1.á mheabhrú a thábhachtaí atá na meáin shaora maidir leis an daonlathas a chaomhnú, institiúidí poiblí agus príobháideacha a thabhairt chun cuntais agus ligean do shaoránaigh rochtain a fháil ar fhaisnéis atá bunaithe ar fhíricí; á chur i bhfáth a thábhachtaí atá iolrachas na meán agus saoirse iriseoireachta; ag cáineadh go láidir gur socraíodh, in 2022, go raibh an líon is mó dá raibh ann riamh d’iriseoirí atá i bpríosún, agus á iarraidh go ndéanfar an ceartas go hiomlán maidir le marú iriseoirí iniúchta in AE;

2.á iarraidh ar na Ballstáit an Moladh ón gCoimisiún maidir le hiriseoirí agus cosantóirí chearta an duine a bhíonn rannpháirteach i rannpháirtíocht an phobail a chosaint ó imeachtaí cúirte ar follasach go bhfuil siad gan bhunús nó mí-úsáideach, agus go sonrach chun pianbhreitheanna príosúin a bhaint as cásanna clúmhillte, clúmhilleadh a dhíchoiriúlú agus tús áite a thabhairt do nósanna imeachta sibhialta nó riaracháin ina ionad sin; ag tathant ar an gCoimisiún aghaidh a thabhairt ar thromchúis na SLAPPanna arna dtionscain trí imeachtaí coiriúla trí thogra a thíolacadh le haghaidh bearta chun a áirithiú nach féidir clúmhilleadh, leabhal ná béadchaint, ar cionta coiriúla iad i bhformhór na mBallstát, a úsáid le haghaidh SLAPPanna trí ionchúiseamh poiblí nó príobháideach; á chur i bhfáth nach n-úsáidtear SLAPPanna ach aon mhodh amháin chun iriseoirí a chur ina dtost agus á iarraidh ar an gCoimisiún cleachtais eile a imscrúdú tuilleadh agus idirghabháil a dhéanamh; á iarraidh ar pholaiteoirí bagairtí agus ionsaithe i gcoinne iriseoirí a cháineadh go poiblí;

3.á athdhearbhú gur cúis bhuartha di an sárú ar chearta bunúsacha maidir le húsáid Pegasus agus earraí spiaireachta coibhéiseacha chun díriú ar dhaoine aonair agus ar phearsantachtaí ardphróifíle, amhail iriseoirí, blagálaithe, cosantóirí chearta an duine, polaiteoirí, nó gníomhaithe eile; á chur i bhfios go láidir go ndéanann úsáid neamhdhlisteanach earraí spiaireachta ag rialtais náisiúnta difear go díreach agus go hindíreach do shláine na cinnteoireachta, rud a bhaineann an bonn de dhaonlathas AE agus a leagann béim ar an ngá práinneach atá le trédhearcacht agus cuntasacht dhlíthiúil níos fearr i dtionscal an fhaireachais;

4.á iarraidh ar na Ballstáit, go háirithe an Ghréig, an Ungáir, an Pholainn, an Spáinn agus an Chipir, a moltaí faoi seach a leanúint óna tuarascáil maidir le húsáid Pegasus agus earraí spiaireachta faireachais coibhéiseacha; á mheabhrú na moltaí uaithi maidir le comhchaighdeáin AE a leanúint, ós rud é nach féidir cearta aonair a chur i mbaol trí rochtain gan bhac ar fhaireachas a cheadú;

5.ag tathant ar na Ballstáit pleananna gníomhaíochta náisiúnta a tharraingt suas maidir le sábháilteacht iriseoirí, timpeallacht fhabhrach a chruthú do na meáin iolra agus neamhspleácha chun go mbeidh rath orthu agus a ról faire bunriachtanach a fheidhmiú chun rialtais agus gníomhaithe eile a thabhairt chun cuntais;

6.á mheabhrú gur gá an trádáil in earraí spiaireachta, agus úsáid na n-earraí spiaireachta sin, a rialú go docht; á chur i bhfios go láidir nach mór úsáid earraí spiaireachta a údarú i gcásanna eisceachtúla agus sonracha amháin i ndáil le himscrúduithe ar liosta teoranta agus dúnta de choireanna tromchúiseacha atá sainithe go soiléir agus go beacht, nach mór údar a bheith leis ar bhonn cás ar chás, an Chairt agus dlí ábhartha eile de chuid an Aontais a chomhlíonadh, agus ordú ex ante a fháil ó údarás breithiúnach neamhspleách neamhchlaonta ag a bhfuil bearta ceartaitheacha éifeachtacha, aitheanta agus inrochtana; á chur i bhfáth nach mór d’údarás maoirseachta neamhspleách ex post grinnscrúdú a dhéanamh ar an bhfaireachas spiaireachta uile, nach mór dó a áirithiú go ndéanfar aon fhaireachas údaraithe i gcomhréir le cearta bunúsacha agus i gcomhréir leis na coinníollacha arna leagan amach ag an gCúirt Bhreithiúnais, ag an gCúirt Eorpach um Chearta an Duine (ECtHR) agus ag Coimisiún na Veinéise; á áitiú go dtabharfaí rochtain do dhaoine aonair a ndírítear orthu le hearraí spiaireachta ar leigheas dlí fíor agus fiúntach;

7.á chur i bhfáth go bhfuil an t-éilliú ar neamhréir le luachanna an daonlathais agus an smachta reachta toisc go ndéanann sé neamhionannais a dhoimhniú agus muinín na saoránach as dea-rialachas a laghdú; á chur in iúl gur cúis mhór bhuartha di an méadú atá ag teacht ar an éilliú i roinnt mBallstát, go háirithe cásanna a bhaineann le hoifigigh ardleibhéil agus polaiteoirí; á athdhearbhú go gcáineann sí na cásanna éillithe líomhnaithe a bhaineann le Feisirí reatha agus iar-Fheisirí de Pharlaimint na hEorpa; á chur i bhfios go láidir, i bhfianaise an mhéid sin, gur glacadh na leasuithe ar a Rialacha Nós Imeachta arb é is aidhm dóibh a sláine, a neamhspleáchas agus a cuntasacht a neartú; á chur in iúl gur cúis bhuartha di leibhéil éagsúla chur chun feidhme chreat frithéillithe AE sna Ballstáit; á iarraidh nach mór gurb é neamhfhulaingt ar éilliú an riail; á iarraidh go mbunófaí comhlacht eitice neamhspleách; á iarraidh ar na Ballstáit a áirithiú go ndéanfar an Treoir maidir le Cosaint do Sceithirí a chur chun feidhme go hiomlán Treoir (AE) 2019/1937 ó Pharlaimint na hEorpa agus ón gComhairle an 23 Deireadh Fómhair 2019 maidir le cosaint daoine a thuairiscíonn sáruithe ar dhlí an Aontais (IO L 305, 26.11.2019, lch. 17).;

8.á chur i bhfáth gur príomh-chomhpháirteanna den smacht reachta iad neamhspleáchas breithiúnach agus seiceálacha agus ceartúcháin éifeachtacha, ar féidir leo a bheith éagsúil ó Bhallstát go Ballstát; á thabhairt chun suntais go bhfuil ábhair imní thromchúiseacha fós ann maidir leis an smacht reachta agus neamhspleáchas na mbreithiúna i roinnt Ballstát; ag cáineadh aon iarrachtaí a dhéanann rialtais na mBallstát tionchar polaitiúil nó rialú a imirt ar chinnteoireacht neamhspleách na mbreithiúna, go díreach nó trí mhodhanna eagraíochtúla;

9.ag tacú le straitéis AE a chruthú chun gníomhaíocht nithiúil agus chomhordaithe a áirithiú ar leibhéal AE, lena n-áirítear trí shásra cosanta a chruthú do chosantóirí chearta an duine san Eoraip, ag tógáil ar na samplaí i mbeartas eachtrach AE, chun cosc, cúnamh díreach agus cuntasacht a áirithiú;

10.ag tacú le húsáid na Saoráide Téarnaimh agus Athléimneachta agus na gcoinníollacha cothrománacha cumasúcháin chun cistiú AE a chalcadh chun an t-éilliú agus an cúlú ar an smacht reachta sna Ballstáit a chomhrac; á chur i bhfáth nár cheart cistí atá srianta trí bhearta coinníollachta éagsúla a scaoileadh go dtí go gcomhlíonfar na príomhchoinníollacha cumasúcháin; ag tathant ar na Ballstáit na bearta iomchuí a thabhairt chun críche chun na garspriocanna a leagtar amach ina bpleananna téarnaimh agus athléimneachta faoi seach a bhaint amach; á iarraidh ar an gComhairle Eorpach gníomhú agus a chinneadh cibé acu an ndearna nó nach ndearna an Ungáir sáruithe tromchúiseacha agus leanúnacha ar luachanna AE faoi Airteagal 7(2) CAE; á chur in iúl gur saoth léi go mór ceap milleáin a bheith á dhéanamh go córasach ag údaráis na hUngáire ar phobal LADTIAI+; á chur i bhfios go láidir go gcomhroinneann an Chomhairle an fhreagracht as na luachanna a chumhdaítear in Airteagal 2 CAE a chosaint agus go mbeadh iarmhairtí fadtéarmacha agus díobhálacha a d’fhéadfadh a bheith ann mura ndéanfaí amhlaidh; á áitiú go n-urramófar ról agus inniúlachtaí na Parlaiminte;

11.á chur in iúl gur saoth léi go bhfuil roinnt Ballstát ag cur síneadh le staid na mbeart éigeandála thar a bhfuil riachtanach agus comhréireach, agus ag iarraidh reachtaíocht a ghlacadh faoi deifir gan comhairliúchán cuí;

12.á athdhearbhú go bhfuil géarghá le sásra AE maidir leis an daonlathas, an smacht reachta agus cearta bunúsacha a bhunú agus ag tathant ar an gCoimisiún agus ar an gComhairle dul i mbun caibidlíochta láithreach leis an bParlaimint maidir leis an gcomhaontú sin;

13.á chur in iúl gur geal léi gur thug an Chúirt Bhreithiúnais isteach craoltóireacht agus beoshruthú in 2022 chun rochtain phoiblí pháirteach ar a gníomhaíocht bhreithiúnach a éascú;

14.á chur in iúl gur cúis mhór bhuartha di na bagairtí méadaitheacha ar an tsaoirse comhlachais, cainte agus comhthionóil; á athdhearbhú nach féidir an ceart chun comhthionóil shíochánta a shrianadh ach amháin nuair a fhoráiltear dó sin leis an dlí agus más gá agus más comhréireach é chun leas ginearálta arna aithint ag an Aontas nó cearta agus saoirsí daoine eile a chosaint; ag cáineadh, i gcásanna áirithe, an úsáid a bhaineann údaráis forfheidhmithe dlí as idirghabháil fhoréigneach agus dhíréireach le linn agóidí síochánta agus ag cáineadh cásanna ollghabhálacha lánroghnacha agóideoirí ionchasacha; ag moladh do na húdaráis náisiúnta ábhartha imscrúduithe trédhearcacha, neamhchlaonta, neamhspleácha agus éifeachtacha a áirithiú ar úsáid amhrasta nó líomhnaithe fornirt dhíréirigh; á iarraidh ar na Ballstáit cleachtais mhalartacha a úsáid chun an t-ord poiblí a choinneáil ar bun, ar cleachtais iad a bhfuil sé léirithe cheana féin go bhfuil siad éifeachtach i mBallstáit eile;

15.ag cur béim ar an bhfíoras, chun an ceart chun saoirse chun tuairimí a nochtadh agus faisnéis a fháil, ar ceart bunúsach é d’aon daonlathas, a áirithiú, nach mór faisnéis a bheith inrochtana go huilíoch agus éagsúil; ag cur béim ar an bhfíoras nach mór saoirse ealaíne a ráthú; á chur i bhfáth gur féidir leis an mbréagaisnéis cur isteach go mór ar fheidhmiú sochaithe daonlathacha, geilleagar agus córas polaitiúil; á mheabhrú gur gá litearthacht sna meáin agus litearthacht dhigiteach a áireamh san oideachas sibhialta chun leathadh na bréagaisnéise a chomhrac; ag athdhearbhú a moltaí bearta éifeachtacha a dhéanamh chun dul i ngleic leis an mbréagaisnéis ó chumhachtaí eachtracha mailíseacha, go háirithe i bhfianaise na dtoghchán Eorpach atá ar na bacáin; á chur i bhfios go láidir go bhfuil timpeallacht meán neamhspleách agus iolraíoch, ar líne agus as líne araon, fíor-riachtanach chun an bhréagaisnéis agus an bholscaireacht a chomhrac go héifeachtach, agus nach mór, dá bhrí sin, é a chur chun cinn, lena n-áirítear trí ghníomhaíocht éifeachtach i gcoinne chomhchruinnithe na meán;

16.á chur i bhfáth, faoi dhlí an Aontais, nach mór d’údaráis agus/nó comhlachtaí rialála náisiúnta a bheith neamhspleách ó thaobh feidhme ar a rialtas agus nár cheart dóibh aon treoracha a lorg ná a ghlacadh ó aon chomhlacht eile; á thabhairt dá haire go bhfuil neamhspleáchas polaitiúil rialáil agus maoirseacht na meán ag na Ballstáit agus ag an gCoimisiún, cosaint an neamhspleáchais eagarthóireachta ar fud AE, cosaint iriseoirí ar fhaireachas agus cosaint foinsí iriseoireachta ríthábhachtach; á iarraidh, ina leith sin, go nglacfaí gníomh láidir Eorpach um shaoirse na meán chun neamhspleáchas, iolrachas agus saoirse na meán ar fud AE a ráthú, lena n-áiritheofar trédhearcacht úinéireachta agus maoinithe;

17.á chur i bhfios go láidir go bhfuil ról ríthábhachtach ag eagraíochtaí na sochaí sibhialta (ESSanna) maidir le saoránacht ghníomhach, cearta bunúsacha agus rannpháirtíocht dhaonlathach san Eoraip a chur chun cinn; ag tathant ar an gCoimisiún straitéis a thíolacadh agus íoschaighdeáin a bhunú chun ESSanna a chosaint sna Ballstáit uile chun timpeallacht rialála agus pholaitiúil a chur chun cinn atá saor ó éifeachtaí, bagairtí agus ionsaithe athchomhairleacha, chun rochtain inbhuanaithe agus neamh-idirdhealaitheach ar acmhainní a chur ar fáil do ESSanna agus chun tacú lena rannpháirtíocht in idirphlé sibhialta agus rannpháirtíocht i gceapadh beartas; á chur in iúl gur saoth léi go bhfuil staid chosantóirí chearta an duine in AE ag dul in olcas go mór le blianta beaga anuas; ag tathant ar an gCoimisiún agus ar na Ballstáit na bearta is gá a dhéanamh chun a áirithiú go mbeidh cosantóirí chearta an duine in ann oibriú saor ó bhac agus neamhshláine;

18.á mheabhrú, faoi Airteagal 6 den Chairt, go bhfuil an ceart chun saoirse agus slándála ag gach duine, rud a chiallaíonn gur cheart gach duine in AE a chosaint ar ghabháil neamhdhleathach agus threallach; á iarraidh ar na Ballstáit cloí leis an Moladh ón gCoimisiún maidir le cearta nós imeachta daoine atá faoi dhrochamhras agus daoine atá cúisithe chun dálaí coinneála a fheabhsú agus, dá bhrí sin, leibhéal níos airde cosanta a áirithiú don cheart chun saoirse agus slándála;

19.ag cáineadh an mhéadaithe atá tagtha ar an idirdhealú reiligiúnach nó creideamh agus ar theagmhais chiníocha in AE; á iarraidh ar an gCoimisiún agus ar na Ballstáit gníomhaíocht chinntitheach a dhéanamh ina leith sin, lena n-áirítear ar an leibhéal idirnáisiúnta; á mheabhrú, faoi Airteagal 10 den Chairt, go bhfuil an ceart chun saoirse smaointeoireachta, coinsiasa agus reiligiúin ag gach duine; á chur in iúl gur saoth léi gur minic nach ndéantar teagmhais idirdhealaithe agus coireanna ciníocha agus seineafóibeacha a thuairisciú do na húdaráis, rud a fhágann go mbíonn saoirse ó phionós de facto ann; á chur in iúl gur oth léi nach ndearna na Ballstáit uile an cinneadh réime maidir le cineálacha agus léirithe áirithe ciníochais agus seineafóibe a chomhrac trí bhíthin an dlí choiriúil a thrasuí go hiomlán;

20.á chur in iúl gur cúis bhuartha di an méadú atá ag teacht ar líon na dteagmhas foréigin póilíneachta i gcoinne phobal na Romach; á iarraidh ar na Ballstáit imscrúdú dian a dhéanamh ar na teagmhais sin chun a áirithiú nach mbeidh aon saoirse ó phionós ann as bearta diansmachta, foréigneacha i gcoinne daoine nó pobail Romacha a thabhairt isteach agus/nó a chur chun feidhme; á iarraidh, thairis sin, ar na Ballstáit aghaidh a thabhairt ar thaifeadtaí póilíneachta, tuairisciú, ionchúiseamh agus breithiúnais chúirte claonta agus ar rochtain neamhleor na Romach ar cheartas;

21.á chur i bhfios go bhfuil an ceart go ndéanfar sonraí pearasanta a chosaint ag éirí níos tábhachtaí mar thoradh ar shonraí a dhéanamh den saol laethúil agus ar scannail sonraí; á athdhearbhú gur cúis imní di cur i bhfeidhm míchothrom an Rialacháin Ghinearálta maidir le Cosaint Sonraí; ag tacú leis na tionscnaimh chun an próiseas reachtach i ndáil le creat rialála AE maidir leis an intleacht shaorga a neartú lena bhforáiltear do choimircí láidre do chearta bunúsacha;

22.ag cáineadh go láidir na sáruithe forleathana ar chearta bunúsacha agus an úsáid a bhaintear as foréigean díréireach ag teorainneacha an Aontais i gcoinne imirceach, lena n-áirítear dídeanaithe, amhail coinneáil threallach, dálaí maireachtála mídhaonna agus easpa rochtana ar chúram sláinte, filleadh neamhdhleathach agus brú siar foréigneach; á chur in iúl gur cúis mhór bhuartha di na Ballstáit a chódaíonn úsáid brú siar ina ndlí náisiúnta; ag cáineadh na ndlíthe uile sna Ballstáit a bhaineann an bonn de chosaint éifeachtach chearta an duine do dhídeanaithe, d’iarrthóirí tearmainn agus d’imircigh ar an talamh agus ar muir, chomh maith le coiriúlú oibrithe daonnúla agus gníomhaithe daonnúla; á thabhairt chun suntais gur leanaí iad beagnach trian d’iarrthóirí tearmainn agus á athdhearbhú nár cheart coinneáil inimirce leanaí a cheadú;

23.á iarraidh ar AE agus ar na Ballstáit a áirithiú go gcuirfear sásraí maoirseachta éifeachtacha i bhfeidhm chun comhlíonadh na gceart bunúsach ag na teorainneacha seachtracha a áirithiú, lenar cheart faireachán ar ghníomhaíochtaí faireachais teorann a chumhdach freisin; á iarraidh, thairis sin, ar an gCoimisiún agus ar na Ballstáit a áirithiú go gcuirfear na daoine aonair a stóráiltear a gcuid sonraí i mbunachair sonraí chórais faisnéise mórscála an Aontais ar an eolas faoina gcearta agus go mbeidh rochtain acu ar na leigheasanna atá ar fáil;

24.á chur in iúl gur saoth léi go mór básanna iomadúla dídeanaithe agus imirceach ar muir ar minic iad ina n-íospartaigh gáinneála ar dhaoine agus ar gá dóibh aghaidh a thabhairt ar íde mhídhaonna tháireach gan aird ar bith a thabhairt ar a sábháilteacht; ag athdhearbhú na hoibleagáide faoi dhlí idirnáisiúnta na farraige cúnamh a thabhairt do dhaoine atá i nguais agus á iarraidh go práinneach go ndéanfaí buanoibríochtaí comhordaithe cuardaigh agus tarrthála le díbhordáil ghasta, agus go ndéanfaidh na Ballstáit gach beart is féidir chun beatha daoine atá i mbaol ar muir a shábháil; á iarraidh go n-urramófar ceart chun tearmainn gach duine a tarrtháladh ar muir, trí mheasúnú a dhéanamh ar imthosca aonair ar bhonn cás ar chás;

25.á thabhairt dá haire go n-úsáideann roinnt Ballstát an tslándáil náisiúnta mar ina dheitéarmanant do bheartais inmheánacha, amhail an imirce; á chur i bhfáth nach mór aon bhearta a dhéantar ar bhonn na slándála náisiúnta a bheith riachtanach agus comhréireach, agus nár cheart dóibh an bonn a bhaint de na cearta a ráthaítear leis an gCairt; á mheabhrú go bhforáiltear le hAirteagal 19 den Chairt do chosaint i gcás ina dtarlaíonn aistriú, díbirt nó eiseachadadh trí ionnarbadh comhchoiteann a thoirmeasc agus, dá bhrí sin, go n-éilítear measúnuithe aonair leis agus go dtoirmeasctar diúltú d’iarratais ar chosaint idirnáisiúnta atá bunaithe ar náisiúntacht shonrach amháin;

26.á chur in iúl gur geal léi gníomhachtú Threoir an Aontais um Chosaint Shealadach (TPD) Treoir 2001/55/CE ón gComhairle an 20 Iúil 2001 maidir le caighdeáin íosta chun cosaint shealadach a thabhairt i gcás insreabhadh ollmhór daoine easáitithe agus maidir le bearta lena gcuirtear cothromaíocht iarrachtaí chun cinn idir Ballstáit agus na daoine sin á nglacadh isteach acu agus na hiarmhairtí lena mbaineann á mbraistint acu (IO L 212, 7.8.2001, lch. 12). tar éis an chogaidh san Úcráin, a bhfuil sé mar aidhm léi rochtain ar chosaint a áirithiú do dhídeanaithe agus d’iarrthóirí tearmainn d’aon tionscnamh; á mheabhrú nach mór cur chuige inscne a chur san áireamh sa rochtain ar sheirbhísí cóiríochta, fostaíochta, oideachais, cúraim sláinte agus leasa shóisialta faoi TPD; á chur in iúl gur saoth léi an chóir neamhionann, an t-idirdhealú ciníoch agus an foréigean a bhíonn os comhair daoine nach Úcráinigh iad atá ag teitheadh ón gcoinbhleacht, go háirithe daoine de chine daite agus daoine LADTIA+; á chur in iúl gur saoth léi na caighdeáin dhúbailte maidir le himircigh agus dídeanaithe in AE agus á iarraidh go gcuirfear deireadh leis an staid sin;

27.á chur in iúl gur geal léi an moladh ó Choiste Airí Chomhairle na hEorpa maidir le cearta na mban agus na gcailíní ar imircigh, dídeanaithe agus iarrthóirí tearmainn iad a chosaint, á iarraidh ar na Ballstáit bearta a dhéanamh chun idirdhealú i gcoinne na mban sin a chosc, lena n-áirítear trí rochtain ar fhostaíocht agus ar chúram sláinte gnéis agus atáirgthe a chur chun cinn, agus rochtain ar sheirbhísí agus ar cheartas a éascú do mharthanóirí foréigin inscnebhunaithe Comhairle na hEorpa, ‘Moladh CM/Rec(2022)17 ó Choiste na nAirí chuig na Ballstáit maidir le cearta na mban agus na gcailíní arb imircigh, dídeanaithe agus iarrthóirí tearmainn iad a chosaint’, an 20 Bealtaine 2022.;

28.á thabhairt dá haire, agus é ina ábhar imní di, go bhfuil daonra mór daoine gan stát in AE, go háirithe leanaí a rugadh gan stát; á iarraidh ar an gCoimisiún straitéis chuimsitheach agus plean gníomhaíochta cuimsitheach a fhorbairt chun aghaidh a thabhairt ar dhaoine gan stát san Aontas agus chun iad a chosaint ar dhíbirt; á iarraidh ar na Ballstáit daoine gan stát a shainaithint, a aithint agus a chosaint i gceart, agus aghaidh a thabhairt ar leochaileachtaí sonracha daoine gan stát;

29.á iarraidh ar an gCoimisiún a áirithiú go n-urramófar an ceart chun neamh-idirdhealaithe agus chun córa comhionainne ar fud AE; á chur in iúl gur saoth léi go bhfuil bac sa Chomhairle ó 2008 i leith ar an togra maidir leis an treoir chothrománach frith-idirdhealaithe; á mheas nach mór le haon nuashonrú a dhéanfaidh an Coimisiún ar an togra sin cur le seasamh na Parlaiminte, aghaidh a thabhairt ar idirdhealú trasnach agus toirmeasc sainráite a chur ar idirdhealú ar aon teaglaim foras a liostaítear sa Chairt; á chur in iúl gur oth léi go ndearna an Chomhairle neamhaird de na hiarrataí sin agus ag tathant ar an gComhairle iad a chomhtháthú ina sainordú agus gach gníomhaíocht iomchuí a dhéanamh chun an t-idirdhealú in AE a chomhrac;

30.á iarraidh ar an gCoimisiún faireachán a dhéanamh ar chur chun feidhme phleananna gníomhaíochta náisiúnta na mBallstát in aghaidh an chiníochais agus plean gníomhaíochta frithchiníochais AE agus obair leantach chuí a áirithiú ina leith; ag tathant, thairis sin, ar an gCoimisiún an frithchiníochas agus an frith-idirdhealú a phríomhshruthú i mbeartais uile AE; á iarraidh ar uachtaránachtaí na Comhairle atá ar na bacáin machnamh dáiríre a dhéanamh ar fhoirmíocht de chuid na Comhairle a bhunú maidir le comhionannas inscne agus comhionannas i gcoitinne;

31.á iarraidh ar an gCoimisiún agus ar na Ballstáit dul i ngleic leis an idirdhealú ciníoch i ngach réimse den tsochaí, agus béim ar leith á leagan ar an oideachas agus ar leithscaradh scoile a chosc, trí bhearta reachtacha agus beartais éifeachtacha, sna Ballstáit agus i dtíortha an mhéadaithe araon;

32.á mheabhrú, maidir leis an digiteáil, gur gá aird ar leith a thabhairt ar chlaontachtaí idirdhealaitheacha atá á dtabhairt isteach i dteicneolaíochtaí nua agus gur gá a cheangal ar fhorbróirí agus ar imlonnóirí faisnéis atá inrochtana go poiblí a chur ar fáil maidir leis an gcaoi a ndéantar na córais sin a oiliúint; á iarraidh ar an gCoimisiún agus ar na Ballstáit bearta a chur i bhfeidhm chun teicneolaíochtaí nua, lena n-áirítear intleacht shaorga, a chosc ó idirdhealú, neamhionannais atá ann cheana agus bochtaineacht a ghéarú; á iarraidh ar an gCoimisiún agus ar na Ballstáit a áirithiú go mbeidh córais intleachta saorga á dtreorú ag prionsabail na trédhearcachta, na hinmhínitheachta, na cothroime agus na cuntasachta, agus go gcuirfear measúnuithe tionchair ar chearta bunúsacha i bhfeidhm; á iarraidh, thairis sin, ar an gCoimisiún agus ar na Ballstáit dul i ngleic leis na bearnaí inscne agus éagsúlachta in earnálacha na teicneolaíochta faisnéise agus cumarsáide (TFC) agus na heolaíochta, na teicneolaíochta, na hinnealtóireachta agus na matamaitice (STEM), go háirithe i bhforbairt teicneolaíochtaí nua, agus go háirithe i bpoist chinnteoireachta;

33.á mheabhrú a thábhachtaí atá sé go mbeadh leanaí ar de mhionlaigh náisiúnta iad in ann scoileanna tiomnaithe a aimsiú a chuireann oideachas ar fáil ina dteanga féin; ag moladh go n-áireofaí ionadaithe mionlaigh náisiúnta i bpróisis chinnteoireachta a mbíonn tionchar acu ar a gcórais oideachais;

34.á mheabhrú go bhfuil foréigean inscnebhunaithe an-fhorleathan i ngach Ballstát ar fud an Aontais; ag cáineadh go láidir an chúlú tapa ar chearta na mban agus LADTIA+ i roinnt Ballstát; ag cáineadh go láidir go bhfuil diúltú rochtana ar sheirbhísí ginmhillte sábháilte agus dlíthiúla toisc gur cineál foréigin inscnebhunaithe é; á thabhairt chun suntais gur rialaigh ECtHR go sáraíonn dlíthe sriantacha maidir le ginmhilleadh agus easpa cur chun feidhme ceart na mban chun neamhspleáchais agus sláine coirp; á athdhearbhú go gcáineann sí dlí na Polainne lena bhforchuirtear toirmeasc iomlán nach mór ar ghinmhilleadh; á mheabhrú nár cheart géarleanúint a dhéanamh ar shaoránaigh a chabhraíonn le daoine rochtain a fháil ar sheirbhísí ginmhillte nuair nach bhfuil siad ar fáil gan bhac nó go dleathach; ag athdhearbhú a hiarrata go n-áireofaí an ceart chun ginmhillte sa Chairt;

35.á chur in iúl gur geal léi an togra ón gCoimisiún le haghaidh treoir chun foréigean in aghaidh na mban agus foréigean teaghlaigh a chomhrac agus á iarraidh go dtabharfar an chaibidlíocht chun críche go pras agus go n-áireofaí foréigean inscnebhunaithe ar liosta choireanna AE; á thabhairt chun suntais gur cheart go ráthófaí leis an treoir sin na hoibleagáidí a leagtar síos i gCoinbhinsiún Iostanbúl mar íoschaighdeán agus gur cheart go mbeadh sé mar aidhm léi na caighdeáin sin a neartú chun an leibhéal cosanta a mhéadú; á chur in iúl gur geal léi gur dhaingnigh AE Coinbhinsiún Iostanbúl a tháinig i bhfeidhm an 1 Deireadh Fómhair 2023; á iarraidh ar na Ballstáit eile an Coinbhinsiún a dhaingniú go pras chun mná a chosaint ar fhoréigean;

36.á chur i bhfios go láidir go leanann daoine faoi mhíchumas, go háirithe mná faoi mhíchumas, de bheith ag tabhairt aghaidh ar idirdhealú iolrach agus trasnach bunaithe ar a míchumas, a n-inscne, a gcine, a n-eitneacht, a n-aois, a reiligiún nó a gcreideamh, a ngnéaschlaonadh, a stádas imirce nó a gcúlra socheacnamaíoch; á chur i bhfáth go bhfuil mná agus cailíní faoi mhíchumas go háirithe faoi réir foréigean inscnebhunaithe, lena n-áirítear foréigean fisiciúil, gnéasach, síceolaíoch agus eacnamaíoch; á iarraidh ar an gCoimisiún agus ar na Ballstáit a áirithiú go ndéanfar sásraí chun foréigean in aghaidh daoine faoi mhíchumas a thuairisciú, chomh maith le seirbhísí tacaíochta d’íospartaigh, a chur i bhfeidhm agus go mbeidh siad inrochtana;

37.á chur i bhfáth go bhfuil cearta an linbh uilíoch agus gur cheart go mbeadh na cearta céanna ag gach leanbh, saor ó idirdhealú, amhail an ceart chun tuismíocht a aithint, lena n-áirítear do lánúineacha comhghnéis; á chur in iúl gur geal léi an togra ón gCoimisiún le haghaidh rialachán maidir le dlínse, an dlí is infheidhme, aithint cinntí agus glacadh ionstraimí barántúla in ábhair tuismíochta agus maidir le Deimhniú Eorpach Tuismitheoireachta a chruthú chun cearta gach linbh a chosaint trína áirithiú go n-aithneofar i mBallstáit uile an Aontais a naisc tuismitheora, lena n-áirítear, go háirithe, tuismitheoirí comhghnéis, atá bunaithe i mBallstát amháin;

38.á iarraidh ar na Ballstáit steiriliú éigeantais a dhéanamh inphionóis mar chion coiriúil; ag athdhearbhú a seasaimh gur cheart steiriliú éigeantais mar chion coiriúil faoi Airteagal 83(1) CFAE a áireamh sa treoir maidir le foréigean in aghaidh na mban agus foréigean teaghlaigh a chomhrac;

39.á mheabhrú gur samplaí antoisceacha den idirdhealú iad coireanna fuatha agus fuathchaint arna spreagadh ag ciníochas, seineafóibe nó éadulaingt reiligiúnach, nó ag éadulaingt nó claontacht bunaithe ar mhíchumas, gnéaschlaonadh, féiniúlacht inscne, léiriú inscne nó saintréithe gnéis duine; á thabhairt dá haire go bhfuil sé de dhualgas ar na Ballstáit an choireacht fuatha a chomhrac agus a imscrúdú, pionós a ghearradh ar dhéantóirí coire agus bearta coisctheacha a dhéanamh; á chur i bhfáth gur gá d’údaráis forfheidhmithe dlí coireanna fuatha a thaifeadadh go hiomchuí chun tuiscint níos fearr a fháil ar chineál agus ar leitheadúlacht an fheiniméin agus ar a thionchar ar íospartaigh, agus chun aghaidh a thabhairt ar na bunchúiseanna atá leis;

40.á chur in iúl gur geal léi an tionscnamh ón gCoimisiún chun liosta na gcoireanna AE in Airteagal 83(1) CFAE a leathnú chun an fhuathchaint agus coireanna fuatha a chumhdach, agus béim á leagan ar an ngá atá le freagairt láidir AE ó thaobh dlí coiriúil de ar an bhfuathchaint agus ar an gcoireacht fuatha a áirithiú; á chur in iúl gur saoth léi go mór gur cuireadh moill ar fhormheas an tionscnaimh, agus á iarraidh an athuair ar an gComhairle oibriú go dícheallach i dtreo comhthola;

41.á mheabhrú gur cheart, le reachtaíocht AE maidir le fuathchaint agus coireanna fuatha, dínit an duine a chosaint go huilíoch agus an fuath agus an éadulaingt a chomhrac gan beann ar a n-inspreagadh, agus béim ar leith á leagan ar dhaoine, ar ghrúpaí agus ar phobail a ndírítear orthu; ag cáineadh go láidir gach cineál fuathchainte agus feachtais chlúmhillte sna meáin phoiblí i gcoinne iriseoirí, polaiteoirí, oifigigh phoiblí, gníomhaithe agus gníomhaithe eile;

42.á iarraidh ar an gCoimisiún faireachán éifeachtach a dhéanamh ar chur chun feidhme na mbeart atá sna straitéisí comhionannais éagsúla, amhail Straitéis AE maidir le Comhionannas LADTIA+ 2020-2025, Straitéis AE maidir le Comhionannas Inscne 2020-2025, an Straitéis maidir le Comhionannas agus Cuimsiú na Romach, agus plean gníomhaíochta an Aontais maidir le frithchiníochas 2020-2025; ag tathant ar na Ballstáit pleananna gníomhaíochta náisiúnta i gcoinne an chiníochais a tharraingt suas agus a chur chun feidhme go pras;

43.á chur in iúl gur geal léi gur agair an Coimisiún, den chéad uair, sárú aonair ar Airteagal 2 CAE nuair a rinne sé ‘dlí cosanta leanaí’ na hUngáire, a raibh cuspóirí eile á gceilt leis, a tharchur chuig an gCúirt Bhreithiúnais;

44.ag aithint gur cineál eile idirdhealaithe í an bhochtaineacht as a n-eascraíonn sárú ar chearta bunúsacha agus neamhchomhionannas deiseanna chun rochtain a fháil ar earraí agus ar sheirbhísí; á thabhairt chun suntais leochaileacht ar leith leanaí agus an tionchar atá ag an mbochtaineacht orthu agus ar a bhforbairt fhisiceach agus shíceolaíoch; á iarraidh ar an gCoimisiún, ar an gComhairle agus ar na Ballstáit beartais a fhorbairt chun an bhochtaineacht agus an t-eisiamh sóisialta a laghdú, agus cur chuige trasnach á chur san áireamh agus aird ar leith á tabhairt ar dhaoine aonair i staideanna leochaileacha; á chur in iúl gur geal léi gur formheasadh an Ráthaíocht Eorpach do Leanaí, ach á mheas go bhfuil gá le tuilleadh iarrachtaí, go háirithe i réimse na cosanta sóisialta; á iarraidh ar na Ballstáit rochtain chomhionann agus comhionannas deiseanna a ráthú d’oideachas agus d’fhostaíocht ar ardchaighdeán, ós rud é go bhfuil ról ríthábhachtach acu chun cabhrú leis an neamhionannas a mhaolú agus chun daoine a bhaint as an mbochtaineacht;

45.á chur in iúl gur cúis mhór bhuartha di an méadú atá tagtha ar an mbochtaineacht, ar an neamhionannas agus ar an eisiamh sóisialta in AE; á iarraidh ar na Ballstáit dul i ngleic le ‘bochtaineacht mhíosta’ agus deireadh a chur le CBL ar tháirgí sláinteachais phearsanta; á chur i bhfáth go bhfuil iarmhairtí eacnamaíocha fadtéarmacha phaindéim COVID-19 agus an t-ardú ar phraghsanna bia agus fuinnimh tar éis tionchar mór a imirt ar chearta na ndaoine atá ag maireachtáil ar ioncam íseal nó atá i mbochtaineacht, lena n-áirítear ar chaighdeán leordhóthanach maireachtála, ar bhia, ar shláinte, ar thithíocht agus ar shlándáil shóisialta; á iarraidh ar an gCoimisiún agus ar an gComhairle beartais mhaicreacnamaíocha a fhorbairt, ní hamháin faoi threoir an fháis eacnamaíoch, ach faoi threoir caighdeán sóisialta freisin agus á mheabhrú a thábhachtaí atá caighdeáin shóisialta sa Seimeastar Eorpach;

46.á chur in iúl gur geal léi Moladh ón gComhairle an 30 Eanáir 2023 maidir le hioncam íosta leordhóthanach Moladh ón gComhairle an 30 Eanáir 2023 maidir le hioncam íosta leordhóthanach lena n-áirithítear cuimsiú gníomhach (IO C 41, 3.2.2023, lch. 1). lena n-áirithítear cuimsiú gníomhach mar chéim chun tosaigh i gcur chun feidhme phrionsabal 14 de Cholún Eorpach na gCeart Sóisialta; á chur in iúl gurb oth léi, áfach, an easpa beart nithiúil chun idirdhealú struchtúrach i leith grúpaí leochaileacha a shárú; á iarraidh ar na Ballstáit sonraí imdhealaithe a bhailiú maidir le hioncam íosta do na grúpaí sin;

47.á chur i bhfáth gur próiseas idirdhisciplíneach é an digitiú a mbíonn tionchar aige ar rochtain ar gach seirbhís, go háirithe cúram sláinte, agus ar fheidhmiú na gceart bunúsach; á chur i bhfios go láidir gur cheart faireachán agus measúnú a dhéanamh ar an mbochtaineacht dhigiteach in AE i ndáil le rochtain ar sheirbhísí bunriachtanacha agus ar chearta bunúsacha, lena n-áirítear do dhaoine scothaosta, do dhaoine atá ina gcónaí i gceantair iargúlta, do dhaoine atá ag maireachtáil i gcásanna easpa dídine agus do dhaoine Romacha; á mheabhrú go bhfuil oibleagáid ar na Ballstáit, faoin gCoinbhinsiún ar Chearta Daoine atá faoi Mhíchumas, a áirithiú go mbeidh rochtain iomlán ag daoine faoi mhíchumas ar an tsochaí; á mheabhrú gurb ionann andúil theicneolaíoch agus fadhb sláinte poiblí a dhéanann difear go háirithe do mhionaoisigh agus dá sláine coirp agus meabhrach;

48.á thabhairt dá haire nach tráchtearra í an tithíocht, ach gur riachtanas í, agus gur réamhchoinníoll í chun páirt iomlán a ghlacadh sa tsochaí; á iarraidh ar na Ballstáit dlús a chur leis an infheistíocht i dtithíocht shóisialta agus inacmhainne chun deireadh a chur leis an ró-ualach ar chostais tithíochta, go háirithe i measc grúpaí faoi mhíbhuntáiste agus grúpaí leochaileacha, agus chun iomaíocht idir na grúpaí sin a sheachaint;

49.á chur in iúl gur geal léi an t-aitheantas a thug Comhairle na Náisiún Aontaithe um Chearta an Duine an 8 Deireadh Fómhair 2021 don cheart uilíoch chun rochtain a fháil ar thimpeallacht shláintiúil agus inbhuanaithe; á thabhairt chun suntais go bhféadfaidh iarmhairtí tromchúiseacha díobhálacha a bheith ann do dhaoine aonair de dheasca dochar a bheith á dhéanamh don chomhshaol agus mainneachtain roinnt údarás poiblí faisnéis a sholáthar faoi rioscaí tromchúiseacha comhshaoil a bhfuil daoine aonair nochta dóibh; á mheabhrú gur gá caighdeáin AE maidir le cáilíocht an aeir chomhthimpeallaigh a ailíniú go hiomlán leis na treoirlínte is déanaí ón Eagraíocht Dhomhanda Sláinte faoi 2030;

50.á chur in iúl gur geal léi an dul chun cinn a rinneadh ó cuireadh tús an athuair leis an gcaibidlíocht maidir le haontachas AE le ECHR i mí an Mheithimh 2020 agus an comhaontú sealadach maidir leis na dréachtionstraimí aontachais athbhreithnithe ar thángthas air i mí an Mhárta 2023; á iarraidh ar an gCoimisiún agus ar an gComhairle an tsaincheist atá fós gan réiteach maidir le staid ghníomhartha AE i réimse an chomhbheartais eachtraigh agus slándála a réiteach a luaithe is féidir chun an próiseas aontachais a thabhairt chun críche;

51.ag tacú le hobair FRA maidir le hanailís a dhéanamh ar shonraí chun idirdhealú a dhoiciméadú agus á chur in iúl gur geal léi tuilleadh forbairtí sa réimse sin; á chur in iúl gur geal léi na tograí ón gCoimisiún le haghaidh dhá threoir maidir le caighdeáin do chomhlachtaí comhionannais, arb é is aidhm leo cur chun feidhme agus forfheidhmiú rialacha frith-idirdhealaithe AE a áirithiú; á iarraidh ar chomhlachtaí náisiúnta atá ag comhoibriú le FRA sonraí neamhchlaonta a chur ar fáil; á iarraidh ar FRA foinsí breise a cheadú i gcás ina bhfuil ábhair imní thromchúiseacha fós ann maidir le cáilíocht na sonraí;

52.á thabhairt chun suntais a thábhachtaí atá sé tacú leis an gcomhar idir institiúidí AE, na Ballstáit, OLAF agus OIPE agus an comhar sin a neartú; á iarraidh ar an gCoimisiún tuarascáil a thíolacadh, ina ndéanfar measúnú ar an bhféidearthacht agus ar na módúlachtaí síneadh a chur le sainordú OIPE, mar a fhoráiltear in Airteagal 86 CFAE, chun coireanna tromchúiseacha comhshaoil a áireamh a dhéanann dochar do leasanna an Aontais nó a dhéanann difear do chur i bhfeidhm comhsheasmhach bheartais AE a bhaineann le cosaint an chomhshaoil.

53.á iarraidh go mbunófaí FRA mar údarás neamhspleách um chearta an duine, cosúil le hinstitiúidí náisiúnta um chearta an duine agus i gcomhréir le Prionsabail Pháras Chomhthionól Ginearálta na Náisiún Aontaithe 1993, chun beartais agus cleachtais na Cairte a chosaint agus a chur chun cinn ó institiúidí, comhlachtaí, oifigí agus gníomhaireachtaí an Aontais, agus ó na Ballstáit agus dlí AE á chur chun feidhme acu; á mheas go n-éilíonn sé sin bunús dlí sna Conarthaí chun údarás AE um chearta bunúsacha a bhunú, lena gcumhdaítear a neamhspleáchas agus lena dtugtar isteach an gnáthnós imeachta reachtach chun a shainordú a ghlacadh agus a leasú; á iarraidh go mbeidh an t-údarás nua sin i dteideal caingne a thionscnamh faoi Airteagal 263 CFAE ar fhorais go ndearnadh sárú ar an gCairt; á iarraidh go n-áireofaí ina shainordú an chumhacht chun gearáin a láimhseáil agus an comhairliúchán éigeantach a dhéanfaidh an Coimisiún le FRA agus tograí le haghaidh gníomhartha reachtacha nó moltaí a bhfuil tionchar acu ar chearta bunúsacha á n-ullmhú aige;

54.á mheabhrú a thábhachtaí atá cásdlí ábhartha na Cúirte Breithiúnais lena seastar leis an urraim do chearta bunúsacha agus lena ndéantar an smacht reachta a shainiú tuilleadh; á chur in iúl gur cúis bhuartha di diúltú leanúnach roinnt Ballstát breithiúnais intíre, breithiúnais ón gCúirt Bhreithiúnais agus breithiúnais ECtHR a chur chun feidhme, rud a chuireann le creimeadh an smachta reachta; á chur i bhfáth go bhféadfaí sáruithe ar chearta an duine a fhágáil gan leigheas mar thoradh ar neamhchur chun feidhme breithiúnas; á thabhairt chun suntais gurb ionann tosaíocht dhlí AE agus bunchloch dhlíchóras AE; á iarraidh ar an gCoimisiún obair leantach leormhaith a áirithiú i gcás nach gcuirfear an prionsabal sin chun feidhme;

55.á chur i bhfáth go bhfuil ról ag riaracháin náisiúnta agus áitiúla, agus ag parlaimintí na mBallstát agus ag údaráis forfheidhmithe dlí maidir le cearta na Cairte a chur chun cinn agus a chosaint;

56.ag cur sonrú i mbreathnóireacht FRA gur cosúil nach bhfuil rannpháirtíocht struchtúrtha ag na Ballstáit i gcur chun feidhme straitéis an Choimisiúin chun cur i bhfeidhm na Cairte a neartú, amhail sainmhínithe ar spriocanna soiléire, garspriocanna agus amlínte; á iarraidh ar na Ballstáit an straitéis a chur chun feidhme go hiomlán;

57.á mheabhrú go ndéantar an ceart chun páirt a ghlacadh sa saol daonlathach agus an oibleagáid chun a áirithiú go ndéanfar cinntí chomh hoscailte agus chomh gar agus is féidir do na saoránaigh a chosaint faoi na Conarthaí agus go háirithe faoi Airteagal 10 CAE; á iarraidh ar institiúidí AE agus ar na Ballstáit dóthain ama a áirithiú le haghaidh comhairliúchán poiblí agus trédhearcacht agus doiciméid phoiblí a fhoilsiú ar bhealach réamhghníomhach;

58.á threorú dá hUachtarán an rún sin a chur ar aghaidh chuig an gComhairle agus chuig an gCoimisiún.