A.de bhrí gur iarr an Príomh-Ionchúisitheoir Poiblí in Düsseldorf go ndéanfaí díolúine Gunnar Beck a tharscaoileadh, Feisire a toghadh sa Ghearmáin, d’fhonn tús a chur le réamhimeachtaí i leith goid maoine ar luach íseal i gcomhar le díobháil choirp d’aon ghnó agus cur i gcoinne oifigeach forfheidhmithe dlí, de bhun ailt 242(1), 248a, 223(1), 230(1) abairt 1, 113(1) agus 53 de Chód Coiriúil na Gearmáine;

B.de bhrí, an 29 Deireadh Fómhair 2022, i siopa ilrannach in Neuss (an Ghearmáin), líomhnaíodh gur thóg Gunnar Beck roinnt samplaí de tháirgí tástálaithe ar taispeáint do chustaiméirí chun triail a bhaint astu, agus, a líomhnaítear, d’fhonn iad a thógáil leis gan íoc astu; de bhrí gur tuairiscíodh cion siopadóireachta; de bhrí gur líomhnaíodh go ndearna Gunnar Beck iarracht an t-áitreabh a fhágáil agus gur chuir na bleachtairí stórais srian air; de bhrí, ina dhiaidh sin, go ndearna oifigigh forfheidhmithe dlí idirghabháil ar an láthair agus gur líomhnaíodh nár chomhlíon Gunnar Beck a n-iarrataí gan cur ina gcoinne;

C.de bhrí nach mbaineann na cionta líomhnaithe le tuairimí a nochtadh nó vótaí a caitheadh le linn don Fheisire de Pharlaimint na hEorpa a bheith i mbun a chuid dualgas chun críocha Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh;

D.de bhrí go bhforáiltear le hAirteagal 9 de Phrótacal Uimh. 7 ar Phribhléidí agus Díolúintí an Aontais Eorpaigh go dteachtfaidh Feisirí de Pharlaimint na hEorpa, ina gcríoch náisiúnta, na díolúintí a thugtar do chomhaltaí Pharlaimint a stáit;

E.de bhrí go bhforáiltear mar seo a leanas le hAirteagal 46(2), (3) agus (4) de Dhlí Bunúsach Phoblacht Chónaidhme na Gearmáine:

‘2) I gcás gníomh atá inphionóis, ní fhéadfar Feisire a chur faoi dhliteanas ná a ghabháil ach amháin le formheas an Bundestag, mura rud é gur gabhadh é nó í i mbun gnímh nó an lá tar éis an lae a rinne sé an gníomh sin.3)Beidh formheas an Bundestag de dhíth freisin chun aon srian eile maidir le saoirse an duine a chur ar Fheisire nó chun imeachtaí a thionscnamh i gcoinne Feisire faoi Airteagal 18.4)Déanfar aon imeachtaí coiriúla agus aon nósanna imeachta de réir Airteagal 18, arna dtionscain i gcoinne Feisire, aon choinneáil nó aon srianadh eile ar a shaoirse nó a saoirse pearsanta a chur ar fionraí ar iarratas ón Bundestag.’;

F.de bhrí go rialaíonn Airteagal 192b den ‘Richtlinien für das Strafverfahren und das Bußgeldverfahren’ (Treoirlínte d’imeachtaí coiriúla agus d’imeachtaí riaracháin) díolúine Feisire de Pharlaimint na hEorpa a tharscaoileadh agus, de bhrí, go háirithe, go bhforáiltear le mír 1 an méid seo a leanas:

‘1) Einem Mitglied des Europäischen Parlaments aus der Bundesrepublik Deutschland steht die einem Abgeordneten des Deutschen Bundestages zuerkannte Immunität zu. (...)’ [Beidh Feisire de Pharlaimint na hEorpa ó Phoblacht Chónaidhme na Gearmáine i dteideal na díolúine arna deonú do chomhalta de Bundestag na Gearmáine];

G.de bhrí nach féidir le Parlaimint na hEorpa ról cúirte a ghlacadh, agus de bhrí nach féidir, i nós imeachta um dhíolúine a tharscaoileadh, Feisire a mheas mar chosantóir Breithiúnas ón gCúirt Ghinearálta an 30 Aibreán 2019, Briois v Parlaimint, T-214/18, ECLI:EU:T:2019:266;;

H.de bhrí gurb é is cuspóir do dhíolúine pharlaiminteach ná Parlaimint na hEorpa agus a Fheisirí a chosaint ar imeachtaí dlíthiúla a bhaineann le gníomhaíochtaí a dhéantar agus dualgais pharlaiminteacha á gcomhlíonadh agus nach féidir a scaradh ó na dualgais sin;

I.de bhrí nár aimsigh an Pharlaimint, sa chás seo, aon fhianaise ar fumus persecutionis, i.e. gnéithe fíorasacha lena léirítear go bhféadfadh sé a bheith mar bhunchuspóir na n-imeachtaí dlíthiúla damáiste a dhéanamh do ghníomhaíocht pholaitiúil an Fheisire agus, dá bhrí sin, do Pharlaimint na hEorpa;