1.Jesprimi t-tħassib tiegħu dwar is-sitwazzjoni ekonomika, l-inċertezza persistenti, kif ukoll it-tkabbir, il-kompetittività u l-produttività dgħajfa fl-UE; jinnota bi tħassib l-impatt kontinwu tal-prezzijiet tal-enerġija u l-inflazzjoni fuq il-kapaċità tal-akkwist tal-unitajiet domestiċi, li jirriżulta f’żieda tar-riksju ta’ faqar, inkluż dak enerġetiku, għal bosta Ewropej, u fuq il-kapaċità ta’ prestazzjoni tal-kumpaniji tal-UE, inkluż l-intrapriżi żgħar u ta’ daqs medju (SMEs); jistieden lill-Istati Membri jieħdu passi ulterjuri biex jegħlbu dawk id-diffikultajiet u jimplimentaw miżuri mmirati biex jiżguraw kompetizzjoni ġusta fis-suq uniku, kif ukoll biex jindirizzaw il-pressjonijiet persistenti mill-inflazzjoni;

2.Jinnota li bosta Stati Membri qed ibatu minn sfidi strutturali li jxekklu l-potenzjal tat-tkabbir tagħhom; jenfasizza li l-indirizzar tal-isfidi strutturali huwa kruċjali għal irkupru sostenibbli u tkabbir kontinwu, u li l-implimentazzjoni tar-riformi biex jiġu indirizzati l-vulnerabbiltajiet strutturali hija kruċjali mhux biss biex titjieb il-kapaċità li wieħed jirreżisti u jlaħħaq mal-isfidi eżistenti iżda wkoll biex it-tranżizzjoni doppja titwettaq b’mod sostenibbli u ġust; jenfasizza li r-riformi strutturali ambizzjużi jibqgħu essenzjali biex tissaħħaħ il-bażi ekonomika tal-UE, jiġu promossi l-ħolqien ta’ negozji u l-intraprenditorija u jissaħħu l-kompetittività, il-produttività u l-potenzjal tat-tkabbir ġenerali tal-UE;

3.Jisħaq li nuqqas ta’ investimenti pubbliċi u privati f’ċerti Stati Membri qed ixekkel il-potenzjal tat-tkabbir soċjalment bilanċjat u sostenibbli; jikkunsidra li regoli prevedibbli, kundizzjonijiet ekwi u tnaqqis fil-kostijiet ta’ konformità huma fatturi kruċjali biex jiġi attirat l-investiment; jenfasizza li dawn l-investimenti huma kruċjali għall-kapaċità tal-UE li tlaħħaq mal-isfidi eżistenti, inkluż it-tranżizzjoni ekoloġika u diġitali ġusta, u li huma se jżidu r-reżiljenza u l-kompetittività fit-tul tal-UE matul l-isfidi li ġejjin; jemmen li dawn l-investimenti għandhom ikunu akkumpanjati minn riformi li jsaħħu t-tkabbir u r-reżiljenza; jiġbed l-attenzjoni għall-investimenti fl-enerġija rinnovabbli u l-effiċjenza enerġetika li huma meħtieġa biex, fost affarijiet oħra, l-UE ssir indipendenti mill-fjuwils fossili importati u tiġi limitata l-inflazzjoni xprunata mill-prezzijiet tal-enerġija; jieħu nota tal-pożizzjoni fiskali restrittiva mistennija fl-2023 u l-2024; jenfasizza li kwalunkwe kontrazzjoni ma għandhiex tkun għad-detriment tal-investiment, li għandu jiżdied madwar l-Unjoni;

4.Jisħaq li l-approfondiment ulterjuri tas-suq uniku u t-tneħħija tal-ostakli għall-investiment, inkluż permezz ta’ riformi li jissimplifikaw u jiddiġitalizzaw l-ippjanar, il-ħruġ tal-permessi u proċeduri amministrattivi oħra, jgħinu biex jixprunaw l-investiment privat; itenni li l-politika industrijali, kif ukoll is-swieq kapitali profondi u integrati tal-UE kif ukoll l-innovazzjoni, jistgħu jkunu wkoll ta’ kontribut billi jappoġġjaw l-investiment, jissalvagwardjaw il-kompetittività globali tal-UE u jevitaw ir-riskji marbuta mad-dipendenza eċċessiva fuq għadd limitat ta’ pajjiżi mhux tal-UE għal inputs industrijali, materja prima u teknoloġiji ewlenin;

5.Jistieden lill-Istati Membri jwettqu rieżamijiet tal-infiq bħala parti regolari mill-proċess baġitarju annwali (jew pluriennali), li jgħinu biex itejbu l-effiċjenza u l-kwalità tal-infiq pubbliku; jaqbel mar-rakkomandazzjoni tal-Kummissjoni fl-Istħarriġ Annwali dwar it-Tkabbir Sostenibbli tal-2024 li l-Istati Membri għandhom inaqqsu l-miżuri ta’ appoġġ għall-enerġija relatati mal-kriżi u jeliminaw gradwalment is-sussidji għall-fjuwils fossili mill-aktar fis possibbli; jisħaq li kemm id-dħul tal-gvern kif ukoll l-infiq tal-gvern huma essenzjali biex tiġi ggarantita s-sostenibbiltà tal-finanzi pubbliċi; jistieden lill-Istati Membri jieħdu azzjoni biex jindirizzaw il-frodi fiskali, l-evitar tat-taxxa, l-evażjoni tat-taxxa u l-ħasil tal-flus; jilqa’ l-ftehim dwar il-pakkett kontra l-ħasil tal-flus f’dan ir-rigward;

6.Jaqbel mal-valutazzjoni tal-Kummissjoni li r-riskji relatati ma’ dejn għoli u diverġenzi tal-prezzijiet jibqgħu rilevanti, b’mod partikolari fl-Istati Membri fejn is-servizz tad-dejn jirrikjedi rifinanzjament kbir tad-dejn, jew fejn is-settur privat jiffaċċja żidiet qawwija fil-pagamenti tal-imgħax;

7.Jistieden lill-Istati Membri fiż-żona tal-euro jesploraw il-metodi kollha possibbli biex titlesta r-reviżjoni tat-Trattat li jistabbilixxi l-Mekkaniżmu Ewropew ta’ Stabbiltà, sabiex jippermetti l-introduzzjoni tal-garanzija ta’ kontinġenza komuni għall-Fond Uniku ta’ Riżoluzzjoni li jkompli jsaħħaħ ir-reżiljenza taż-żona tal-euro;

8.Ifakkar li s-Semestru Ewropew huwa l-qafas stabbilit sew għall-koordinazzjoni tal-politiki baġitarji, ekonomiċi, soċjali u tal-impjiegi madwar l-Unjoni f’konformità mat-Trattati, inkluż il-Pilastru Ewropew tad-Drittijiet Soċjali, u b’hekk jissalvagwardja l-istabbiltà makroekonomika tiegħu, il-konverġenza sostnuta tal-prestazzjonijiet ekonomiċi tal-Istati Membri u l-koeżjoni soċjali tal-UE; jappella għal sjieda nazzjonali aktar b’saħħitha fis-Semestru Ewropew mill-Istati Membri, pereżempju permezz tal-awtoritajiet lokali u reġjonali tagħhom; jinnota li l-pjan industrijali tal-Patt Ekoloġiku tal-2023 huwa l-istrateġija ta’ tkabbir tal-UE;

9.Jikkondividi l-fehma li s-CSRs għall-2024 jeħtieġ li jkunu ffukati fuq kriterji speċifiċi; jissottolinja li dawn iridu jservu wkoll biex jippromwovu tkabbir ekonomiku sod u inklużiv, isaħħu l-kompetittività u l-istabbiltà makroekonomika, jippromwovu t-tranżizzjoni ekoloġika u dik diġitali u jiżguraw ġustizzja soċjali u interġenerazzjonali; iqis id-differenzi rigward it-tbassiriet nazzjonali għat-tkabbir tal-PDG, l-inflazzjoni, il-qgħad, il-bilanċ tal-amministrazzjoni pubblika, id-dejn pubbliku gross u l-bilanċ tal-kontijiet kurrenti u juri l-ħtieġa ta’ approċċi flessibbli, ibbażati fuq ir-realtà speċifika ta’ kull Stat Membru; jistieden, f’dan ir-rigward, lill-Kummissjoni torbot is-CSRs aktar mill-qrib mar-rapporti tal-pajjiżi rispettivi; jappella għal monitoraġġ effiċjenti tal-implimentazzjoni tas-CSRs u tar-riformi rilevanti, kif ukoll tal-progress fit-tnaqqis tal-lakuni identifikati fl-investiment; jisħaq li s-CSRs jeħtieġ li jqisu l-vulnerabbiltajiet soċjali u l-qgħad; jinnota l-għadd dejjem jonqos ta’ CSRs soċjali abbażi tat-tabella ta’ valutazzjoni soċjali;

10.Jilqa’ l-flessibbiltà fl-aġġustament tal-RRF, eż. fil-kuntest tar-REPowerEU, abbażi tat-tagħlimiet meħuda mill-implimentazzjoni tagħha; jenfasizza li l-istadji importanti u l-miri fil-pjanijiet nazzjonali ta’ rkupru għandhom ikunu konsistenti mas-CSRs u li l-Istati Membri għandhom jindirizzaw mill-anqas subsett sinifikanti tas-CSRs, bħala parti mill-pjanijiet nazzjonali tagħhom għall-irkupru u r-reżiljenza; jenfasizza s-suċċess tal-RRF; ifakkar li s-suċċess u l-effettività tal-proġetti ffinanzjati se jitkejlu mill-impatt tagħhom fuq l-ekonomija u l-impjiegi u jappella għal implimentazzjoni rapida, trasparenti u effettiva ta’ dawn il-proġetti; jissottolinja, f’dan ir-rigward, li l-konformità mar-Regolament dwar l-RRF u l-implimentazzjoni xierqa huma kruċjali għall-kredibbiltà tal-RRF;

11.Jinnota r-rwol li għandha l-RRF biex tindirizza l-isfidi globali li jirriżultaw mit-tranżizzjoni ekoloġika u t-trasformazzjoni diġitali tal-ekonomija; jisħaq li r-riformi u l-investimenti fl-ambitu tal-pjanijiet għall-irkupru u r-reżiljenza jikkontribwixxu għall-miri klimatiċi tar-Regolament dwar l-RRF u jirrispettaw il-prinċipju “la tagħmilx ħsara sinifikanti”; jistieden lill-Istati Membri jagħmlu l-aħjar użu minn din l-opportunità u jużaw l-RRF biex jittrasformaw l-ekonomiji tagħhom u jagħmluhom aktar kompetittivi; ifakkar fl-importanza li jiġi vverifikat li l-fondi jilħqu l-ekonomija reali u l-SMEs u jissottolinja l-importanza tal-obbligu ta’ rendikont u t-trasparenza għall-korpi li jirċievu finanzjament mill-UE;

12.Jissottolinja l-importanza tal-investiment privat u pubbliku fil-kuntest tal-irkupru ekonomiku u fil-ġestjoni tat-tranżizzjoni doppja; ifakkar li l-RRF ma tissostitwix ir-rwol speċifiku tal-investiment pubbliku nazzjonali; itenni l-ħtieġa li jiġu żgurati l-kwalità, it-trasparenza u l-obbligu ta’ rendikont fl-investiment pubbliku u fl-istrateġiji nazzjonali sabiex dawn jiġu allinjati mal-objettivi tat-tranżizzjoni doppja; jenfasizza li dawn l-istrateġiji nazzjonali għat-tranżizzjoni doppja għandhom jikkomplementaw l-RRF u strumenti oħra Ewropej ta’ investiment;

13.Jappoġġja s-simplifikazzjoni tal-programmi tal-politika ta’ koeżjoni tal-UE bi ħtiġijiet ta’ investiment identifikati fl-ambitu tal-RRF u fis-CSRs; ifakkar li l-politika ta’ koeżjoni sservi sett usa’ ta’ objettivi mill-RRF u tista’ tikkomplementa l-miżuri maqbula fl-ambitu tal-RRF; jappella biex il-parteċipazzjoni tal-partijiet ikkonċernati, inkluż mis-sħab soċjali, l-organizzazzjonijiet tas-soċjetà ċivili u s-settur tan-negozju, tiġi inkorporata b’mod komparabbli fl-abbozzar u fl-implimentazzjoni tal-pjanijiet nazzjonali għall-irkupru u r-reżiljenza, kif inhu l-każ għall-programmi tal-politika ta’ koeżjoni;

14.Jissottolinja li l-koordinazzjoni bejn l-awtoritajiet rilevanti, inkluż bejn il-gvernijiet nazzjonali u l-awtoritajiet reġjonali u lokali, hija essenzjali għall-ġestjoni tal-RRF u biex jingħelbu l-ostakli amministrattivi u l-burokrazija;

15.Jieħu nota tal-ftehim politiku proviżorju li ntlaħaq bejn il-koleġiżlaturi fl-10 ta’ Frar 2024 dwar ir-riforma tal-qafas ta’ governanza ekonomika tal-UE, li għandu l-għan li jiżgura l-koordinazzjoni effettiva tal-politiki ekonomiċi u l-konverġenza sostnuta tal-prestazzjoni ekonomika u soċjali tal-Istati Membri;

16.Jilqa’ t-tagħlimiet meħuda mill-għażliet tat-tfassil għall-governanza tal-RRF; jinnota li r-riforma tal-qafas ta’ governanza ekonomika ma tipprovdix mekkaniżmi ta’ inċentivi finanzjarji tal-UE biex tappoġġja u tippromwovi riformi u investimenti ta’ politika nazzjonali; jisħaq li l-forniment tal-livell meħtieġ ta’ investiment pubbliku huwa kruċjali biex jintlaħqu l-objettivi ewlenin tar-riforma tal-qafas ta’ governanza ekonomika u biex jiġu indirizzati l-prijoritajiet attwali u futuri tal-Unjoni; jinsab imħasseb li xi Stati Membri mhux se jkollhom il-kapaċità finanzjarja li jiffinanzjaw it-tranżizzjoni ekoloġika u diġitali ġusta waħedhom;

17.Jenfasizza r-rwol tal-Parlament Ewropew fil-qafas ta’ governanza ekonomika tal-UE u jirrakkomanda impenn akbar tal-Parlament Ewropew fis-Semestru Ewropew, filwaqt li jiġu rispettati bis-sħiħ il-kompetenzi stabbiliti mit-Trattati; jinnota d-djalogu bejn il-Kummissjoni u l-Istati Membri dwar il-pjanijiet fiskali u strutturali individwali tagħhom; jisħaq fuq il-ħtieġa li l-Istati Membri kollha jiġu ttrattati b’mod ugwali; jissottolinja li żieda fis-setgħa diskrezzjonali għall-Kummissjoni fil-proċess ta’ żvilupp għall-pjanijiet fiskali strutturali ta’ terminu medju trid tkun akkumpanjata minn konformità akbar mar-regoli taħt l-iskrutinju tal-Bord Fiskali Ewropew, kif ukoll żieda fl-obbligu ta’ rendikont u żieda fil-fluss ta’ informazzjoni lejn il-Parlament Ewropew; jirrikonoxxi li d-Djalogu Ekonomiku bħala parti mis-Semestru Ewropew jistabbilixxi pedament utli tal-obbligu ta’ rendikont; iqis li l-obbligu xieraq ta’ rendikont ikun jirrikjedi li l-Parlament Ewropew ikollu strumenti li jippermettulu japplika konsegwenzi bbażati fuq il-valutazzjoni tiegħu tal-prestazzjoni tas-Semestru Ewropew, f’konformità mat-Trattati;

18.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.