1.á iarraidh ar an gCoimisiún an gealltanas dearfach a thug an tUachtarán von der Leyen chun comhionannas inscne a chur chun cinn i ngach ceapadh beartais a chomhlíonadh agus á chur i bhfáth gur gá níos mó a dhéanamh ós rud é go bhfuil gné na hinscne in easnamh sna príomhthionscnaimh arna dtíolacadh i leith na haeráide, an fhuinnimh agus an chomhshaoil; á iarraidh go n-áiritheofaí leis an gComhaontú Glas don Eoraip go mbeadh aistriú cóir atá cothrom go sóisialta ann a oibreoidh do chách trí straitéis thrasnach atá claochlaitheach ó thaobh inscne de a fhorbairt chun aghaidh a thabhairt ar an mbochtaineacht fuinnimh agus trí infheistíocht phoiblí i dtithíocht shóisialta atá inacmhainne agus tíosach ar fhuinneamh a mhéadú, agus riachtanais shonracha na mban á gcur san áireamh, ar mná iad a rannchuidíonn go mór le bainistíochta fuinnimh teaghlaigh go minic, ach nach bhfuil rochtain chomhionann acu ar acmhainní;

2.á chur in iúl gur oth léi nach n-aithnítear i Moladh (AE) 2023/2407 ón gCoimisiún an 20 Deireadh Fómhair 2023 maidir leis an mbochtaineacht fuinnimh IO L, 2023/2407, 23.10.2023. agus an treoir a ghabhann leis Moladh ón gCoimisiún maidir leis an mbochtaineacht fuinnimh. Treoir ón Aontas maidir leis an mbochtaineacht fuinnimh. Doiciméad tionlacain (SWD(2023)0647). gnéithe inscneacha na bochtaineachta fuinnimh agus an gá bunriachtanach atá le sonraí imdhealaithe de réir inscne chun measúnú leormhaith a dhéanamh ar riachtanais teaghlach leochaileach mar phríomhtháscaire; á chur in iúl gur cúis bhuartha di nár ghlac an Coimisiún leis na hiarrataí iomadúla ó Pharlaimint na hEorpa, ón tsochaí shibhialta agus ón Institiúid Eorpach um Chomhionannas Inscne (EIGE) táscairí inscne-shonracha a fhorbairt chun a áirithiú go mbeidh an t-aistriú glas cothrom go sóisialta;

3.á iarraidh ar AE pacáiste urghnách a chur chun cinn chun tacú le daoine atá ag streachailt leis na costais mhaireachtála atá ag ardú go pras, lena n-áirítear EUR 100 billiún do theaghlaigh, go háirithe na teaghlaigh aontuismitheora – arb iad mná an tuismitheoir atá i gceist iontu formhór mór an ama – is mó atá thíos leis an mbochtaineacht fuinnimh agus EUR 20 billiún ar a laghad chun cur le scéim na Ráthaíochta Eorpach do Leanaí;

4.á iarraidh ar na Ballstáit agus ar AE fóntais agus bia inacmhainne a ráthú go práinneach do theaghlaigh ar ioncam íseal agus, go háirithe, dóibh siúd a ndéantar idirdhealú trasnach orthu; á chur i bhfáth nár cheart go mbeadh ar aon duine a bheith préachta leis an bhfuacht i ndúlaíocht an gheimhridh nó a bheith róthe le linn mhíonna teo an tsamhraidh agus á iarraidh ar na Ballstáit agus ar AE díscor fuinnimh a thoirmeasc; á chur i bhfáth gur cheart go mbeadh sé ina thosaíocht ar fud na mBallstát uile éifeachtúlacht fuinnimh a mhéadú trí thithíocht a athchóiriú;

5.á mheabhrú gur cheart cúnamh airgeadais a chur ar fáil chun tacú le teaghlaigh ar ioncam íseal i gcomhréir le híoschaighdeáin feidhmíochta fuinnimh i gcás breis agus 50 milliún duine san Aontas atá thíos leis an mbochtaineacht fuinnimh; á mheas go bhfuil sé tábhachtach go ráthódh na Ballstáit rochtain ar leictreachas do dhaoine leochaileacha;

6.á mheabhrú go ndéanann an bhochtaineacht fuinnimh difear díréireach do mhná ar fud an Aontais agus, dá bhrí sin, ba cheart do na Ballstáit an tacaíocht is gá a thiomnú chun an bhochtaineacht fuinnimh i measc na mban a laghdú;

7.á iarraidh ar an gCoimisiún agus ar na Ballstáit gníomhú go práinneach chun aghaidh a thabhairt ar an mbochtaineacht agus ar neamhionannais mhéadaitheacha i measc na mban, go háirithe i measc grúpaí leochaileacha, lena n-áirítear máithreacha singile, mná faoi mhíchumas, mná ó chúlra ciníoch agus ó chúlra eitneach, daoine LGBTIQ+, mná ar imircigh agus dídeanaithe iad, mná scothaosta agus mná i limistéir thuaithe nó bhánaithe; á iarraidh ar an gCoimisiún straitéis uaillmhianach Eorpach 2030 a fhorbairt i gcoinne na bochtaineachta, lena n-áirítear bochtaineacht ama, ina mbeidh spriocanna nithiúla chun an bhochtaineacht a laghdú agus béim ar dheireadh a chur le bochtaineacht na mban agus ar thimthriall na rioscaí bochtaineachta ó ghlúin go glúin a bhriseadh;

8.á iarraidh ar na Ballstáit bearta sonracha a ghlacadh chun baol na bochtaineachta sa tseanaois a chomhrac agus cur chuige inscne-íogair a ghlacadh agus córais na bpinsean á n-athchóiriú, an aois scoir á oiriúnú agus pinsin agus sochair shóisialta agus seirbhísí amhail cúram fadtéarmach á neartú, agus tearcionadaíocht ag mná i margadh an tsaothair á cur san áireamh, chomh maith le deighilt mhargadh an tsaothair agus idirdhealú ar bhonn inscne;

9.á iarraidh ar an gCoimisiún measúnú a dhéanamh ar ghníomhartha reachtacha nua agus iad a mholadh, i gcás inarb iomchuí, chun stop a chur le hamhantraithe rochtain ar fhuinneamh a dhéanamh neamh-inacmhainne do mhná;

10.á thabhairt chun suntais go bhfuil ról bunúsach ag rochtain ar leictreachas maidir leis an mbochtaineacht a laghdú agus maidir le rannpháirtíocht iomlán agus chomhionann sa tsochaí a áirithiú;

11.á iarraidh ar Ard-Stiúrthóireacht an Fhuinnimh de chuid an Choimisiúin plean gníomhaíochta inscne a fhorbairt lena n-áiritheofar go ndéanfar gné na hinscne a chomhtháthú le reachtaíocht uile an Aontais maidir le fuinneamh, lena n-áirítear an ceart chun comhroinnt fuinnimh mar a luaitear i dTreoir (AE) 2018/2001, agus go bhforbróidh sí bearta sonracha, táscairí agus cistí spriocdhírithe chun an bhochtaineacht fuinnimh, agus go háirithe a hiarmhairtí inscneacha, a chomhrac;

12.á iarraidh ar an gCoimisiún agus ar na Ballstáit a áirithiú go gcuirfear gné na hinscne agus an ghné thrasnach san áireamh i ngach scéim um éifeachtúlacht fuinnimh agus um leictreachas in-athnuaite, lena n-áirítear an ceart chun comhroinnt fuinnimh, chun tacú leis na saoránaigh sin is mó a ndéanann an bhochtaineacht fuinnimh difear dóibh; á aithint go rannchuidíonn tionscnaimh atá faoi stiúir ban le réitigh fuinnimh inbhuanaithe agus go bhfuil ról lárnach ag mná i ndearadh na réiteach sin ar gach leibhéal, lena n-áirítear leibhéal an teaghlaigh, leibhéal an phobail, an leibhéal áitiúil, an leibhéal náisiúnta agus an leibhéal Eorpach;

13.á iarraidh ar an gCoimisiún agus ar na Ballstáit comhionannas inscne a phríomhshruthú i ngach beartas chun an fhreagairt is fearr ar an ngéarchéim fuinnimh a bhaint amach, a dhéanann difear díréireach do mhná; á iarraidh, ina leith sin, ar an gCoimisiún tuarascáil a ullmhú maidir leis na hiarmhairtí a bhaineann le hinscne mar thoradh ar an méadú ar an gcostas maireachtála de bharr na géarchéime fuinnimh, lena n-áirítear measúnú inscne ar chur chun feidhme a mholta maidir leis an mbochtaineacht fuinnimh; á iarraidh ar na Ballstáit faireachán a dhéanamh ar phraghsanna fuinnimh, iompair agus earraí bunriachtanacha eile d’fhonn bearta sonracha a fhorbairt chun baol an eisiaimh shóisialta agus na bochtaineachta a chomhrac, agus béim á leagan ar rochtain ar thithíocht inacmhainne, iompar, ceartas agus fuinneamh;

14.á iarraidh ar an gCoimisiún ceangal a chur ar na Ballstáit measúnuithe tionchair inscne éigeantacha a dhéanamh i bpleananna náisiúnta fuinnimh agus aeráide, lena n-áirítear agus tuairisciú á dhéanamh acu ar an mbochtaineacht fuinnimh;

15.á iarraidh ar an gCoimisiún treoirlínte sonracha a fhorbairt maidir le conas a áirithiú go gcuirfidh na Ballstáit príomhshruthú inscne agus anailís inscne i bhfeidhm i gceart agus Pleananna Náisiúnta Fuinnimh agus Aeráide (PNFA) á gceapadh acu, lena n-áirítear bearta agus gníomhaíochtaí chun an bhochtaineacht fuinnimh a mhaolú; á mheas go bhfuil sé ríthábhachtach anailís inscne a bhfuil gné thrasnach ag baint léi a ionchorprú in PNFAnna chun aistriú fuinnimh atá cothrom go sóisialta a chur chun cinn;

16.á iarraidh ar na Ballstáit infheistíocht phoiblí a mhéadú i mbeartais a bhfuil sé d’aidhm acu, go díreach nó go hindíreach, gníomhú in aghaidh éifeachtaí diúltacha na géarchéime costais maireachtála ar mhná ina n-éagsúlacht uile, lena gcosnófar íospartaigh foréigin inscnebhunaithe, agus rochtain ar sheirbhísí poiblí agus saor in aisce ar ardcháilíocht a ráthú i dtaca le cúram, oideachas, sláinte, lena n-áirítear sláinte ghnéis agus sláinte atáirgthe agus na cearta a bhaineann leo, chomh maith le tithíocht inacmhainne, iompar agus fuinneamh, agus rochtain ar fhostaíocht chuibhiúil; á iarraidh ar na Ballstáit aird ar leith a thabhairt ar réigiúin tuaithe agus intíre, na réigiúin is forimeallaí agus réigiúin atá i mbaol a mbánaithe, ar réigiúin iad nach mbíonn soláthar leormhaith na seirbhísí sin acu go minic;

17.á thabhairt chun suntais go bhfuil tionchar an bhoilscithe aird agus na gcostas fuinnimh ag baint an bhoinn ó sheirbhísí poiblí, ar mó an seans go mbeidh mná ag brath orthu agus go n-oibreoidh mná iontu; á chur i bhfáth go bhfuil impleachtaí díreacha ag ciorruithe ar bhuiséid na mBallstát, a mhéid a bhaineann le cúram leanaí, oideachas, gníomhaíochtaí réamh-bhunscoile agus cúramóirí, do mhná a dhéanann formhór na gcúraimí breise atá i gceist; á iarraidh ar na Ballstáit cistiú a mhéadú don bhonneagar sóisialta, go háirithe do sheirbhísí cúraim sláinte agus cúraim, agus tús áite a thabhairt do thithíocht shóisialta agus don infheistíocht in iarfheistiú tithe chun costais fuinnimh a laghdú;

18.á chur i bhfáth go bhfuil tionchar diúltach ag an ngéarchéim costais fuinnimh, mar aon leis an ngéarchéim costais maireachtála, ar chuimsiú eacnamaíoch agus sóisialta na mban agus ar shláinte agus ar chearta bunúsacha na mban lena n-áirítear sláinte ghnéis agus sláinte atáirgthe agus na cearta a bhaineann leo; á thabhairt chun suntais go ndeir thart ar aon trian de dhaoine gur chuir siad deireadh le cóir leighis in 2022, agus go bhfuil níos mó daoine ag rá go bhfuil orthu deireadh a chur le cúram leighis mar gheall ar chostais atá ag ardú, agaí feithimh níos faide, agus ganntanais dochtúirí agus cógas;

19.á iarraidh go n-áiritheofaí ioncam íosta leormhaith, i gcomhréir leis na moltaí Eorpacha, d’fhonn comhionannas inscne, cinnteacht ioncaim agus neamhspleáchas eacnamaíoch na mban a chur chun cinn; á mheabhrú gur coimirce riachtanach é pá íosta leormhaith chun dáileadh pá níos cothroime a áirithiú agus chun pá íosta bunúsach lena gcosnaítear mná a ráthú; á thabhairt chun suntais nach mór do na hionstraimí thuasluaite na cearta a bhunaítear i gcomhaontuithe comhchoiteanna a urramú;

20.á iarraidh ar an gCoimisiún staonadh ó aon mholadh beartais a chur chun cinn a chuirfeadh le caidreamh oibre forbhásach, nó as a dtiocfadh dírialú uaireanta oibre, laghdú ar thuarastail, ionsaí ar chómhargáil nó príobháidiú seirbhísí poiblí agus slándála sóisialta;

21.á iarraidh go mbeadh beartas iompair phoiblí ann lena gcuirtear comhionannas inscne san áireamh, go háirithe tríd an tseirbhís iompair phoiblí a leathnú agus a fheabhsú agus soghluaisteacht éifeachtach a áirithiú ionas gur féidir le mná obair a fháil agus páirt níos gníomhaí a ghlacadh i margadh an tsaothair (agus cothromaíocht oibre is saoil níos fearr a bhaint amach);

22.á iarraidh ar na Ballstáit a áirithiú nach gcruthófar aon bholgán amhantrach shaorga a bheidh chun dochair do leas na mban;

23.á mheabhrú gur ceart bunúsach í tithíocht leormhaith nach mór a chosaint agus a aithint mar réamhchoinníoll chun cearta bunúsacha eile a fheidhmiú, agus chun rochtain a fháil orthu, agus chun go mbeidh saol lán dínite ag an duine; á chur in iúl gur oth léi, mar thoradh ar idirdhealú agus neamhionannais i dtithíocht, go bhfuil go leor ban ina gcónaí gan dínit i ndálaí éiginnte agus neamhshábháilte, agus go bhfuil siad i mbaol níos mó easpa dídine agus foréigin; á chur i bhfáth go mbíonn tionchar díréireach ag díshealbhuithe éigeantacha agus sáruithe eile ar an gceart chun tithíochta ar mhná agus go dtreisítear leo na neamhionannais atá ann cheana, ar bac suntasach iad ar chomhionannas inscne a bhaint amach; á iarraidh ar an gCoimisiún measúnú a dhéanamh ar ghníomhartha reachtacha nua agus iad a mholadh, i gcás inarb iomchuí, chun airgeadrú na margaí tithíochta a mhaolú agus chun stop a chur le hamhantraithe tithíocht a dhéanamh neamh-inacmhainne;

24.á iarraidh ar an gCoimisiún deis a thabhairt d’údaráis áitiúla, lena n-áirítear údaráis bhardasacha, a rialú ar ardáin ar líne chun tithíocht a fháil ar cíos a dhéanamh níos doichte; á iarraidh ar na Ballstáit soláthar agus rogha na tithíochta poiblí atá ar fáil a mhéadú agus aghaidh a thabhairt ar thionchar na n-arduithe ar rátaí úis arb é boilsciú is cúis leo;

25.á iarraidh ar an gCoimisiún tathant ar na Ballstáit soláthairtí fuinnimh a choimirciú i limistéir atá i bhfad ó lárionaid uirbeacha ionas go mbeidh na dálaí íosta compoird do mhná agus do theaghlaigh ar fáil i limistéir thuaithe;

26.á thabhairt chun suntais gur féidir an t-ualach a chuireann luaineacht sna margaí fuinnimh ar na tomhaltóirí is leochailí a laghdú go suntasach trí fheabhas a chur ar éifeachtúlacht fuinnimh foirgneamh;

27.á iarraidh ar chuideachtaí fuinnimh cur chuige comhréireach a ghlacadh chun úsáideoirí a dhícheangal ón soláthar cumhachta, agus riachtanais, dúshláin agus deacrachtaí eile na mban, na máithreacha singile, na mban faoi mhíchumas, na mban scothaosta, na gcailíní, agus na mban atá ina gcónaí i limistéir thuaithe agus intíre á gcur san áireamh le linn géarchéim costais maireachtála, ar gné bhunúsach den ghéarchéim fuinnimh í;

28.á iarraidh ar AE agus ar a Bhallstáit gné na hinscne agus gné thrasnach a chomhtháthú ina sainmhínithe ar an mbochtaineacht fuinnimh, ionas go mbeifear in ann comparáid agus faireachán a dhéanamh ar an bhfírinne sin ar bhealach a théann níos faide ná an coincheap ginearálta a bhaineann le ‘teaghlaigh leochaileacha’, agus ar an gcaoi sin tuiscint níos fearr a fháil ar na cásanna éagsúla laistigh de gach teaghlach;

29.á iarraidh an athuair ar an gCoimisiún, ar Eurostat agus ar na Ballstáit bailiú sonraí, staidrimh, taighde agus anailíse atá imdhealaithe de réir inscne agus trasnach a fhorbairt agus a fheabhsú tuilleadh, ós rud é gurb é sin an t-aon bhealach chun a áirithiú nach ndéanfar neamhaird ar chásanna sonracha agus go mbeidh siad mar bhonn do cheapadh beartais feasach;

30.á iarraidh ar an gCoimisiún agus ar na Ballstáit sonraí imdhealaithe de réir inscne maidir leis an mbochtaineacht fuinnimh a iarraidh ar Eurostat; á iarraidh, ina leith sin, ar Fhaireachlann AE um an mBochtaineacht Fuinnimh na sonraí sin a úsáid chun táscairí inscne-shonracha a fhorbairt agus a roghnú lena gceadófaí forbairt beartais atá bunaithe ar fhianaise sa réimse sin, i gcomhairle leis an Institiúid Eorpach um Chomhionannas Inscne, le Gníomhaireacht an Aontais Eorpaigh um Chearta Bunúsacha agus leis an nGníomhaireacht Eorpach Comhshaoil;

31.á chreidiúint gur cheart do na Ballstáit níos mó a dhéanamh chun sonraí imdhealaithe de réir inscne a áireamh ina bpleananna náisiúnta athchóirithe foirgneamh chun díriú ar bhealach níos fearr ar bheartais agus ar bhearta;

32.á chur i bhfios go láidir a thábhachtaí atá sé taighde agus nuálaíocht leanúnach atá inscne-íogair a chothú i dtionscal an leictreachais in-athnuaite;

33.á iarraidh ar na Ballstáit agus ar AE fóntais inacmhainne a áirithiú go práinneach do FBManna atá faoi stiúir ban, go háirithe, dóibh siúd a ndéantar idirdhealú trasnach orthu; á aithint gur minic gur cuid ríthábhachtach de tháirgeadh earraí bunriachtanacha iad fiontair atá faoi stiúir ban agus fiontair áitiúla ina bhfuil céatadán ard oibrithe ar mná iad; á chur i bhfáth nár cheart d’bhanfhiontraithe ualach díréireach amhantraíochta eacnamaíche a ghlacadh orthu féin agus gur cheart rochtain chomhionann a thabhairt dóibh ar na deiseanna a bhaineann leis an aistriú glas, agus an tionchar éagothrom atá aige á mhaolú ag an am céanna;

34.á chur i bhfáth gur cheart prionsabal na córa comhionainne agus prionsabal an phríomhshruthaithe inscne a bheith ag croílár bhunphrionsabal na héifeachtúlachta fuinnimh agus gur cheart iad a léiriú i gcinntí beartais, pleanála agus infheistíochta;

35.á mheabhrú go bhfuil gá le haistriú glas cóir chun géarchéimeanna tromchúiseacha amach anseo agus bochtaineacht mhéadaithe a sheachaint; á mheabhrú, thairis sin, nach mbeidh an t-aistriú glas cothrom go sóisialta ach amháin má áirítear gné na hinscne leis agus má ráthaíonn sé comhionannas deiseanna do mhná agus dóibh siúd a ndéantar idirdhealú trasnach orthu, chomh maith lena gcuimsiú fóinteach sa phróiseas ceaptha beartais; á iarraidh, dá bhrí sin, ar an gCoimisiún comhordaitheoir inscne agus aeráide AE a cheapadh a mbeidh foireann agus cistiú leordhóthanach aige, agus measúnuithe tionchair inscne a thabhairt isteach i mbeartais agus i reachtaíocht uile AE, go háirithe i dtionscnaimh an Chomhaontaithe Ghlais don Eoraip;

36.á mheabhrú go bhfuil sé ríthábhachtach rochtain ar fhuinneamh glas a leathnú agus a inacmhainneacht a chur chun cinn chun forbairt níos cuimsithí agus níos inbhuanaithe a bhaint amach; á aithint, mar gheall ar chostais teicneolaíochta fuinnimh in-athnuaite atá ag titim go tapa agus samhlacha nua gnó, go gcuirtear réitigh fuinnimh ar fáil, a bhfuil an-ghealladh fúthu i leith dlús a chur le rochtain ar fhuinneamh inbhuanaithe do mhná ina n-éagsúlacht uile;

37.á chur i bhfáth go bhfuil ról straitéiseach agus tairbheach ag mná san aistriú glas, ós rud é gur príomhghníomhaithe iad i bhforbairt patrúin tomhaltais agus táirgthe inbhuanaithe atá fónta ó thaobh na héiceolaíochta de, agus i ngnó agus ceapadh beartais ar gach leibhéal; á thabhairt chun suntais gur gá láithreach aitheantas a thabhairt don acmhainneacht a bhaineann leo maidir le fuinneamh inbhuanaithe a chothú agus rannchuidiú le SDGanna iomadúla a bhaint amach;

38.á chur in iúl gur oth léi, de réir na Náisiún Aontaithe, nach mbaintear tearcúsáid as acmhainneacht na mban mar fhiontraithe in earnáil an fhuinnimh; á iarraidh ar an gCoimisiún tacú le banfhiontraithe fuinnimh inbhuanaithe agus ar na Ballstáit na bearnaí idir na hinscní atá ann cheana a dhúnadh agus feabhas a chur ar an rochtain atá acu ar fhaisnéis, teicneolaíocht, earraí agus seirbhísí agus ar mhargaí agus maoiniú go háirithe trí sheirbhísí idirghabhála airgeadais traidisiúnta agus nuálacha, amhail ardáin chomhtháite ghréasánbhunaithe, a neartú;

39.ag moladh rialtais áitiúla/náisiúnta nó cuideachtaí príobháideacha atá ag déanamh sáriarrachtaí chun aghaidh a thabhairt ar ghnéithe sóisialta agus eacnamaíocha na bochtaineachta fuinnimh agus ag tathant orthu leanúint leis an obair sin trí ghné na hinscne a ionchorprú nuair is féidir agus trína áirithiú go mbeidh an teanga/cumarsáid a úsáidtear cuimsitheach ó thaobh inscne de agus go gcuirfear ar fáil in Braille í dóibh siúd a bhfuil gá acu léi;

40.á chur in iúl gur saoth léi go bhfuil mná faoi ghannionadaíocht shuntasach i bpoist tábhachtacha a bhaineann le ceapadh beartais maidir leis an athrú aeráide, leis an aistriú fuinnimh agus leis an gcomhshaol, agus á iarraidh ar AE agus ar na Ballstáit bearta gníomhaíochta dearfacha a dhéanamh amhail cuótaí sealadacha chun ionadaíocht chomhionann agus éagsúil a áirithiú i bpoist chinnteoireachta ar fud institiúidí AE, comhlachtaí rialtais agus údaráis phoiblí ar gach leibhéal rialachais agus comhlachtaí poiblí lena mbaineann; á iarraidh ar na Ballstáit rannpháirtíocht fhóinteach na mban a chur chun cinn i bpleanáil, i mbeartais agus i gcláir atá freagrúil ó thaobh inscne de, lena n-áirítear a bpleanáil fhioscach, agus a áirithiú go gcuirfear tionchair dhifreálacha an athraithe aeráide agus géarchéimeanna fuinnimh ar mhná agus ar fhir san áireamh sna beartais sin;

41.ag tabhairt dá haire gur cheart go mbeadh sé d’aidhm ag na Ballstáit éagothromaíocht idir na hinscní san earnáil tógála agus foirgníochta a laghdú, lena n-áirítear trína bpleananna náisiúnta fuinnimh agus aeráide, chun a áirithiú go mbeidh lucht saothair an Aontais go hiomlán ullamh chun oibriú go gníomhach chun a chuspóirí aeráide a bhaint amach;

42.á chur in iúl gur geal léi, mar phríomhghníomhaireachtaí comhshaoil agus comhionannais inscne i gcóras na Náisiún Aontaithe, go bhfuil UNEP agus Mná na Náisiún Aontaithe tagtha le chéile chun Clár Domhanda a fhorbairt chun Fiontraíocht na mBan maidir le fuinneamh inbhuanaithe a chur chun cinn; á iarraidh ar an gCoimisiún agus ar ghníomhaireachtaí ábhartha AE an clár sin a thabhairt dá n-aire agus cuspóirí fiontraíochta comhchosúla maidir le fuinneamh inbhuanaithe a chur chun cinn laistigh de AE;

43.á chur i bhfios go láidir go bhfuil méadú ag teacht ar a thábhachtaí atá an teicneolaíocht dhigiteach agus ardáin dhigiteacha sa phróiseas foriomlán chun oideachas agus oiliúint a chur ar fáil do mhná agus do chailíní agus in go leor próisis roghnúcháin oibre; á chur in iúl gur oth léi na tionchair dhiúltacha a bhaineann le rochtain mhíchothrom ar an teicneolaíocht, rud a d’fhéadfadh bac a chur ar fhorbairt litearthacht dhigiteach na mban agus cailíní agus á iarraidh ar an gCoimisiún a áirithiú nach ndéanfaidh an bhochtaineacht fuinnimh difear díréireach do mhná agus cailíní ina n-éagsúlacht uile, lena n-áirítear mná singile agus mná scothaosta agus na mná sin atá ina gcónaí i limistéir thuaithe, i limistéir intíre agus i limistéir ina bhfuil baol mór bánaithe;

44.á iarraidh ar an gCoimisiún agus ar na Ballstáit an bhearna idir na hinscní in earnáil an fhuinnimh a laghdú trí dhul i ngleic le tearcionadaíocht ag mná i ngairmeacha ETIEM agus a áirithiú go mbeidh rochtain chomhionann ag mná ar chúrsaí gairmoiliúna agus ar chúrsaí múscailte feasachta in ábhair ETIEM lena n-áirítear iad siúd a bhaineann le héifeachtúlacht fuinnimh agus neamhthuilleamaíocht fuinnimh agus nasc dearfach a chruthú idir eolas a fháil agus scileanna a fhorbairt atá riachtanach do dheiseanna fostaíochta atá ag teacht chun cinn san aistriú digiteach agus glas;

45.á aithint nár comhlíonadh na cuspóirí deiridh maidir le cuimsiú, comhionannas agus cothromaíocht inscne a bhaint amach in earnáil an fhuinnimh go fóill; á iarraidh ar na húdaráis oideachais faoi seach laistigh de na Ballstáit cailíní a spreagadh go háirithe chun spéis a chur in earnáil an fhuinnimh trí steiréitíopaí inscne i roghanna oideachais a chomhrac agus a muinín a chothú maidir leis na scileanna is gá a bheith acu chun a bheith ina bhfostaithe, ina nuálaithe agus ina gceannródaithe in earnáil an fhuinnimh;

46.á chur i bhfáth go bhfuil earnáil an fhuinnimh ar cheann de na tionscail is éagothroime ó thaobh inscne de in AE, agus nach ionann mná agus ach 24 % den lucht saothair EIGE, Gender Equality Index 2023 [Innéacs Comhionannais Inscne 2023]., agus maidir lena idirdheighilt ghairme agus chéimlathach na n-inscní; á iarraidh ar chuideachtaí fuinnimh príobháideacha agus poiblí deireadh a chur le haon chineál idirdhealaithe ar bhonn inscne nó ar aon fhoras eile mar a leagtar amach in Airteagal 21 den Chairt um Chearta Bunúsacha an Aontais Eorpaigh; á chur i bhfáth gur gá dul i ngleic leis na neamhionannais struchtúracha inscne atá fós ann lena mbuanaítear na bacainní ar dhul isteach sa lucht saothair in earnáil an fhuinnimh agus é a choinneáil, lena n-áirítear cearta máithreachais agus atharthachta a urramú agus a chur chun cinn; á chur i bhfios go láidir go bhfuil timpeallachtaí oibre na gcuideachtaí fuinnimh a chuireann comhionannas chun cinn níos tarraingtí dá bhfostaithe uile agus d’fhostaithe ionchasacha;

47.á chur in iúl gur geal léi na tionscnaimh lena gcuirtear mná chun cinn chun bheith ina bhfiontraithe grianfhuinnimh, fuinnimh gaoithe, fuinnimh gheoiteirmigh agus fuinnimh hidrileictrigh, ós rud é go dtéann sé sin chun tairbhe do na mná lena mbaineann agus don phobal i gcoitinne, agus á iarraidh ar na Ballstáit aon bhac a chuireann cosc ar mhná a bheith ag obair sna hearnálacha sin a shainaithint; á iarraidh ar chuideachtaí príobháideacha laistigh d’earnáil an fhuinnimh a áirithiú go gcumhachtófar teicneolaíocht ghrianfhuinnimh, fuinnimh gaoithe, fuinnimh gheoiteirmigh agus fuinnimh hidrileictrigh, agus a nuálaithe baineanna, chun tacú leis an aistriú fuinnimh;

48.ag cur sonrú i bpríomhchuspóirí an Choimisiúin laistigh de Straitéis an Aontais um an nGrianfhuinneamh, lena bhféachtar le córais ghrianfhuinnimh AE a dhéanamh níos iomaíche agus níos athléimní; á aithint go bhfuil grianfhuinneamh, fuinneamh gaoithe, fuinneamh geoiteirmeach agus fuinneamh hidrileictreach ag tabhairt rochtain ar fhuinneamh do níos mó ban, go háirithe i limistéir thuaithe; á thabhairt chun suntais gur gá ábhair imní sábháilteachta na mban a chomhtháthú maidir le húsáid soilsithe agus beartais uirbeacha agus soghluaisteachta á ndearadh agus á bpleanáil d’fhonn spásanna poiblí atá sábháilte agus saor ó chiapadh a chur chun cinn;

49.á iarraidh ar an gCoimisiún agus ar an gComhairle gealltanas a thabhairt maidir le buiséadú inscne agus a áirithiú go gcuirfear i bhfeidhm é maidir le buiséad iomlán AE, agus go gcuirfear moltaí Chúirt Iniúchóirí na hEorpa chun feidhme go hiomlán, lena n-áirítear san athbhreithniú meántéarma ar an gcreat airgeadais ilbhliantúil reatha agus i gcur chun feidhme na Saoráide Téarnaimh agus Athléimneachta;

50.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.