Gan dochar do shainchumais an údaráis bhuiséadaigh faoi chuimsiú an nós imeachta bhuiséadaigh bhliantúil agus do chumhachtaí an Choimisiúin an dréachtbhuiséad a bhunú, iarrann Parlaimint na hEorpa agus an Chomhairle ar an gCoimisiún a mholadh go gcruthófaí líne bhuiséid amháin ar a laghad do Cholún I den tSaoráid don Úcráin, dhá líne bhuiséid faoi Cholún II, lena n-áirítear le haghaidh soláthar don Chiste don Soláthar Coiteann le haghaidh na Ráthaíochta don Úcráin a bhunaítear faoi Chaibidil IV den Rialachán maidir le Saoráid na hÚcráine, trí líne bhuiséid faoi Cholún III le haghaidh Bearta cúnaimh agus eile maidir le haontachas don Aontas, a fóirdheontais i leith costais iasachtaíochta agus soláthar don Chiste don Soláthar Coiteann — Leagáide, agus líne bhuiséid shonrach le haghaidh caiteachas ar chúnamh teicniúil agus riaracháin chun an tSaoráid a chur chun feidhme.
Tá Parlaimint na hEorpa, an Chomhairle agus an Coimisiún ar aon intinn gur ionstraim mheántéarmach eisceachtúil í an tSaoráid don Úcráin a bhfuil fíorthábhacht gheopholaitiúil ag baint léi agus atá curtha in oiriúint don éiginnteacht agus do na dúshláin dífhasaigh a bhaineann le tacaíocht a thabhairt do thír atá i mbun cogaidh agus impleachtaí díreacha ann do shlándáil an Aontais. Mar thoradh air sin, cuireann an tSaoráid don Úcráin cothromaíocht ar fáil idir solúbthacht agus inchláraitheacht fhreagairt an Aontais chun aghaidh a thabhairt ar bhearna maoiniúcháin na hÚcráine, ar riachtanais téarnaimh, atógála agus nuachóirithe na hÚcráine, agus ag an am céanna tacú le hiarracht athchóirithe na hÚcráine mar chuid dá conair aontachais leis an Aontas. Na cuspóirí agus na socruithe maoiniúcháin agus rialachais a comhaontaíodh don tSaoráid don Úcráin, freagaíonn siad don chomhthéacs eisceachtúil, sonrach agus do na dúshláin ar ina leith a glacadh an tSaoráid áirithe seo.
Níor cheart, dá bhrí sin, an réiteach sin don Úcráin a mheas mar fhasach d’ionstraimí a bheidh ann amach anseo maidir le cúnamh eacnamaíoch do thríú tíortha.