li l-Kunsilli Konsultattivi għandhom jingħataw il-possibbiltà li jikkontribwixxu għall-pariri li l-Kummissjoni titlob mingħand il-Kunsill Internazzjonali għall-Esplorazzjoni tal-Baħar (ICES) u l-Kumitat Xjentifiku, Tekniku u Ekonomiku għas-Sajd (STECF) sabiex titrawwem kollaborazzjoni aktar mill-qrib bejn ix-xjentisti u l-partijiet ikkonċernati;

74.Jistieden lill-Kummissjoni tinforma b’mod sistematiku lill-Parlament Ewropew dwar dawn it-talbiet, b’mod partikolari l-mod li bih jikkontribwixxu għall-objettivi tal-PKS;

75.Jisħaq fuq il-ħtieġa li jiġi żgurat li s-sajd u l-akkwakultura jingħataw post ġust meta mqabbla ma’ setturi oħra fit-tfassil tal-politika u fl-ippjanar tal-ispazju; ifakkar fil-ħtieġa li jiġi stabbilit bilanċ aħjar bejn id-diversi attivitajiet ekonomiċi li jappartjenu għall-Ekonomija Blu sabiex jitnaqqsu u jiġu evitati l-kunflitti u jitrawmu sinerġiji, speċjalment mal-infrastrutturi tal-enerġija rinnovabbli marittimi Skont ir-rapport speċjali tal-Qorti tal-Awdituri tal-5 ta’ Lulju 2023 dwar “Enerġija rinnovabbli lil hinn mill-kosta fl-UE”: “Il-konsegwenzi negattivi potenzjali tal-iżvilupp tal-enerġija rinnovabbli lil hinn mill-kosta fuq is-settur tas-sajd jeħtieġ li jiġu identifikati u indirizzati aħjar” (https://www.eca.europa.eu/ECAPublications/SR-2023-22/SR-2023-22_MT.pdf, paġna 41)., permezz tad-Direttiva dwar l-ippjanar tal-ispazju marittimu Id-Direttiva 2014/89/UE tat-23 ta’ Lulju 2014 li tistabbilixxi qafas għal ippjanar tal-ispazju marittimu (ĠU L 257, 28.8.2014, p. 135).; jindika li dan jirrikjedi parteċipazzjoni wiesgħa u inklużiva tal-partijiet ikkonċernati;

76.Ifakkar li r-rekwiżiti tal-ħarsien tal-ambjent iridu jiġu integrati fil-PKS bl-għan li jiġi promoss l-iżvilupp sostenibbli, f’konformità mat-TFUE;

77.Jenfasizza li huwa impossibbli li s-sajd jiġi ġestit bħala politika awtonoma, u jistieden lill-Kummissjoni timplimenta l-PKS f’sinerġija mal-politiki pubbliċi kollha tal-UE li jolqtu l-idrosfera u filwaqt li tqis l-isfidi kollha assoċjati maż-żoni marittimi tal-Ewropa;

78.Jissottolinja li, b’mod partikolari, il-PKS trid tkun konsistenti mal-leġiżlazzjoni ambjentali tal-UE, b’mod partikolari mal-objettiv li jinkiseb status ambjentali tajjeb kif stabbilit fid-Direttiva Kwadru dwar l-Istrateġija Marina Id-Direttiva 2008/56/KE tas-17 ta’ Ġunju 2008 li tistabbilixxi qafas għal azzjoni komunitarja fil-qasam tal-politika tal-ambjent marin (Direttiva Kwadru dwar l-Istrateġija Marina) (ĠU L 164, 25.6.2008, p. 19)., u tiġi implimentata filwaqt li tirrispetta t-tliet pilastri tas-sostenibbiltà b’mod ugwali;

79.Jenfasizza l-ħtieġa li politiki u strateġiji oħra tal-UE jqisu biżżejjed il-PKS u jkunu koerenti magħha;

80.Jinnota l-ħtieġa ta’ approċċ olistiku, li jiżgura appoġġ xieraq għas-settur tas-sajd u tal-akkwakultura, meta jiġu implimentati miżuri mfassla biex itejbu l-kundizzjonijiet għall-ambjent tal-baħar;

81.Ifakkar li l-Artikolu 13 tat-TFUE jipprevedi li, fil-formulazzjoni u fl-implimentazzjoni tal-politika tas-sajd tal-UE, l-UE u l-Istati Membri tagħha għandhom iqisu bis-sħiħ ir-rekwiżiti tat-trattament xieraq tal-annimali, filwaqt li jirrispettaw id-dispożizzjonijiet leġiżlattivi jew amministrattivi u d-drawwiet tal-Istati Membri;

82.Jistieden lill-Kummissjoni żżid aktar l-għarfien ibbażat fuq ix-xjenza dwar it-trattament xieraq tal-annimali akkwatiċi u tqis din ir-riċerka fi żviluppi futuri tal-politika fis-sajd u fl-akkwakultura; jenfasizza li, kwalunkwe żvilupp tal-politika futur għandu jqis ukoll il-fattibbiltà prattika fil-ġestjoni tas-sajd u tal-akkwakultura u l-impatt ekonomiku u operattiv potenzjali fuq l-operaturi u l-attivitajiet, u għandu jqis ukoll il-ħtieġa li jiġu żgurati kundizzjonijiet ekwi internazzjonali;

83.Iqis li l-kummerċjalizzazzjoni ta’ prodotti purament ibbażati fuq il-pjanti bl-isem kummerċjali “ħut” jew speċijiet ta’ ħut tista’ twassal għal konfużjoni għall-konsumaturi meta jixtruhom; jafferma li l-isem kummerċjali “ħut” jew speċijiet ta’ ħut għandu jkun riżervat fis-suq intern għall-prodotti tas-sajd jew tal-akkwakultura li joriġinaw mill-annimali;

84.Jistieden lill-Kummissjoni tirrevedi, taġġorna u tagħti kontenut regolatorju lill-kunċett ta’ “żona li tiddependi ħafna mis-sajd”, sabiex dan ir-rikonoxximent jipprovdi trattament differenzjat immirat lejn il-preżervazzjoni tas-sajd f’dawn iż-żoni permezz ta’ distribuzzjoni preferenzjali tal-kwoti tas-sajd; jappoġġja l-fehma li l-elementi li jiddefinixxu kunċett aġġornat ta’ “żona li tiddependi ħafna mis-sajd” għandhom jinkludu l-produzzjoni ta’ proteini tal-annimali ta’ kwalità, il-kontribut għas-sigurtà tal-ikel jew l-iżgurar ta’ valur miżjud għoli għall-qabdiet u prodotti oħra tal-baħar, kif ukoll l-importanza soċjali tal-attività;

85.Jinnota li xi aspetti tal-PKS jaf ma jaħsbux b’mod adegwat għas-settur tas-sajd fuq skala żgħira u li jeħtieġ li jiġu żgurati r-rwol soċjoekonomiku vitali tiegħu f’ħafna komunitajiet tal-kosta u r-rwol strateġiku tiegħu fid-disponibbiltà tal-provvista tal-ikel;

86.Huwa tal-fehma li l-PKS għandha tqis biżżejjed in-natura varjata, il-karatteristiċi speċifiċi u l-problemi tas-setturi tas-sajd fuq skala żgħira u tal-frott tal-baħar bil-qoxra;

87.Jiġbed l-attenzjoni għall-ħtieġa ta’ involviment u parteċipazzjoni akbar tal-professjonisti tas-sajd fuq skala żgħira fil-ġestjoni, id-definizzjoni u l-implimentazzjoni tal-politiki tas-sajd, kif ukoll fl-Kunsilli Konsultattivi;

88.Huwa tal-fehma li rieżami tal-PKS għandu jinkludi definizzjoni komuni, wiesgħa u xierqa ta’ sajd fuq skala żgħira, artiġjanali u tal-kosta; jenfasizza li din id-definizzjoni għandha tkun prammatika, tista’ titkejjel u ċara; jenfasizza wkoll li din id-definizzjoni għandha tirriżulta minn valutazzjoni xierqa li tqis il-karatteristiċi u l-kriterji speċifiċi tat-taqsima tas-sajd fuq skala żgħira, aktar milli tiffoka biss fuq it-tul tal-opra tal-baħar, sabiex naslu għal definizzjoni ta’ sajd fuq skala żgħira li tirrifletti aħjar ir-realtà ta’ din it-taqsima;

89.Jistieden lill-Kummissjoni, flimkien mal-Kunsilli Konsultattivi, tipproponi definizzjoni armonizzata li għandha tiġi inkluża f’rieżami tar-Regolament Bażiku tal-PKS sabiex din tkopri l-leġiżlazzjoni kollha tal-UE dwar is-sajd, fejn xieraq; iqis li l-ebda waħda mill-bidliet deskritti hawn fuq m’għandu jkollha impatt fuq l-implimentazzjoni tal-FEMSA matul il-perjodu baġitarju attwali;

90.Jisħaq fuq il-bżonn ta’ emenda għar-Regolament tal-Kunsill (KE) Nru 1967/2006 dwar miżuri ta’ ġestjoni għall-isfruttament sostenibbli ta’ riżorsi tas-sajd fil-Baħar Mediterran, magħruf ukoll bl-isem “Regolament dwar il-Mediterran”, li jistabbilixxi r-regoli dwar il-karatteristiċi tekniċi tal-irkaptu tas-sajd u tal-użu tiegħu u li sfortunatament huwa obsolet u għaldaqstant jippreżenta ostaklu biex jintlaħqu l-għanijiet ewlenin tal-Politika Komuni tas-Sajd, b’mod partikolari dawk relatati mas-sajd fuq skala żgħira;

91.Jenfasizza li, skont l-Artikolu 17, meta jallokaw l-opportunitajiet tas-sajd disponibbli għall-flotta tagħhom, l-Istati Membri għandhom jużaw kriterji trasparenti u oġġettivi, inklużi dawk ta’ natura ambjentali, soċjali u ekonomika; jenfasizza li huwa f’idejn l-Istati Membri li jiddeterminaw il-kriterji li jużaw meta jallokaw l-opportunitajiet tas-sajd;

92.Jilqa’ l-fatt li l-metodi ta’ allokazzjoni attwali bbażati fil-parti l-kbira fuq drittijiet storiċi jippermettu ċertu livell ta’ stabbiltà ekonomika fis-settur tas-sajd, li tista’ tkun kundizzjoni li tippermetti lill-operaturi jinnovaw u jadottaw tekniki aktar sostenibbli;

93.Jisħaq li sistema faċilment aċċessibbli ta’ opportunitajiet tas-sajd flimkien ma’ kriterji trasparenti għall-allokazzjoni tagħha u trasparenza dwar l-applikazzjoni prattika tagħha tippermetti skrutinju aħjar, kundizzjonijiet ekwi, opportunitajiet indaqs għall-partijiet ikkonċernati kollha u aktar prevedibbiltà, stabbiltà u ċertezza tad-dritt għas-sajjieda;

94.Jiddeplora n-nuqqas ta’ trasparenza fir-rigward tad-distribuzzjoni tal-opportunitajiet tas-sajd f’ċerti Stati Membri u jitlob li l-kriterji jsiru pubbliċi, f’konformità mal-leġiżlazzjoni applikabbli dwar il-protezzjoni tad-data;

95.Iqis li l-metodi ta’ allokazzjoni għandhom jiġu żviluppati u applikati bl-involviment tal-komunitajiet tas-sajd, l-awtoritajiet reġjonali u partijiet ikkonċernati rilevanti oħra, filwaqt li jiġi żgurat li s-segmenti kollha tal-flotta, l-organizzazzjonijiet tal-produtturi u l-organizzazzjonijiet tal-ħaddiema jkunu rappreżentati b’mod ġust, abbażi tal-aħjar parir xjentifiku disponibbli, u li dawn għandhom jinkludu salvagwardji bħal perjodi ta’ avviż li jippermettu lis-sajjieda jadattaw f’każ li l-Istati Membri jiddeċiedu li jibdlu l-metodu ta’ allokazzjoni tagħhom;

96.Iħeġġeġ lill-Kunsill iqis l-ispeċifiċitajiet u l-ħtiġijiet ta’ kull taqsima tal-flotta, inkluż it-taqsima tas-sajd fuq skala żgħira, meta jalloka l-opportunitajiet tas-sajd;

97.Ifakkar fir-rwol tal-Artikolu 17 tal-PKS bħala għodda biex tipprovdi inċentivi għal sajd b’impatt baxx u fuq skala żgħira u li huwa f’idejn l-Istati Membri li jagħmlu użu mill-possibbiltajiet offruti minnha, bħal inċentivi biex jintuża rkaptu tas-sajd aktar selettiv jew biex jintużaw tekniki tas-sajd b’inqas konsum tal-enerġija jew b’inqas impatt fuq il-ħabitat;

98.Jinnota li l-Kummissjoni se tibda diskussjonijiet bejn l-Istati Membri u l-partijiet ikkonċernati bil-ħsieb li jitħejja vade mecum dwar l-allokazzjoni tal-opportunitajiet tas-sajd sabiex ittejjeb it-trasparenza, tippromwovi prattiki tas-sajd sostenibbli fl-UE kollha, u tappoġġja s-sajd fuq skala żgħira u tal-kosta;

99.Jissottolinja r-rwol tal-organizzazzjonijiet tal-produtturi fil-promozzjoni tas-sostenibbiltà, fil-kontribut għad-disponibbiltà tal-provvista tal-ikel u fit-tisħiħ tat-tkabbir u l-impjiegi fis-setturi tas-sajd u tal-akkwakultura permezz ta’, fost l-oħrajn:–il-ġestjoni u l-implimentazzjoni ta’ azzjonijiet kollettivi,–l-irbit tal-produtturi, tal-ewwel xerrejja u tal-konsumaturi fil-katina tal-provvista,–il-promozzjoni ta’ prodotti tas-sajd vijabbli u sostenibbli għall-konsumaturi billi jipparteċipaw fi skemi ta’ ċertifikazzjoni,–il-promozzjoni tal-konformità mar-regolamentazzjoni tas-sajd, filwaqt li tiġi appoġġjata t-traċċabbiltà u jissaħħu t-trasparenza u l-kwalità tad-data fid-dikjarazzjonijiet tal-qbid sabiex jiġi miġġieled is-sajd IUU,–id-distribuzzjoni u l-ġestjoni, f’xi Stati Membri, tal-kwoti tas-sajd;

100.Barra minn hekk jinnota li f’ħafna Stati Membri, huma relattivament ftit is-sajjieda fuq skala żgħira li jappartjenu għal organizzazzjoni tal-produtturi, u saħansitra inqas is-sajjieda fuq skala żgħira li għandhom organizzazzjoni tal-produtturi speċifika tagħhom, u dan jillimita l-kapaċità tagħhom li jibbenifikaw minn dan il-kanal biex jaċċessaw il-kwoti tas-sajd; iħeġġeġ, għalhekk, lill-Kummissjoni u lill-Istati Membri jiffaċilitaw u jinkoraġġixxu l-ħolqien ta’ organizzazzjoni tal-produtturi minn, u għal, sajjieda fuq skala żgħira;

101.Jisħaq li l-assoċjazzjonijiet tas-sajjieda bħax-xrieki, li jsegwu l-objettivi ewlenin ta’ organizzazzjoni tal-produtturi fl-ambitu tal-Organizzazzjoni Komuni tas-Swieq Regolament (UE) Nru 1379/2013 tal-11 ta’ Diċembru 2013 dwar l-organizzazzjoni komuni tas-swieq fil-prodotti tas-sajd u l-akkwakultura (ĠU L 354, 28.12.2013, p. 1)., għandhom ikunu eliġibbli biex jirċievu għajnuna finanzjarja fuq bażi ugwali mal-organizzazzjonijiet tal-produtturi rikonoxxuti fil-preżent; jinsisti, f’dan ir-rigward, li l-Istati Membri kkonċernati, il-Kummissjoni u x-xrieki għandhom jikkunsidraw flimkien l-għażliet u s-soluzzjonijiet rilevanti;

102.Jirrimarka li l-istandards tal-PKS huma fost l-ogħla fid-dinja u jagħtu kontribut importanti għas-sostenibbiltà ambjentali, ekonomika u soċjali u li, għalkemm għad hemm ħafna lok għal titjib, il-progress li sar f’dawn l-aħħar deċennji juri x’jista’ jsir għal kontribut ulterjuri għas-sostenibbiltà tal-istokkijiet u tal-ħabitats tal-ħut min-naħa l-waħda u għaż-żieda fid-dħul tas-sajjieda u tas-sidien tal-bastimenti min-naħa l-oħra; jenfasizza li l-promozzjoni ta’ standards għoljin f’termini ta’ sostenibbiltà ambjentali, ekonomika u soċjali tas-settur tas-sajd, fost fatturi oħra, hija kruċjali biex tiġi attirata ġenerazzjoni ġdida ta’ sajjieda u tiġi pprovduta stabbiltà ekonomika fit-tul għas-settur tas-sajd;

103.Jinnota li l-ħarsien tal-ambjent huwa qasam ta’ tħassib li kulma jmur qed jikber għall-Ewropej, u b’mod partikolari għall-ġenerazzjonijiet iżgħar; jisħaq fuq l-importanza tal-ġestjoni sostenibbli tas-sajd biex jiġu attirati sajjieda żgħażagħ; jitlob, f’dan ir-rigward, il-promozzjoni ta’ sajd b’impatt baxx;

104.Jistieden ukoll lill-Kummissjoni tiżgura li parti mill-kontribuzzjonijiet finanzjarji fl-ambitu tal-Ftehimiet ta’ Sħubija dwar is-Sajd Sostenibbli tiġi allokata wkoll, fejn possibbli, għall-integrazzjoni aħjar taż-żgħażagħ u n-nisa fis-setturi tas-sajd u tal-akkwakultura, għar-restawr tal-ambjent tal-baħar u għat-titjib tal-għarfien dwar l-istat tal-klima u l-ambjent tal-baħar;

105.Jisħaq fuq il-ħtieġa li ż-żgħażagħ jiġu attirati mhux biss lejn attivitajiet tas-sajd fuq il-baħar, iżda anki lejn il-ġestjoni tal-impriżi tas-sajd u lejn l-akkwakultura, biex b’hekk jiġi żgurat tiġdid ġenerazzjonali fis-settur kollu tal-ikel akkwatiku;

106.Jenfasizza li t-tiġdid ġenerazzjonali huwa importanti biex jiġu miġġielda l-isfidi demografiċi li qed iħabbtu wiċċhom magħhom iż-żoni tal-kosta u ż-żoni rurali tal-madwar, b’mod partikolari, u se jikkontribwixxi għall-preżervazzjoni tal-wirt kulturali tagħhom;

107.Jilqa’ l-fatt li l-FEMSA 2021-2027 jipprovdi assistenza u appoġġ għas-sajjieda żgħażagħ li jixtru opra tal-baħar jew impriża tas-sajd għall-ewwel darba; jistieden, f’dan ir-rigward, lill-Kummissjoni u lill-Istati Membri jippromwovu t-tiġdid ġenerazzjonali billi jappoġġjaw lill-persuni li jixtiequ jibdew karriera fis-settur tas-sajd u jneħħu l-ostakli, bħal pereżempju billi jindirizzaw il-kost għoli tal-bidu tan-negozju, l-instabbiltà tal-introjtu, l-inugwaljanza bejn il-ġeneri u n-nuqqas ta’ stabbiltà tal-karriera;

108.Jistieden lill-Kummissjoni, f’kooperazzjoni mal-Istati Membri, biex tipprovdi miżuri ġodda,u lis-settur biex jieħu miżuri, li se jistimulaw l-inklużjoni taż-żgħażagħ u n-nisa fil-livelli kollha tas-settur u jippromwovu aħjar it-tiġdid ġenerazzjonali, b’mod partikolari billi jagħmlu l-impjiegi kollha fil-katina tal-valur tas-sajd u tal-akkwakultura aktar attraenti, sikuri u mħallsa aħjar;

109.Jenfasizza l-importanza li jiġu żgurati informazzjoni u taħriġ xierqa, speċjalment għaż-żgħażagħ, biex tiġi żgurata l-kondiviżjoni tal-għarfien b’mod partikolari fir-rigward tal-kontribut tas-sajd għall-kwistjonijiet ta’ sostenibbiltà; jemmen li dan huwa importanti sabiex tiġi garantita kemm is-sitwazzjoni personali tagħhom billi jingħata kontribut għat-titjib tal-introjtu tagħhom, kif ukoll, b’estensjoni, il-koeżjoni tal-komunitajiet lokali tagħhom, speċjalment fir-reġjuni tal-kosta l-aktar iżolati, li għandhom anqas opportunitajiet ta’ impjieg;

110.Jissottolinja li t-tiġdid ġenerazzjonali jrid iqis l-objettivi tal-Patt Ekoloġiku Ewropew u l-ħtieġa li tiġi żgurata tranżizzjoni diġitali anke f’ekonomija blu sostenibbli; iqis, madankollu, li t-tiġdid ġenerazzjonali ma jridx iwassal għal kunflitt bejn il-ġenerazzjonijiet u għandu jinkludi sajjieda ta’ kull età biex jiġi żgurat bilanċ fit-tranżizzjoni ekoloġika u diġitali sabiex jiġi żgurat li l-wirt tal-esperjenza ma jintilifx; jappella wkoll għal mobilità u opportunitajiet ta’ impjieg imtejba fl-UE kollha, mingħajr diffikultajiet jew restrizzjonijiet rigward ir-rikonoxximent tal-ħiliet u t-taħriġ tas-sajjieda;

111.Jirrikonoxxi r-rwol importanti tan-nisa fl-appoġġ loġistiku u amministrattiv għal-laneċ tas-sajd kif ukoll fil-kummerċjalizzazzjoni u l-ipproċessar tal-ħut; jenfasizza, madankollu, li dan ir-rwol spiss jiġi injorat jew bilkemm huwa viżibbli, b’mod partikolari bħala sajjieda jew kaptani tal-opri tal-baħar kif ukoll ir-rwol tagħhom fix-xjenza;

112.Jistieden, għalhekk, lill-Kummissjoni tvara inizjattivi biex tirrikonoxxi l-ħidma tan-nisa fis-sajd u ssaħħaħ il-viżibbiltà tar-rwol tagħhom, kemm billi tiffavorixxi l-inkorporazzjoni tagħhom fid-diversi oqsma tas-settur kif ukoll billi tappoġġja rappreżentanza aħjar tan-nisa fl-organizzazzjonijiet u l-entitajiet rappreżentattivi kollha, u tiżgura pagament ugwali bejn il-ġeneri;

113.Ifakkar li l-Istrateġija dwar l-Ugwaljanza bejn il-Ġeneri għall-perjodu 2020 - 2025 tirrikjedi li l-fondi rilevanti tal-UE jappoġġjaw azzjonijiet bħall-FEMSA biex jiġu promossi l-bilanċ tan-nisa bejn ix-xogħol u l-ħajja privata tagħhom u l-parteċipazzjoni tagħhom fis-suq tax-xogħol, jiġu promossi investimenti f’faċilitajiet ta’ kura, tiġi appoġġjata l-intraprenditorija femminili u tiġi miġġielda s-segregazzjoni skont il-ġeneru;

114.Jistieden lill-Kummissjoni u lill-Istati Membri jagħmlu ħilithom biex jiżguraw li kull programm u azzjoni mmirati biex jattiraw liż-żgħażagħ lejn is-settur tas-sajd li jitwettqu fl-ambitu tal-PKS jeħtieġ jikkontribwixxi għall-kisba tal-ugwaljanza bejn il-ġeneri;

115.Jistieden lill-Kummissjoni jinvesti aktar sforz fil-promozzjoni tal-PKS bħala mudell ta’ politika għall-governanza tal-oċeani, billi tuża l-pożizzjoni tal-UE fl-organizzazzjonijiet reġjonali tal-ġestjoni tas-sajd, fil-Ftehimiet ta’ Sħubija dwar is-Sajd Sostenibbli, u b’mod aktar ġenerali fil-fora internazzjonali; jenfasizza li dan se jkun essenzjali biex tiġi żgurata kompetizzjoni ġusta għall-operaturi tal-UE u biex jiġu difiżi l-interessi tas-setturi tas-sajd u tal-akkwakultura tal-UE fil-livell globali;

116.Jistieden lill-Kummissjoni timmonitorja d-distribuzzjoni tal-kontribuzzjonijiet finanzjarji tal-UE, filwaqt li tiżgura li dawn jiġu allokati għas-setturi tas-sajd u tal-akkwakultura;

117.Jitlob li jissaħħaħ ir-rwol tal-organizzazzjonijiet reġjonali tal-ġestjoni tas-sajd u jistieden lill-Kummissjoni tipproponi qafas ġenerali għall-mandati ta’ negozjar għall-parteċipazzjoni f’dawn l-organizzazzjonijiet; jistieden ukoll lill-Kummissjoni tiżgura l-involviment tal-Parlament fl-istadji l-aktar bikrija tal-abbozzar ta’ miżuri u rakkomandazzjonijiet għall-adozzjoni fi ħdan l-organizzazzjonijiet reġjonali tal-ġestjoni tas-sajd, b’mod li ma jdgħajjifx il-pożizzjoni ta’ negozjar tal-UE;

118.Iqis li ma għandu jkun hemm l-ebda żona tal-oċean u l-ebda riżorsa tas-sajd rilevanti li ma jkunux koperti mill-organizzazzjonijiet reġjonali tal-ġestjoni tas-sajd rilevanti; jistieden lill-Kummissjoni tippromwovi l-ħolqien ta’ organizzazzjonijiet reġjonali tal-ġestjoni tas-sajd ġodda, fejn ikun meħtieġ, kif ukoll l-adattament ta’ dawk eżistenti, f’fora internazzjonali, biex jittejbu l-protezzjoni tal-istokkijiet tal-ħut u l-ġestjoni sostenibbli tar-riżorsi tas-sajd u jiġu mħarsa l-attivitajiet sostenibbli tal-flotot li joperaw f’dawn iż-żoni;

119.Jirrimarka li l-ftehimiet ta’ sħubija dwar is-sajd sostenibbli ma’ pajjiżi mhux tal-UE jipprovdu benefiċċji reċiproċi kemm lill-UE kif ukoll lill-pajjiżi sħab; jissottolinja li ftehimiet ta’ sħubija dwar is-sajd sostenibbli reċenti jinkludu klawżoli dwar id-drittijiet tal-bniedem u jintegraw il-ħtiġijiet tal-popolazzjonijiet lokali;

120.Iqis li huwa imperattiv li l-Kummissjoni tirrispetta għalkollox l-aspetti kollha tal-liġi internazzjonali meta tinvolvi ruħha fid-dimensjoni esterna tal-PKS;

121.Jistieden lill-Kummissjoni tiżgura li l-objettivi tal-PKS ikunu integrati bis-sħiħ fil-pożizzjoni tal-UE fil-fora ambjentali internazzjonali kollha, bħall-Konvenzjoni dwar id-Diversità Bijoloġika (KDB) jew il-Konvenzjoni dwar il-Kummerċ Internazzjonali fl-Ispeċijiet ta’ Fawna u Flora Selvaġġi fil-Periklu (CITES), fejn jiġu diskussi kwistjonijiet relatati mar-riżorsi bijoloġiċi tal-baħar;

122.Iqis li l-prodotti tal-ikel akkwatiku importati jridu jkunu soġġetti għal proċeduri rigorużi ta’ monitoraġġ u ċertifikazzjoni, biex jiġi żgurat li jiġu minn sajd sostenibbli, u bi standards ambjentali, soċjali u tas-saħħa għoljin, li jkunu stretti daqs dawk applikati għall-prodotti tal-UE; huwa tal-fehma li dan għandu jkun meħtieġ permezz ta’ klawżoli speċifiċi fil-ftehimiet kummerċjali ġodda nnegozjati mill-UE;

123.Jirrimarka li s-sistema ta’ traċċabbiltà għall-prodotti tal-ikel akkwatiku frisk, iffriżat u pproċessat importati fl-Unjoni, inkluż għal-lojns tat-tonn importati fl-ambitu tar-reġim tal-kwoti tariffarji awtonomi (ATQs), hija essenzjali sabiex jintlaħqu l-aspettattivi tal-konsumaturi permezz ta’ informazzjoni bl-għan li tittejjeb is-sikurezza tal-ikel u li jkunu possibbli verifiki fuq l-importazzjonijiet minn pajjiżi terzi, flimkien ma’ miżuri biex jiġi miġġieled is-sajd IUU; jitlob approċċ aktar armonizzat fl-UE fir-rigward tal-implimentazzjoni tal-leġiżlazzjoni tal-UE fir-rigward tal-IUU;

124.Ifakkar li l-UE hija l-akbar suq ta’ importazzjoni għall-frott tal-baħar u għall-prodotti tal-akkwakultura, u l-aktar wieħed attraenti; jitlob li din il-pożizzjoni ta’ setgħa kummerċjali tiġi ingranata biex jiġu mħarsa l-interessi tal-konsumaturi tal-UE fil-promozzjoni ta’ standards għoljin u tas-setturi tal-UE, biex jiġi evitat li s-sħab tagħha jmorru lura mill-ftehimiet jew impenji u biex jitrawmu kundizzjonijiet ekwi fil-livell internazzjonali, b’mod partikolari fir-rigward tal-istandards soċjali, ekonomiċi u ambjentali;

125.Jilqa’ l-fatt li l-Ftehim dwar il-Kummerċ u l-Kooperazzjoni bejn l-UE u r-Renju Unit jinkorpora rabta diretta bejn id-dispożizzjonijiet dwar il-kummerċ u dawk dwar is-sajd; jistieden lill-Kummissjoni u lill-Kunsill jiżguraw li n-negozjati dwar is-sajd mar-Renju Unit kif ukoll ma’ stati oħra tal-kosta fl-Atlantiku tal-Grigal ikunu marbuta wkoll ma’ kwistjonijiet relatati mal-kummerċ u mal-aċċess għas-suq uniku tal-UE;

126.Jissottolinja l-importanza tal-politika ta’ tolleranza żero tal-UE fir-rigward tas-sajd IUU, fid-dawl tal-fatt li dan tal-aħħar għadu jseħħ fil-livell internazzjonali, inkluż eżempji li jvarjaw minn nuqqas ta’ trasparenza dwar operazzjonijiet tas-sajd illegali għal skjavitù moderna, bħal fil-każ ta’ xi opri tal-baħar Ċiniżi, u jiddispjaċih li frott tal-baħar mhux awtorizzat għadu jinbiegħ f’għadd ta’ swieq tal-UE;

127.Jirrimarka li l-Kummissjoni u l-Istati Membri jeħtiġilhom jirduppjaw l-isforzi tagħhom biex jindirizzaw is-sajd IUU u jiżguraw li l-konsum tal-frott tal-baħar fl-UE ma jikkontribwixxix għalih;

128.Jistieden lill-Kummissjoni ssaħħaħ ir-rwol tal-Aġenzija Ewropea għall-Kontroll tas-Sajd (EFCA) fil-ġlieda kontra s-sajd IUU;

129.Jitlob li l-ftehimiet kollha ta’ kummerċ ħieles ma’ pajjiżi terzi jinkludu taqsima dwar l-indirizzar tas-sajd IUU;

130.Iqis li xi aspetti tal-PKS ma jindirizzawx biżżejjed il-ħtiġijiet speċifiċi tar-reġjuni ultraperiferiċi; jistieden lill-Kummissjoni u lill-Istati Membri kkonċernati jindirizzaw din is-sitwazzjoni abbażi tal-Artikolu 349 tat-TFUE u permezz ta’ approċċ reġjonalizzat, kif minqux fil-PKS, u, fejn meħtieġ, jagħmlu l-aġġustamenti meħtieġa;

131.Jindika l-karatteristiċi speċifiċi tas-setturi tas-sajd u tal-akkwakultura fir-reġjuni ultraperiferiċi; jistieden lill-Kummissjoni tipproponi programm ta’ għażliet relatati b’mod speċifiku mal-periferiċità u l-insularità (POSEI) għas-sajd u l-akkwakultura, simili għal dak tal-agrikoltura;

132.Jenfasizza li l-appoġġ nazzjonali u tal-UE għat-tiġdid tal-flotot artiġjanali huwa ta’ importanza vitali għal dawn ir-reġjuni; jistieden lill-Kummissjoni, b’mod partikolari, tadatta l-linji gwida tagħha għall-analiżi tal-bilanċ bejn il-kapaċità tas-sajd u l-opportunitajiet tas-sajd (COM(2014)0545) għall-karatteristiċi tar-reġjuni ultraperiferiċi;

133.Jissottolinja l-importanza li jitwettqu studji robusti biex jiġu vvalutati r-riżorsi bijoloġiċi tal-baħar fl-ilmijiet kollha tal-Unjoni u, b’mod partikolari, fir-reġjuni ultraperiferiċi;

134.Jinsisti fuq il-ħtieġa li jiġu appoġġjati metodi selettivi tas-sajd, bħal irkaptu ankrat biex jinġema’ l-ħut użat minn flotot artiġjanali fir-reġjuni ultraperiferiċi, dment li rkaptu bħal dan jikkontribwixxi għas-sajd sostenibbli u selettiv;

135.Jisħaq fuq il-ħtieġa li jiġu pprovduti r-riżorsi meħtieġa biex jittejjeb l-għarfien xjentifiku taż-żoni ekonomiċi esklużivi tar-reġjuni ultraperiferiċi;

136.Jenfasizza li l-mitigazzjoni tat-tibdil fil-klima u l-adattament għalih huma sfidi ewlenin li mhumiex indirizzati biżżejjed mill-PKS attwali;

137.Jenfasizza li l-isforzi li saru mill-industrija tas-sajd biex ittejjeb is-sostenibbiltà tal-istokkijiet u biex timpenja ruħha li żżommhom f’kundizzjoni tajba ladarba jintlaħaq status tajjeb se jitilfu t-tifsira tagħhom jekk it-tibdil fil-klima ma jiġix indirizzat;

138.Jenfasizza bil-qawwa l-ħtieġa li r-riċerka xjentifika tiffoka aktar fuq l-interazzjonijiet bejn l-istokkijiet tal-ħut u l-bidliet ambjentali minħabba t-tibdil fil-klima, sabiex jiġi evitat li l-industrija tas-sajd tieħu t-tort kollu għall-eżawriment tal-istokkijiet;

139.Jisħaq li s-sajjieda u l-bqija tal-katina tal-frott tal-baħar mhumiex kawża tat-tibdil fil-klima, iżda pjuttost vittmi tiegħu;

140.Iqis li s-settur tal-akkwakultura kapaċi jipprovdi kontribut konsistenti għas-servizzi tal-ekosistema għas-soċjetà, u li l-akkwakultura tal-għadajjar, il-kultivazzjoni tal-algi u t-trobbija tal-frott tal-baħar bil-qoxra jistgħu jikkontribwixxu għad-dekarbonizzazzjoni tal-ekonomija tal-UE u għall-mitigazzjoni tat-tibdil fil-klima; jenfasizza, madankollu, li s-sekwestru tal-karbonju permezz tal-kultivazzjoni tal-algi u tat-trobbija tal-frott tal-baħar bil-qoxra huwa limitat u jiddependi mill-metodu ta’ produzzjoni u l-użu meta l-prodott jinħasad; jistieden lill-Istati Membri jippromwovu ktajjen tal-provvista qosra u effiċjenti, fejn xieraq, bil-ħsieb li jikkontribwixxu għall-ġlieda kontra t-tibdil fil-klima;

141.Jindika li ċerti prattiki tal-akkwakultura, bħat-trobbija tal-maskli jew tal-gajdri u l-polikultura tal-għadajjar, jistgħu jkunu mudelli ta’ suċċess għal sistemi futuri tal-krediti tat-tnaqqis ta’ emissjonijiet tal-karbonju, fil-kuntest tal-leġiżlazzjoni tal-UE dwar il-klima; jistieden lill-Kummissjoni u lill-Istati Membri jappoġġjaw dan it-tip ta’ negozju ekoloġiku;

142.Jistieden lill-Istati Membri jkomplu jinkoraġġixxu l-promozzjoni tat-trobbija tal-algi u jiffaċilitaw l-użu u l-iżvilupp tal-algi bħala ikel u għalf; jenfasizza li fil-kultivazzjoni tal-algi hemm potenzjal mhux sfruttat għall-ħolqien ta’ impjiegi ġodda u għall-forniment ta’ servizzi tal-ekosistema u ta’ ikel u għalf aktar ekoloġiċi;

143.Jistieden lill-Kummissjoni Ewropea tqis, meta tirrevedi l-Politika Komuni tas-Sajd, li l-karatteristiċi tal-oċean (it-temperatura, id-densità, is-salinità, is-saturazzjoni tal-ossiġenu, eċċ.) inbidlu matul dawn l-aħħar 10 snin;

144.Jenfasizza l-ħtieġa ta’ ekosistemi aktar reżiljenti permezz ta’ żoni tal-baħar protetti konnessi u ġestiti b’mod effettiv, bħala bażi għal setturi tas-sajd reżiljenti u li joffru profitt ekonomiku;

145.Jenfasizza li, għas-sajd, ir-reżiljenza għat-tibdil fil-klima tinkiseb permezz ta’ żoni tas-sajd u speċijiet fil-mira diversifikati;

146.Iħeġġeġ lill-Kummissjoni u lill-Istati Membri jżidu r-riżorsi umani u finanzjarji għax-xjenza tas-sajd relatata mat-tibdil fil-klima u mad-dekarbonizzazzjoni tal-flotta, filwaqt li janalizzaw l-impatt tat-tibdil fil-klima fuq l-istat taż-żoni tas-sajd u l-ambjent tagħhom;

147.Jitlob li jkun hemm innovazzjoni fil-monitoraġġ tal-impatt tat-tibdil fil-klima fuq l-istokkijiet fil-qafas ta’ kollaborazzjoni mill-qrib bejn il-komunità xjentifika u l-partijiet ikkonċernati, sabiex tiżdied ir-reattività u jiġu żviluppati għodod ta’ ġestjoni adatti;

148.Jistieden lill-Kummissjoni tfassal għodod u finanzjament biżżejjed għas-setturi milquta mit-tibdil fil-klima;

149.Jistieden lill-Kummissjoni, sabiex tippromwovi l-ekonomija ċirkolari fis-settur tas-sajd, tistabbilixxi programmi Ewropej għas-sajjieda biex jiġbru l-iskart fil-baħar, jekk ikunu jistgħu jagħmlu dan, matul il-perjodi meta ma jkunux jistgħu jistadu, u b’hekk jissupplimentaw l-introjtu tagħhom;

150.Jistieden lill-Kummissjoni u lill-Istati Membri jindirizzaw u jsegwu d-dispożizzjonijiet kollha tal-PKS li ma ġewx implimentati;

151.Jisħaq fuq l-urġenza u l-ħtieġa li jittejjeb il-ġbir tad-data mill-qabdiet tas-sajd rikreattiv; iħeġġeġ lill-Kummissjoni u lill-Istati Membri jinkludu fil-Qafas Ewropew għall-Ġbir tad-Data, stabbilit bir-Regolament (UE) 2017/1004 Ir-Regolament (UE) 2017/1004 tas-17 ta’ Mejju 2017 dwar l-istabbiliment ta’ qafas tal-Unjoni għall-ġbir, il-ġestjoni u l-użu ta’ data fis-settur tas-sajd u appoġġ għall-parir xjentifiku fir-rigward tal-Politika Komuni dwar is-Sajd u li jħassar ir-Regolament tal-Kunsill (KE) Nru 199/2008 (ĠU L 157, 20.6.2017, p. 1)., l-ispeċijiet kollha soġġetti għal TACs u kwoti, apparti dawk inklużi fil-pjanijiet ta’ ġestjoni pluriennali (MAPs) u taħt l-obbligu ta’ ħatt l-art;

152.Jenfasizza l-ħtieġa ta’ data biex jiġi vvalutat l-impatt tas-sajd rikreattiv fl-UE fuq l-ekosistema tal-baħar u fuq ir-riżorsi bijoloġiċi tal-baħar f’ilmijiet tal-UE, inkluż data dwar qabdiet inċidentali, b’mod partikolari speċijiet protetti fl-ambitu tal-liġi tal-Unjoni jew dik internazzjonali, data dwar l-impatti tas-sajd rikreattiv fuq il-ħabitats tal-baħar, inkluż żoni marittimi vulnerabbli, u data dwar l-impatti tas-sajd fuq il-katini alimentari;

153.Jissottolinja li s-sajd rikreattiv jista’ jkollu impatt sinifikanti fuq l-istokkijiet tal-ħut; jilqa’ l-progress li sar fir-reviżjoni tar-Regolament dwar il-Kontroll tas-Sajd u jistieden lill-Istati Membri jiżguraw li s-sajd rikreattiv isir b’mod li jkun kompatibbli mal-objettivi tal-PKS;

154.Ifakkar fl-importanza tal-akkwakultura biex tiġi ggarantita s-sigurtà tal-ikel fit-tul u biex tikkontribwixxi biex tintlaħaq id-domanda dinjija għall-ikel akkwatiku li kulma jmur qegħda dejjem tikber, kif ukoll fil-kontribut tagħha għall-ħolqien tat-tkabbir u tal-impjiegi għaċ-ċittadini tal-UE, biex jiġu ppreservati aħjar l-ekosistemi u l-bijodiversità u biex tkun parti minn ġestjoni aktar ċirkolari tar-riżorsi;

155.Jenfasizza li l-frott tal-baħar tat-trobbija, bħala sors ta’ proteina għall-ikel għandu impronta tal-karbonju iżgħar u jeħtieġ l-inqas użu ta’ riżorsi naturali minn bhejjem terrestri oħra, u għandu rwol importanti x’jaqdi biex jgħin fil-bini ta’ sistema alimentari sostenibbli;

156.Jirrikonoxxi r-rwol tal-linji gwida strateġiċi u l-Pjanijiet Strateġiċi Nazzjonali Pluriennali għall-iżvilupp ta’ akkwakultura sostenibbli u reżiljenti;

157.Jiddispjaċih li l-akkwakultura Ewropea ilha staġnata mill-2014, u li l-progress fit-tnaqqis tal-piż amministrattiv u fl-integrazzjoni tal-akkwakultura fl-ippjanar spazjali marittimu, kostali u intern kien limitat;

158.Jissottolinja li l-akkwakultura Ewropea għadha ’l bogħod milli tilħaq il-kapaċità sħiħa tagħha u li r-rata ta’ dipendenza tal-UE fuq l-importazzjoni hija għolja ħafna, peress li kważi 75 % tal-frott tal-baħar totali li jiġi kkunsmat fl-UE jiġi importat minn pajjiżi terzi;

159.Jistieden lill-Kummissjoni u lill-Istati Membri jippromwovu t-tkabbir ta’ akkwakultura b’impatt ambjentali baxx, li tinkludi mhux biss il-molluski u l-algi iżda wkoll it-trobbija tal-ħut bil-pinen tal-ilma ħelu u tal-baħar, aktar milli tippromwovi t-tkabbir ta’ akkwakultura b’livell trofiku baxx; jenfasizza b’mod partikolari l-importanza tal-produzzjoni tal-ħut bil-pinen fil-provvista tas-suq tal-UE, minħabba l-iskala tat-tunnellaġġ importat involut (94 % fl-2021);

160.Ifakkar li l-pajjiżi produtturi l-kbar mhux tal-UE qed ikomplu jippromwovu b’mod qawwi t-tkabbir tas-settur tagħhom tat-trobbija tal-ħut bil-pinen, u l-UE hija s-suq ewlieni tal-esportazzjoni tagħhom;

161.Jistieden lill-Kummissjoni u lill-Istati Membri jappoġġjaw b’mod attiv l-implimentazzjoni tal-linji gwida strateġiċi riveduti u l-pjanijiet nazzjonali pluriennali u jippromwovu s-sostenibbiltà fit-tul tagħhom b’enfasi mhux biss fuq is-sostenibbiltà ambjentali iżda wkoll fuq is-sostenibbiltà ekonomika u soċjali tal-akkwakultura tal-UE;

162.Jiddispjaċih li l-politika kummerċjali attwali tal-UE ma tissalvagwardjax kundizzjonijiet ekwi bejn il-produtturi tal-UE u dawk mhux tal-UE li se jippermettu lis-settur tal-akkwakultura jikseb riżultati ekonomiċi sostenibbli u min-naħa l-oħra jikkontribwixxi għall-iżvilupp soċjali u ekonomiku tar-reġjuni tal-UE;

163.Ifakkar fl-importanza tal-akkwakultura biex tiggarantixxi s-sigurtà tal-ikel fit-tul u tikkontribwixxi biex tintlaħaq id-domanda dinjija li kulma jmur qed tikber għall-ikel akkwatiku, kif ukoll il-kontribut tagħha għall-ħolqien tat-tkabbir u l-impjiegi għaċ-ċittadini tal-UE, biex jiġu ppreservati aħjar l-ekosistemi u l-bijodiversità u li tagħmel parti minn ġestjoni aktar ċirkolari tar-riżorsi; jiddispjaċih li l-akkwakultura Ewropea ilha staġnata mill-2014, u li l-progress fit-tnaqqis tal-piż amministrattiv u fl-integrazzjoni tal-akkwakultura fl-ippjanar tal-ispazju marittimu, kostali u intern kien limitat; jenfasizza li l-akkwakultura Ewropea għadha ’l bogħod mill-ilħuq tal-kapaċità sħiħa, u li 75 % tal-frott tal-baħar ikkunsmat fl-UE jitrabba f’faċilitajiet barra mill-UE; jistieden lill-Kummissjoni tappoġġja b’mod attiv l-implimentazzjoni tal-linji gwida strateġiċi u l-pjanijiet nazzjonali riveduti u tippromwovi s-sostenibbiltà ambjentali, ekonomika u soċjali fit-tul tagħhom;

164.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.