1.Jinnota b’apprezzament li l-isforzi ta’ monitoraġġ tal-baġit, matul is-sena finanzjarja 2022, irriżultaw f’implimentazzjoni tal-baġit b’rata tal-approprjazzjonijiet ta’ impenn tas-sena attwali ta’ 99,95 %, li meta mqabbla mal-2021 tirrappreżenta tnaqqis ċkejken ta’ 0,04 %; jinnota, barra minn hekk, li r-rata ta’ eżekuzzjoni tal-approprjazzjonijiet ta’ pagament tas-sena attwali kienet ta’ 89,77 %, li meta mqabbla mal-2021 tirrappreżenta żieda ta’ 0,92 %;

2.Jinnota li nuqqas ta’ riżorsi u pożizzjonijiet għall-awtoritajiet regolatorji tal-prodotti għall-protezzjoni tal-pjanti jirriżulta f’dewmien għall-approvazzjoni ta’ sustanzi attivi b’riskju baxx u għall-aġġornament tal-metodoloġiji ta’ valutazzjoni skont l-iżviluppi xjentifiċi, li jnaqqsu l-impatt ambjentali tal-prodotti għall-protezzjoni tal-pjanti fit-tul; jistieden lill-Kummissjoni tieħu passi xierqa biex tiżgura li l-Awtorità jkollha biżżejjed riżorsi u pożizzjonijiet biex tappoġġja lill-Istati Membri ħalli jilħqu l-iskadenzi tagħhom kif stabbilit fir-Regolament (KE) Nru 1107/2009, tirdoppja l-ammont ta’ valutazzjonijiet ta’ sustanzi attivi għal prodotti għall-protezzjoni tal-pjanti kull sena u tittriplika l-ħeffa li biha tiżviluppa l-metodoloġiji biex il-valutazzjonijiet tar-riskju jinżammu aġġornati mal-aħħar żviluppi xjentifiċi u f’konformità mal-aspettattivi tas-soċjetà;

3.Jilqa’ l-kontribut tal-Awtorità għas-sikurezza tal-katina tal-ikel u tal-għalf tal-Unjoni, kif ukoll l-isforzi konsiderevoli tagħha biex tipprovdi konsulenza xjentifika komprensiva, indipendenti u aġġornata dwar kwistjonijiet marbuta mal-katina tal-ikel lill-maniġers tar-riskju, tikkomunika b’mod ċar lill-pubbliku l-outputs tagħha, u l-informazzjoni li huma bbażati fuqha, u tikkoopera ma’ partijiet interessati u sħab istituzzjonali bil-għan li tippromwovi l-koerenza u l-fiduċja fis-sistema tas-sikurezza tal-ikel;

4.Jinnota b’sodisfazzjon li l-Awtorità implimentat qafas ta’ prestazzjoni integrat li jgħaqqad ir-riżorsi u l-attivitajiet mal-outputs u r-riżultati mistennija, ikkomplementat minn sett ta’ indikaturi ewlenin tal-prestazzjoni (KPIs) biex timmonitorja u tixpruna l-prestazzjoni; jinnota, barra minn hekk, li l-prestazzjoni mqabbla mal-miri stabbiliti fil-Qafas ta’ Prestazzjoni laħqet rata ġenerali ta’ 96 %; josserva li l-oqsma tal-Objettiv Strateġiku 2 (L-iżgurar tat-tħejjija għall-ħtiġijiet futuri tal-analiżi tar-riskju) u l-Objettiv Strateġiku 3 (L-għoti tas-setgħa lin-nies u l-iżgurar tal-aġilità organizzattiva), kellhom prestazzjoni tajba b’mod ġenerali, filwaqt li l-qasam tal-Objettiv Strateġiku 1 (“L-Għoti ta’ Pariri Xjentifiċi Affidabbli u Komunikazzjoni dwar ir-Riskji ta’ “mill-Għalqa sal-Platt””), affettwat ħafna mill-implimentazzjoni ta’ regoli u proċeduri ġodda skont ir-Regolament (UE) 2019/1381 Ir-Regolament (UE) 2019/1381 tal-Parlament Ewropew u tal-Kunsill tal-20 ta’ Ġunju 2019 dwar it-trasparenza u s-sostenibbiltà tal-valutazzjoni tar-riskju tal-UE fil-katina alimentari u li jemenda r-Regolament (KE) Nru 178/2002, (KE) Nru 1829/2003, (KE) Nru 1831/2003, (KE) Nru 2065/2003, (KE) Nru 1935/2004, (KE) Nru 1331/2008, (KE) Nru 1107/2009, (UE) 2015/2283 u d-Direttiva 2001/18/KE (ĠU L 231, 6.9.2019, p. 1)., kien iddevja mill-mira;

5.Jenfasizza li l-Awtorità ffinalizzat 586 mistoqsija xjentifika mis-701 mistoqsija fil-mira rigward l-Objettiv 1: “L-Għoti ta’ Pariri Xjentifiċi Affidabbli u Komunikazzjoni dwar ir-Riskji ta’ “mill-Għalqa sal-Platt””; jinnota li minkejja li l-għadd ta’ mistoqsijiet xjentifiċi magħluqa kien inqas minn dak imbassar, ġeneralment kien daqs il-mistoqsijiet li daħlu ġodda li waslu matul is-sena, u b’hekk żgura li l-ammont ta’ mistoqsijiet miftuħa ma żdiedx;

6.Jilqa’ l-fatt li l-qasam tal-komunikazzjoni tas-sejbiet irreġistra riżultati pożittivi ħafna, bil-puntwalità tal-pubblikazzjoni fil-Ġurnal tal-Awtorità li żżomm il-prestazzjoni pożittiva miksuba matul l-aħħar sentejn;

7.Jieħu nota li l-2022 immarkat l-ewwel sena tal-implimentazzjoni tal-Istrateġija 2027; l-Istrateġija 2027, imfassla bħala evoluzzjoni tal-Istrateġija 2020, hija ffukata fuq l-implimentazzjoni tar-Regolament (UE) 2019/1381 (fuq terminu qasir) u tħejji lill-Awtorità biex tindirizza politiki ġodda tal-Unjoni li qed jevolvu (fuq terminu itwal);

8.Jilqa’ l-organizzazzjoni tal-Awtorità ta’ “ONE Conference - Health, Environment, Society” (Konferenza ONE - Saħħa, Ambjent, Soċjetà) f’Ġunju 2022, li tenfasizza r-rabta bejn is-saħħa tal-bniedem, tal-annimali u dik ambjentali u li twassalna għal “saħħa waħda-ambjent wieħed”;

9.Jinnota li l-Awtorità nediet kampanja dwar id-Deni tal-Ħnieżer Afrikan fi sħubija ma’ 18-il Stat Membru; jinnota wkoll li l-Awtorità tat kontribut għall-ħolqien u l-implimentazzjoni tal-Istrateġija tal-UE dwar is-Sustanzi Kimiċi;

10.Jinnota li, skont l-Istħarriġ Annwali tal-Istrateġija mniedi mill-Awtorità fejn talbet feedback mingħand il-klijenti, is-sħab u l-partijiet ikkonċernati tagħha li huma involuti direttament jew indirettament fl-għoti tal-opinjonijiet xjentifiċi tal-Awtorità, il-kapaċità tal-Awtorità li tipprovdi l-pariri tagħha f’waqthom tibqa’ tingħata attenzjoni;

11.Josserva li l-Awtorità ilha tikkollabora mal-Awtorità Ewropea għas-Sustanzi Kimiċi, fil-kuntest tal-Istrateġija l-ġdida tal-Unjoni dwar is-Sustanzi Kimiċi, u maċ-Ċentru Ewropew għall-Prevenzjoni u l-Kontroll tal-Mard biex tiżviluppa sistemi għall-ġbir u l-analiżi tas-sekwenzjar ġenomiku; jinnota, barra minn hekk, li l-Awtorità qasmet ir-riżorsi umani u r-riżorsi tar-riċerka mal-Aġenziji Aħwa u maċ-Ċentru Konġunt tar-Riċerka; jenfasizza wkoll il-benefiċċji orizzontali ta’ ħidma flimkien u l-adattament tal-aħjar prattiki;

12.Jinnota li l-Awtorità żiedet l-isforzi tagħha fl-2022 biex tikkonsolida l-implimentazzjoni ta’ proċessi u għodod tal-IT ġodda, filwaqt li ppruvat tikseb livell għoli ta’ effiċjenza u timmassimizza s-sinerġiji ma’ aġenziji oħra; jinnota wkoll li wħud mir-riżultati tal-Awtorità rigward l-effiċjenza u l-kisbiet fl-għodod tal-IT meħuda fl-2020-2022 ma kinux fil-mira sa tmiem l-2023;

13.Jilqa’ l-intenzjoni tal-Awtorità li ssaħħaħ il-ġestjoni konġunta tad-data mal-Istati Membri u ma’ aġenziji oħra sabiex ittejjeb il-kwalità u l-interoperabbiltà tad-data (f’konformità mal-approċċ Saħħa Waħda);

14.Jinnota li, fil-31 ta’ Diċembru 2022, it-tabella tal-persunal kellha rata ta’ implimentazzjoni ta’ 95,55 %, b’5 uffiċjali u 382 aġent temporanju maħtura mit-total ta’ 405 pożizzjonijiet awtorizzati fl-ambitu tal-baġit tal-Unjoni (meta mqabbla ma’ 380 pożizzjoni awtorizzati fl-2021); jinnota li, barra minn hekk, 170 aġent kuntrattwali u 14-il espert nazzjonali sekondat kienu qed jaħdmu għall-Awtorità fl-2022; jinnota, barra minn hekk, li sabiex jiġi implimentat ir-Regolament (UE) 2019/1381, l-Awtorità ngħatat 31 pożizzjoni ġdida tal-persunal fl-2022, u 15-il aġent kuntrattwali (AK) addizzjonali għall-perjodu 2022-2024;

15.Jieħu nota li fl-2022 inkiseb bilanċ bejn il-ġeneri fi ħdan il-persunal ġenerali tal-Awtorità, b’335 minn 557 (60,1 %) li huma nisa u fi ħdan il-bord ta’ ġestjoni tal-Awtorità b’37 minn 70 (52,9 %) li huma nisa; josserva li f’pożizzjonijiet superjuri u maniġerjali, hemm proporzjon ogħla ta’ pożizzjonijiet okkupati mill-irġiel (63 %) meta mqabbla man-nisa (37 %); jistieden lill-Awtorità tintensifika l-isforzi biex tnaqqas id-distakk bejn il-ġeneri f’pożizzjonijiet superjuri u maniġerjali;

16.Jieħu nota li s-servizz mediku rrapporta tliet każijiet ta’ eżawriment fl-2022; jenfasizza l-importanza kritika li jinżamm l-ekwilibriju bejn ir-responsabbiltajiet professjonali u l-ħajja personali; jistieden lill-Awtorità tkompli tippromwovi bilanċ tajjeb bejn ix-xogħol u l-ħajja privata fost il-persunal;

17.Jinnota li l-Awtorità hija impenjata bil-valuri tan-Network tal-Aġenziji tal-UE u l-Karta dwar id-Diversità u l-Inklużjoni, u qed taħdem għall-adozzjoni malajr kemm jista’ jkun; jinnota wkoll il-parteċipazzjoni tal-Awtorità fil-Grupp ta’ Ħidma tan-Network tal-Aġenziji tal-UE dwar id-Diversità u l-Inklużjoni permezz tal-kondiviżjoni tas-sinerġiji, l-informazzjoni u r-riżorsi rigward id-diversità u l-inklużjoni; barra minn hekk, ġew implimentati xi inizjattivi interni, bħal sit web ġdid dwar il-karrieri u filmat dwar il-ħidma fl-Awtorità, b’suġġett speċjali dwar id-diversità u l-inklużjoni;

18.Josserva li l-Awtorità adottat il-Linji Gwida għall-Implimentazzjoni tal-Għajnuna għall-Persuni b’Diżabilità li jippromwovu l-politika soċjali u t-trattament ugwali fuq il-post tax-xogħol; jinnota, barra minn hekk, li l-bini tal-Awtorità ġie ppjanat f’konformità mar-Regolamenti dwar l-Aċċessibbiltà Taljani għall-persuni b’diżabilità;

19.Jinnota li struttura organizzattiva ġdida mfassla biex tappoġġja l-implimentazzjoni tar-Regolament (UE) 2019/1381 u l-ambizzjonijiet tal-Istrateġija 2027 tal-Awtorità ġiet implimentata mill-1 ta’ Jannar 2022;

20.Jinnota li l-bord maniġerjali u l-maniġment operattiv tal-Awtorità ffirmaw Dikjarazzjoni ta’ Kunflitt ta’ Interess u li din hija ppubblikata u disponibbli fis-sit web; jinnota wkoll li s-CVs tal-membri u l-membri supplenti tal-bord ta’ ġestjoni kellhom jiġu ppubblikati sa tmiem l-2023;

21.Josserva li fl-2022 l-Awtorità identifikat u mmaniġġjat seba’ kunflitti ta’ interess fil-livell ta’ dikjarazzjonijiet ta’ interess annwali li jappartjenu għal esperti esterni; jinnota li l-Awtorità żammithom milli jipparteċipaw fl-attività xjentifika;

22.Jirrikonoxxi li l-Awtorità għandha fis-seħħ kodiċi ta’ kondotta volontarju li skontu l-membri tal-bord ta’ ġestjoni jobbligaw lilhom infushom jikkomunikaw lill-Awtorità l-attivitajiet okkupazzjonali mwettqa fi żmien sentejn wara t-tmiem tal-mandat tagħhom;

23.Jieħu nota li l-Awtorità qed tippjana li tadotta proċedura standard ġdida ta’ wara l-impjieg sal-ewwel trimestru tal-Q1/2024, li tkun tinkludi l-kriterji u l-proċedura biex jitwaqqaf l-aċċess għal informazzjoni kunfidenzjali għall-persunal li jitlaq mis-servizz, ir-rekwiżiti ta’ monitoraġġ u implimentazzjoni, u l-istandards ta’ trasparenza;

24.Jinnota li l-Awtorità għandha fis-seħħ strateġija kontra l-frodi, żviluppata f’kooperazzjoni mill-qrib mal-Uffiċċju Ewropew Kontra l-Frodi, akkumpanjata minn regoli ta’ implimentazzjoni relatati u pjan ta’ azzjoni biex tipprevjeni l-frodi u l-korruzzjoni;

25.Josserva li f’Ġunju 2022 is-Servizz tal-Awditjar Intern (IAS) ħareġ ir-rapport tal-awditjar dwar is-sigurtà tal-informazzjoni u l-irkupru minn diżastri, bl-għan li jivvaluta l-adegwatezza tat-tfassil u l-implimentazzjoni tal-governanza, u identifika żewġ osservazzjonijiet u tliet osservazzjonijiet importanti dwar il-Governanza tas-Sigurtà tal-IT; jinnota li l-Awtorità aċċettat ir-rakkomandazzjonijiet tal-IAS u bħalissa qed timplimenta pjan ta’ azzjoni;

26.Jilqa’ l-isforzi tal-Awtorità biex iżżid il-viżibbiltà pubblika u l-preżenza online tagħha permezz tat-tnedija tal-kampanja “#EUChooseSafeFood” għat-tieni sena, imwettqa fi sħubija mal-awtoritajiet kompetenti tal-Istati Membri, bl-għan li tispjega x-xjenza wara s-sigurtà fl-ikel fl-Unjoni b’mod aċċessibbli, u l-organizzazzjoni tal-Konferenza “ONE – Saħħa, Ambjent, Soċjetà” fi sħubija mal-erba’ aġenziji l-oħra tal-Kumitat ENVI, li wasslu għat-tnedija ta’ kont ta’ Instagram konġunt imsejjaħ “Ambjent Wieħed Saħħa Waħda”; jinnota wkoll li l-Awtorità investiet biex tagħmel is-sit web tagħha multilingwi, bl-intelliġenza artifiċjali permezz tal-widget tal-eTranslation tal-Kummissjoni; jinnota, barra minn hekk, li fl-2022 l-Awtorità kompliet tinvesti fl-iżvilupp tal-portal “OpenEFSA” tagħha, skont ir-rekwiżiti tar-Regolament (UE) 2019/1381;

27.Jilqa’ l-fatt li għal dawn l-aħħar ftit snin l-Awtorità kienet waħda mill-aġenziji ċċertifikati tal-EMAS; jieħu nota li, skont it-tip ta’ xiri, l-Awtorità tapplika standards ta’ “Akkwist Pubbliku Ekoloġiku (APE)” bħala rekwiżiti minimi għall-ispeċifikazzjoni tal-offerta fil-kriterji tas-selezzjoni u/jew tal-għoti;

28.Jirreferi, rigward kummenti oħrajn ta’ natura orizzontali li jakkumpanjaw id-deċiżjoni tiegħu dwar il-kwittanza, għar-riżoluzzjoni tiegħu tal-11 ta’ April 2024 Testi adottati, P9_TA(2024)0280. dwar il-prestazzjoni, il-ġestjoni finanzjarja u l-kontroll tal-aġenziji.