P9_TA(2024)0160L-ambjent repressiv fl-Afganistan, inklużi l-eżekuzzjonijiet pubbliċi u l-vjolenza kontra n-nisaRiżoluzzjoni tal-Parlament Ewropew tal-14 ta' Marzu 2024 dwar l-ambjent repressiv fl-Afganistan, inklużi l-eżekuzzjonijiet pubbliċi u l-vjolenza kontra n-nisa (2024/2617(RSP))Il-Parlament Ewropew,

–wara li kkunsidra r-riżoluzzjonijiet preċedenti tiegħu dwar l-Afganistan,

–wara li kkunsidra l-Artikoli 144(5) u 132(4) tar-Regoli ta’ Proċedura tiegħu,

A.billi minn meta ħadu f’idejhom il-pajjiż it-Talibani żarmaw is-sistema ġudizzjarja, ordnaw lill-imħallfin jimplimentaw bis-sħiħ ix-Xarija u reġgħu bdew l-eżekuzzjonijiet pubbliċi u l-pieni krudili bħas-swat bil-frosta u t-tħaġġir; billi minn dak iż-żmien ’l hawn saru ħames eżekuzzjonijiet pubbliċi li għalihom attendew eluf ta’ persuni;

B.billi t-Talibani virtwalment neħħew lin-nisa u l-bniet mill-ħajja pubblika; billi r-restrizzjonijiet fuq id-drittijiet tagħhom jinkludu l-projbizzjoni tal-aċċess tagħhom għax-xogħol, l-ivvjaġġar u l-kura tas-saħħa mingħajr qarib maskili, il-projbizzjoni tal-edukazzjoni wara s-sitt grad, iċ-ċaħda tal-aċċess għal postijiet pubbliċi u l-isport, l-infurzar vjolenti ta’ kodiċi strett tal-ilbies u ż-żarmar tas-sistema ta’ appoġġ għall-vittmi tal-vjolenza;

C.billi l-minoranzi, bħall-Ħażara u t-Taġikin, qed iħabbtu wiċċhom ma’ repressjoni u diskriminazzjoni dejjem akbar;

1.Jesprimi t-tħassib serju tiegħu dwar il-kriżijiet umanitarji u tad-drittijiet tal-bniedem fl-Afganistan minn mindu t-Talibani ħadu l-kontroll; ifakkar fl-obbligi internazzjonali tal-Afganistan rigward id-drittijiet tal-bniedem; itenni l-impenn sod tiegħu lejn il-poplu Afgan u li jiddefendi d-drittijiet u l-libertajiet li dan kiseb f’dawn l-aħħar 20 sena;

2.Jikkundanna l-interpretazzjoni u l-infurzar radikali tax-Xarija mit-Talibani kif ukoll it-tentattiv biex in-nisa u l-bniet jitneħħew mill-ħajja pubblika, li jikkostitwixxi persekuzzjoni tal-ġeneru u apartheid tal-ġeneru; jitlob li l-parteċipazzjoni sħiħa, ugwali u sinifikattiva tan-nisa u l-bniet fil-ħajja pubblika tiġi restawrata minnufih, b’mod partikolari l-aċċess tagħhom għall-edukazzjoni u x-xogħol; ifaħħar il-kuraġġ tan-nisa tal-Afganistan u jinsab f’solidarjetà magħhom;

3.Jitlob lill-awtoritajiet Afgani de facto jiftħu mill-ġdid is-sistema ta’ appoġġ nazzjonali għall-vittmi tal-vjolenza kontra n-nisa u l-bniet, u jiżguraw modi biex jipprovdu kenn, kura medika, rikors legali u reparazzjonijiet għalihom;

4.Jappella biex il-vittmi tal-vjolenza kontra n-nisa u l-bniet jinħelsu mill-ħabs, fejn qed jinżammu f’kundizzjonijiet inumani għad-detriment tas-saħħa mentali u fiżika tagħhom Missjoni ta’ Assistenza tan-Nazzjonijiet Uniti fl-Afganistan, Divergence of Practice: The Handling of Complaints of Gender-Based Violence against Women and Girls by Afghanistan’s de facto Authorities (Diverġenza tal-Prattika: It-trattament tal-Ilmenti ta’ Vjolenza Abbażi tal-Ġeneru kontra n-Nisa u l-Bniet mill-Awtoritajiet de facto tal-Afganistan), Diċembru 2023.;

5.Iħeġġeġ lill-awtoritajiet Afgani de facto jabolixxu l-piena kapitali u jwaqqfu minnufih l-eżekuzzjonijiet pubbliċi, pieni krudili jew inumani oħra u d-diskriminazzjoni tagħhom kontra n-nisa u l-bniet u l-persekuzzjoni barbara ta’ dawn, u b’mod partikolari tal-minoranzi LGBTIQ+, etniċi u reliġjużi;

6.Jikkundanna d-detenzjoni arbitrarja tad-difensuri tad-drittijiet tal-bniedem, inklużi Manizha Seddiqi, Ahmad Fahim Azimi, Sediqullah Afghan, Fardin Fedayee u Ezatullah Zwab; jitlob li jinħelsu minnufih u bla kundizzjonijiet;

7.Jinsisti li jinżamm impenn strettament kundizzjonali mat-Taliban abbażi tal-ħames parametri referenzjarji stabbiliti mill-Kunsill u mir-rakkomandazzjonijiet tar-Rapporteur Speċjali tan-NU;

8.Jappoġġja t-talbiet tas-soċjetà ċivili Afgana biex l-awtoritajiet de facto jinżammu responsabbli għar-reati tagħhom, b’mod partikolari permezz tal-investigazzjoni tal-Qorti Kriminali Internazzjonali, billi jiġi stabbilit Mekkaniżmu ta’ Investigazzjoni Indipendenti tan-NU u jiġu estiżi l-miżuri restrittivi tal-UE;

9.Iħeġġeġ lill-UE u lill-Istati Membri jżidu l-għajnuna umanitarja u l-finanzjament biex jappoġġjaw il-ħtiġijiet u l-għajxien bażiċi u s-soċjetà ċivili Afgana; iħeġġeġ lill-Istati Membri joħorġu viżi umanitarji lin-nisa u lid-difensuri tad-drittijiet tal-bniedem ippersegwitati u jtemmu l-evakwazzjoni tal-persunal Afgan lokali li tħalla jibqa’ lura;

10.Jistieden lill-komunità internazzjonali u, b’mod partikolari, lill-atturi reġjonali biex iżommu pressjoni fuq l-awtoritajiet Afgani de facto; jenfasizza li r-ritorn furzat tal-Afgani jpoġġihom f’riskju;

11.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lill-Istati Membri, lin-NU u lill-awtoritajiet Afgani de facto.