–ag féachaint don iarraidh ón Leas-Ionchúisitheoir Poiblí i gCúirt Chéadchéime na hAithne go ndéanfaí díolúine Ioannis Lagos a tharscaoileadh, arna tarchur le litir dar dáta an 31 Bealtaine 2023 ag Leas-Ionchúisitheoir Chúirt Uachtarach na Gréige i ndáil le cúisimh choiriúla a d’fhéadfadh a bheith ann (Re. ABM: RB 2022/13-EG: 104-23/3), agus a fógraíodh sa suí iomlánach an 14 Meitheamh 2023,
–tar éis éisteacht a thabhairt do Ioannis Lagos i gcomhréir le Riail 9(6) dá Rialacha Nós Imeachta,
–ag féachaint d’Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh, agus d’Airteagal 6(2) d’Ionstraim an 20 Meán Fómhair 1976 maidir le toghadh Fheisirí de Pharlaimint na hEorpa trí vótáil chomhchoiteann dhíreach,
–ag féachaint do na breithiúnais a thug Cúirt Bhreithiúnais an Aontais Eorpaigh an 21 Deireadh Fómhair 2008, an 19 Márta 2010, an 6 Meán Fómhair 2011, an 17 Eanáir 2013 agus an 19 Nollaig 2019 Breithiúnas ón gCúirt Bhreithiúnais an 21 Deireadh Fómhair 2008, Marra v De Gregorio agus Clemente, C 200/07 agus C-201/07, ECLI:EU:C:2008:579; breithiúnas ón gCúirt Ghinearálta an 19 Márta 2010, Gollnisch v an Pharlaimint, T-42/06, ECLI:EU:T:2010:102; breithiúnas ón gCúirt Bhreithiúnais an 6 Meán Fómhair 2011, Patriciello, C 163/10, ECLI: EU:C:2011:543; breithiúnas ón gCúirt Ghinearálta an 17 Eanáir 2013, Gollnisch v an Pharlaimint, T-346/11 agus T-347/11, ECLI:EU:T:2013:23; breithiúnas ón gCúirt Bhreithiúnais an 19 Nollaig 2019, Junqueras Vies, C-502/19, ECLI:EU:C:2019:1115.,
–ag féachaint do Riail 5(2), do Riail 6(1) agus do Riail 9 dá Rialacha Nós Imeachta,
–ag féachaint don tuarascáil ón gCoiste um Ghnóthaí Dlíthiúla (A9-0027/2024),
A.de bhrí gur thíolaic an Leas-Ionchúisitheoir Poiblí i gCúirt Chéadchéime na hAithne iarraidh go ndéanfaí díolúine pharlaiminteach Ioannis Lagos a tharscaoileadh chun imeachtaí coiriúla a thionscnamh ina choinne ar fhorais ráiteas a phostáil sé ar an idirlíon;
B.de bhrí, an 1 Márta 2022, gur fhoilsigh Ioannis Lagos teachtaireacht ar shuíomh gréasáin a pháirtí a líomhnaítear gurb ionann í agus gríosú poiblí chun foréigin nó fuatha i gcoinne grúpa daoine arna sainmhíniú ar bhonn tionscnamh náisiúnta, reiligiúin nó gnéaschlaonadh de shárú ar Airteagal 1 de Dhlí na Gréige Uimh. 927/1979 arna leasú le Dlíthe na Gréige Uimh. 4285/2014 agus Uimh. 4491/2017;
C.de bhrí, an 2 Márta 2022, gur thug Faireachlann na Gréige de Chomhaontuithe Heilsincí fógra do Chúirt Chéadchéime na hAithne, ar mhaithe le faisnéis agus gníomhaíocht riachtanach, faoin teachtaireacht a phostaigh Ioannis Lagos an lá roimhe sin;
D.de bhrí, an 1 Márta 2022, gur ghlac Ioannis Lagos páirt i vótáil iomlánach i bParlaimint na hEorpa ar an tairiscint i gcomhair rún maidir le ‘fogha na Rúise i gcoinne na hÚcráine’ agus de bhrí, an lá céanna, tar éis na vótála, gur fhoilsigh sé ar shuíomh gréasáin a pháirtí ráiteas dar teideal ‘I will not sell out, nor will I betray my principles and beliefs’[Ní ghéillfidh mé, ná ní dhéanfaidh mé feall ar mo phrionsabail ná ar mo chreidimh], inar mhínigh sé na cúiseanna a bhí lena vótáil;
E.de bhrí, mar gheall ar an ráiteas sin a bheith déanta aige, go líomhnaítear go bhfuil Ioannis Lagos ciontach i ngríosú poiblí chun foréigin agus fuatha i gcoinne grúpa daoine arna sainmhíniú ar bhonn tionscnamh náisiúnta, reiligiúin nó gnéaschlaonadh, ar cion coiriúil é faoi Airteagal 1 de Dhlí na Gréige Uimh. 927/1979 arna leasú le Dlíthe na Gréige Uimh. 4285/2014 agus Uimh. 4491/2017;
F.de bhrí nach pribhléid phearsanta d’Fheisire í díolúine pharlaiminteach, ach is ráthaíocht í ar neamhspleáchas na Parlaiminte ina hiomláine agus a cuid Feisirí;
G.de bhrí nach féidir le Parlaimint na hEorpa ról cúirte a ghlacadh, agus de bhrí nach féidir, i nós imeachta um dhíolúine a tharscaoileadh, Feisire a mheas mar chosantóir;
H.de bhrí go bhforáiltear in Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh nach bhfuil ‘Feisirí Pharlaimint na hEorpa inchurtha faoi aon saghas fiosrúcháin, coinneála ná imeachtaí dlíthiúla i leith tuairimí a thug siad nó vótaí a chaith siad ag comhlíonadh a ndualgas dóibh’;
I.de bhrí go bhféadfaidh ráiteas ó Fheisire lasmuigh de Pharlaimint na hEorpa a bheith ina thuairim arna cur in iúl i gcomhlíonadh a ndualgas, de réir bhrí Airteagal 8 den Phrótacal, i gcás ina bhfuil measúnú suibiachtúil ann a bhfuil baint dhíreach agus fhollasach aige le comhlíonadh dhualgais an Fheisire sin i bParlaimint na hEorpa; de bhrí nach mór, dá bhrí sin, cibé acu an amhlaidh nó nach ea, a chinneadh de réir chineál agus ábhar an ráitis seachas an áit ina ndearnadh é;
J.de bhrí go dtarlaíonn an díospóireacht pholaitiúil a nglacann Feisirí de Pharlaimint na hEorpa páirt inti níos mó agus níos mó lasmuigh d’áitribh na Parlaiminte na laethanta seo, lena n-áirítear ar an idirlíon;
K.de bhrí, i bhfianaise an mhéid sin, gur léir go ndearnadh an ráiteas a d’fhoilsigh Ioannis Lagos ina cháil mar Fheisire de Pharlaimint na hEorpa agus de bhrí gur féidir a mheas gurb ann do nasc díreach soiléir idir an ráiteas atá faoi bhreithniú agus sainordú parlaiminteach Ioannis Lagos;