1.á chur in iúl gur geal léi an uaillmhian atá ag go leor tíortha Eorpacha agus a gcuid saoránach dul isteach san Aontas agus ag aithint a dtoil pholaitiúil agus na n-iarrachtaí dáiríre atá déanta acu chun na ceanglais maidir le ballraíocht a chomhlíonadh;

2.á chreidiúint go bhfuil an méadú ríthábhachtach ó thaobh straitéise de do Aontas; á athdhearbhú go bhfuil beartas feabhsaithe um méadú ar cheann de na beartais agus na huirlisí geopholaitiúla is láidre de chuid an Aontais lena léirítear infheistíocht gheostraitéiseach sa tsíocháin fhadtéarmach, sa daonlathas, sa chobhsaíocht, sa tslándáil, i gcosaint na haeráide agus sa rathúnas ar fud na mór-roinne agus go háirithe mar gheall ar chogadh foghach na Rúise i gcoinne na hÚcráine agus dúshláin gheopholaitiúla chomhchoiteanna eile, lena n-éilítear fís pholaitiúil fhadtéarmach agus cinntí misniúla; ag cur béim ar an bpráinn pholaitiúil a bhaineann le tiomantas an Aontais don ord idirnáisiúnta riailbhunaithe a léiriú; á áitiú, i bhfianaise na mórdhúshláin slándála atá os comhair na hEorpa, i bhfianaise mhéadú an Aontais, agus i bhfianaise chuimsiú na hÚcráine i gcórais chomhchoiteanna slándála agus cosanta an Iarthair, go neartófar slándáil na hEorpa;

3.á chur in iúl gur geal léi na moltaí ón gCoimisiún i bpacáiste 2023 um méadú agus á chur in iúl gur geal léi freisin na cinntí ón gComhairle Eorpach tús a chur le caibidlíocht aontachais leis an Úcráin agus le Poblacht na Moldóive, stádas tír is iarrthóir a thabhairt don tSeoirsia ar an tuiscint go nglactar na céimeanna ábhartha a leagtar amach sa mholadh ón gCoimisiún an 8 Samhain 2023 agus tús a chur le caibidlíocht aontachais leis an mBoisnia agus an Heirseagaivéin, a luaithe a bheidh an méid comhlíonta is gá leis na critéir bhallraíochta bainte amach; á iarraidh go ndéanfadh an Comhairle a chur de chúram ar an gCoimisiún tograí a thíolacadh láithreach le haghaidh na gcreataí caibidlíochta ábhartha agus iad a ghlacadh a luaithe a ghlacfar na céimeanna ábhartha a leagtar amach sna moltaí ón gCoimisiún an 8 Samhain 2023 faoi seach;

4.ag aithint na deise stairiúla agus an dúshláin stairiúil atá os comhair an Aontais chun a ghealltanais a chomhlíonadh maidir le tíortha agus pobail na hAlbáine, na Boisnia agus na Heirseagaivéine, na Macadóine Thuaidh, na Cosaive, Mhontainéagró agus na Seirbia, agus na hÚcráine, Phoblacht na Moldóive agus na Seoirsia; á aithint a thábhachtaí atá lánpháirtiú Eorpach na gcomhpháirtithe ríthábhachtacha sin; á aithint freisin a thábhachtaí atá an comhar réigiúnach laistigh de réigiúin Chomhpháirtíocht an Oirthir agus na mBalcán Thiar faoi seach;

5.á athdhearbhú nach féidir próiseas aontachais an Aontais leis an Tuirc a atosú sna cúinsí reatha; ag tathant ar Rialtas na Tuirce deireadh a chur leis an tsáinn atá ann faoi láthair agus bogadh ar aghaidh i dtreo comhpháirtíocht níos dlúithe, níos dinimiciúla agus níos straitéisí trí chreat réalaíoch comhthreomhar comhair a fhorbairt, amhail comhaontú comhlachais nuachóirithe agus á iarraidh go bhféachfadh an Coimisiún ar fhormáidí a d’fhéadfadh a bheith ann do chreat den sórt sin; á mheabhrú nach mór aon fheabhas ar an gcaidreamh idir an tAontas agus an Tuirc a bheith bunaithe ar dhul chun cinn nithiúil maidir le cearta an duine, an daonlathas agus leis an gcaidreamh urramach comharsanachta;

6.á chur i bhfios go láidir nach mór aontachas leis an Aontas a bheith ina nós imeachta bunaithe ar fhiúntas i gcónaí agus nach mór gach iarratasóir a mheasúnú ar a fhiúntas féin ó thaobh critéir Chóbanhávan a chomhlíonadh ina n-iomláine; á chur i bhfios go láidir nach féidir bealaí níos éasca maidir le luachanna agus bunphrionsabail an Aontais a bheith ann; á thabhairt chun suntais gur cheart an smacht reachta, an t-athchóiriú daonlathach, saoirse na meán agus urraim do chearta an duine, lena n-áirítear cearta mionlach, a chur chun tosaigh sa phróiseas aontachais, agus gur réamhchoinníollacha ríthábhachtacha iad neamhspleáchas breithiúnach, an comhrac i gcoinne an éillithe agus cumhachtú na sochaí sibhialta chun dul chun cinn a dhéanamh ar an mbealach chuig ballraíocht san Aontas;

7.á iarraidh go bhfeabhsófaí sásraí faireacháin éifeachtacha chun luachanna bunúsacha agus leasanna fónta airgeadais an Aontais a chosaint i gcomhthéacs nósanna imeachta aontachais; á iarraidh an athuair, ina leith sin, go n-áireofaí tíortha is iarrthóirí i sásra an Aontais maidir leis an smacht reachta agus lena chleachtas tuairiscithe bliantúil, lena ndéantar sásraí comhair agus fíoraithe réamhaontachais a ghníomhachtú go huathoibríoch; ag tacú le rún an Choimisiúin tíortha aontachais a áireamh sna Tuarascálacha maidir leis an Smacht Reachta, á áitiú go gcuirfidh siad leis na tuarascálacha bliantúla ar dhul chun cinn;

8.ag spreagadh thíortha an mhéadaithe leanúint de na hathchóirithe riachtanacha a chur chun feidhme go diongbháilte agus dul chun cinn inláimhsithe agus do-aisiompaithe a dhéanamh, ag tosú le bunphrionsabail phróiseas aontachais an Aontais;

9.á áitiú go bhfuil gá le hiarrachtaí leanúnacha chun iolrachas na meán a chothú, cearta iriseoirí a chosaint agus saoirse cainte a áirithiú i ngach tír is iarrthóir;

10. á chur i bhfios go bhfuil ailíniú le CBES an Aontais ina tháscaire bunriachtanach freisin lena gcloítear go hiomlán le bunphrionsabail an Aontais agus le ballraíocht inbhuanaithe san Aontas amach anseo; ag tathant ar gach tír is iarrthóir agus ar gach tír is iarrthóir ionchasach tús áite a thabhairt d’ailíniú tapa agus iomlán le CBES agus á athdhearbhú nach féidir le haontachas tíre ar leith dul ar aghaidh go dtí go mbeidh sé ailínithe le bearta sriantacha an Aontais, lena n-áirítear smachtbhannaí a cuireadh i bhfeidhm mar fhreagairt ar chogadh foghach na Rúise i gcoinne na hÚcráine;

11.á iarraidh go ndéanfaí meastóireacht chríochnúil ar straitéis an Aontais um méadú agus ar na cúiseanna leis an dul chun cinn teoranta atá déanta ag roinnt tíortha is iarrthóirí, go háirithe i réimsí an smachta reachta, chearta an duine agus an daonlathais;

12.á mheas gur creat beartais fadtéarmach é modheolaíocht athbhreithnithe an Choimisiúin, ar cheart í a thabhairt cothrom le dáta chun próisis aontachais na hÚcráine, Phoblacht na Moldóive agus na Seoirsia a áireamh, lena dtreorófar próiseas an mhéadaithe;

13.á chur i bhfáth, cé gur cheart go n-éireodh an próiseas níos incriminteach agus níos dinimiciúla agus gur cheart don Aontas spriocanna nithiúla aonair don athchóiriú, treochláir agus amlínte idirmheánacha a leagan síos do gach tír aontachais, nach féidir luathú nó spriocdhátaí réamhshainithe a bheith ann le haghaidh ballraíochta, toisc go bhféadfadh siad difear a dhéanamh do shláine an phróisis aontachais; á chreidiúint, áfach, gur cheart go dtarlódh an chéad mhéadú eile san Aontas a luaithe a chomhlíonfar na coinníollacha aontachais uile sna tíortha is iarrthóirí lena mbaineann agus go gcomhaontófar agus go gcuirfear chun feidhme na hathchóirithe Eorpacha is gá ag an am céanna; ag dréim leis go mbeidh na chéad tíortha is iarrthóirí réidh le teacht isteach san Aontas faoi dheireadh na ndeich mbliana seo;

14.á áitiú gur freagracht chomhroinnte ar na Ballstáit reatha agus ar na Ballstáit ar mian leo a bheith mar Bhallstáit den Aontas, é méadú an Aontais; á iarraidh go ndéanfadh na Ballstáit gealltanas polaitiúil soiléir agus aonchiallach a léiriú i leith phróiseas an mhéadaithe, bunaithe ar chritéir oibiachtúla agus gan mí-úsáid a bhaint as chun díospóidí déthaobhacha a réiteach, ar cheart iad a réiteach ar leithligh ón bpróiseas aontachais; á chur i bhfáth gur féidir le moilleanna iomarcacha ar an mbealach i dtreo ballraíocht iomlán an Aontais tionchar diúltach a imirt ar thuairimí an phobail agus ar thiomantas polaitiúil na dtíortha is iarrthóirí;

15.á chur i bhfios go láidir gur féidir próisis aontachais a chur ar bun ar bhealach inchúlaithe, agus go bhféadfadh calcadh na caibidlíochta aontachais a bheith mar thoradh ar an gcur chuige bunaithe ar fhiúntas freisin i gcás cúlú ar luachanna bunúsacha, agus nach féidir é a atosú go dtí go ndéanfar dul chun cinn suntasach maidir le hathchóirithe; á iarraidh go ndéanfaí faireachán, tuairisciú agus measúnú láidir agus feabhsaithe ar na hathchóirithe agus ar an dul chun cinn atá déanta ag na tíortha is iarrthóirí sna caibidlí caibidlíochta uile le coinníollacht spriocdhírithe a chuirtear i bhfeidhm go straitéiseach bunaithe ar thagarmharcanna soiléire dul chun cinn, smachtbhannaí a fhorchur ar chúlú bunúsach nó ar mharbhántacht leanúnach in athchóirithe agus luach saothair a thabhairt d’athchóirithe agus do chomhlíonadh tagarmharcanna trí amlínte soiléire caibidlíochta;

16.á iarraidh go ndéanfadh an Coimisiún comhsheasmhacht, éifeachtúlacht agus trédhearcacht an chúnaimh réamhaontachais a fheabhsú, lena léirítear go soiléir na tosaíochtaí sna réimsí bunúsacha i leithdháileadh chistiú IPA III; á iarraidh, go háirithe, go dtabharfaí isteach cuntasacht níos déine agus níos in-fhorfheidhmithe maidir le caiteachas agus go bhfeabhsófaí timthriall foriomlán na heisíocaíochta, an chur chun feidhme agus an ghrinnscrúdaithe ar chistiú réamhaontachais, agus coinníollacht dhocht á cur i bhfeidhm, lena n-áirítear i gcur chun feidhme an Phlean Eacnamaíoch agus Infheistíochta agus an Phlean nua Fáis do na Balcáin Thiar; á iarraidh go ndéanfadh an Coimisiún athbhreithniú meántéarma ar Rialachán IPA III agus a mholadh go liostófaí an Úcráin, Poblacht na Moldóive agus an tSeoirsia mar thairbhithe di, á iarraidh go ndéanfadh an Coimisiún na moltaí i dTuarascáil Speisialta Uimh. 01/2022 ó Chúirt Iniúchóirí na hEorpa a chur chun feidhme go pras;

17.á iarraidh go mbeadh roghanna ann chun cosaint an smachta reachta agus luachanna daonlathacha an Aontais i gcoinne cúlú do na Ballstáit atá ann cheana agus a bheidh ann amach anseo a neartú tuilleadh i gcomhthéacs athchóiriú na gConarthaí, lena n-áiritheofar go neartófar an tAontas agus a mhargadh aonair leis an méadú;

18. á thabhairt chun suntais gur gá a áirithiú go mbeidh cistiú an Aontais a chuirtear ar fáil do thíortha an mhéadaithe i gcomhréir le spriocanna agus leasanna straitéiseacha an Aontais féin; á iarraidh go ndéanfadh an Coimisiún tacaíocht airgeadais a thabhairt do na tíortha aontachais sin a oibríonn i dtreo dea-chaidreamh comharsanachta, comhar réigiúnach cuimsitheach agus athmhuintearas inbhuanaithe, lena n-áirítear ach gan a bheith teoranta do choirpigh chogaidh a ionchúiseamh agus rochtain ar an bhfírinne, ar cheartas agus ar chúiteamh éifeachtach a áirithiú d’íospartaigh coireanna cogaidh, coireanna in aghaidh an chine dhaonna agus cinedhíothú;

19.á iarraidh go ndéanfadh na tíortha aontachais feabhas a chur ar an gcomhar breithiúnach leis an Aontas in ábhair choiriúla faoi na socruithe oibre le hOifig an Ionchúisitheora Phoiblí Eorpaigh (OIPE) chun imscrúdú agus ionchúiseamh éifeachtach ar mhí-úsáid chistí an Aontais a éascú, lena n-áirítear trí oifigigh idirchaidrimh náisiúnta a thabhairt ar iasacht do OIPE, agus dlús a chur le cumas riaracháin na riarachán áitiúil;

20.ag athdhearbhú a seasaimh maidir leis an ngá atá le comhar neartaithe, foirmiúil, struchtúrtha agus córasach idir an tAontas agus Comhairle na hEorpa chun tacú le tíortha aontachais maidir le hathchóirithe, lena n-áiritheofar go gcomhlíonfaidh siad na moltaí uile ó Choimisiún na Veinéise ar a mbealach i dtreo ballraíocht an Aontais;

21.á chreidiúint go n-éilítear leis an dúshlán a bhaineann le hAontas leathnaithe beartas feabhsaithe um méadú lena gcuirfear bealach incriminteach soiléir ar fáil i dtreo ballraíocht an Aontais, lena n-áirítear comhtháthú de réir a chéile i gcomhbheartais, amhail an margadh aonair, do na tíortha sin a thugann an chaibidlíocht chun críche i gcaibidil beartais ar leith nó a dhéanann dul chun cinn suntasach maidir le hathchóirithe a bhaineann leis an Aontas; á thabhairt dá haire gur cheart go gcumasódh dul chun cinn den sórt sin rochtain ar chistí an Aontais sna réimsí faoi seach chun tairbhí soiléire a thabhairt do shaoránaigh le linn an phróisis; á thabhairt dá haire gur cheart go mbeadh cúnamh airgeadais méadaithe teicniúil agus coinníollach ag gabháil leis an gconair sin agus béim ar leith á leagan ar chur chun feidhme agus ar fhorfheidhmiú dlíthe faoi bhraislí caibidlíochta maidir le bunphrionsabail agus caidreamh seachtrach, go háirithe caibidlí 23, 24, 30 agus 31; á iarraidh go ndéanfadh an Coimisiún tograí mionsonraithe a thíolacadh maidir leis an modheolaíocht aontachais incriminteach, lena n-áirítear clásail shoiléire ‘ghrádaithe’ agus inchúlaitheachta; á chur i bhfios go láidir nach ionann céimniú isteach tíortha is iarrthóirí, i réimsí beartais roghnaithe, a bhfuil cearta agus oibleagáidí teoranta acu, mar mhalairt ar bhallraíocht iomlán, nó mar rogha ar bhallraíocht iomlán;

22.á aithint a thábhachtaí atá tionscnaimh amhail an Comhphobal Polaitiúil Eorpach, lena gcumasaítear comhar polaitiúil agus lena rannchuidítear le hidirphlé réigiúnach agus lena bhféadfaí tíortha is iarrthóirí a lánpháirtiú de réir a chéile san Aontas agus ina bheartais, ach nach roghanna malartacha iad ar bhallraíocht an Aontais;

23.á chur i bhfáth go bhféadfadh sé a bheith úsáideach post ar leith mar Choimisinéir um Méadú a bheith ann;

24.á moladh go ndéanfaí breithniú ar stádas breathnóra a thabhairt do thíortha is iarrthóirí i gcomhlachtaí agus in institiúidí ábhartha, lena n-áirítear an Pharlaimint, ar bhonn socruithe sealadacha ar dtús má tá dul chun cinn leordhóthanach déanta i gcaibidlíochtaí, go háirithe maidir le braislí maidir le bunphrionsabail agus caidreamh seachtrach, agus go gcomhlíonfar agus go gcomhaontófar na coinníollacha uile, go dtí go síneofar na conarthaí aontachais; á chur in iúl gur geal léi, ina leith sin, cinneadh Choiste Eacnamaíoch agus Sóisialta na hEorpa breathnóirí ó thíortha is iarrthóirí a áireamh ó 2024 ar aghaidh;

25.á mheas go bhfuil gá le cinnteoireacht agus maoirseacht níos láidre, níos éifeachtaí agus níos fónta ó Pharlaimint na hEorpa ar bheartas méadaithe an Aontais agus ar a chistiú, chun dlisteanacht agus cuntasacht dhaonlathach a mhéadú; á áitiú go neartófaí ról na Parlaiminte le linn an phróisis aontachais ina iomláine, lena n-áirítear na céimeanna idirmheánacha, lena gcumhdaítear grinnscrúdú iomlán ar an dul chun cinn atá déanta ag na tíortha is iarrthóirí ar fud na réimsí beartais; á chur in iúl go bhfuil sí tiomanta feabhas a chur ar idirphlé agus ar chomhar rialta agus trédhearcach le parlaimintí náisiúnta na dtíortha is iarrthóirí mar shamhail do ghrinnscrúdú parlaiminteach ar lánpháirtiú an Aontais;

26.á chur i bhfios go láidir gur gá tacaíocht daonlathais a neartú trí na bealaí agus na hionstraimí atá ann cheana, amhail Idirphlé Jean Monnet, an tIdirphlé Idirpháirtí (IPD) agus Próiseas an Idirphlé Pharlaimintigh (PDP);

27.á iarraidh go ndéanfadh institiúidí an Aontais agus na Ballstáit páirt iomlán a ghlacadh chun na próisis athchóirithe sna tíortha is iarrthóirí a neartú tuilleadh, go háirithe a n-acmhainneachtaí riaracháin;

28.á thabhairt chun suntais gur gá dlús a chur leis an trédhearcacht, rannpháirtíocht na saoránach agus dlúth-rannpháirtíocht na sochaí sibhialta i bpróiseas an mhéadaithe agus ina ghrinnscrúdú a chumhachtú, lena n-áiritheofar a chistiú inbhuanaithe;

29.á chur i bhfios go láidir nár cheart do phróiseas an mhéadaithe buanú nó géarú a dhéanamh, de thaisme, ar éagothromaíochtaí atá bunaithe ar ghnéaschlaonadh agus ar fhéiniúlacht inscne; ag tathant ar an gCoimisiún agus ar thíortha is iarrthóirí bearta a chomhtháthú sa phróiseas um méadú lena ndéantar cearta daoine LGBTIQ a chur chun cinn agus a áirithiú go gníomhach, amhail beartais a fhorbairt lena gcuirfear deireadh le hidirdhealú bunaithe ar ghnéaschlaonadh agus ar fhéiniúlacht inscne, lena bhfeabhsaítear rannpháirtíocht LGBTIQ i bpróisis chinnteoireachta, agus lena gcothaítear cuimsitheacht sna réimsí polaitiúla, eacnamaíocha agus sóisialta trí ghníomhaíochtaí oideachais agus múscailte feasachta; á iarraidh go ndéanfadh an Coimisiún agus tíortha is iarrthóirí faireachán agus meastóireacht chuí ar stádas chearta LGBTIQ i dtíortha is iarrthóirí;

30.á mheas nach mór a áirithiú leis an bpróiseas aontachais go méadóidh tíortha is iarrthóirí a n-iarrachtaí a bhaineann le cearta comhionanna do dhaoine faoi mhíchumas; ag cur béim ar an ngá atá le brú breise a chur ar thíortha is iarrthóirí athchóirithe a chur chun feidhme chun feabhas a chur ar staid na ndaoine faoi mhíchumas agus chun a n-iarrachtaí a mhéadú ó thaobh dí-institiúidithe de lena n-áirítear an t-aistriú ó chúram institiúideach go cúram teaghlaigh agus pobalbhunaithe;

31.á mheas gur cheart leanúint leis na próisis ullmhúcháin don mhéadú i gcomhthráth san Aontas agus i dtíortha aontachais; á chur i bhfáth go bhfuil gá le hathchóirithe institiúideacha agus airgeadais Eorpacha chun aghaidh a thabhairt ar na dúshláin atá ann faoi láthair agus chun a áirithiú go mbeidh an tAontas in ann comhaltaí nua a ionsú agus a lánpháirtiú rathúil a chur chun cinn; á iarraidh go dtabharfadh Institiúidí an Aontais agus na Ballstáit faoi na hathchóirithe is gá chun a áirithiú nach gcuirfidh a n-éagmais moill ar aontachas na mBallstát nua; á thabhairt dá haire go bhfuil gá leis na hathchóirithe sin chun an tAontas agus a institiúidí a neartú chun dlisteanacht dhaonlathach, dea-rialachas, feidhmiúlacht, cuntasacht, trédhearcacht agus inbhuanaitheacht a chur chun cinn; á chur i bhfáth, go háirithe, a thábhachtaí atá sé dlisteanacht dhaonlathach bheartais an Aontais a neartú trí chearta cinnteoireachta agus grinnscrúdaithe na Parlaiminte a threisiú; á athdhearbhú, dá bhrí sin, go bhfuil sí ag iarraidh go dtabharfaí ceart ginearálta agus díreach tionscnaimh reachtaigh don Pharlaimint;

32.á chreidiúint go daingean gur cheart go méadódh athchóirithe institiúideacha Eorpacha cumas an Aontais gníomhú, agus go n-áireofaí leo nósanna imeachta cinnteoireachta simplithe agus níos éifeachtaí, ag imeacht ón aontoilíocht; á athdhearbhú gur cheart vótáil trí thromlach cáilithe a chur chun feidhme i réimsí amhail cosaint an daonlathais, chearta an duine agus an smacht reachta, CAI, smachtbhannaí agus cinntí beartais eachtraigh ábhartha eile, amhail tús a chur le caibidlíocht aontachais an Aontais, braislí caibidlíochta aonair a oscailt agus a dhúnadh agus smachtbhannaí a fhorchur ar chúlrianú, ach cé is moite de chinntí lena n-údaraítear misin nó oibríochtaí míleata a bhfuil sainordú feidhmiúcháin acu;

33.á iarraidh go neartófaí an sásra chun an smacht reachta agus prionsabail agus luachanna bunúsacha an Aontais a chosaint, agus an cumas faireacháin chun comhlíonadh chritéir Chóbanhávan a áirithiú, roimh an gcéad bhabhta eile den mhéadú; á mholadh go ndéanfaí an nós imeachta in Airteagal 7 CAE a athchóiriú trí dheireadh a chur le haontoilíocht i gcinntí ón gComhairle, trí thráthchlár soiléir a thabhairt isteach, agus tríd an gCúirt Bhreithiúnais a dhéanamh ina réiteoir ar sháruithe; á chur i bhfios go n-éascófaí an próiseas méadaithe dá dtabharfaí isteach vótáil trí thromlach cáilithe ina leith sin; á chur i bhfáth gur gá sásra coinníollachta an smachta reachta a athchóiriú tuilleadh chun luachanna bunúsacha uile an Aontais mar a shainítear in Airteagal 2 CAE a chumhdach agus a ráthú;

34.á chreidiúint, i gcomhthéacs na ballraíochta iomláine, go bhfuil comhtháthú difreáilte mar chuid den réiteach le haghaidh Aontas atá éifeachtúil agus méadaithe; á chur i bhfios go láidir, áfach, go bhfuil urraim do luachanna an Aontais mar atá leagtha amach in Airteagal 2 CAE doshannta, nár cheart go mbeadh sé faoi réir aon mhaoluithe nó rogha an diúltaithe agus nach mór gealltanas láidir a bheith ag teastáil ó bhallraíocht an Aontais go n-urramófar dlí uile an Aontais; á mheas freisin nach mór limistéar leathan de chomhthuiscint Eorpach a áirithiú i gcónaí, lena gcumhdaítear réimsí amhail an t-aontas custaim, an margadh aonair agus a cheithre shaoirse, an acquis sóisialta lárnach, agus beartais talmhaíochta, iomaíochta agus trádála; á thabhairt dá haire, thar an gcomhthuiscint sin, gur cheart go mbeadh cead ag na Ballstáit atá toilteanach lánpháirtiú na hEorpa a bhogadh ar aghaidh i réimse níos leithne réimsí beartais é sin a dhéanamh; á chur i bhfios go láidir, faoi chóras an lánpháirtithe dhifreáilte den sórt sin, cé go nglacfadh na Ballstáit uile páirt i gcinntí maidir le saincheisteanna i réimse an chomhsheasaimh, nach nglacfadh ach na Ballstáit sin atá toilteanach páirt a ghlacadh i réimsí an lánpháirtithe níos doimhne páirt sna cinntí lena mbaineann; á thabhairt dá haire go bhfuil socruithe difreáilte airgeadais i gceist le lánpháirtiú difreáilte freisin;

35.á iarraidh go mbainfí leas iomlán as an tsolúbthacht dá bhforáiltear i gConradh Liospóin roimh athchóiriú níos doimhne i gcomhthéacs athbhreithniú a d’fhéadfaí a dhéanamh ar na conarthaí; á mheabhrú go bhfuil roinnt ionstraimí solúbthachta ann cheana féin, amhail clásail passerelle, comhar feabhsaithe, staonadh cuiditheach, buanchomhar struchtúrtha (PESCO) agus sásraí um rogha gan a bheith páirteach, faoi chreat dlíthiúil reatha an Aontais, mar a léirítear go soiléir le taithí limistéar Schengen, ceann de na héachtaí is mó atá bainte amach ag an Aontas, agus an limistéar euro; á mheabhrú gur féidir réitigh chéimniú isteach, maoluithe sealadacha agus idirthréimhsí a chaibidliú i gcomhthéacs nósanna imeachta aontachais; á chur i bhfios nár cheart go gcuirfeadh úsáid na sásraí solúbthachta sin cosc ar phlé cuiditheach maidir le hathbhreithniú ar chonarthaí, mar a d’fhormhuinigh an Pharlaimint ina rún an 22 Samhain 2023;

36.á thabhairt dá haire nach mór d’athchóirithe institiúideacha réamh-mhéadaithe aghaidh a thabhairt freisin ar impleachtaí an mhéadaithe do chomhdhéanamh na Parlaiminte; á mheabhrú gurb í Parlaimint na hEorpa an t-aon institiúid a thoghtar go díreach a dhéanann ionadaíocht ar shaoránaigh an Aontais; á chur i bhfios go láidir, agus ionadaíochas daonlathach iomchuí á háirithiú, gur cheart don Pharlaimint fanacht ar mhéid inoibrithe; á chur i bhfios, áfach, nach féidir méadú réasúnta ar mhéid na Parlaiminte a chur as an áireamh chun ionadaíocht dhaonlathach leordhóthanach a áirithiú in Aontas méadaithe; á áitiú go mbeadh córas nua ann chun suíocháin a leithdháileadh bunaithe ar fhoirmle bhuan mhatamaiticiúil, atá oibiachtúil, cothrom, trédhearcach agus buan; ag meabhrú a seasaimh gur cheart leithdháileadh suíochán i bParlaimint na hEorpa a mheas in éineacht leis an gcóras vótála sa Chomhairle;

37.á chur i bhfáth gur gá athbhreithniú pras a dhéanamh ar fheidhmiú agus ar phróiseas cinnteoireachta na Comhairle i bhfianaise an mhéadaithe; á mholadh go ndéanfaí athbhreithniú ar chóras uachtaránachtaí rothlacha na Comhairle; á thabhairt dá haire gur cheart athbhreithniú a dhéanamh freisin ar ríomh na dtairseach vótála trí thromlach cáilithe chun feabhas a chur ar an gcothromaíocht idir stáit mhóra agus stáit bheaga agus chun tairseacha níos airde a leagan síos do na cinntí is tábhachtaí; á iarraidh go mbeadh an-trédhearcacht agus sláine i bpróiseas cinnteoireachta na Comhairle i gcomhthéacs an mhéadaithe;

38.á thabhairt dá haire nach mór an méadú a chur san áireamh i gcomhdhéanamh an Choimisiúin agus á mheabhrú i ndáil leis sin an tsolúbthacht dá bhforáiltear i gConradh Liospóin; á thabhairt chun suntais nach mór d’aon athmheasúnú ar an gcleachtas Coimisinéir amháin a cheapadh in aghaidh an Bhallstáit a áirithiú go mbeidh comhdhéanamh an Choimisiúin cothrom ó thaobh geografaíochta de;

39.ag athdhearbhú a hiarrata go neartófaí na hionstraimí do rannpháirtíocht na saoránach i bpróiseas cinnteoireachta an Aontais;

40.á chur i bhfáth gur mórdhúshlán airgeadais don Aontas é an méadú, go háirithe maidir le beartais chomhtháthaithe agus talmhaíochta, agus gur deis é chun an tAontas a athchóiriú; á chur i bhfios go n-éilíonn an dúshlán sin CAI atá deartha, go dtugtar tosaíocht dó agus cistithe go cuí agus buiséad an Aontais níos éifeachtaí a chuireann ar chumas an Aontais gealltanais nua a ghlacadh agus leanúint de na cláir agus na tosaíochtaí polaitiúla atá ann cheana a bhaint amach ag an am céanna; á chur i bhfáth, thairis sin, go bhfuil gá le hacmhainní dílse breise leordhóthanacha freisin chun aghaidh a thabhairt ar dhúshlán an mhéadaithe; á thabhairt dá haire go gcuireann an méadú le héilimh eile atá ag dul i méid ar chistiú an Aontais i réimsí na cobhsaíochta airgeadais, an neamhspleáchais straitéisigh, na sláinte, an fhuinnimh, an dícharbónaithe, an aistrithe chuig fuinneamh glan, cosaint an chomhshaoil, an digitithe, an taighde, na cosanta agus na slándála; á chur i bhfios go láidir nach mór athchóirithe airgeadais den sórt sin a mheas i gcomhthráth leis an gcaibidlíocht aontachais atá ar siúl faoi láthair agus nach mór iad a ghlacadh roimh an méadú; ag cosaint a seasaimh gur cheart struchtúr CAI atá ann faoi láthair agus a bheidh ann amach anseo a athstruchtúrú agus a neartú go suntasach chun athléimneacht a mhéadú; á chur i bhfios go láidir gur gá aontachas comhaltaí nua a chur san áireamh agus CAI 2028-2034 á ullmhú;

41.á iarraidh go ndéanfadh an Coimisiún agus na tíortha is iarrthóirí ról speisialta FBManna a ráthú mar phríomhcholún maidir le beartais thionsclaíocha a neartú agus feabhas a chur ar chumas na dtíortha aistriú cóir a bhaint amach agus oiriúnú do dhúshláin theicneolaíocha ar an mbealach chuig aistriú digiteach cuimsitheach;

42.á iarraidh an athuair go ndéanfadh an Comhairle, an Coimisiún agus SEGS feabhas a chur ar chumarsáid straitéiseach agus ar infheictheacht thairbhí socheacnamaíocha frithpháirteacha agus dúshláin an mhéadaithe araon sna tíortha aontachais agus sna Ballstáit araon trí straitéis éifeachtach feachtais faisnéise le linn phróiseas an mhéadaithe, lena léirítear torthaí nithiúla an phróisis aontachais leanúnaigh agus torthaí gach babhta caibidlíochta;

43.á iarraidh an athuair go ndéanfaí na moltaí ón gCoiste Speisialta um an Trasnaíocht Eachtrach ar na Próisis Dhaonlathacha Uile san Aontas Eorpach, lena n-áirítear Bréagaisnéis (INGE) a chur chun feidhme, go háirithe trí dhlús a chur leis na hiarrachtaí chun an bhréagaisnéis a chomhrac agus trí chur isteach mailíseach eachtrach agus iarrachtaí chun an bonn a bhaint den daonlathas agus lánpháirtiú an Aontais a chosc trí chobhsaíocht pholaitiúil, eacnamaíoch agus shóisialta sna tíortha is iarrthóirí a chur de dhroim seoil;

44.á chur i bhfios gur dúshlán ilghnéitheach é atógáil agus téarnamh iarchogaidh na hÚcráine ar gá aghaidh a thabhairt air i gcomhthéacs níos leithne d’iarracht idirnáisiúnta; á chur i bhfáth go gcaithfidh cistiú don Úcráin eascairt as an iliomad foinsí idirnáisiúnta, lena n-áirítear sócmhainní calctha na Rúise; á chur i bhfios go láidir go mbeidh rioscaí airgeadais gaolmhara ag baint leis na hinfheistíochtaí sin agus á áitiú nach mór dlúthfhaireachán a dhéanamh ar an bpróiseas sin agus é a leabú i gcreat reachtach dea-dheartha agus saincheaptha, is é sin le rá, sábháilte ó éilliú agus calaois; á iarraidh, i ndáil leis sin, go nglacfaí gan mhoill an Rialachán lena mbunaítear an tSaoráid don Úcráin;

45.á chur in iúl gur geal léi obair an Choimisiúin maidir le beartas réamh-mhéadaithe agus an t-athbhreithniú ar chistiú, agus á iarraidh go ndéanfaí measúnú tionchair críochnúil ar impleachtaí an mhéadaithe; ag tacú le sásra éifeachtach um réiteach coinbhleachtaí agus idirghabháil, a fhaigheann tacaíocht ón Aontas, a chruthú lasmuigh den chreat um méadú, atá dírithe ar athmhuintearas a chothú agus ar shaincheisteanna déthaobhacha a réiteach i dtíortha aontachais, lena gcabhrófar le réitigh cheangailteacha chinntitheacha ar dhíospóidí réigiúnacha agus déthaobhacha agus ar leagáidí an ama a chuaigh thart a aimsiú agus a chur chun feidhme;

46.á iarraidh go nglacfaí toghcháin Eorpacha 2024 mar dheis chun an gá agus na tairbhí a bhaineann leis an bpróiseas chun an tAontas Eorpach a dhoimhniú agus a mhéadú a phlé agus a chur i láthair; agus na hathchóirithe Eorpacha polaitiúla, institiúideacha agus airgeadais is gá;

47.á threorú dá hUachtarán an rún seo a chur ar aghaidh chuig an gComhairle, chuig an gCoimisiún, chuig Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála, agus chuig rialtais agus parlaimintí na mBallstát agus chuig rialtais agus parlaimintí na dtíortha aontachais.