“D’aontaigh Parlaimint na hEorpa agus an Chomhairle go ndéanfar aon ús nó muirir eile is dlite ar fhíneálacha a cuireadh ar ceal nó a laghdaíodh, pionóis nó smachtbhannaí eile a thaifeadadh mar ioncam diúltach ar feadh thréimhse an chreata ilbhliantúil reatha. Is eisceacht é sin ón toirmeasc ar ioncam diúltach, atá teoranta don chás sonrach neamh-intuartha seo.
Gan dochar do na sainchumais faoi seach, comhaontaíonn Parlaimint na hEorpa, an Chomhairle agus an Coimisiún, agus an taithí a fuarthas roimhe seo agus na forbairtí a bhfuiltear ag súil leo amach anseo á gcur i gcuntas, scrúdú a dhéanamh ar réiteach inbhuanaithe fadtéarmach, i gcomhréir le cur i bhfeidhm phrionsabail bhuiséadacha an Rialacháin Airgeadais, maidir leis an ús sin nó muirir eile a mhaoiniú, a mbeidh feidhm leo tar éis 2027, lena n-áirítear maidir leis an ráta úis atá le híoc ar mhéid na bhfíneálacha nó na bpionós eile atá le haisíoc mar chúiteamh leormhaith do na gnóthais is faighteoir sna cásanna sin.”
“Aithníonn Parlaimint na hEorpa, an Chomhairle agus an Coimisiún (‘na trí Institiúid’) an tábhacht a bhaineann le cosaint leasanna airgeadais an Aontais a fheabhsú mar a aithnítear i gComhaontú Idirinstitiúideach (‘IIA’) an 16 Nollaig 2020 agus mar a leagtar amach in Airteagal 325 CFAE.
Comhaontaíonn na trí Institiúid gur gá an uirlis a fhorbairt tuilleadh i gcomhréir le rialacha slándála TF agus cosanta sonraí. D’fhonn an t-ualach riaracháin a laghdú agus costais dhíréireacha TF do na Ballstáit agus do na húsáideoirí eile a sheachaint, cuirfear córais fhormheasta atá bunaithe sna Ballstáit i gcuntas.
Geallann na trí Institiúid go n-oibreoidh siad i gcomhar le chéile chun an uirlis a fhorbairt tuilleadh. Deimhníonn an Coimisiún go leanfaidh sé de bheith ag forbairt na huirlise i gcomhairle lena húsáideoirí agus de thacaíocht a chur ar fáil do na Ballstáit chun aghaidh a thabhairt ar aon cheisteanna teicniúla. Oibreoidh na Ballstáit i gcomhar leis an gCoimisiún chun na sineirgí is gá a chumasú don idir-inoibritheacht le córais agus bunachair sonraí TF ábhartha.
Tar éis don Choimisiún measúnú a dhéanamh lena mbunaítear ullmhacht na huirlise bunaithe ar na critéir dá dtagraítear in Airteagal 36(6) den Rialachán Airgeadais, geallann na trí Institiúid, gan dochar dá n-inniúlachtaí faoi seach, go ndéanfaidh siad scrúdú agus plé arís ar úsáid éigeantach na huirlise le linn an chreata airgeadais ilbhliantúil iar-2027.”
“I gcomhthéacs an ullmhúcháin don chreat airgeadais ilbhliantúil tar éis 2027, scrúdóidh an Coimisiún an cheist maidir le raon feidhme na leithreasuithe a chomhfhreagraíonn do shaoradh ó ghealltanais a chur ar fáil arís. Tá an méid sin gan dochar don togra ón gCoimisiún a bheidh ann amach anseo maidir leis an gcreat airgeadais ilbhliantúil tar éis 2027 agus do cheart an Choimisiúin maidir le tionscnamh reachtach, mar a bhunaítear sna Conarthaí.”
“Aithníonn an Coimisiún Eorpach a thábhachtaí atá sé an t ualach riaracháin ar údaráis na mBallstát a íoslaghdú i gcomhthéacs leathnú spriocdhírithe an Chórais Luathbhraite agus Eisiaimh (EDES) chuig an mbainistíocht chomhroinnte agus chuig an mbainistíocht dhíreach leis na Ballstáit.
Tá an Coimisiún tiomanta do threoir chuimsitheach a fhorbairt agus seisiúin oiliúna a thairiscint do na Ballstáit maidir le cur chun feidhme EDES agus maidir le húsáid a bhunachair sonraí.
Leanfaidh an Coimisiún d’fheabhas a chur ar bhunachar sonraí EDES, mar shampla trí chuardaigh ar níos mó ná eintiteas amháin a chumasú agus trí leagan amach an bhunachair sonraí a fheabhsú.
Déanfaidh an Coimisiún a dhícheall idir-inoibritheacht TF idir EDES agus na córais náisiúnta ábhartha a áirithiú chun an próiseas a chuíchóiriú agus chun seiceálacha níos tapúla a dhéanamh ar chásanna eisiaimh daoine nó eintiteas ábhartha.
Deimhníonn an Coimisiún nach rachaidh aon iarraidh ar fhaisnéis bhreise chun críocha EDES thar a bhfuil fíor-riachtanach agus comhréireach, agus go gcaithfear leis i gcomhréir leis na rialacha cosanta sonraí is infheidhme. Meabhraítear nár léirigh tuairim an Mhaoirseora Eorpaigh ar Chosaint Sonraí maidir leis an togra ón gCoimisiún le haghaidh athmhúnlú ar an Rialachán Airgeadais aon ábhar imní i ndáil le EDES.
Tá an Coimisiún tiomanta d’aistriú rianúil i dtreo chur i bhfeidhm EDES a éascú i gcomhar iomlán leis na Ballstáit.”