1.Jilqa’ l-aspirazzjoni ta’ bosta pajjiżi Ewropej u ċ-ċittadini tagħhom li jissieħbu fl-UE u jirrikonoxxi r-rieda politika tagħhom u l-isforzi serji li għamlu biex jissodisfaw ir-rekwiżiti għas-sħubija;

2.Jemmen li t-tkabbir huwa ta’ importanza strateġika fundamentali għall-UE; jafferma mill-ġdid li politika ta’ tkabbir imsaħħa saret waħda mill-aktar għodod politiċi u ġeopolitiċi b’saħħithom tal-UE li jirrappreżentaw investiment ġeostrateġiku fil-paċi, fid-demokrazija, fl-istabbiltà, fis-sigurtà, fil-protezzjoni tal-klima u l-prosperità fit-tul fil-kontinent kollu u aktar u aktar fid-dawl tal-gwerra ta’ aggressjoni tar-Russja kontra l-Ukrajna u sfidi ġeopolitiċi komuni oħra, li jirrikjedu viżjoni politika fit-tul u deċiżjonijiet kuraġġużi; jenfasizza l-urġenza politika li jintwera l-impenn tal-UE għall-ordni internazzjonali bbażat fuq ir-regoli; jinsisti li, minħabba l-isfidi ewlenin tas-sigurtà li qed tiffaċċja l-Ewropa, it-tkabbir tal-UE u l-inklużjoni tal-Ukrajna fis-sistemi ta’ sigurtà u difiża kollettivi tal-Punent se jsaħħu s-sigurtà Ewropea;

3.Jilqa’ r-rakkomandazzjonijiet tal-Kummissjoni fil-pakkett tat-tkabbir tal-2023 u jilqa’ wkoll id-deċiżjonijiet tal-Kunsill Ewropew li jiftaħ negozjati ta’ adeżjoni mal-Ukrajna u mar-Repubblika tal-Moldova, li jagħti lill-Georgia status ta’ kandidat bil-kundizzjoni li jittieħdu l-passi rilevanti stabbiliti fir-rakkomandazzjoni tal-Kummissjoni tat-8 ta’ Novembru 2023 u li jinfetħu negozjati ta’ adeżjoni mal-Bożnija-Ħerzegovina, ladarba jintlaħaq il-livell meħtieġ ta’ konformità mal-kriterji tas-sħubija; jistieden lill-Kunsill jagħti l-kompitu lill-Kummissjoni biex tippreżenta immedjatament proposti għall-oqfsa ta’ negozjar rilevanti u tadottahom ladarba jittieħdu l-passi rilevanti stabbiliti fir-rakkomandazzjonijiet rispettivi tal-Kummissjoni tat-8 ta’ Novembru 2023;

4.Jirrikonoxxi l-opportunità u l-isfida storika li qed tiffaċċja l-UE li tissodisfa l-impenji tagħha lejn il-pajjiżi u lejn il-popli tal-Albanija, tal-Bożnija-Ħerzegovina, tal-Maċedonja ta’ Fuq, tal-Kosovo, tal-Montenegro u tas-Serbja, kif ukoll tal-Ukrajna, tar-Repubblika tal-Moldova, u tal-Georgia; jirrikonoxxi l-importanza tal-integrazzjoni Ewropea ta’ dawn is-sħab kruċjali; jirrikonoxxi wkoll l-importanza tal-kooperazzjoni reġjonali fi ħdan ir-reġjuni rispettivi tas-Sħubija tal-Lvant, u l-Balkani tal-Punent;

5.Itenni l-fehma li l-proċess ta’ adeżjoni tat-Turkija mal-UE ma jistax jitkompla fiċ-ċirkostanzi attwali; iħeġġeġ bis-saħħa lill-Gvern Tork ineħħi l-imblokk attwali u jimxi ’l quddiem lejn sħubija aktar mill-qrib, aktar dinamika u strateġika billi jiżviluppa qafas parallel realistiku ta’ kooperazzjoni, bħal ftehim ta’ assoċjazzjoni modernizzat u jistieden lill-Kummissjoni tesplora formati possibbli għal qafas bħal dan; ifakkar li kwalunkwe titjib fir-relazzjonijiet bejn l-UE u t-Turkija jrid ikun ibbażat fuq progress tanġibbli fil-qasam tad-drittijiet tal-bniedem, id-demokrazija u relazzjonijiet rispettużi ta' viċinat;

6.Jissottolinja li l-adeżjoni mal-UE għandha dejjem tkun proċedura bbażata fuq il-mertu u li biha kull applikant jeħtieġlu jiġi vvalutat fuq il-mertu tiegħu stess fit-twettiq tal-kriterji ta’ Copenhagen fl-intier tagħhom; jenfasizza li ma jistgħux jinqatgħu kantunieri f’dak li għandu x’jaqsam mal-valuri u mal-prinċipji fundamentali tal-UE; jenfasizza li l-istat tad-dritt, ir-riforma demokratika, il-libertà tal-midja u r-rispett għad-drittijiet tal-bniedem, inklużi d-drittijiet tal-minoranzi, għandhom jitqiegħdu fuq quddiem nett tal-proċess ta’ adeżjoni, u li l-indipendenza ġudizzjarja, il-ġlieda kontra l-korruzzjoni u l-għoti tas-setgħa lis-soċjetà ċivili jkunu prekundizzjonijiet kruċjali għall-progress fit-triq lejn is-sħubija fl-UE;

7.Jitlob li jissaħħu mekkaniżmi effettivi ta’ monitoraġġ għall-protezzjoni tal-valuri fundamentali u l-interessi finanzjarji sodi tal-Unjoni fil-kuntest tal-proċeduri ta’ adeżjoni; itenni f’dan ir-rigward is-sejħiet tiegħu biex jiġu inklużi l-pajjiżi kandidati fil-mekkaniżmu tal-UE għall-istat tad-dritt u l-eżerċizzju ta’ rappurtar annwali tiegħu, biex b'hekk jiġu attivati awtomatikament il-mekkaniżmi ta’ kooperazzjoniu ta’ verifika ta’ qabel l-adeżjoni ; jappoġġja l-intenzjoni tal-Kummissjoni li tinkludi l-pajjiżi tal-adeżjoni fir-Rapporti dwar l-Istat tad-Dritt u jinsisti li dawn jikkontribwixxu għar-rapporti ta’ progress annwali;

8.Iħeġġeġ lill-pajjiżi tat-tkabbir ikomplu jimplimentaw b’mod sod ir-riformi meħtieġa u jagħmlu progress tanġibbli u irriversibbli, billi jibdew bl-elementi fundamentali tal-proċess ta’ adeżjoni mal-UE;

9.Jinsisti fuq il-ħtieġa ta’ sforzi kontinwi fit-trawwim tal-pluraliżmu tal-media, fid-difiża tad-drittijiet tal-ġurnalisti, u fl-iżgurar tal-libertà tal-espressjoni fil-pajjiżi kandidati kollha;

10. Jirrimarka li l-allinjament mal-PESK tal-UE huwa wkoll mod importanti kif tintwera aderenza sħiħa mal-prinċipji fundamentali tal-UE u sħubija futura sostenibbli; iħeġġeġ bis-saħħa lill-pajjiżi kandidati u kandidati potenzjali kollha jipprijoritizzaw allinjament rapidu u sħiħ mal-PESK u jtenni li l-adeżjoni ta’ pajjiż partikolari tista’ tipproċedi biss ladarba tallinja ruħha mal-miżuri restrittivi tal-UE, inklużi sanzjonijiet stabbiliti b’reazzjoni għall-gwerra ta’ aggressjoni tar-Russja kontra l-Ukrajna;

11.Jitlob li ssir evalwazzjoni bir-reqqa tal-istrateġija tat-tkabbir tal-UE kif ukoll tar-raġunijiet għalfejn sar progress limitat minn xi pajjiżi tat-tkabbir li jridu jiġu valutati, b’mod partikolari fl-oqsma tal-istat tad-dritt, id-drittijiet tal-bniedem u d-demokrazija;

12.Iqis il-metodoloġija riveduta tal-Kummissjoni, li għandha tiġi aġġornata biex tinkludi l-proċessi ta’ adeżjoni tal-Ukrajna, tar-Repubblika tal-Moldova u tal-Georgia, bħala qafas ta’ politika fit-tul, li jiggwida l-proċess ta’ tkabbir;

13.Jisħaq li filwaqt li l-proċess għandu jsir aktar inkrementali u dinamiku u l-UE għandha tistabbilixxi miri ta’ riforma individwali konkreti, pjanijiet direzzjonali u skedi ta’ żmien intermedji għal kull pajjiż ta’ adeżjoni, ma jistax ikun hemm skadenzi rapidi jew definiti minn qabel għas-sħubija, peress li dawn jistgħu jaffettwaw l-integrità tal-proċess ta’ adeżjoni; jemmen, madankollu, li t-tkabbir tal-UE li jmiss għandu jseħħ hekk kif il-kundizzjonijiet kollha tal-adeżjoni jiġu ssodisfati fil-pajjiżi kandidati kkonċernati u b’mod parallel ir-riformi Ewropej meħtieġa jiġu miftiehma u implimentati; jistenna li l-ewwel pajjiżi kandidati jkunu lesti li jissieħbu fl-Unjoni sa tmiem dan id-deċennju;

14.Jinsisti li t-tkabbir tal-UE huwa responsabbiltà kondiviża tal-Istati Membri attwali u dawk aspiranti; jistieden lill-Istati Membri juru impenn politiku ċar u inekwivoku lejn il-proċess ta’ tkabbir, ibbażat fuq kriterji oġġettivi u mhux użat ħażin biex isolvi tilwim bilaterali, li għandu jiġi solvut separatament mill-proċess ta’ adeżjoni; jisħaq li d-dewmien eċċessiv fit-triq lejn sħubija sħiħa tal-UE jista’ jkollu impatt negattiv kemm fuq l-opinjoni pubblika kif ukoll fuq l-impenn politiku tal-pajjiżi kandidati;

15.Jissottolinja li l-proċessi ta’ adeżjoni jistgħu jseħħu b’mod riversibbli, u li l-approċċ ibbażat fuq il-mertu jista’ jwassal ukoll għall-iffriżar tan-negozjati tal-adeżjoni f’każ ta’ rigress fil-valuri fundamentali, u jista’ jitkompla biss wara progress sinifikanti fir-riformi; jitlob monitoraġġ, rappurtar u valutazzjoni robusti u msaħħa tar-riformi u l-progress li sar mill-pajjiżi kandidati fil-kapitoli tan-negozjati kollha b’kundizzjonalità mmirata applikata strateġikament ibbażata fuq parametri referenzjarji ċari tal-progress, is-sanzjonar tar-rigressjoni fuq il-prinċipji fundamentali jew l-istaġnar persistenti fir-riformi u l-ippremjar tar-riformi u t-twettiq tal-parametri referenzjarji permezz ta’ skedi ta’ żmien ċari għan-negozjati;

16.Jitlob lill-Kummissjoni ttejjeb il-konsistenza, l-effiċjenza u t-trasparenza tal-assistenza ta’ qabel l-adeżjoni, filwaqt li tirrifletti l-prijoritajiet b’mod ċar fl-oqsma fundamentali fl-allokazzjoni tal-finanzjament tal-IPA III; jitlob, b’mod partikolari, għall-introduzzjoni ta’ obbligu ta’ rendikont aktar strett u aktar infurzabbli fir-rigward tal-infiq u għat-titjib taċ-ċiklu ġenerali tal-iżborż, l-implimentazzjoni u l-iskrutinju tal-finanzjament ta’ qabel l-adeżjoni, bl-applikazzjoni ta’ kundizzjonalità stretta, inkluż fl-implimentazzjoni tal-Pjan Ekonomiku u ta’ Investiment u l-Pjan ġdid ta’ Tkabbir għall-Balkani tal-Punent; jistieden lill-Kummissjoni twettaq rieżami ta’ nofs it-terminu tar-Regolament IPA III u tipproponi l-elenkar tal-Ukrajna, tar-Repubblika tal-Moldova u tal-Georgia bħala l-benefiċjarji tagħha, jistieden lill-Kummissjoni timplimenta malajr ir-rakkomandazzjonijiet tar-Rapport Speċjali 01/2022 tal-Qorti Ewropea tal-Awdituri;

17.Jitlob li jiġu esplorati possibilitajiet biex tissaħħaħ aktar il-protezzjoni tal-istat tad-dritt u l-valuri demokratiċi tal-UE kontra r-rigress, kemm għall-Istati Membri attwali kif ukoll għal dawk futuri fil-kuntest tar-riforma tat-Trattat, filwaqt li jiġi żgurat li t-tkabbir isaħħaħ l-UE u s-suq uniku;

18. Jissottolinja l-ħtieġa li jiġi żgurat li l-fondi tal-UE pprovduti lill-pajjiżi tat-tkabbir ikunu konformi mal-għanijiet u l-interessi strateġiċi proprji tal-UE; jitlob lill-Kummissjoni tappoġġja finanzjarjament lil dawk il-pajjiżi tal-adeżjoni li jaħdmu biex jiksbu relazzjonijiet tajba mal-viċinat, kooperazzjoni reġjonali inklużiva u rikonċiljazzjoni sostenibbli, inkluż iżda mhux limitat għall-prosekuzzjoni tal-kriminali tal-gwerra u l-iżgurar tal-aċċess għall-verità, il-ġustizzja u r-riparazzjonijiet effettivi għall-vittmi ta’ reati tal-gwerra, reati kontra l-umanità u l-ġenoċidju;

19.Jistieden lill-pajjiżi tal-adeżjoni jsaħħu l-kooperazzjoni ġudizzjarja mal-UE f’materji kriminali skont l-arranġamenti ta’ ħidma mal-Uffiċċju tal-Prosekutur Pubbliku Ewropew (UPPE) sabiex jiffaċilitaw l-investigazzjoni u l-prosekuzzjoni effettivi tal-użu ħażin tal-fondi tal-UE, inkluż permezz tas-sekondar ta’ uffiċjali ta’ kollegament nazzjonali mal-UPPE, u t-tisħiħ tal-kapaċità amministrattiva tal-amministrazzjonijiet lokali;

20.Itenni l-pożizzjoni tiegħu dwar il-ħtieġa ta’ kooperazzjoni msaħħa, formali, strutturata u sistematika bejn l-UE u l-Kunsill tal-Ewropa fl-appoġġ għall-pajjiżi tal-adeżjoni fil-qasam tar-riformi, filwaqt li tiġi żgurata l-konformità tagħhom mar-rakkomandazzjonijiet kollha tal-Kummissjoni ta’ Venezja fi triqithom lejn is-sħubija fl-UE;

21.Jemmen li l-isfida ta’ UE estiża teħtieġ politika ta’ tkabbir imsaħħa li tistabbilixxi direzzjoni inkrementali ċara lejn is-sħubija fl-UE, inkluż integrazzjoni gradwali f’politiki komuni bħas-suq uniku, għal dawk il-pajjiżi li jtemmu n-negozjati f’kapitolu ta’ politika partikolari jew li jagħmlu progress sostanzjali fil-qasam tar-riformi relatati mal-UE; jinnota li tali progress għandu jippermetti l-aċċess għall-fondi tal-UE fl-oqsma rispettivi sabiex iġib benefiċċji ċari għaċ-ċittadini matul il-proċess kollu; jinnota li din id-direzzjoni għandha tkun akkumpanjata minn aktar assistenza teknika u finanzjarja kundizzjonali b’enfasi speċjali fuq l-implimentazzjoni u l-infurzar tal-liġijiet taħt ġbir ta’ negozjati fuq prinċipji fundamentali u relazzjonijiet esterni, b’mod speċjali l-kapitoli 23, 24, 30 u 31; jistieden lill-Kummissjoni biex tippreżenta proposti dettaljati dwar il-metodoloġija ta’ adeżjoni inkrementali, inklużi klawżoli ċari ta’ “gradwazzjoni” u ta’ riversibbiltà ; jissottolinja li d-dħul gradwali tal-pajjiżi kandidati f’oqsma ta’ politika magħżula bi drittijiet u obbligi limitati m’għandu bl-ebda mod jissostitwixxi jew ikun ta’ alternattiva għal sħubija sħiħa;

22.Jirrikonoxxi l-importanza ta’ inizjattivi bħall-Komunità Politika Ewropea, li jippermettu l-kooperazzjoni politika u jikkontribwixxu għal djalogi reġjonali u li jistgħu jiffaċilitaw l-integrazzjoni gradwali tal-pajjiżi kandidati fl-Unjoni u fil-politiki tagħha, iżda dawn mhumiex alternattivi għas-sħubija fl-UE;

23.Jisħaq li jista’ jkun utli li jkun hemm kariga separata ta’ Kummissarju għat-Tkabbir;

24.Jissuġġerixxi li jiġi kkunsidrat li l-pajjiżi kandidati jingħataw status ta’ osservaturi f’korpi u istituzzjonijiet rilevanti, inkluż il-Parlament, inizjalment abbażi ta’ arranġamenti temporanji jekk in-negozjati jkunu avvanzati biżżejjed, b’mod partikolari dwar ġbir fuq prinċipji fundamentali u r-relazzjonijiet esterni, u l-kundizzjonijiet kollha jiġu ssodisfati u miftiehma, sakemm jiġu ffirmati t-trattati ta’ adeżjoni; jilqa’ f’dan ir-rigward id-deċiżjoni tal-Kumitat Ekonomiku u Soċjali Ewropew li jinkludi osservaturi minn pajjiżi kandidati mill-2024;

25.Iqis li hemm bżonn ta’ teħid ta’ deċiżjonijiet u sorveljanza aktar b’saħħithom, aktar effettivi u sinifikanti tal-Parlament Ewropew tal-politika tat-tkabbir tal-UE u l-finanzjament tagħha, sabiex jiżdiedu l-leġittimità demokratika u r-responsabbiltà; jinsisti fuq it-tisħiħ tar-rwol tal-Parlament matul il-proċess kollu ta’ adeżjoni, inkluż il-passi intermedji li jkopru l-iskrutinju kollu tal-progress li jkun sar mill-pajjiżi kandidati fl-oqsma tal-politika kollha; jimpenja ruħu li jtejjeb id-djalogu u l-kooperazzjoni regolari u trasparenti mal-parlamenti nazzjonali tal-pajjiżi kandidati bħala mudell għall-iskrutinju parlamentari tal-integrazzjoni tal-UE;

26.Jissottolinja l-ħtieġa li jissaħħaħ l-appoġġ għad-demokrazija permezz tal-mezzi u l-istrumenti eżistenti, bħad-Djalogu Jean Monnet, id-Djalogu bejn il-Partiti (IPD) u l-Proċess ta’ Djalogu Parlamentari (PDP);

27.Jitlob lill-istituzzjonijiet tal-UE u lill-Istati Membri jinvolvu ruħhom bis-sħiħ biex isaħħu aktar il-proċessi ta’ riforma fil-pajjiżi kandidati, b’mod partikolari l-kapaċitajiet amministrattivi tagħhom;

28.Jissottolinja l-ħtieġa li tiżdied it-trasparenza, tingħata s-setgħa lill-parteċipazzjoni taċ-ċittadini u l-involviment mill-qrib tas-soċjetà ċivili fil-proċess tat-tkabbir u l-iskrutinju tiegħu, billi jiġi żgurat finanzjament sostenibbli;

29.Jissottolinja li l-proċess ta’ tkabbir ma għandux jipperpetwa jew jaggrava b’mod involontarju d-disparitajiet abbażi tal-orjentazzjoni sesswali u tal-identità tal-ġeneru; iħeġġeġ bis-saħħa lill-Kummissjoni u lill-pajjiżi kandidati jintegraw miżuri fil-proċess tat-tkabbir li jippromwovu u jiżguraw b’mod attiv id-drittijiet tal-individwi LGBTIQ, bħall-iżvilupp ta’ politiki li jeliminaw id-diskriminazzjoni bbażata fuq l-orjentazzjoni sesswali u l-identità tal-ġeneru, it-tisħiħ tal-parteċipazzjoni tal-LGBTIQ fil-proċessi tat-teħid tad-deċiżjonijiet, u t-trawwim tal-inklużività fl-isferi politiċi, ekonomiċi, u soċjali permezz ta’ attivitajiet ta’ edukazzjoni u ta’ sensibilizzazzjoni; jistieden lill-Kummissjoni u lill-pajjiżi kandidati jimmonitorjaw u jevalwaw kif xieraq l-istatus tad-drittijiet tal-LGBTIQ fil-pajjiżi kandidati;

30.Iqis li l-proċess ta’ adeżjoni jrid jiżgura li l-pajjiżi kandidati jżidu l-isforzi tagħhom relatati mad-drittijiet ugwali għall-persuni b’diżabbiltà; jenfasizza l-ħtieġa li tiżdied il-pressjoni fuq il-pajjiżi kandidati biex jimplimentaw ir-riformi ħalli tittejjeb is-sitwazzjoni tal-persuni b’diżabbiltà u jżidu l-isforzi tagħhom f’termini ta’ deistituzzjonalizzazzjoni inkluża t-tranżizzjoni minn kura istituzzjonali għall-familja u għal kura bbażata fil-komunità;

31.Iqis li l-proċessi ta’ tħejjija għat-tkabbir għandhom jipproċedu b’mod parallel fl-UE u fil-pajjiżi ta’ adeżjoni; jisħaq li riformi istituzzjonali u finanzjarji Ewropej huma meħtieġa biex jintlaqgħu l-isfidi attwali u tiġi żgurata l-kapaċità tal-UE li tassorbi membri ġodda u li tippromwovi l-integrazzjoni b’suċċess tagħhom; jitlob lill-Istituzzjonijiet tal-UE u lill-Istati Membri jwettqu r-riformi meħtieġa biex jiżguraw li l-assenza tagħhom ma ddewwimx l-adeżjoni ta’ Stati Membri ġodda; jinnota li dawn ir-riformi huma meħtieġa biex jissaħħu l-UE u l-istituzzjonijiet tagħha sabiex jiġu promossi l-leġittimità demokratika, il-governanza tajba, il-funzjonalità, ir-responsabbiltà, it-trasparenza u s-sostenibbiltà; Jisħaq, b’mod partikolari, fuq l-importanza li tissaħħaħ il-leġittimità demokratika tal-politiki tal-UE billi jissaħħu d-drittijiet tat-teħid tad-deċiżjonijiet u tal-iskrutinju tal-Parlament; itenni, għalhekk, it-talbiet tiegħu li l-Parlament Ewropew jingħata dritt ġenerali u dirett ta’ inizjattiva leġiżlattiva;

32.Jemmen bis-sħiħ li r-riformi istituzzjonali Ewropej għandhom iżidu l-kapaċità tal-UE li taġixxi, u jinkludu proċeduri ta’ teħid ta’ deċiżjonijiet simplifikati u aktar effettivi, li jitbiegħdu mill-unanimità; itenni li l-votazzjoni b’maġġoranza kwalifikata għandha tiġi implimentata f’oqsma bħall-protezzjoni tad-demokrazija, id-drittijiet tal-bniedem u l-istat tad-dritt, il-QFP, is-sanzjonijiet u deċiżjonijiet rilevanti oħra dwar il-politika barranija, bħall-bidu tan-negozjati tal-adeżjoni mal-UE, il-ftuħ u l-għeluq ta’ ġbir ta’ negozjati individwali u s-sanzjonar ta’ rigress, iżda bl-eċċezzjoni ta’ deċiżjonijiet li jawtorizzaw missjonijiet jew operazzjonijiet militari b’mandat eżekuttiv;

33.Jitlob li l-mekkaniżmu jipproteġi l-istat tad-dritt u l-prinċipji u l-valuri fundamentali tal-UE, u li l-kapaċità ta’ monitoraġġ tiżgura l-konformità mal-kriterji ta’ Copenhagen, biex dawn jissaħħu qabel it-tkabbir li jmiss; jipproponi riforma tal-proċedura fl-Artikolu 7 tat-TUE billi tintemm l-unanimità fid-deċiżjonijiet tal-Kunsill, tiddaħħal skeda ta’ żmien ċara, u l-Qorti tal-Ġustizzja ssir l-arbitru tal-ksur; jirrimarka li l-introduzzjoni ta’ votazzjoni b’maġġoranza kwalifikata (VMK) f’dan ir-rigward tiffaċilita l-proċess ta’ tkabbir; jisħaq fuq il-ħtieġa ta’ aktar riformi tal-mekkaniżmu ta’ kundizzjonalità tal-istat tad-dritt li jkopri u jiggarantixxi l-valuri fundamentali kollha tal-Unjoni kif definiti fl-Artikolu 2 tat-TUE;

34.Jemmen li fil-kuntest ta’ sħubija sħiħa l-integrazzjoni differenzjata hija parti mis-soluzzjoni għal UE mkabbra effiċjenti u approfondita; jissottolinja, madankollu, li r-rispett għall-valuri tal-Unjoni kif stipulati fl-Artikolu 2 tat-TUE ma jistax jiġi negozjat, qatt ma għandu jkun suġġett għal xi derogi jew nonparteċipazzjoni u li s-sħubija tal-Unjoni għandha tirrikjedi impenn b’saħħtu biex jiġi rispettat id-dritt tal-UE; iqis ukoll li għandu dejjem jiġi żgurat qasam wiesa’ ta’ bażi komuni Ewropea, li jkopri oqsma bħall-Unjoni Doganali, is-suq uniku u l-erba’ libertajiet tiegħu, l-acquis soċjali ċentrali, u l-politiki tal-agrikoltura, tal-kompetizzjoni u tal-kummerċ; jinnota li lil hinn minn din il-bażi komuni, l-Istati Membri bir-rieda li jmexxu ’l quddiem l-integrazzjoni Ewropea f’firxa usa’ ta’ oqsma ta’ politika għandhom jitħallew jagħmlu dan; jenfasizza li taħt tali sistema ta’ integrazzjoni differenzjata, filwaqt li l-Istati Membri kollha jieħdu sehem f’deċiżjonijiet dwar kwistjonijiet fil-qasam ta’ bażi komuni, huma l-Istati Membri biss bir-rieda li jipparteċipaw f’oqsma ta’ integrazzjoni aktar profonda jistgħu jieħdu sehem fid-deċiżjonijiet ikkonċernati; jinnota li l-integrazzjoni differenzjata timplika wkoll arranġamenti finanzjarji differenzjati;

35.Jitlob l-użu sħiħ tal-flessibbiltà provduta fit-Trattat ta’ Liżbona qabel riforma aktar fil-fond fil-kuntest ta’ reviżjoni possibbli tat-trattati; ifakkar li għadd ta’ strumenti ta’ flessibbiltà, bħal klawsoli passerelle, kooperazzjoni msaħħa, astensjonijiet kostruttivi, Kooperazzjoni Strutturata Permanenti (PESCO) u mekkaniżmi ta’ nonparteċipazzjoni huma diġà possibbli fil-kuntest tal-qafas legali attwali tal-UE, kif turi biċ-ċar l-esperjenza taż-żona Schengen, waħda mill-akbar kisbiet tal-Unjoni, kif ukoll dik taż-żona tal-Ewro; ifakkar li soluzzjonijiet ta’ introduzzjoni gradwali, derogi temporanji u perjodi ta’ tranżizzjoni jistgħu jiġu nnegozjati fil-kuntest tal-proċeduri ta’ adeżjoni; jirrimarka li l-użu ta’ dawn il-mekkaniżmi ta’ flessibbiltà m’għandux jipprevjeni diskussjonijiet kostruttivi dwar ir-reviżjoni tat-trattati, kif approvat mill-Parlament fir-riżoluzzjoni tiegħu tat-22 ta’ Novembru 2023;

36.Jinnota li riformi istituzzjonali ta’ qabel it-tkabbir iridu jindirizzaw ukoll l-implikazzjonijiet tat-tkabbir għall-kompożizzjoni tal-Parlament; ifakkar li l-Parlament Ewropew huwa l-unika istituzzjoni eletta direttament li tirrappreżenta liċ-ċittadini tal-UE; jissottolinja li, filwaqt li tiġi żgurata rappreżentanza demokratika xierqa, il-Parlament għandu jibqa’ f’daqs li jippermettilu jaħdem; jirrimarka, madankollu, li żieda raġonevoli fid-daqs tal-Parlament ma tistax tiġi eskluża sabiex tiġi żgurata rappreżentattività demokratika suffiċjenti f’UE mkabbra; jinsisti fuq sistema ġdida għall-allokazzjoni tas-siġġijiet ibbażata fuq formula matematika permanenti, li hija oġġettiva, ġusta, trasparenti u dejjiema; itenni l-pożizzjoni tiegħu li l-allokazzjoni tas-siġġijiet fil-parlament Ewropew għandha titqies flimkien mas-sistema ta’ votazzjoni fil-Kunsill;

37.Jisħaq fuq il-ħtieġa li ssir reviżjoni rapida tal-funzjonament u tal-proċess tat-teħid tad-deċiżjonijiet tal-Kunsill fid-dawl tat-tkabbir; jipproponi li tiġi rieżaminata s-sistema ta’ rotazzjoni tal-presidenzi tal-Kunsill; jinnota li l-kalkolu tal-limiti tal-votazzjoni b’maġġoranza kwalifikata għandu wkoll jiġi kkunsidrat mill-ġdid biex jittejjeb il-bilanċ bejn stati akbar u iżgħar u biex jiġu stabbiliti limiti ogħla għall-aktar deċiżjonijiet importanti; Jitlob l-akbar trasparenza u integrità fil-proċess tat-teħid tad-deċiżjonijiet tal-Kunsill fil-kuntest tat-tkabbir;

38.Jinnota li l-kompożizzjoni tal-Kummissjoni trid tqis it-tkabbir u f’dan ir-rigward ifakkar fil-flessibbiltà prevista fit-Trattat ta’ Liżbona; jissottolinja li kwalunkwe valutazzjoni mill-ġdid tal-prattika tal-ħatra ta’ Kummissarju wieħed għal kull Stat Membru trid tiżgura kompożizzjoni ġeografikament ibbilanċjata tal-Kummissjoni;

39.Itenni l-appell tiegħu għat-tisħiħ tal-istrumenti għall-parteċipazzjoni taċ-ċittadini fil-proċess tat-teħid tad-deċiżjonijiet tal-UE;

40.Jisħaq li t-tkabbir huwa sfida finanzjarja ewlenija għall-UE, b’mod partikolari fir-rigward tal-politiki ta’ koeżjoni u agrikoli, kif ukoll opportunità għal riforma fl-UE; jirrimarka li din l-isfida teħtieġ QFP li jkun imfassal, ipprijoritizzat u ffinanzjat kif xieraq u li baġit tal-UE iktar effettiv jippermetti lill-Unjoni tieħu impenji ġodda filwaqt li tkompli timplimenta l-programmi u l-prijoritajiet politiċi eżistenti; ikompli jisħaq li huma meħtieġa wkoll riżorsi proprji addizzjonali u ġenwini suffiċjenti biex tiġi indirizzata l-isfida tat-tkabbir; jinnota li t-tkabbir iżid ma’ domandi oħra dejjem jikbru fuq il-finanzjament tal-UE fl-oqsma tal-istabbiltà finanzjarja, l-awtonomija strateġika, is-saħħa, l-enerġija, id-dekarbonizzazzjoni, it-tranżizzjoni tal-enerġija nadifa, il-protezzjoni tal-ambjent, id-diġitalizzazzjoni, ir-riċerka, id-difiża u s-sigurtà; jissottolinja li riformi finanzjarji bħal dawn iridu jitqiesu b’mod parallel man-negozjati ta’ adeżjoni li għaddejjin u adottati qabel iseħħ it-tkabbir; jiddefendi l-pożizzjoni tiegħu li l-arkitettura attwali u futura tal-QFP għandha tiġi ristrutturata u msaħħa b’mod sinifikanti biex tiżdied ir-reżiljenza; jissottolinja l-ħtieġa li l-adeżjoni ta’ membri ġodda titqies matul it-tħejjija tal-QFP 2028–2034;

41.Jitlob lill-Kummissjoni u lill-pajjiżi kandidati jiggarantixxu r-rwol speċjali tal-SMEs bħala pilastru ewlieni biex jissaħħu l-politiki industrijali u titjieb il-kapaċità tal-pajjiżi li jiksbu tranżizzjoni ġusta u jadattaw għall-isfidi teknoloġiċi fil-mixja lejn tranżizzjoni diġitali inklużiva;

42.Itenni t-talbiet tiegħu lill-Kunsill, lill-Kummissjoni u lis-SEAE biex itejbu l-komunikazzjoni strateġika u l-viżibilità kemm tal-benefiċċji soċjoekonomiċi reċiproċi kif ukoll tal-isfidi tat-tkabbir kemm fil-pajjiżi tal-adeżjoni kif ukoll fl-Istati Membri permezz ta’ strateġija effettiva ta’ kampanja ta’ informazzjoni matul il-proċess tat-tkabbir, li turi riżultati tanġibbli tal-proċess ta’ adeżjoni li għaddej bħalissa u ta’ kull ċiklu ta’ negozjati;

43.Itenni t-talbiet tiegħu biex jiġu implimentati r-rakkomandazzjonijiet tal-Kumitat Speċjali dwar l-Indħil Barrani fil-Proċessi Demokratiċi kollha fl-Unjoni Ewropea, inkluża d-Diżinformazzjoni (INGE), b’mod partikolari billi jiżdiedu l-isforzi biex tiġi miġġielda d-diżinformazzjoni u jiġi evitat l-indħil barrani malizzjuż u t-tentattivi biex tiġi mminata d-demokrazija u biex tixxekkel l-integrazzjoni tal-UE billi tiġi sabotata l-istabbiltà politika, ekonomika u soċjali fil-pajjiżi kandidati;

44.Jirrimarka li r-rikostruzzjoni u l-irkupru ta’ wara l-gwerra tal-Ukrajna huma sfida multidimensjonali li għandha tiġi indirizzata fil-kuntest usa’ ta’ sforz internazzjonali; jisħaq li l-finanzjament għall-Ukrajna jrid jirriżulta minn diversi sorsi internazzjonali, inklużi assi Russi ffriżati; jissottolinja li dawn l-investimenti se jiġu b’riskji finanzjarji assoċjati u jinsisti li dan il-proċess irid jiġi mmonitorjat mill-qrib u inkorporat f’qafas leġiżlattiv imfassal tajjeb u apposta, li jkun reżistenti għall-korruzzjoni u għall-frodi; jitlob, f’dan ir-rigward, l-adozzjoni rapida tar-Regolament li jistabbilixxi l-Faċilità għall-Ukrajna;

45.Jilqa’ l-ħidma tal-Kummissjoni dwar il-politika ta’ qabel it-tkabbir u r-reviżjoni tal-finanzjament, u jitlob valutazzjoni tal-impatt bir-reqqa tal-implikazzjonijiet tat-tkabbir; jappoġġja l-ħolqien ta’ mekkaniżmu effettiv ta’ riżoluzzjoni u ta’ medjazzjoni tal-kunflitti appoġġjat mill-UE barra mill-qafas tat-tkabbir, iddedikat għat-trawwim tar-rikonċiljazzjoni u għas-soluzzjoni ta’ kwistjonijiet bilaterali fil-pajjiżi tal-adeżjoni, li jgħin biex jinstabu u jiġu implimentati soluzzjonijiet vinkolanti definittivi għal tilwim reġjonali u bilaterali u l-legati tal-passat;

46.Jitlob li l-elezzjonijiet Ewropej tal-2024 jittieħdu bħala opportunità biex jiġu diskussi u ppreżentati l-ħtieġa u l-benefiċċji tal-proċess tal-approfondiment u t-tkabbir tal-Unjoni Ewropea; u r-riformi politiċi, istituzzjonali u finanzjarji Ewropej meħtieġa;

47.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lill-gvernijiet u lill-parlamenti tal-Istati Membri, u lill-gvernijiet u lill-parlamenti tal-pajjiżi ta’ adeżjoni.