P9_TA(2024)0224Talba għat-tneħħija tal-immunità ta’ Gunnar BeckDeċiżjoni tal-Parlament Ewropew tal-11 ta' April 2024 dwar it-talba għat-tneħħija tal-immunità ta’ Gunnar Beck (2023/2192(IMM))Il-Parlament Ewropew,

–wara li kkunsidra t-talba tal-Kap Prosekutur Pubbliku f’Düsseldorf għat-tneħħija tal-immunità ta’ Gunnar Beck, trażmessa permezz ta’ ittra fil-25 ta’ Lulju 2023 mill-Ministeru Federali Ġermaniż għall-Ġustizzja u l-Ħarsien tal-Konsumatur, b’rabta ma’ investigazzjoni preliminari dwar reati kriminali suspettati, u mħabbra fis-seduta plenarja tal-11 ta’ Settembru 2023,

–wara li sema’ lil Gunnar Beck, f’konformità mal-Artikolu 9(6) tar-Regoli ta’ Proċedura tiegħu,

–wara li kkunsidra l-Artikoli 8 u 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea kif ukoll l-Artikolu 6(2) tal-Att tal-20 ta’ Settembru 1976 dwar l-elezzjoni tal-Membri tal-Parlament Ewropew b’suffraġju universali dirett,

–wara li kkunsidra s-sentenzi mogħtija mill-Qorti tal-Ġustizzja tal-Unjoni Ewropea fil-21 ta’ Ottubru 2008, fid-19 ta’ Marzu 2010, fis-6 ta’ Settembru 2011, fis-17 ta’ Jannar 2013 u fid-19 ta’ Diċembru 2019 Is-sentenza tal-Qorti tal-Ġustizzja tal-21 ta’ Ottubru 2008, Marra vs De Gregorio u Clemente, C-200/07 u C‑201/07, ECLI:EU:C:2008:579; is-sentenza tal-Qorti Ġenerali tad-19 ta’ Marzu 2010, Gollnisch vs il-Parlament, T‑42/06, ECLI:EU:T:2010:102; is-sentenza tal-Qorti tal-Ġustizzja tas-6 ta’ Settembru 2011, Patriciello, C-163/10, ECLI: EU:C:2011:543; is-sentenza tal-Qorti Ġenerali tas-17 ta’ Jannar 2013, Gollnisch vs il-Parlament, T-346/11 u T-347/11, ECLI:EU:T:2013:23; is-sentenza tal-Qorti tal-Ġustizzja tad-19 ta’ Diċembru 2019, Junqueras Vies, C‑502/19, ECLI:EU:C:2019:1115.,

–wara li kkunsidra l-Artikolu 46(2), (3) u (4) tal-Liġi Bażika tar-Repubblika Federali tal-Ġermanja u l-Artikolu 192b tar-Richtlinien für das Strafverfahren und das Bußgeldverfahren (Linji Gwida għal proċedimenti kriminali u dawk dwar il-multi),

–wara li kkunsidra l-Artikolu 5(2), l-Artikolu 6(1) u l-Artikolu 9 tar-Regoli ta’ Proċedura tiegħu,

–wara li kkunsidra r-rapport tal-Kumitat għall-Affarijiet Legali (A9-0170/2024),

A.billi l-Kap Prosekutur Pubbliku f’Düsseldorf talab it-tneħħija tal-immunità ta’ Gunnar Beck, MEP elett fil-Ġermanja, bil-ħsieb li jinbdew proċedimenti preliminari għal serq ta’ proprjetà ta’ valur baxx flimkien ma’ feriti intenzjonati fuq persuna u reżistenza għall-uffiċjali tal-infurzar tal-liġi, skont it-taqsimiet 242 (1), 248a, 223 (1), 230 (1), is-sentenza 1, 113 (1) u 53 tal-Kodiċi Kriminali tal-Ġermanja;

B.billi, fid-29 ta’ Ottubru 2022 f’ċentru kummerċjali f’Neuss (il-Ġermanja), Gunnar Beck allegatament ħa xi kampjun ta’ testers li kienu għall-wiri sabiex il-klijenti jippruvawhom, allegatament bil-ħsieb li jeħodhom miegħu mingħajr ma jħallas għalihom; billi ġie rrappurtat reat ta’ serq mill-ħanut; billi Gunnar Beck allegatament ipprova jitlaq mill-bini u membri mill-persunal tal-ħanut inkarigati biex jidentifikaw serq potenzjali żammewh; billi, wara, l-uffiċjali tal-infurzar tal-liġi intervjenew fix-xena u, allegatament, Gunnar Beck ma kkonformax mat-talbiet tagħhom biex hu ma jirreżistix;

C.billi l-allegati reati ma jikkonċernawx opinjoni espressa jew vot mitfugħ minnu fil-qadi ta’ dmirijietu bħala Membru tal-Parlament Ewropew f’konformità mal-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea;

D.billi l-Artikolu 9 tal-Protokoll Nru 7 dwar Privileġġi u l-Immunitajiet tal-Unjoni Ewropea jipprevedi li l-Membri tal-Parlament Ewropew għandhom igawdu, fit-territorju tal-Istat tagħhom stess, l-immunitajiet mogħtija lill-membri tal-parlament tagħhom;

E.billi l-Artikolu 46(2), (3) u (4) tal-Liġi Bażika tar-Repubblika Federali tal-Ġermanja jipprevedi dan li ġej:

“2) Membru ma jistax jinżamm responsabbli jew inkella arrestat għal reat kastigabbli mingħajr il-permess tal-Bundestag, sakemm ma jinqabadx fil-fatt iwettaq ir-reat jew inkella l-għada.3)Il-permess tal-Bundestag għandu jkun meħtieġ ukoll għal kwalunkwe restrizzjoni oħra tal-libertà tal-persuna tal-Membru jew biex jinbdew proċedimenti kontra Membru skont l-Artikolu 18.4)Kwalunkwe proċediment kriminali jew proċediment skont l-Artikolu 18 kontra Membru u kwalunkwe detenzjoni jew restrizzjoni oħra tal-libertà tal-persuna tiegħu għandhom jiġu sospiżi fuq talba tal-Bundestag.”;

F.billi l-Artikolu 192b tar-Richtlinien für das Strafverfahren und das Bußgeldverfahren (Linji Gwida għal proċedimenti kriminali u dawk dwar il-multi) jirregola t-tneħħija tal-immunità ta’ Membri tal-Parlament Ewropew, u billi, b’mod partikolari, il-paragrafu 1 tiegħu jipprevedi dan li ġej:

“1) Einem Mitglied des Europäischen Parlaments aus der Bundesrepublik Deutschland steht die einem Abgeordneten des Deutschen Bundestages zuerkannte Immunität zu. (...)” [Membru tal-Parlament Ewropew mir-Repubblika Federali tal-Ġermanja għandu jkun intitolat għall-immunità mogħtija lil membru tal-Bundestag Ġermaniż];

G.billi, minn naħa, il-Parlament ma jistax jitqies bħala qorti u, min-naħa l-oħra, il-Membru ma jistax, fil-kuntest ta’ proċedura għat-tneħħija tal-immunità, jitqies bħala “akkużat” Is-sentenza tal-Qorti Ġenerali tat-30 ta’ April 2019, Briois vs il-Parlament, T-214/18, ECLI:EU:T:2019:266.;

H.billi l-għan tal-immunità parlamentari huwa li tipproteġi lill-Parlament u lill-Membri tiegħu minn proċedimenti legali relatati ma’ attivitajiet imwettqa fil-qadi tad-dmirijiet parlamentari u li huma inseparabbli minn dawn l-attivitajiet;

I.billi, f’dan il-każ, il-Parlament ma sab l-ebda evidenza tal-eżistenza ta’ fumus persecutionis, jiġifieri elementi fattwali li jindikaw li l-intenzjoni sottostanti tal-proċediment legali tista’ tkun ta’ ħsara għall-attività politika tal-Membru u għalhekk tal-Parlament Ewropew;

1.Jiddeċiedi li jneħħi l-immunità ta’ Gunnar Beck;

2.Jagħti istruzzjonijiet lill-President tiegħu biex tgħaddi minnufih din id-deċiżjoni u r-rapport tal-kumitat responsabbli tiegħu lill-awtorità kompetenti tar-Repubblika Federali tal-Ġermanja u lil Gunnar Beck.