1.ag aontú leis an gCoimisiún go bhfuil na coinníollacha a leagtar amach in Airteagal 4(2), pointe (a), de Rialachán CED comhlíonta agus go bhfuil an Danmhairg i dteideal EUR 1 882 212 de ranníocaíocht airgeadais a fháil faoin Rialachán sin, arb ionann í agus 60 % den chostas iomlán de EUR 3 137 021, a chuimsíonn EUR 2 878 001 de chaiteachas ar sheirbhísí pearsantaithe agus EUR 259 020 de chaiteachas ar ghníomhaíochtaí ullmhúcháin, bainistíochta, faisnéise agus poiblíochta, rialaithe agus tuairiscithe;

2.ag tabhairt dá haire gur thíolaic údaráis na Danmhairge an t-iarratas an 6 Nollaig 2023, agus, tar éis don Danmhairg faisnéis bhreise a sholáthar, gur chuir an Coimisiún bailchríoch ar a mheasúnú an 29 Feabhra 2024 agus gur thug sé fógra do Pharlaimint na hEorpa faoi an lá céanna;

3.ag tabhairt dá haire go mbaineann an t-iarratas le 751 oibrí iomarcacha a ndearna dúnadh sheamlas Danish Crown in Sæby difear dóibh; ag tabhairt dá haire, thairis sin, go mbeidh 390 oibrí iomarcacha san iomlán ina dtairbhithe spriocdhírithe agus go bhfuiltear ag dréim leis go nglacfaidh siad páirt sna bearta;

4.ag tabhairt dá haire go bhfuil leibhéil ísle cáilíochtaí foirmiúla ag formhór na n-oibrithe (46 %) nó cáilíochtaí agus scileanna atá réasúnta as dáta acu (40 %); ag tabhairt dá haire gur de chúlra imirceach iad 305 (41 %) na n-oibrithe iomarcacha agus nach bhfuil siad líofa sa Danmhairgis; moltar sa phacáiste CED freisin bearta maidir le hinniúlachtaí ginearálta a fheabhsú, lena n-áirítear feabhas a chur ar scileanna teanga sa Danmhairgis;

5.á chur in iúl gur geal léi gur dhréachtaigh an Danmhairg an pacáiste comhordaithe de sheirbhísí pearsantaithe i gcomhairle le tairbhithe a bhfuiltear ag díriú orthu, lena n-ionadaithe foirne agus lena gcomhpháirtithe sóisialta;

6.á mheabhrú gurb é atá sna seirbhísí pearsantaithe atá le soláthar d’oibrithe agus do dhaoine féinfhostaithe ná na gníomhaíochtaí seo a leanas: spreagadh, coinneáil, oiliúint maidir le hinniúlachtaí ginearálta, oiliúint maidir le huas-sciliú/athsciliú, agus liúntas oiliúna/liúntas um chuardach poist;

7.á chur in iúl gur geal go mór leis gur tarraingíodh suas tairiscintí oiliúna agus roinnt staidéar á mbreithniú, amhail Jobbarometer 2023 (anailís ar riachtanais saothair áitiúla i mBardais Frederikshavn, Hjørring, Jammerbugt agus Brønderslev), Cothromaíocht Dhébhliantúil an Mhargaidh Saothair a sholáthraíonn forbhreathnú ar fholúntais phoist fhéideartha, agus anailís FremKom4 ar scileanna, agus gurb é is aidhm dó cur le hinniúlachtaí ginearálta (lena n-áirítear inniúlachtaí teanga agus uimhearthachta), inniúlachtaí digiteacha agus feabhas a chur scileanna le haghaidh poist a bhfuil ganntanas scileanna ann ina leith;

8.á chur i bhfáth go háirithe a thábhachtaí atá Airteagal 7(2) de Rialachán CED, lena gceanglaítear go mbeidh pacáiste comhordaithe ann chun na peirspictíochtaí agus na scileanna riachtanacha sa mhargadh saothair amach anseo a réamh-mheas, ar nithe iad atá i gcomhréir leis an aistriú i dtreo geilleagar atá inbhuanaithe agus éifeachtúil ó thaobh acmhainní de agus lena ndíreofar go háirithe ar leathadh na scileanna a theastaíonn sa ré dhigiteach thionsclaíoch;

9.ag tabhairt dá haire gur thosaigh an Danmhairg seirbhísí pearsantaithe a chur ar fáil do na tairbhithe a bhfuiltear ag díriú orthu an 16 Deireadh Fómhair 2023 agus go mbeidh, dá bhrí sin, tréimhse na hincháilitheachta le haghaidh ranníocaíocht airgeadais ó CED ón 16 Deireadh Fómhair 2023 go ceann 24 mhí tar éis theacht i bhfeidhm an chinnidh maoiniúcháin;

10.ag tabhairt dá haire gur thosaigh an Danmhairg ar chaiteachas a thabhú chun CED a chur chun feidhme an 1 Meitheamh 2023, agus go mbeidh an caiteachas le haghaidh gníomhaíochtaí ullmhúcháin, bainistíochta, faisnéise agus poiblíochta, rialaithe agus tuairiscithe incháilithe dá bhrí sin le haghaidh ranníocaíocht airgeadais ó CED ón 1 Meitheamh 2023 go ceann 31 mhí tar éis theacht i bhfeidhm an chinnidh maoiniúcháin;

11.á chur i bhfáth gur dhearbhaigh údaráis na Danmhairge nach bhfaigheann na gníomhaíochtaí incháilithe cúnamh ó chistí nó ionstraimí airgeadais eile an Aontais, agus go n-urramófar prionsabail na córa comhionainne agus an neamh-idirdhealaithe maidir le rochtain ar na gníomhaíochtaí atá beartaithe agus maidir lena gcur chun feidhme;

12.á athdhearbhú nach mór nach dtiocfaidh ranníocaíocht airgeadais ó CED in ionad gníomhaíochtaí a bhfuil na cuideachtaí freagrach astu, de bhua an dlí náisiúnta nó comhaontuithe comhchoiteanna, nó aon cheann de liúntais nó cearta oibrithe iomarcacha, chun breisíocht iomlán an leithdháilte a áirithiú;

13.ag formheas an chinnidh a ghabhann leis an rún seo;

14.á threorú dá hUachtarán an cinneadh a shíniú in éineacht le hUachtarán na Comhairle agus a shocrú go ndéanfar é a fhoilsiú in Iris Oifigiúil an Aontais Eorpaigh;

15.á threorú dá hUachtarán an rún seo, mar aon leis an iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.