Tá cogadh foghach na Rúise i gcoinne na hÚcráine ag cur isteach ar shlabhraí soláthair a bhí ann cheana. Tá an tAontas ag tabhairt tacaíochta don Úcráin chun gur féidir an gnáthshreabhadh gráin agus earraí eile a atosú, go háirithe trí na Lánaí Dlúthpháirtíochta, agus chun a chinntiú gur féidir na honnmhairí gráin a gceann scríbe a bhaint amach, mar shampla, go háirithe, i dtríú margaí, chun tacú leis an tslándáil bia ar fud an domhain.
Tá an Coimisiún tiomanta do thacaíocht a thabhairt don Úcráin agus, an tráth céanna, leas tháirgeoirí gráin an Aontais a chaomhnú agus feidhmiú cuí an mhargaidh gráin san Aontas a chinntiú.
I bhfianaise a thábhachtaí atá táirgeadh gráin agus margaí gráin, tabharfaidh an Coimisiún aird ar leith ar fhaireachán a dhéanamh ar allmhairí gráin, go háirithe cruithneacht, agus go sonrach an dlús allmhairí den chineál sin sna Ballstáit atá comharsanach don Úcráin. San idirphlé tráthrialta a dhéanann an Coimisiún leis an Úcráin, tabharfaidh sé aghaidh ar aon saincheist a thiocfaidh chun solais de bharr an fhaireacháin. Meabhraíonn an Coimisiún gur féidir allmhairí ón Úcráin a bheith faoi réir faireachais faoi Chaibidil IV de Rialachán (AE) 2015/478 ó Pharlaimint na hEorpa agus ón gComhairle an 11 Márta 2015 maidir le comhrialacha d’allmhairí, rialacha is féidir a bheith i bhfoirm ceadúnaithe allmhairiúcháin, má tá baol ann go ndéanfaidh an treocht in allmhairí díobháil do tháirgeoirí an Aontais agus má theastaíonn sin de réir leasanna an Aontais. I ndáil leis an méid sin, úsáidfidh an Coimisiún na huirlisí atá ar fáil dó de réir mar is gá. Leanfaidh an Coimisiún ag tuairisciú go tráthrialta do na Ballstáit maidir le torthaí an idirphlé thráthrialta leis an Úcráin.
I gcás táirgí a chumhdaítear le bearta trádála uathrialacha, meabhraíonn an Coimisiún go bhforáiltear leis an Rialachán freisin maidir le sásra coimirce treisithe. Den chéad uair, tá an deis tugtha isteach ag an gCoimisiún ar an sásra sin a ghníomhachtú i gcás éifeachtaí díobhálacha ar mhargadh Ballstáit amháin nó roinnt Ballstát agus tá sé réidh sin a dhéanamh, agus ní hamháin ar mhargadh an Aontais ina iomláine. I ndáil leis an méid sin, bainfidh an Coimisiún leas iomlán as a chumhachtaí an sásra coimirce treisithe le haghaidh allmhairí cruithneachta ón Úcráin a thionscnamh ex officio.
Meabhraíonn an Coimisiún gur ghlac sé bearta in 2022 agus in 2023 chun tacú le feirmeoirí na hEorpa i ngach Ballstát, go háirithe sna Ballstáit atá comharsanach leis an Úcráin.
Na bearta is gá, faoi Airteagal 29 den Chomhaontú Comhlachais, chun tabhairt faoi léirscaoileadh cómhalartach taraifí, deimhníonn an Coimisiún go ndéanfaidh sé na bearta sin, trí chomhairliúcháin leis an Úcráin, a luaithe a ghlacfaidh na comhreachtóirí na bearta trádála uathrialacha nua.
Oibreoidh an Coimisiún i ndlúthchomhar le Parlaimint na hEorpa agus coinneoidh sé ar an eolas í maidir le dul chun cinn na gcomhairliúchán sin leis an Úcráin. Tabharfaidh an Coimisiún aird chuí ar bharúlacha Pharlaimint na hEorpa ina leith sin.
Tugann an Coimisiún chun cuimhne nach fasach le haghaidh clásail athbhreithniúcháin in aon chomhaontú eile atá sna módúlachtaí oibre sin, agus nach n-imíonn siad ó Airteagal 218 CFAE.
Cuirfidh toradh an phróisis sin cinnteacht eacnamaíoch agus trádáil chobhsaí ar fáil don Úcráin agus don Aontas araon, sin agus d’fheirmeoirí agus gnólachtaí. Céim thábhachtach a bheidh ann freisin i dtaobh an Úcráin a atógáil, agus í a chomhtháthú níos mó i margadh inmheánach an Aontais, rud is cuid d’aontú na tíre sin don Aontas amach anseo.’