–wara li kkunsidra t-talba għat-tneħħija tal-immunità ta’ Eva Kaili, imressqa fil-15 ta’ Diċembru 2022 mill-Kap Prosekutur Ewropew, u mħabbra fis-seduta plenarja fid-19 ta’ Jannar 2023,
–wara li sema’ lil Eva Kaili, f’konformità mal-Artikolu 9(6) tar-Regoli ta’ Proċedura tiegħu,
–wara li kkunsidra l-Artikoli 8 u 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea kif ukoll l-Artikolu 6(2) tal-Att tal-20 ta’ Settembru 1976 dwar l-elezzjoni tal-Membri tal-Parlament Ewropew b’vot dirett universali,
–wara li kkunsidra r-Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) ĠU L 283, 31.10.2017, p. 1, u b’mod partikolari l-Artikolu 29(2) tiegħu,
–wara li kkunsidra s-sentenzi mogħtija mill-Qorti tal-Ġustizzja tal-Unjoni Ewropea fil-21 ta’ Ottubru 2008, fid-19 ta’ Marzu 2010, fis-6 ta’ Settembru 2011, fis-17 ta’ Jannar 2013 u fid-19 ta’ Diċembru 2019 Is-Sentenza tal-Qorti tal-Ġustizzja tal-21 ta’ Ottubru 2008, Marra vs De Gregorio u Clemente, C-200/07 u C-201/07, ECLI:EU:C:2008:579; is-Sentenza tal-Qorti Ġenerali tad-19 ta’ Marzu 2010, Gollnisch vs il-Parlament, T-42/06, ECLI:EU:T:2010:102; is-Sentenza tal-Qorti tal-Ġustizzja tas-6 ta’ Settembru 2011, Patriciello, C-163/10, ECLI: EU:C:2011:543; is-Sentenza tal-Qorti Ġenerali tas-17 ta’ Jannar 2013, Gollnisch vs il-Parlament, T-346/11 u T-347/11, ECLI:EU:T:2013:23; is-Sentenza tal-Qorti tal-Ġustizzja tad-19 ta’ Diċembru 2019, Junqueras Vies, C-502/19, ECLI:EU:C:2019:1115.,
–wara li kkunsidra l-Artikolu 62 tal-Kostituzzjoni tar-Repubblika Ellenika,
–wara li kkunsidra l-Artikoli 5(2), 6(1) u 9 tar-Regoli ta’ Proċedura tiegħu,
–wara li kkunsidra r-rapport tal-Kumitat għall-Affarijiet Legali (A9-0029/2024),
Α.billi l-Kap Prosekutur Ewropew talab it-tneħħija tal-immunità parlamentari ta’ Eva Kaili fil-kuntest ta’ investigazzjoni li għaddejja dwar atti li x’aktarx jikkostitwixxu reat kbir ta’ istigazzjoni ta’ frodi li taffettwa l-interessi finanzjarji tal-Unjoni Ewropea, imwettqa ripetutament, li rriżultaw f’dannu ta’ aktar minn EUR 120 000 u EUR 150 000, punibbli b’terminu ta’ priġunerija ta’ bejn 5 u 15-il sena, kif previst fl-Artikolu 46(1), l-Artikolu 52(2) u l-Artikolu 98(2) tal-Kodiċi Kriminali Grieg u fl-Artikolu 4(1) u l-Artikolu 4(2)(b) tal-Liġi Nru 2803/2000, flimkien mal-Artikolu 2(1) u l-Artikolu 386(2) tal-Kodiċi Kriminali Grieg, l-Artikolu 24(2) u l-Artikolu 26(3) tal-Liġi Nru 4689/2020;
Β.billi, b’segwitu għal rapport tal-OLAF irreġistrat mill-Kap Prosekutur Ewropew fl-1 ta’ Lulju 2021, il-Prosekutur Delegat Ewropew Grieg fetaħ l-investigazzjoni inkwistjoni fit-8 ta’ Settembru 2021; billi fit-12 ta’ Novembru 2021, f’konformità mar-responsabbiltajiet tagħha, il-Prosekutur Ewropew delegata inkarigata mill-każ talbet lill-OLAF jippreżenta d-dokumenti tal-każ; billi, wara li analizzat il-każ, fit-2 ta’ Frar 2022, talbet investigazzjoni ulterjuri mill-OLAF u t-traduzzjoni tad-dokumenti tal-każ mill-Ingliż għall-Grieg fis-7 ta’ Frar 2022; billi l-OLAF ippreżenta r-rapport finali u d-dokumenti ta’ sostenn tiegħu fit-8 ta’ Diċembru 2022 u t-traduzzjonijiet korrispondenti fl-14 ta’ Diċembru 2022;
C.billi l-irregolaritajiet allegati li Eva Kaili kienet taf bihom jirrigwardaw b’mod partikolari:- (a)nuqqas minn wieħed mill-assistenti parlamentari akkreditati (APAs) tagħha milli jwettaq l-obbligi tiegħu li jkun preżenti fuq il-post tax-xogħol tiegħu bejn it-28 ta’ Settembru 2015 u t-2 ta’ Lulju 2019 u mill-qadi ta’ dmirijietu,
- (b)it-tressiq ta’ talbiet għal ordnijiet ta’ missjonijiet u dikjarazzjonijiet ta’ spejjeż u l-ġbir ta’ rimborżi fir-rigward ta’ missjonijiet mhux imwettqa minn erbgħa mill-APAs ta’ Eva Kaili, bejn Frar 2016 u Marzu 2018 fil-każ tal-ewwel APA, bejn Mejju 2015 u Frar 2020 fil-każ tat-tieni APA, bejn Diċembru 2015 u April 2019 fil-każ tat-tielet APA, u bejn Ottubru 2014 u Frar 2020 fil-każ tar-raba’ APA,
- (c)il-ħlas ta’ parti mis-salarji/spejjeż tal-missjonijiet ta’ APA lil Eva Kaili fuq talba allegata tagħha, bejn it-28 ta’ Settembru 2015 u t-2 ta’ Lulju 2019;
D.billi, minn naħa, il-Parlament ma jistax jitqies bħala qorti u, min-naħa l-oħra, il-Membru ma jistax, fil-kuntest ta’ proċedura għat-tneħħija tal-immunità, jitqies bħala “akkużat” Is-sentenza tal-Qorti Ġenerali tat-30 ta’ April 2019, Briois vs il-Parlament, T-214/18, ECLI:EU:T:2019:266.;
E.billi l-allegat reat ma jikkonċernax opinjonijiet jew voti mitfugħa minn Eva Kaili fil-qadi ta’ dmirijietha bħala Membru tal-Parlament Ewropew, skont l-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea;
F.billi, skont l-Artikolu 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea, il-Membri tal-Parlament Ewropew jibbenefikaw, fit-territorju nazzjonali tagħhom, minn immunitajiet mogħtija lid-deputati tal-parlament nazzjonali ta’ pajjiżhom;
G.billi l-Artikolu 62 tal-Kostituzzjoni tar-Repubblika Ellenika jipprevedi, fost affarijiet oħra, li matul il-leġiżlatura, id-deputati ma għandhomx jiġu mħarrka, arrestati, miżmuma l-ħabs jew inkella sottomessi għal xi restrizzjoni oħra mingħajr l-awtorizzazzjoni minn qabel tal-Parlament;
H.billi l-għan tal-immunità parlamentari huwa li tipproteġi lill-Parlament u lill-Membri tiegħu minn proċedimenti ġudizzjarji relatati ma’ attivitajiet imwettqa fil-qadi tad-dmirijiet parlamentari u li huma inseparabbli minn dawn l-attivitajiet;
I.billi, f’dan il-każ, il-Parlament ma setax jikkonstata l-eżistenza ta’ fumus persecutionis, jiġifieri elementi fattwali li jindikaw li l-proċedimenti legali inkwistjoni nfetħu bl-intenzjoni li ssir ħsara lill-attività politika tal-Membru u għalhekk tal-Parlament Ewropew;